Yesus nompakau sampulu rombaꞌa anaguruna mompatolele Kareba Belo
9
Yesus nompokio sampulu rombaꞌa anaguruna pade niwaina ka ira kuasa mompopalai seta-seta pade mompakabelo juꞌa-juꞌa.
2 Pade nipakauna ira malau mompakabelo tau to najuꞌa pade mompatolele Kareba Belo to nanguli Pue Alatala nompamulamo noparenta ewa sambaꞌa magau.
3 Yesus nombatagi ira, “Neꞌe manggeni bara nuapa-nuapa riara mpolumako komi. Neꞌe manggeni lembau bara batutu, bara manggeni baku, bara manggeni doi, bara manggeni rontonga baju.
4 Ane komi marata ri saongu ngata pade maria pue njapo mompopesai komi, petoꞌomo komi ri setu sampe komi malai nggari ngata etu.
5 Pade ri umba-umba komi daꞌa ratarima ntau, sapunaimo sowu nggari kadamu tempo komi malai ala majadi popatora ka tau ri setu ira kana rasuku Alatala.”
6 Naopu etu nalaimo anaguru Yesus nalau nompebutu ngata mompatolele Kareba Belo, pade mompakabelo tau to najuꞌa ri umba-umba.
Magau Herodes naingu
7 Tempona Magau Herodes Antipas nangepe tesa ewa nuapa to nipowia Yesus riara poparentana ri Galilea, naingumo iꞌa, sabana naria tau to nanguli, “Tau eꞌi kakonona Yohanes Topediu to natuwu bali nggari kamatena.”
8 Naria woꞌu to nanguli, “Iꞌa nabi Elia neumba bali.” Pade tau to santanina nanguli, “Iꞌa sambaꞌa nabi nggaolu to natuwu bali.”
9 Tapi nangulimo i Herodes, “Nipakaukumo tau nombatompo balengga Yohanes bopia. Jadi tau eꞌi, isema kakonona Iꞌa? Nadeamo tesa niepeku ewa Iꞌa.” Etu sampe i Herodes nangelo jala ala mosirata ka Yesus.
Yesus nompakoni limanjobu mbaꞌa tau
10 Sangga nanjilipa anaguru-anaguru Yesus notesamo ira ka Iꞌa ewa pura-pura nuapa to nipowia ira. Naopu etu Yesus nanggeni ira sampulu rombaꞌa nalau nompatani ri saongu ngata to nosanga ka ngata Betsaida.
11 Tapi tempo tau dea nangginjani patuju Yesus, ira pura-pura nantuki Iꞌa. Pade ri tatongo jala ri setu Yesus nantarima ira pade nompatuduki ka ira tesa ewa Poparenta nu Alatala. Pade nipakabelona woꞌu tau-tau to najuꞌana ri setu.
12 Tempo ntora mawengimo naratamo anaguru Yesus sampulu rombaꞌa etu nanguli ka Iꞌa, “Guru, agina tau dea etu rapakau matingguli ala ira mamala malau mangelo panggoni ante petoꞌo rapaturu ira, apa petoꞌota eꞌi nakalinoa.”
13 Tapi nangulimo Yesus ka ira, “Komi mompakoni ira.”
Nesonomo anaguruna etu, “To naria ri jaꞌi kami aga limaongu roti bo rombaꞌa bau. Etu daꞌa magana ratibo ka ira ane kita daꞌa malau mangoli mpakadea panggoni.”
14 (Kadea ira ri setu kira-kira limanjobu mbaꞌa langgai.)
Tapi nangulimo Yesus ka anaguruna, “Pakaumo ira etu mekatoko kira-kira limampulu mbaꞌana sampetoꞌo.”
15 Pade nipowia anaguru Yesus nuapa to niulina ka ira. Nipakau ira pura-pura tau etu nekatoko.
16 Naopu etu Yesus nangala limaongu roti bo rombaꞌa bau etu, pade nantingoa langi nosambaya nanguli tarima kasi ri jaꞌi Alatala. Pade nibingga-binggana roti ante bau etu pade niwaina ka anaguruna nombatibo-tibo ka tau dea.
17 Ira pura-pura nanggoni sampe nabosu. Pade anaguruna nompasiromu labi panggoni to nabolina, naponupa sampulu rotonda.
Petrus nompangaku Yesus Magau to Mompakasalama to nijanji Alatala
18 Naria sanggani Yesus nosambaya njambaꞌana, anaguru-anaguruna daꞌa nakawao ante Iꞌa. Naopu Iꞌa nosambaya Yesus nompekutana ira, “Nantuki tesa ntodea, isema Aku eꞌi?”
19 Nesonomo ira, “Naria to nanguli Komi Yohanes Topediu to natuwu bali. Naria woꞌu sanu nanguli Komi nabi Elia to neumba bali. Pade naria woꞌu to nanguli bara Komi sambaꞌa nabi nggaolu to natuwu bali.”
20 Pade Yesus nekutana sangganipa, “Tapi nantuki pombarata komi, isema Aku eꞌi?”
Nesonomo i Petrus, “Komi Magau to Mompakasalama to nijanji Alatala!”
Yesus nombaboto kamatena banepia
21 Naopu i Petrus nompangaku etu Yesus nombatagi ira, “Neꞌe mpuꞌu rauli etu ka isema-sema!
22 Aku, Ana nu Manusia kana rapandasa mpuꞌu pade Aku rapoara totuꞌa-totuꞌa nto Yahudi ante balengga-balengga topanggeni agama bo guru-guru agama. Aku kana rapatesi pade ri eo katolueona Aku kana matuwu bali.”
23 Naopu etu niulina ka pura-pura tau ri setu, “Isema-sema madota majadi topantuki Aku iꞌa kana mombakabasaka dotana mboto, pade eo-eo iꞌa kana masadia mantuki Aku nau sampe mamate rapaku ri kayu parika.
24 Sabana isema-sema daꞌa masadia mantuki Aku nau sampe mamate iꞌa daꞌa mombarata katuwua mabelo sampe ri kasae-saena. Tapi isema-sema mombakabasaka pura-pura dota rarana pade mantuki Aku nau sampe rapatesi, iꞌa kana mombarata katuwua mabelo sampe ri kasae-saena.
25 Natantumo daꞌa ria gunana ane sambaꞌa tau mombarata pura-pura nuapa to naria ri dunia tapi daꞌa masalama, aga rasuku sampe ri kasae-saena ri naraka.
26 Isema-sema maeya mompangaku Aku pade tesaku, Aku woꞌu kana maeya mompangaku iꞌa tempona Aku manjili ri dunia. Tempo etu Aku kana marata ante kuasa bo remeku mosanggani-nggani ante kuasa bo reme Umaku Pue Alatala ante malaeka-malaeka to nagasana.
27 Tapi toramo! Mana masaeka etu majadi! Naria bara sakuya mbaꞌa ri tatongo komi eꞌi daꞌapa mamate ane daꞌapa rakita ira Pue Alatala mompamula moparenta.”
Yesus nipakareme Alatala ri bunggu nu bulu
28 Kira-kira walumbengi kaliuna Yesus nombawai pepatuduki etu ka ira, Iꞌa nanggeni i Petrus, Yohanes ante Yakobus nalau nantende ri saongu buluna mosambaya ka Alatala.
29 Tempo Yesus danosambaya nabalimo lenjena pade bajuna najadi nabula nenggila sanggani.
30 Tempona etu naratamo tau rombaꞌa notesa ante Iꞌa, etumo i Musa ante Elia, nabi Alatala nggaolu.
31 Ira rombaꞌa nompopokita koro ira riara reme nggari suruga. Pade ira notesa ewa kamate Yesus to majadi ri ngata Yerusalem.
32 Tempona etu i Petrus bo rombaꞌa roana nangantu mpuꞌu sampe ira napisi. Tempo ira nembangu nikita ira reme Yesus ante rombaꞌa tau nenggore ri setu nosanggani ante Iꞌa.
33 Tempo tau rombaꞌa etu nompamula nompalasi Yesus nangulimo i Petrus ka Iꞌa, “Guru, nasana mpuꞌu kami ri seꞌi. Nabelopa kami mompowia toluongu pakumpa ri seꞌi, saongu ka Komi, saongu ka i Musa pade saongu ka Elia.” Tapi daꞌa ninjani i Petrus nuapa nitesana etu sabana daꞌa nanoto rarana nanggita kajadia paneꞌa.
34 Tempo i Petrus danotesa naratamo kulimu nombabungu ira pura-pura, pade naekamo ira sabana ira nibungu kulimu.
35 Pade nggariara kulimu etu naria suara nanguli, “Eꞌimo Anaku to nipelisiku. Epe komimo tesana!”
36 Sangga nalino suara etu, nikita ira damo Yesus njambaꞌana ri setu. Nompamula nggari tempona etu ira tolumbaꞌa nomboli riara ntaꞌi ira kajadia etu. Daꞌapa ira madota motesa ka sambaꞌa tau ewa nuapa to nikita ira.
Yesus nompakabelo sambaꞌa kabilasa to nipesua seta
37 Kaeona mpadondo notuamo Yesus ante anaguruna nggari buluna etu. Narata ri kadelena nadea tau narata ri jaꞌi Yesus.
38 Naria sambaꞌa langgai nggari tatongo ntau dea etu nongare ka Yesus, “Guru! Tulungi kita ka aku ruru anaku, anaku aga sambaꞌana lau.
39 Ane nesuamo seta ri jaꞌina iꞌa kaliu-liu nongare pade korona nolalete sampe ngangana nawura. Seta etu daꞌa ria nalai-lai nompandasa ngana etu. Nasae pade iꞌa nesuwu nggari jaꞌina.
40 Niperapiku ka anaguru-anaguru Komi mompopalai seta etu, tapi daꞌa nipakule ira.”
41 Nangepe etu nangulimo Yesus ka tau ri setu, “Iwenu tanu komi? Komimo tanu tau mpuꞌu-mpuꞌu daꞌa nomparasaya pade topesapuaka! Sakuyapa kasaena Aku kana mosanggani ante komi pade mosabara ri jaꞌi komi?” Naopu etu nangulimo Yesus ka uma ngana to najuꞌana etu, “Keni wemaimo anamu!”
42 Tempona ngana etu nolumako mpaka ri jaꞌi Yesus, nidungganaka nu setamo iꞌa pade korona nokalalete-lete. Tapi Yesus nompopalai seta pade nompakabelo ngana etu nggari juꞌana. Sangga nabelopa ngana etu niwaina ka umanamo.
43 Nanggita kabete kabaraka Alatala etu, nasumara mpuꞌumo pura-pura tau ri setu.
Yesus nombaboto woꞌumo kamatena banepia
Tempona tau danasumarapa nanggita pura-pura nuapa to nikawia Yesus, nangulimo Iꞌa ka anaguru-anaguruna,
44 “Pariara mpakabelo-belo nuapa to niuliku eꞌi. Kana marata tempona Aku, Ana nu Manusia kana rawai ka baliku.”
45 Tapi anaguru-anaguru Yesus etu daꞌa nangginjani nuapa batuana to nitesana etu. Batua nu tesa etu danitabuniaka ka ira sampe daꞌapa ninjani ira. Pade daꞌa nabia ira nompekutana batuana ri jaꞌina.
Anaguru-anaguru Yesus nosinggarau isemana to neliu nggalanga katuwuna
46 Pade nompamulamo anaguru-anaguru Yesus nosinggarau mbotomo bara isema nggari jaꞌi ira etu to neliu nggalanga katuwuna.
47 Yesus nangginjani pompekiri ira. Jadi nialana sambaꞌa ngana nggedi pade nipopekanggorena ri sinjorina ri setu.
48 Pade niulina ka ira, “Isema-sema to mantarima sambaꞌa ngana sabana iꞌa topomparasaya Aku, etu batuana iꞌa woꞌu mantarima Aku. Pade isema-sema mantarima Aku iꞌa woꞌu mantarima Alatala to nompakau Aku. Jadi isema nggari jaꞌi komi pura-pura eꞌi to naede katuwuna iꞌamo to neliu nggalanga katuwuna riara mpanggita Alatala.”
Tau daꞌa nangewa komi iꞌa roa komi
49 Naopu etu nangulimo Yohanes ka Yesus, “Guru, kami nanggita sambaꞌa tau nompopalai seta ante kuasa nggari sanga Komi. Tau etu nitagi kami sabana iꞌa daꞌa topantuki kita.”
50 Tapi nanguli Yesus ka iꞌa, “Neꞌe komi mombatagi iꞌa, sabana isema daꞌa nangewa komi iꞌa roa komi.”
Yesus daꞌa nitarima ri saongu ngata ri Bagia Samaria
51 Tempona namosumo ntoana Yesus meore mpaka ri suruga Iꞌa nompakatantu polumakona kana malau mpaka ri ngata Yerusalem.
52 Pade nipakauna tau mokolu ka Iꞌa ala mompakasadia mpengaya-ngaya ka Iꞌa. Jadi nalaumo ira pade nesua riara saongu ngata nto Samaria.
53 Tapi pue ngata etu daꞌa nadota nantarima Yesus sabana ninjani ira patujuna malau mpaka ri ngata Yerusalem.
54 Sangga ninjani Yakobus bo Yohanes pue ngata etu daꞌa madota mantarima Yesus, nangulimo ira ka Iꞌa, “Pue, ane rapodota Komi, raperapi kami apu nggari langi manaꞌu mompalabu tau-tau eꞌi.”
55 Tapi Yesus nompeili ira rombaꞌa pade nanggarau ira.
56 Naopu etu nalaimo ira mpaka ri ngata to santanina.
Tau-tau to madota majadi topantuki Yesus
57 Tempo Yesus ante anaguruna nompapola polumako ira naria sambaꞌa tau nanguli ka Iꞌa, “Ri umba-umba rakalau Komi aku kana mantuki Komi!”
58 Nangulimo Yesus ka iꞌa, “Asulako naria bolona rapaturuna bo tonji naria jumuna, tapi Aku, Ana nu Manusia daꞌa ria petoꞌo kupaturu.”
59 Pade nanguli woꞌumo Yesus ka sambaꞌa tau ntanina, “Kamaimo, tukimo Aku!”
Tapi nesonomo tau etu, “Pue, paloga ntanimo ruru aku manjili mombatana umaku. Naopu etu pade aku momai mantuki Komi.”
60 Tapi nangulimo Yesus ka iꞌa, “Waikamo tau-tau to namate mombatana tau to namatena. Komi kana malau mpaka ri umba-umba mompatolele Kareba Belo ewa Poparenta nu Alatala.”
61 Naria woꞌu sambaꞌa tau ntanina nanguli ka Yesus, “Aku kana mantuki Komi, Pue, tapi paloga ntani ruru aku malau mopasabi ka kami saongu njapo.”
62 Tapi nangulimo Yesus ka iꞌa, “Ane komi mopajeko naoso nakampeili, etu daꞌa nabelo. Waꞌa woꞌu ante topantuki Aku. Ane iꞌa kana mombatora nuapa to nipalasina daꞌa masipato iꞌa rapake riara Poparenta nu Alatala.”