Yesus nompakau pitumpulu mbaꞌa topantuki Iꞌa manggeni Kareba Belo
10
Naopu etu Yesus nompelisi pitumpulu mbaꞌa topantuki Iꞌa ntanina. Ira pitumpulu mbaꞌana etu nipakauna rombaꞌa-rombaꞌa sanjala mokolu ka Iꞌa mpaka ri pura-pura ngata to rakalauna.
2 Niulina ka ira, “Nadea tau madota mantarima Kareba Belo. Ira nasimbayu ante pae to natasamo. Mamalamo rakato. Pae rakato nadea mpuꞌu, tapi tau topokato daꞌa nadea. Sabana etu komi kana merapi ka Pue ntinalu ala Iꞌa mompakau tau malau mokato.
3 Kalaumo komi weꞌi-weꞌi, tapi pakabelo-belo. Aku mompakau komi mpaka ri tatongo ntau to najaꞌa. Komi nasimbayu ka ana nu bimba nipopalai ri tatongo asulako.
4 Neꞌe komi manggeni doi bara batutu rapomboli baku bara sapatu ropasa. Naganamo sapasa. Neꞌe komi motesa masae ante tau raposirata komi ri jala.
5 Ane komi mesua ri sapo ntau kana rauli ntani ruru, ‘Tabe, perapi Pue mombagane komi saongu njapo.’
6 Ane maria ira riara njapo etu to madota mantarima rasi bo belo etu, Alatala kana mombawai ka ira rasi bo belo madea. Tapi ane daꞌa ria to madota mantarima etu, Alatala daꞌa mombawai ka ira rasi bo belo etu.
7 Ri umba sapo to mantarima komi, petoꞌomo komi ri setu. Neꞌe komi molinja-linja nggari sapo etu. Konimo bo inumo nuapa-nuapa to rawai pue njapo ka komi, sabana tau nokarajaa masipato mantarima gajina.
8 Ane komi mesua ri saongu ngata pade komi ratarima pue ngata ante nabelo, konimo panggoni nuapa-nuapa to rawai ira ka komi ri setu.
9 Pakabelomo tau najuꞌa ri ngata etu pade uli ka ira, ‘Nompamulamo Alatala noparenta ri tatongo komi pura-pura.’
10 Tapi ane komi mesua ri saongu ngata pade daꞌa ratarima pue ngata ri setu, kalaumo komi ri jala jama rara ngata etu pade pongaremo komi iweꞌi:
11 ‘Sowu eꞌi nggari ngata komi nentaka ri kada kami. Rasapunai kami ri ngayo komi ewa tandaina komi kana rasuku banepia. Tapi toramo! Namosumo tempo Alatala mompamula moparenta ewa magau.’”
12 Pade nangulimo Yesus ka ira pitumpulu mbaꞌa, “Toramo! Tempo Pue Alatala mombatangara pura-pura manusia banepiana, neliu nggandasapa tau-tau etu pade pue ngata Sodom to najaꞌana mpuꞌu.”
Yesus nangontiaka tau-tau daꞌa nomparasaya Iꞌa
13 Nanguli woꞌumo Yesus, “Umba komi, pue ngata Khorazim! Mandasa mpuꞌumo komi banepia! Pade mandasa woꞌu komi to netoꞌo ri ngata Betsaida! Sabana ane rapana kabaraka-kabaraka to nikawiaku ri ngata komi kukawia ri ngata Tirus bo Sidon, natantu nasaemo ira tau-tau daꞌa to Yahudi kana majea nggari silaka ira. Nasaemo ira kana mopakea karu pade mombadika sowu ri balengga ira ewa tandaina nanjoso raramo ira mompekiri powia ira to najaꞌana. Kabaraka-kabarakaku nikita komi tau to Yahudi, tapi komi daꞌa najea.
14 Jadi tempo Pue Alatala mombatangara manusia banepia, pombasuku komi meliu nggatomo nggari pombasuku pue ngata Tirus bo Sidon.
15 Pade komi pue ngata Kapernaum, komi nompekiri bara komi etu raore mpaka ri suruga! Tapi etu daꞌa ntoto nakono! Komi kana ratajiaka riara naraka!”
16 Pade nangulimo Yesus ka pitumpulu mbaꞌa topantuki Iꞌa, “Isema-sema to nangepe tesa komi, etu nasimbayu ewa ira nangepe tesaku. Isema-sema daꞌa nantarima komi ira daꞌa nantarima Aku. Pade isema-sema daꞌa nantarima Aku ira woꞌu daꞌa nantarima Pue Alatala to nompakau Aku.”
Pitumpulu mbaꞌa topantuki Yesus nanjili
17 Tempo pitumpulu mbaꞌa topantuki Yesus etu nanjili nggari polumako ira, nadamba mpuꞌu rara ira. Nangulimo ira ka Yesus, “Pue, seta-seta woꞌu natundu bo nalai tempo nipopalai kami riara sanga Komi!”
18 Nangulimo Yesus ka ira, “Nakono. Nikitaku Magau nu Seta nanawu nggari langi ewa kila.
19 Toramo eꞌi! Aku nombawai ka komi kuasa ala naupa komi mombalonggo ule bo ndorokaa daꞌa ria mokuya. Pade niwaiku woꞌu kuasa ka komi mombadagi balita, Magau nu Seta. Daꞌa ria iꞌa namala mompandasa komi.
20 Naupa iwetu neꞌe komi madamba sabana seta-seta natundu ri jaꞌi komi. Aginapa komi madamba sabana sanga komi naopu nitulisi riara buku Pue Alatala ri suruga.”
21 Tempona etu woꞌumo Nosa Nagasa nu Alatala nompakadamba rara Yesus pade Yesus nosambaya. Niulina, “Uma, Pue nu langi bo dunia, Aku mosukuru ri jaꞌimu sabana pura-pura etu nitabuniakamu nggari jaꞌi tau-tau to naria pangginjanina ante tau-tau to napandena. Tapi etu nipopokitamu ka tau-tau to naede katuwuna, sabana etumo to nipodamba raramu, Uma.”
22 Pade niuli Yesus ka tau-tau ri setu, “Mpengele-ngele niwai Umaku ka Aku. To mpuꞌu-mpuꞌu nosinjani ante Aku, Ana nu Alatala, aga Umaku Pue Alatala. Daꞌa ria tau ntanina. Pade to mpuꞌu-mpuꞌu nosinjani ante Umaku Pue Alatala aga Aku, Anana bo isema-sema kupodota mompopanjani Iꞌa ka ira.”
23 Naopu etu negolimo Yesus notesa ka anaguru-anaguruna, “Nabelo mpuꞌumo komi sabana komi nanggita pura-pura nuapa to nikawiaku.
24 Toramo! Nadea nabi ante magau nadota manggita nuapa to nikita komi weꞌi-weꞌi, tapi etu daꞌa nikita ira. Ira nadota mangepe nuapa to niepe komi weꞌi-weꞌi, tapi daꞌa ria niepe ira.”
Porapa ewa to Samaria to nabelo rarana
25 Naria sambaꞌa guru agama to Yahudi nekanggore mangelo kasala tesa Yesus. Nekutanamo iꞌa, “Guru, nuapa to masipato kupowia ala aku mamala matuwu mabelo sampe ri kasae-saena?”
26 Nesonomo Yesus, “Nuapa to nitulisi riara Atura-atura agama to nipapola i Musa? Nuapa to nibasamu ri setu?”
27 Nesonomo tau etu, “To nitulisi ri setu iweꞌi: ‘Potowemo Pue Alatalamu ante mpuꞌu-mpuꞌu raramu, ante pura-pura katuwumu, ante pura-pura karoso koromu, pade ante pura-pura pekirimu woꞌu, bo potowemo sanggamanusiamu nasimbayu ewa komi nompotowe koromu mboto.’” a
28 Nangulimo Yesus ka iꞌa, “Nawelamo pesonomu etu. Ane komi mowia iwetu, komi kana matuwu mabelo sampe ri kasae-saena.”
29 Tapi guru agama etu madota mantakono korona mboto. Jadi nekutana woꞌumo iꞌa ka Yesus, “Isema sanggamanusiaku etu?”
30 Nesonomo Yesus ante porapa eꞌi: “Naria sambaꞌa tau to Yahudi notua nggari ngata Yerusalem mpaka ri ngata Yerikho. Tempona iꞌa ri tatongo jala iꞌa nibaga parampo, pade pura-pura pakeana ante mbara-mbarana naopu niago ira. Iꞌa woꞌu niboba santongo mate pade nipalasi ira ri setu.
31 Tempona etu woꞌu naria sambaꞌa topanggeni agama to Yahudi noliu ri setu. Sangga nanggita tau etu, iꞌa neleli nombaliunaka tau etu pade napolamo.
32 Iwetu woꞌu tau to Lewi to nokarajaa ri Sapo Mpepue to noliu ri setu. Tempo iꞌa nanggita tau niboba parampo ri setu iꞌa woꞌu neleli nombaliunaka tau etu ri wiwi jala.
33 Naopu etu ri purina naria woꞌu sambaꞌa tau to Samaria noliu ri setu. Tempo iꞌa nanggita tau etu naasi mpuꞌu matana.
34 Nalaumo iꞌa ri jaꞌi ntau etu pade nipakulina bela-bela ntau etu ante lana bo ue anggur, pade niwewena bela etu ante kae. Naopu etu nionggotakana nipopesawina ri bunggu jarana pade nikenina ri sapo ntau ri jala poliu nikatonona ri setu.
35 Naeompadondo to Samaria etu nangala rompeka doi salaka niwaina ka pue njou to nipesai ira etu, pade niulina, ‘Poeru ruru tojuꞌa eꞌi. Manjili aku pade kubayari pura-pura to nipake komi mompoeru iꞌa.’”
36 Pade nipakaopu Yesus tesana ante saongu pompekutana ka guru agama etu iweꞌi: “Nantuki pombaratamu, nggari tolumbaꞌa tau etu ri umbana to nantora sanggamanusiana ri jaꞌi ntau nirampo etu?”
37 Nesonomo guru agama etu, “Tau to naasi matana nantulungi tau etu.”
Pade nangulimo Yesus, “Kau kawia komi woꞌu iwetu!”
Yesus nalau nanggita Marta bo Maria
38 Naopu etu Yesus ante anaguru-anaguruna nompapola polumako ira sampe narata ri saongu ngata. Ri setu naria sambaꞌa besi to nosanga ka i Marta nompakeni Yesus mpaka ri sapona.
39 Naria sambaꞌa sampesuwu besi i Marta, sangana i Maria. Maria etu narata nekatoko ri ngayo Yesus nangepe pepatudukina.
40 Tapi i Marta nasiwu-siwu nombatorata ira etu. Pade nalaumo iꞌa nanguli ka Yesus, “Nipekiri Komi nabelo ane aga aku njambaꞌaku nokarajaa, i Maria daꞌa? Pakaumo i Maria etu mantulungi aku mokarajaa.”