Tau to namate palena sabingga nipakabelo Yesus ri Eo Mpenonto
3
Pade nesua woꞌumo Yesus ri sapo mpodade. Ri setu naria sambaꞌa tau to namate palena sabingga.
2 Bara sakuya mbaꞌa tau to Parisi ri setu nompariara mpakabelo-belo nanggita ane Yesus mompakabelo tau etu ri Eo Mpenonto ala ira mamala mompakasala Iꞌa.
3 Nangulimo Yesus ka tau to namate palena etu, “Kamai pekanggoremo ri tatongona ri seꞌi!”
4 Pade nekutanamo Yesus ka tau-tau to Parisi ri setu, “Nantuki Atura-atura agamata nuapa to nipaloga ka kita ri Eo Mpenonto, mowia to nabelona atau to najaꞌana? Mompakasalama tau atau mompatesi tau?” Tapi ira aga nekalino daꞌa nenjui.
5 Yesus nanggita ira ntalili. Nasusa bo naraumo rarana sabana daꞌa naasi mata ira nanggita tau to namate palena. Pade nangulimo Iꞌa ka tau etu, “Ojomo palemu!” Tau etu nangojo palena, pade kaliu-liu nabelo balimo palena etu.
6 Naopu etu nesuwumo tau-tau to Parisi nggari sapo mpodade etu pade kaliu-liu ira nalau nolibu ante topantuki-topantuki Magau Herodes mangelo jala ala ira mamala mompatesi Yesus.
Nadea tau nantuki Yesus sabana naria kuasana mompakabelo tau-tau najuꞌa
7 Pade nalaumo Yesus ante topantuki-topantuki Iꞌa mpaka ri Rano Galilea. Nadea mpuꞌu tau nggari Bagia Galilea nantuki ira mpaka gusaꞌa. Nadea woꞌu ira to narata nggari Bagia Yudea,
8 nggari ngata Yerusalem, nggari Bagia Idumea, nggari sambote Binangga Yordan, pade nggari bagia namosu ngata Tirus bo Sidon. Ira pura-pura narata ri jaꞌi Yesus sabana nangepe lele to nantesa pura-pura nuapa to nipowiana.
9 Nadea mpuꞌu tau to nasiromu ri setu sampe Yesus nompakau topantuki-topantuki Iꞌa mompakasadia saongu sakaya ka Iꞌa ala neꞌe sampe Iꞌa rarumpa ira.
10 Etu najadi sabana nadea mpuꞌu tau najuꞌa nipakabelona bopia sampe pura-pura tau najuꞌa nosiaso-aso mompasimbuku mompakamosu Iꞌa ala ira mamala manggabe Iꞌa.
11 Tempo tau-tau to nipesua seta nanggita Yesus, nekadedemo ira ri ngayona ante nongare-ngare, “Komimo Ana nu Alatala!”
12 Tapi Yesus nombatagi seta-seta etu ala neꞌe motesa isema kakonona Iꞌa.
Yesus nompelisi sampulu rombaꞌa anaguruna
13 Naopu etu nantendemo Yesus mpaka ri saongu bulu, pade nipokiona ri jaꞌina isema tau to nipodotana. Tau to nipokiona etu narata puramo ri jaꞌina,
14 pade nipelisina nggari tatongo ira sampulu rombaꞌa tau momporoa Iꞌa riara bagona. Ira nipelisina ala rapakauna malau mompatolele Kareba Belo,
15 pade ala ira mamala rawai kuasa mompopalai seta-seta.
16 Sanga ira sampulu rombaꞌa to nipelisina etumo: i Simon to nidaena woꞌu i Petrus,
17 Yakobus ana i Zebedeus bo tuaꞌina Yohanes. Ira rombaꞌa nidaena Boanerges, to naria batuana “Ana Guntu.”
18 Naria woꞌu Andreas, i Filipus, i Bartolomeus, i Matius, i Tomas, Yakobus ana Alfeus, i Tadeus, i Simon to Zelote,
19 pade Yudas Iskariot to mompobalu Iꞌa.
Guru-guru agama nanguli Yesus nompopalai seta ante kuasa nggari Magau nu Seta
20 Naopu etu nesuamo Yesus raranjapo, pade narata woꞌumo tau dea ri jaꞌina sampe Iꞌa ante anaguru-anaguruna daꞌa ntoto naria loga manggoni.
21 Tempo etu naria tau nanguli, “Nabayamo Iꞌa!” Jadi sangga nangepe tesa etu naratamo indona bo sampesuwu-sampesuwuna ala mangala Iꞌa matingguli ri sapo ira.
22 Nangulimo guru-guru agama to narata nggari ngata Yerusalem, “Iꞌa nipesua i Beelzebul, Magau nu Seta. Ante kuasa nggari jaꞌi Tadulako nu seta etu Iꞌa nompopalai seta nggari jaꞌi ntau!”
23 Nangepe etu Yesus nompokio guru-guru agama etu pade Iꞌa notesa ka ira ante porapa iweꞌi: “Natantumo Magau nu Seta daꞌa madota mompopalai roana.
24 Rapana maria sambaꞌa magau pade todea riara poparentana aga matibagi-bagi pade mosipobali, natantumo poparentana etu kana magero.
25 Pade ane tau sanjapo matibagi-bagi pade mosipobali, natantumo ira kana magaro mosimpotatare.
26 Iwetu woꞌu ante Magau nu Seta. Ane iꞌa mangewa roana pade ira matibagi-bagi, natantumo poparentana daꞌa maroo. Mana masaeka magero.
27 Daꞌa ria tau namala mesua riara njapo ntau to narosona ala mangago mbara-mbarana ane daꞌa ratipunggu ntani pue njapo to naroso etu. Ane iwetu iꞌa mamala mangago pura-pura isi njapona. a
28 Aku mpuꞌu-mpuꞌu notesa ka komi, mpengele-ngele silaka manusia bo tesa-tesa nanguli sinjaꞌi namala raampungi.
29 Tapi isema-sema nanguli sinjaꞌi Nosa Nagasa nu Alatala daꞌa ntoto mamala raampungi. Silaka ira etu daꞌa ria ampuna sampe ri kasae-saena.”
30 Yesus nanguli iwetu sabana naria tau nanguli Iꞌa nipesua seta.
Tau-tau to nompowia dota Alatala nireke indo bo sampesuwu Yesus
31 Naopu etu naratamo indo bo sampesuwu-sampesuwu Yesus. Narata ri setu nenggoremo ira ri sawalikuna pade nompakau tau mompokio Yesus momai mpaka ri jaꞌi ira.
32 Tempo etu nadea tau nekatoko nantalili Yesus. Ira nanguli ka Iꞌa, “Kitamo, naria indomu bo sampesuwu-sampesuwumu ri sawalikuna. Ira madota mosirata ka Komi.”