Anania nu Safira
5
1 Tondo muntu umozi wamanagwa Anania, nu mukikulu wage amanagwa Safira, akunzizie isoa lyage. 2 Eidangide nkindi za bikulo byamonine wenyene nu endile n'engo nkindi ku basingwa, nu mukikulu wage abumenyine. 3 Petro amubuzizie bunee: “Anania, kubuni Satana eizazia mutima wobe ku kabamba ka kwengelela Muuza Wasililila nu kwibikila kyindi kya bikulo byobe biwamonine ku isoa lyobe? 4 Galyabezagile talikunzwa, ndi talyabezagile lyobe? Aba galyasilile kukunzwa, ndi bikulo tabyabezagile ku bwangato bwobe? Kubuni kuwakengede mu mutima wobe kukita bubuno? Ntwekela bantu buza, tondo Kalaga uguweka buza.” 5 Nu gongule Anania ku moki mamo agwede gansi nu akule. Bansania gabongule ku musagu wozo baganineganine nu bakule boba nunse. 6 Beiyambali bamugondile na nsulu, kusila bamwekile kumbuga nu bamuyikile. 7 Nu kumbusa kwa nkungu isatu mukikulu wage eingide mu numba nu ntamenyine kikizi kyabede. 8 Petro amubuzizie bunee: “Ntende, ndi mwakunzizie isoa lilyo ku bubo bukunza?” Nu akwide bunee: “Ee, ku bubo bukunza.” 9 Petro amubwide bunee: “Kubuni kumwagomezie kulindika Muuza wa Mukota? Lola, masindi ma bantu bendaga kuyika iba wobe mu nsinda beseli kalazi ku mwingilo nu bakukweka nu uwe.” 10 Kazanga kongo agwede ku magulu mage nu akule. Beiyambali beingide nu bamusangile akua; bamwekile nu bamuyikile bwigi na iba wage. 11 Nu boba bunene bwabede ku bantu ba kanisa kansania nu ku bansania bongule ku bitondo bibyo.
12 Basingwa bakitaga migeleko mingi nu miganogano mingi munkatini mwa bantu. Nu babo bansania bakundamenne na mutima umozi ku lusu lwa Solomono. 13 Takuli aba muntu wagelekile kugomia nabo, tondo bantu babaganwine nunse. 14 Nu babo bakatizizie Mukota, bamulume nu bakikulu, bitide nunse kuba beingi. 15 Nu balingile kweka basambi mu nzila: bababikaga ga migu nu ga bikala buno ndi Petro es'atinga, kilimelime kyage nti kinavwama konia bamozi kubeli. 16 Bantu beingi bavule lubilo kutuka ku miino za bwigi na Yerusalema; bavule na basambi nu bantu babezaga bakubabazibwa na basumbu, nu bansania bonezibwe.
Kusungibwa kwa Basingwa
17 Sankoga munene nu bansania babezaga nage, babo ba ku lulenge lwa baSadukayo babede na lugi ku basingwa; 18 nu bakatile basingwa nu kubabika mu kikando. 19 Tondo mu kindi, mwanzelo wa Mukota eigwide nibi za kikando nu abasizie basingwa nu abatendile bunee: 20 “Endazi mwemane ku numba za kukumbamina nu kubasambalila bunsania bwa kalamo kakano.” 21 Nu basingwa gabongule ku bubo, beingide mu numba nnene za kukumbamina, nindunindu nu beigisizie.
Sankoga munene nu babo babezaga nabo bakundamanizie bakulu bansania ba baYuda nu bakalile lwango, nu basingile bantu kutola basingwa ku kikando. 22 Tondo gabasile balangi ku numba za kikando, tababamonineko. Basubizie nu balolesizie bibyo bitondo lwabusio lwa nibi. 23 Nu batendile bunee: “Twasangile kikando kyakandwa busoga nunse, nu balangi babezaga lwabusio lwa nibi tondo gatwasilile kwigula tatwamonine ku muntu wampa mu numba za kikando.” 24 Gabede mukota wa balangi ba numba za kukumbamina nu basankoga bongwa ku bitondo bibino tabamenyine bubekita nu buni bwabe kuzinda kwa bubuno. 25 Kusila, muntu umozi avule nu abatendile bunee: “Ungwililazi! Bantu bamwabikagile ku kikando beli mu numba za kukumbamina nu bakwigisia bantu.” 26 Mukota wa balangi endile na bantu bage nu bavule lingo na basingwa. Tondo kuteli ku magala, kubuno bakule boba buno bantu banavwa kubalibula makozi.
27 Nu gabavule nabo, bababikile lwabusio lwa ngatu nu Sankoga munene nu abalondozizie. 28 Abatendile bunee: “Ndi tatwamuzugide nunse buno tamwigisie lingo ku izina lya wozo muntu. Lolazi, bumwasila kukukya Yerusalema na meigisia meinyu, mukutunda kubika kabamba ka lukuo lwage kutuli.” 29 Petro nu basingwa bakwide bunee: “Twatunganana kwanza Kalaga kutinga kwanza bantu. 30 Kalaga wakumbaminaga batateiswe ba kulinga ayukizie Yesu kutuka ku bakuzi, u mwitaga nu kumutaka ku musalaba. 31 Kalaga asakikile wono ku kuboko kwage kwa seidume nu amubikile Mukota nu Monia buno kikanga kya baIsraeli kiyanie nu kusigililwa ku misako za bwagi bwabo. 32 Nu iswe tuli balongeki ba bitondo bibino gamozi na Muuza Wasililila wakasenne Kalaga ku babo bakumwanza, tuli balongeki ba bitondo bibino.”
33 Nu gongule balongeki ku bitondo bibyo, bongilwe nunse nu batundile kwita basingwa. 34 Tondo munkatini mwabo mwabezaga muFarisayo umozi wamanagwa Gamalieli, abezaga ngatu za milembe nu wanzagwa na bantu bansania. Emanukile munkatini mwa ngatu nu atendile bunee: “Babasiazi tanga kumbuga.” 35 Kusila atendile ku bantu bunee: “Bamulume ba Israeli, idangazi na bumukulonda kukitila bantu babano. 36 Kuse kwatinga tugu bindi bikeke, Teuda abasile, nu abezaga akwitenda buno eli muntu munene, nu bantu bwigi na nkama inazi bamuyangile. Tondo geitilwe, bantu bansania bamuyangaga babalangenne nu takwasigede wampa. 37 Kumbusa kwage, nkungu za kusanza bantu, Yuda wa ku Galilaya abasile nu we. Nu alubikanizie bantu buno bamuyange. Tondo we eitilwe nu bantu bamuyangaga babalangenne. 38 Kano kaluma nkumutenda buno tamuyangane na bantu babano, mubasige bende. Kubuno ndi bulongeki bwabo aba mulimo wabo watukile ku bantu nti wakue. 39 Tondo ndi lebelebe bukutuka ku Kalaga kasi tamunavwama kubwita. Mwidange buno munavwa kuba anga bakwitana na Kalaga!” 40 Balongeki ba lwango beitabizizie bwatendaga Gamalieli. Bamanine basingwa, babasuswide na tususula, nu babazugide buno tabeigisie lingo ku izina lya Yesu, nu babasigile buno beiyendele. 41 Basingwa batukile mu lusu na mbogimbogi kubuno Kalaga abakengede buno batunganana kusungibwa ku kabamba k'izina lya Yesu. 42 Nu busi na busi, mu numba nnene za kukumbamina nu mu numba zabo tabasigile kusambala Musagu Musoga wa Yesu u Kristo.