11
Sangga naopupa Yesus nompatuduki sampulu rombaꞌa anaguruna iwetu nalaimo Iꞌa nggari setu ala mompatuduki tau pade mompatolele Kareba Belo riara ngata-ngata ri bagia etu.
KAJADIA-KAJADIA RI BAGIA GALILEA TO NOMPAKANOTO YESUS MAGAU TO MOMPAKASALAMA TO NIJANJI ALATALA (11:2-12:50)
Tesa Yesus ewa Yohanes Topediu
2 Tempo etu Yohanes Topediu naria riara tarunggu. Nggari setu iꞌa nangepe lele nantesa pura-pura nuapa to nipowia Kristus. Jadi iꞌa nompakau bara sakuya mbaꞌa anaguruna malau mompekutana Yesus.
3 Niulina ka ira, “Pekutanamo ka Iꞌa iweꞌi: ‘Komi eꞌimo Magau to Mompakasalama to nijanji Alatala, bara damariapa ntanina to rapopea kami?’”
4 Sangga nangepe pompekutana etu nesonomo Yesus ka ira, “Panjilimo komi mpaka ri jaꞌi Yohanes pade uli ka iꞌa pura-pura nuapa to niepe pade nikita komi ri seꞌi.
5 Tau naburo namala nekita, tau napunggu namala nolumako, tau najuꞌa bete nipakabelo bali, tau nabongo namala neepe, tau namate nipakatuwu bali, pade Kareba Belo nggari jaꞌi Alatala nipatolele ka tau napakasi.
6 Nabelo ntotomo tau to daꞌa nokanggaura nomparasaya Aku.”
7 Sangga nanjilipa anaguru-anaguru to nipakau Yohanes etu, nompamulamo Yesus notesa ka tau dea ewa katuwu Yohanes Topediu. Niulina, “Nuapa patuju komi nalau ranggarawana bopia? Aga manggita wio niburu mpoiri gusaꞌa guseꞌi? Natantu daꞌa iwetu.
8 Jadi nuapa patuju komi malau gusetu? Ala manggita sambaꞌa tau nopakea nagaya? Natantu daꞌa woꞌu, sabana tau nopakea iwetu aga netoꞌo ri sapo magau.
9 Jadi nuapa patuju komi malau gusetu? Ala manggita sambaꞌa nabi? Nakono! Toramo! Yohanes neliu nggari nabi-nabi ntanina,
10 sabana iꞌamo to nitesa riara Buku Nagasa iweꞌi:
‘Kitamo! Aku mompakau batuaku mokolu nggari jaꞌimu,
ala iꞌa mompakasadia jala ka Komi.’” (Mal. 3:1)
11 Nanguli woꞌumo Yesus, “Aku mpuꞌu-mpuꞌu notesa ka komi, riara dunia eꞌi daꞌapa naria neumba sambaꞌa to neliu nggalanga katuwuna nggari Yohanes Topediu. Tapi tau to neliu nggaede katuwuna riara Poparenta nu Alatala iꞌamo to neliu nggalanga katuwuna nggari jaꞌi Yohanes.
12 Nggari pamula nu pokarajaa Yohanes Topediu sampe weꞌi-weꞌi todea nu Alatala niewa ntau to madota mombakuasai ira. a
13 Nompamula nggari nabi-nabi nggaolu sampe Yohanes weꞌi-weꞌi, pura-pura nabi bo tesa-tesa riara buku i Musa nombaboto tempo eꞌi.
14 Pade ane komi madota momparasaya tesa-tesa etu, Yohanes eꞌi nabi Elia to niboto mamimo nggaolu karatana.
15 Isema-sema naria talingana, epemo mpakabelo-belo tesaku eꞌi!
16 Aku motesa mompakanoto ka komi inggu tau-tau tempo weꞌi-weꞌi. Ira nasimbayu ewa ngana-ngana nekatoko ri potomu to nggari sampetoꞌona nompongare roana to santanina iweꞌi:
17 ‘Kami nantawui sasuli ala mompakadamba rara komi, tapi komi daꞌa ria nadamba. Kami nodade nasusa tapi komi daꞌa ria notumangi.’
18 Iwetu woꞌu inggu ntau ri jaꞌi Yohanes bo Aku. Tempo Yohanes etu narata iꞌa napuasa pade daꞌa nanginu anggur, pade ira aga nanguli iꞌa nipesua nu seta!
19 Weꞌi-weꞌi Aku, Ana nu Manusia narata. Aku nanggoni bo nanginu, tapi ira nanguli, ‘Kitamo tau eꞌi! Iꞌa sambaꞌa tau nadoko bo nalangu to nowega ka tau topomperapi balasitee bo tau-tau nasilaka!’ Tapi naupa iwetu, ane tau mantarima noto nggari jaꞌi Alatala kana manoto rakita aselena riara nggatuwu ira.”
Yesus nangontiaka tau to Yahudi ri Bagia Galilea to daꞌa nomparasaya
20 Naopu etu nompamulamo Yesus nangontiaka pue ngata to daꞌa najea nggari silaka ira naupa nadea mpuꞌu kabaraka nikawia Yesus ri ngata ira.
21 Niulina, “Umba komi, pue ngata Khorazim! Mandasa mpuꞌumo komi banepia! Pade mandasa mpuꞌumo komi to netoꞌo ri ngata Betsaida! Sabana ane rapana kabaraka-kabaraka to nikawiaku ri ngata komi etu kukawia ri ngata Tirus bo Sidon, natantu nasaemo ira tau-tau daꞌa to Yahudi kana majea nggari silaka ira. Nasaemo ira kana mopakea karu pade mombadika sowu ri balengga ira ewa tandaina nanjoso raramo ira mompekiri powia ira to najaꞌana.
22 Tapi kuuli ka komi, tempo Pue Alatala mombatangara manusia banepia, pesuku komi meliu nggatomo nggari pesuku to rapawela ka pue ngata Tirus bo Sidon.
23 Pade komi pue ngata Kapernaum, komi nompekiri bara komi etu raore sampe ri suruga! Tapi etu daꞌa ntoto nakono! Komi kana ratajiaka riara naraka! Sabana ane rapana kabaraka-kabaraka to nikawiaku ri ngata komi kukawia ri ngata Sodom to najaꞌa mpuꞌu, natantumo ngata etu daꞌa naropu, tapi batena naria sampe weꞌi-weꞌi.
24 Tapi kuuli ka komi, tempo Pue Alatala mombatangara manusia banepia pesuku komi meliu nggatomo nggari pesuku to rapawela ka pue ngata Sodom!”
Yesus nompokio tau marata ri jaꞌina
25 Tempona etu nosambayamo Yesus. Niulina, “Uma, Pue nu langi bo dunia, Aku mosukuru ri jaꞌimu sabana pura-pura etu nitabuniakamu nggari jaꞌi tau-tau to naria pangginjanina ante tau-tau to napandena. Tapi etu nipopokitamu ka tau-tau to naede katuwuna,
26 sabana etumo to nipodamba raramu, Uma.”
27 Naopu etu nanguli woꞌumo Yesus, “Mpengele-ngele niwai Umaku ka Aku. To mpuꞌu-mpuꞌu nosinjani ante Aku, Ana nu Alatala aga Umaku Pue Alatala. Daꞌa ria tau ntanina. Pade to mpuꞌu-mpuꞌu nosinjani ante Umaku aga Aku, Anana bo isema-sema kupodota mompopanjani Iꞌa ka ira.