Bantu Mutubakamo Basombwedwe Kukasia Basingwa
6
1 Mu nkungu zezo beigisibwa babezaga bakwitila kuba beingi nu babo baYuda batendaga kiGriki babezaga na manungunungu ku baYuda batendaga kiEbrania nu batendile buno misigala zabo zikwibililagwa busi na busi ku bibyo bibabeganagia. 2 Nu babo basingwa ikumi nu babili bakundamanizizie beigisibwa bansania nu babatendile bunee: “Tabwatunganana kusiga kwigisia idagi lya Kalaga nu kukita mulimo w'idia. 3 Ku bubo, mibuto zeitu, sombolazi munkatini mweinyu bantu mutubakamo bakulumbibwa ku busoga nu beiyala na Muuza Wasililila nu na menge nu tubabike ku wono mulimo. 4 Nu iswe twakokomezie kusega, nu kusambala Musagu Musoga.” 5 Musanganano unsania watananizizibwe na mamo moki. Basombwede Stefano, muntu wiyala na bukatizio nu na Muuza Wasililila, nu Filipo, Porokoro, Nikanora, Timoni, Permena, nu Nikolao muntu umozi wa Antiokia wagalukile kuyanga meigisia ma baYuda. 6 Bababikile lwabusio lwa basingwa nu babikile maboko gantata gabo nu kubasegela. 7 Idagi lya Kalaga lyitide nunse. Nu maganzo ma beigisibwa mitide nunse mu Yerusalema nu basankoga beingi bakatizizie nu bo.
Kukatwa kwa Stefano
8 Stefano, abezaga na magala ku kabamba ka mponga za Kalaga, akitaga miganogano minene nu migeleko munkatini mwa bantu. 9 Tondo bamulume bamozi balingile kukita kazege na Stefano: Bamozi babezaga ba numba za misanganano zamanagwa bunee: “Numba za bakandulwa,” mwabezaga baYuda batukile ku Kurene, nu ku Alesanduria, nu bango bamozi ba baYuda ba ku Kilikia nu ba mu mwino wa Asia. Bakananizanizie na Stefano. 10 Tondo tabavwamine kumukinda, kubuno atendile na menge mamukasaga Muuza Wasililila. 11 Balutile bango bantu kusongela Stefano buza bunee: “Tungule wono muntu alinga Musa nu Kalaga!” 12 Batulanizie bantu, bakulu nu bakota ba milembe. Kusila bakatile Stefano nu bamwekile lwabusio lwa lusu lunene. 13 Bavule na bantu bamwekaga buza bunee: “Wono muntu ntakusiga kutenda bubi ku kabamba ka milembe za Musa nu kiziki kyasililila. 14 Tungule akutenda buno Yesu wa Nazareti eite numba za kukumbamina nu agalukye nkita zeitu zitwakasilwe na Musa.” 15 Bansania babezaga beikile gansi mu lusu lwa lwango balolile Stefano kisozi nu bamonine buno kilungi kyage kyabezaga kyasusania anga kya mwanzelo.