3
1 Nu atendile lingo bunee: “Lolazi, nasinge mugenzi wane. Nu we alongeke nzila lwabusio lwane: nu mwitangale buno Mukota u mukulonda asasie kuvwa ku kiziki kyage kya kukumbamina; nu mugenzi w'idagano u mukutunda, lolazi, avwa.” u bukutenda Yehowa, Mwiya Mayombo. 2 “Tondo nazi wavwame kwikalila busi bwa kuvwa kwage? Nazi wemane ku nkungu za kumoneka kwage? Kubuno, we eli anga keiya ka kwengia, nu anga sabuni za kwengia nunse. 3 Eikale anga muntu ukwengia feza nu kuzisuga: asuge kibuti kya Lawi nu kukyengia anga olo nu feza, nubo bakase Yehowa bisansa anga bwatananina. 4 Mu nkungu zezo kisansa kya Yuda nu Yerusalema kyatananizie Yehowa, anga bwabezaga ku bindi nu myaka za wakalazi. 5 Nu nne namukunde buno nimusungie; nu nasasie kusongela bagila, nu bitazi, nu babo bakulumbila bya buza, nu babo batakuliga mukiti lukalilo lwage, babo bakubabazia misigala nu nkubi, nu babo bakunyaga mugeni, tondo babo batakunkua boba,” u bukutenda Yehowa, Mwiya Mayombo. 6 “Ku buno nne Yehowa nsikugaluka; ukinsa tamwazikile, ee bana ba Yakobo. 7 Kutukila ku bindi bya basoinyu mwendile bulazi na makakizio mane, aba tamwamalangile. Subyazi kundi, nu Nne nasubye kumuli,” u bukutenda Yehowa, Mwiya Mayombo.
“Tondo inyuwe mukubuzia bunee: ‘Buni butwasubye?’
8 Muntu, ndi aneibila Kalaga? Tondo inyuwe mukunibila.
Mukumbuzia bunee: ‘Buni butukukwibila?’
Ku nkaso nu kyindi ky'ikumi. 9 Mwaswililwa na kiswililo, aba nu kilongo kikino kinsania, kubuno mukunibila. 10 Vwazi na kyindi ky'ikumi nu kukibika ga kigenge, bikazi idia mu numba zane; mundindike ku bibyo kano kaluma, ndi nsyamwigulile miingilo za mwigulu, nu kumubikila mponga ningi, aaba nu kiziki kyakuka kuzilanga takyamoneke,” u bukutenda Yehowa, Mwiya Mayombo. 11 “Nu nne nazugile butwazi ku kabamba keinyu mu masoa meinyu, aba muti wa biguma tawakolokye biguma lwabusio lwa matubulo,” u bukutenda Yehowa, Mwiya Mayombo. 12 “Bantu ba bilongo binsania batende bunee: ‘Mbogimbogi kumuli,’ kubuno mwabe kisi kyakutananizia,” u bukutenda Yehowa, Mwiya Mayombo.
13 Yehowa akuntenda bunee: “Moki meinyu mabezaga makali kundi.
Tondo mukubuzia bunee: ‘Twatendile bitondo bikizi kuguli?’
14 Mwatendile bunee: ‘Buli bulia kukitila Kalaga, nu twamwonine mutali mukizi gatwalangile makakizio mage, nu kwenda na kabebe lwabusio lwa Yehowa, Mwiya Mayombo? 15 Kano kaluma tukumona ku bantu beli na lwikotio, bakukita bubi beli na kalamo kasoga; nu bakulindika Kalaga bakonibwa.’”
16 Nu bakwaga Yehowa boba batendenne gamozi. Yehowa abongwilide. Kigondi kya mukanda wa kakengelezio wasanzilwe lwabusio lwage, ku kabamba ka babo bakukua Yehowa boba, nu bakuganuna izina lyage. 17 Nu Yehowa, Mwiya Mayombo atenda bunee: “Babano babe bantu bane nkungu zezo zinakate bikulo byane; nu nabasigilile anga bukusigililaga muntu mwana wage ukumukitilaga. 18 Mukamona bwengukana gasamba muntu wisanana nu muntu mubi, nu muntu ukukitila Kalaga nu wozo utakumukitila.”