Meigisia ma Yoana Mututiki
3
1 Ku mwaka w'ikumi n'itano wa kwangata kwa Tiberio Kaisari; nu Pontio Pilato abezaga mwangati wa Yudea, nu Herode mwangati wa Galilaya, nu muto wage Filipo mwangati wa Iturea, nu wa kisi kya Tarakoniti, nu Lisania mwangati wa kisi kya Abilene, 2 nu Ana nu Kayafa babezaga basankoga banene, idagi lya Kalaga lyabasile ku Yoana mwana wa Zakaria mu kalula. 3 Nu endile mu kisi kinsania mu ntungo za Yordani, asambalaga kututikwa kwa kwiyania ku isigililo lya bwagi; 4 anga bwasanzilwe mu mukanda wa mulengania Isaya bunee: “Iyuki lya muntu likulaluka mu kalula,
Kungazi nzila za Mukota,
Isanania nzila zage za kutinga.
5 Na mpinga na mpinga zizazibwe,
Nu na mwiduko na mwiduko usigulizibwe
Nu nzila zatimba zisananibwe
6 Nu bansania beli na mubili bakamona ku lonio lwa
Kalaga.” a
7 Nu we abwide musanganano wavule kututikwa nage bunee: “Inyuwe kikanga kya nzoka, nazi wamusambalide buno, mubembuke bongoa bukavwa? 8 Kolamazi biguma bikulolesia kwiyania, nu tamulinge kutenda mu mitima zeinyu bunee: ‘Tuli na Tateiswe Abrahamu’ kubuno nkumutenda buno mu makozi mamano, Kalaga anavwama kubasizia Abrahamu bana. 9 Kano kaluma isaga lyabikwa gansina ga miti: na muti unsania utakolama biguma bisoga, nti waseswe nu kwiswa mu keiya.”
10 Nu musanganano wamubuzizie bunee: “Umpanga, buni butwatunganana kukita?” 11 Nu abakwide bunee: “Wozo uli na nsulu ibili, akase wozo uteli na kampa; nu wozo uli n'idia akite nu we bubo.” 12 Nu baligia ba kodi bavule kweli buno batutikwe, nu bamubwide bunee: “Musozi, buni butwatunganana kukita?” 13 Nu abakwide bunee: “Tamusege kampa kutinga bumwakakizizibwe.” 14 Nu bakoloboyo nu bo bamubuzizie bunee: “Nu iswe, tukite buni?” Nu abakwide bunee: “Tamunyage bikulo bya muntu ku magala aba kumukandika bitondo, lingo mubogeboge na lukalilo lweinyu lumukuligagwa.”
15 Nu bantu bansania babezaga bakulindila nu bakengelaga mu mitima zabo buno embe Yoana u Kristo. 16 Nu Yoana akwide bansania bunee: “Nne nkumututika mu mazi; tondo umozi avwe, wozo wantinga magala, nu nsyakuka kukandula mizigi za bisalapata byage. We, amututike mu Muuza Wasililila nu na keiya. 17 Eli na lweli lwage mu kuboko kwage, We engie mulungu wage, nu akundamanie ngano mu kigenge kyage, tondo agisie mpepa mu keiya katakuzimaga.”
18 Nu ku mango mano meingi, Yoana asambalide bantu musagu musoga; 19 tondo mukota Herode azugidwe na Yoana ku kabamba ka kusonga Herodia, mukazi wa muto wage Filipo, nu ku kabamba ka ingo mibi insania zaakitaga, 20 atalikide bubuno lingo gantata ga bibyo bitondo binsania, akandile Yoana mu kikando.
Kututikwa kwa Yesu
21 Gabede bantu bansania basila kututikwa, Yesu nu We atutikilwe; nu gaabezaga akusega, igulu lyakandwidwe, 22 nu Muuza Wasililila agelile gantata gage ku kisusania kya mubili anga nkulimba, nu iyuki lyatukile mwigulu lyatendile bunee: “Uwe uli Mwana wane mutundwa, wantananizia.”
Kibuti kya Yesu Kristo
23 Nu gabede Yesu wenyene eseli bwigi na myaka makumi masatu, alingile mulimo wage wa kwigisia nu bamukengelede buno eli mwana wa Yosefu, mwana wa Eli, 24 mwana wa Matati, mwana wa Lawi, mwana wa Melki, mwana wa Yanai, mwana wa Yosefu, 25 mwana wa Matatia, mwana wa Amosi, mwana wa Nahumu, mwana wa Esili, mwana wa Nage, 26 mwana wa Mati, mwana wa Matatia, mwana wa Simei, mwana wa Yosefu, mwana wa Yuda, 27 mwana wa Yoana, mwana wa Resa, mwana wa Zerubabeli, mwana wa Sealtieli, mwana wa Neri, 28 mwana wa Melki, mwana wa Adi, mwana wa Kosamu, mwana wa Elmadamu, mwana wa Eri, 29 mwana wa Yose, mwana wa Eliezeri, mwana wa Yorimu, mwana wa Matata, mwana wa Lawi, 30 mwana wa Simeoni, mwana wa Yuda, mwana wa Yosefu, mwana wa Yonamu, mwana wa Eliakimu, 31 mwana wa Melea, mwana wa Mena, mwana wa Matata, mwana wa Natani, mwana wa Davidi, 32 mwana wa Yese, mwana wa Obedi, mwana wa Boazi, mwana wa Salmoni, mwana wa Nasoni, 33 mwana wa Aminadabu, mwana wa Aramu, mwana wa Hezironi, mwana wa Perezi, mwana wa Yuda, 34 mwana wa Yakobo, mwana wa Isaka, mwana wa Abrahamu, mwana wa Tera, mwana wa Nahori, 35 mwana wa Serugu, mwana wa Reu, mwana wa Pelegi, mwana wa Eberi, mwana wa Sela, 36 mwana wa Kainana, mwana wa Arfaksadi, mwana wa Semu, mwana wa Noa, mwana wa Lameki, 37 mwana wa Metusaeli, mwana wa Enoke, mwana wa Yaredi, mwana wa Mahalaleli, mwana wa Kenani, 38 mwana wa Enosi, mwana wa Seti, mwana wa Adamu, mwana wa Kalaga.