To Parisi nangontiaka Yesus sabana anaguruna nompui gando ri Eo Mpenonto
12
Tempo etu Yesus ante anaguruna noliu ri tinalu gando ri Eo Mpenonto. Tempo ira noliu ri setu nompamulamo anaguru Yesus nompui wua gando sakedi pade nionta sabana naoromo taꞌi ira.
2 Nanggita powia ira etu nangulimo bara sakuya mbaꞌa tau to Parisi ri setu ka Yesus, “Kitamo! Anagurumu nombaliunaka Atura-atura agamata ante nowia anu nitagi ri Eo Mpenonto!”
3 Tapi nesonomo Yesus ka ira, “Iwenumo? Daꞌapa nibasa komi tesa riara Buku Nagasa ewa powia i Daud nggaolu tempona iꞌa ante roa-roana naoro taꞌi?
4 Iꞌa nesua riara Sapo Alatala pade nikonina roti to nipesomba ka Alatala ri setu. Tapi kakonona nantuki Atura-atura agamata roti etu aga mamala rakoni topanggeni-topanggeni agama. Daꞌa masipato rakoni Daud ante roa-roana.
5 Bara daꞌapa woꞌu nibasa komi to nitulisi riara Atura-atura agama. Ri Eo Mpenonto topanggeni-topanggeni agama nokarajaa riara Sapo Mpepue tapi ira daꞌa nireke nasala.
6 Toramo mpakabelo-belo nuapa kuuli ka komi eꞌi. Ri seꞌi naria sambaꞌa to neliu nggapoko nggari Sapo Alatala.
7 Naria tesa nitulisi riara Buku Nagasa iweꞌi: ‘To nipodotaku ala komi maasi mata manggita roamu. Daꞌa nipodotaku binata-binata rakeni rasambale ka Aku.’ a Ane komi mpuꞌu-mpuꞌu nangginjani patuju tesa etu natantumo komi daꞌa nombasalaraka tau-tau to daꞌa nasala.
8 Sabana Aku, Ana nu Manusiamo to nakuasa ri Eo Mpenonto.”
To Parisi nonia mompatesi Yesus
9 Naopu etu nalaumo Yesus nompalasi petoꞌo etu pade nesuamo Iꞌa riara saongu sapo mpodade nto Yahudi.
10 Ri setu naria sambaꞌa tau namate palena sabingga. Naria bara sakuya mbaꞌa tau ri setu madota mangelo sala Yesus ala mompangadu Iꞌa. Etu sampe ira nompekutana Iꞌa, “Nantuki Atura-atura agamata masipato kita mompakabelo tau najuꞌa tempo Eo Mpenonto bara daꞌa?”
11 Nesonomo Yesus ka ira, “Ane rapana maria sambaꞌa ri tatongo komi to naria bimbana nanawu ralowu nandala tempo Eo Mpenonto nuapa rakawiana? Natantumo iꞌa kana malau mombasoreaka bimbana etu nggariara lowu nandala etu!
12 Tapi sambaꞌa manusia neliu nggadea olina nggari saongu bimba. Jadi ane iwetu, masipato kita mantulungi tau ri Eo Mpenonto!”
13 Naopu etu nangulimo Yesus ka tau to namate palena sabingga etu, “Ojomo palemu!” Tau etu nangojo palena, pade kaliu-liu nabelo balimo palena nasimbayu ewa palena to sabinggana.
14 Tapi tau-tau to Parisi ri setu nompalasi sapo mpodade etu pade nolibu mangelo jala mompatesi Yesus.
Yesus Batua nu Alatala
15 Yesus nangginjani patuju jaꞌa tau-tau to Parisi etu. Jadi nalaumo Iꞌa nggari setu mpaka ri petoꞌo ntanina. Nadea tau nantuki Iꞌa pade Iꞌa nompakabelo pura-pura tau to najuꞌana.
16 Pade nitagina ira neꞌe motesa ka tau ntanina isema Iꞌa.
17 Ante iwetu nadupamo Tesa nu Alatala to niboto nabi Yesaya nggaolu iweꞌi:
18 “Iꞌa eꞌimo Batuaku to nipelisiku.
Iꞌamo to nipotoweku bo nipodamba raraku.
Nosa Nagasa kuwai ka Iꞌa,
pade Iꞌa mompatolele ka pura-pura tau daꞌa to Yahudi parenta-parentaku nanoa.
19 Iꞌa daꞌa mosinggarau, pade Iꞌa daꞌa woꞌu mongare-ngare.
Suarana daꞌa woꞌu raepe ntau ri jala jama.
20 Wolo naringgolu daꞌa rapakakotona,
pade sumbu mpoindo jelana aga nakampido daꞌa rapopayana.
Iꞌa bate-batena mokarajaa
sampe parenta to nanoana etu ranjani manusia.
21 Pade pura-pura manusia kana manjarumaka Iꞌa.” (Yes. 42:1-4)
To Parisi nanguli Yesus nompopalai seta ante kuasa Magau nu Seta
22 Naopu etu naria sambaꞌa tau nikeni mpaka ri jaꞌi Yesus to naburo bo nabobo sabana iꞌa nipesua seta. Pade Yesus nompakabelo tau etu sampe iꞌa namala notesa pade nekita bali.
23 Nanggita kajadia etu nogumaa mpuꞌumo tau dea ri setu sampe nosimpekutana ira sambaꞌa bo sambaꞌa, “Bara Iꞌa eꞌimo Magau to Mompakasalama, Muli i Daud to nijanji Alatala nggaolu.”
24 Tapi tempo tau-tau to Parisi nangepe tesa ntau dea etu nesonomo ira, “A, tau eꞌi kuasana nggari jaꞌi Beelzebul, Magau nu Seta. Etu sampe Iꞌa namala nompopalai seta-seta.”
25 Tapi ninjani Yesusmo pompekiri ira. Etu sampe niulina ka ira, “Ane rapana maria sambaꞌa magau pade todea riara poparentana etu aga natibagi-bagi bo nosipobali, natantumo poparentana etu kana magero. Pade ane tau-tau ri saongu ngata bara ri saongu njapo aga natibagi-bagi bo nosipobali, natantumo ira kana magaro mosimpotatare.
26 Iwetu woꞌu ane Magau nu Seta mompopalai roana seta-seta ntanina, batuana seta-seta aga natibagi-bagi bo nosipobali. Ane iwetu natantumo poparenta Magau nu Seta etu daꞌa maroo, aga magero waꞌamo.
27 Niuli komi Aku nompopalai seta ante kuasa Beelzebul, Magau nu Seta. Tapi ane iwetu uli ka Aku ante kuasa isema roa-roa komi nompopalai seta-seta? Natantumo ante kuasa nggari jaꞌi Alatala! Jadi powia roamu mboto nompakanoto pombarata komi etu nasala!
28 Tapi Aku nompopalai seta-seta ante kuasa nggari jaꞌi Nosa Nagasa nu Alatala. Pade etu nompopokita ka komi Pue Alatala nompamulamo noparenta ri tatongo komi.
29 Iwenu tau mamala mesua riara njapo ntau to naroso ala mangala mbara-mbarana? Natantumo iꞌa nokolu mombabaga mantipunggu pue njapo to naroso etu. Pade naopu etu mamalamo iꞌa mangala mbara-mbarana etu. b
30 Isema-sema daꞌa nosanggani ante Aku, iꞌamo baliku. Isema-sema daꞌa nantulungi Aku, iꞌa etu nombagero panggawiaku.
31 Jadi kuuli ka komi, mpengele-ngele silaka bo tesa nanguli sinjaꞌi namala raampungi. Tapi ane tau manguli sinjaꞌi Nosa Nagasa nu Alatala iꞌa daꞌa ntoto mamala raampungi.
32 Isema-sema motesa mangewa Aku, Ana nu Manusia mamala raampungi. Tapi isema-sema motesa mangewa Nosa Nagasa nu Alatala, daꞌa ntoto mamala raampungi, nabeloka weꞌi-weꞌi, nabeloka tempo banepiana.
33 Ane kayu to nabelona, nabelo woꞌu wuana. Ane kayu daꞌa nabelo, daꞌa woꞌu nabelo wuana. Sabana nggari wua kayu etu, ninjani komi kayu etu nabelo.
34 Komi tanu tau-tau topebagiu ewa ule! Daꞌa ntoto namala komi notesa to nabelona sabana najaꞌa mpuꞌu raramu! Sabana nuapa to nitesa ntau aga nantuki nuapa to naria riara ntaꞌina.
35 Tau nabelo rarana nombatesa to nabelona, sabana to niboli riara ntaꞌina nabelo puramo. Pade tau najaꞌa rarana nombatesa to najaꞌana, sabana to niboli riara ntaꞌina aga kajaꞌana.
36 Jadi toramo! Ri Eo Mpotangara banepiana pura-pura tau kana mombatanggu butu-butu tesa najaꞌa to nitesana.
37 Sabana tesamu mboto rapake mompakanoto ane komi masala bara daꞌa.”
Guru agama bo tau to Parisi nerapi Yesus mompowia tandai to nipogumaa
38 Naopu etu nangulimo bara sakuya mbaꞌa guru agama bo tau to Parisi ka Yesus, “Guru, kami madota manggita Komi mowia tandai to nipogumaa.”
39 Tapi nesonomo Yesus ka ira, “Najaꞌa mpuꞌumo komi pura-pura! Komi daꞌa natutu natundu ri jaꞌi Alatala! Komi nerapi Aku mowia saongu tandai to nipogumaa. Tapi daꞌa ntoto kukawia etu ka komi! Tandai to rapopokita ka komi aga tandai ewa to najadi ri jaꞌi nabi Yunus nggaolu.
40 Nasimbayu ewa nabi Yunus naria riara ntaꞌi bau bete tolumbengi tolueo kasaena, iwetu woꞌu Aku, Ana nu Manusia kana maria riara dayo tolumbengi tolueo kasaena.
41 Ri Eo Mpotangara banepia pue ngata Niniwe kana rapakatuwu bali mpasanggani-nggani ante komi to natuwu weꞌi-weꞌi. Pade ira kana mompakasala komi, sabana ira najeamo nggari silaka ira tempo ira nangepe tesa nabi Yunus ka ira. Tapi weꞌi-weꞌi naria ri tatongo komi sambaꞌa to neliu nggakuasa nggari nabi Yunus, tapi komi daꞌa madota mantarima tesana.
42 Waꞌa woꞌu ri Eo Mpotangara magau besi nggari sabingga puluna kana rapakatuwu bali mpasanggani-nggani ante komi. Pade iꞌa kana mompakasala komi, sabana iꞌa narata nggari ngata to nakawao mpuꞌu ala mangepe pepatuduki Magau Salomo. Tapi weꞌi-weꞌi naria ri tatongo komi ri seꞌi sambaꞌa to neliu nggakuasa nggari Magau Salomo, tapi komi daꞌa madota mantarima tesana.”
Tesa seta to nalai nanjili bali ri jaꞌi ntau
43 “Tempo seta nesuwu nompalasi sambaꞌa tau iꞌa nalau ranggarawa baina nangelo petoꞌo rapangosarakana, tapi daꞌa niratana.
44 Sabana etu iꞌa nanguli, ‘Aginapa aku matingguli mpaka ri sapo to nipalasiku ria.’ Sangga nanjilipa iꞌa niratanamo petoꞌo etu naboa, daꞌa ria topetoꞌo, pade sapo etu naopu nipegasa bo nipakasiayumo.
45 Pade seta etu nalau nompokio pitumbaꞌa roana to neliu nggajaꞌa nggari iꞌa mboto. Pade naratamo ira nesua ri jaꞌi ntau etu pade naroo ri setu. Kaopuna katuwu ntau etu neliu mpuꞌumo kajaꞌana nggari pamulana bopia. Iwetu woꞌu to majadi ri jaꞌi tau-tau najaꞌa tempo weꞌi-weꞌi.”
Tau to nompowia dota Alatala nireke ewa indo bo sampesuwu Yesus
46 Tempo Yesus danotesa-tesa ka tau dea etu, naratamo indona bo sampesuwu-sampesuwuna. Ira nenggore ri sawalikuna madota motesa ka Iꞌa.
47 Pade naria sambaꞌa tau nalau nanguli ka Yesus, “Uma, naria indomu bo sampesuwu-sampesuwumu ri sawalikuna. Ira madota motesa ka Komi.”