KAREBA BELO TO NITULISI
MATIUS
Tesa nompakanoto isi buku
Kareba Belo eꞌi nitulisi i Matius, sambaꞌa nggari sampulu rombaꞌa anaguru i Pue Yesus. Riara Kareba Belo to nitulisi i Lukas bo i Markus, Matius eꞌi niuli i Lewi (Luk. 5:27-32, Mrk. 2:14-17). Matius nantulisi Kareba Belo eꞌi ka tau-tau to Yahudi ala mompakanoto ka ira Yesus mpuꞌu-mpuꞌu Magau to Mompakasalama to nijanji Alatala nggaolu ka tau-tau to Yahudi. Riara bukuna eꞌi nadea nggani Matius nompakanoto kadupa nu tesa-tesa nabi-nabi nggaolu riara nggatuwu i Pue Yesus. (Kitamo 1:23; 2:6, 15, 17-18, 23; 3:3; 4:14-16; 8:17; 12:17-21; 13:35; 21:4, 5; 27:9-10.)
Riara buku eꞌi naria alima pepatuduki Yesus to nandatena. 1) Pepatudukina ka todea ri buluna (pasal 5-7), 2) Pepatudukina ka anaguruna daꞌapa Iꞌa nangonggotaka ira malau mompatolele Kareba ewa Poparenta nu Alatala (pasal 10), 3) Porapa-porapana to nompakanoto iwenu ane Alatala moparenta ri dunia ewa magau (pasal 13), 4) Pepatudukina ka anaguruna iwenu batuana mantuki Iꞌa (pasal 18), pade 5) Pepatudukina ri Bulu Zaitun nombaboto kajadia-kajadia ri tempo marata (pasal 24-25).
Isi buku to napokona iweꞌi:
1. Tuntu posisunju sanga ntotuꞌa Yesus, tesa pesuwuna bo tesa tempo kanganana (pasal 1-2)
2. Pamula nu bago Yesus (3:1-4:11)
3. Bago Yesus ri Bagia Galilea (4:12-14:12)
Yesus nompamula bagona ri Galilea pade nompelisi anaguruna pamulana (4:12-25)
Yesus nompatuduki todea ri bunggu nu bulu (pasal 5-7)
Kabaraka-kabaraka to nipowia Yesus (8:1-9:34)
Yesus nompatuduki anaguruna (9:35-11:1)
Kajadia-kajadia ri Bagia Galilea to nompakanoto Yesus Magau to Mompakasalama (11:2-12:50)
Porapa-porapa to nompakanoto iwenu ane Alatala moparenta ri dunia ewa magau (13:1-52)
Tau-tau to Nasaret daꞌa nantarima Yesus (13:53-58)
Kamate Yohanes Topediu (14:1-12)
4. Bago Yesus ri ngata-ngata namosu Bagia Galilea (14:13-17:21)
5. Bago Yesus kaopuna ri Bagia Galilea (17:22-18:35)
6. Polumako Yesus mpaka ri ngata Yerusalem (pasal 19-20)
7. Yesus ri ngata Yerusalem (pasal 21-28)
Powia bo pepatuduki Yesus ri ngata Yerusalem (pasal 21-22)
Yesus nangontiaka topanggeniaka agama Yahudi (pasal 23)
Pepatuduki Yesus ri Bulu Zaitun (pasal 24-25)
Yesus nisoko, nitangara pade nipatesi (pasal 26-27)
Yesus natuwu bali (28:1-15)
Yesus nompakau anaguruna manggeni Kareba Belo (28:16-20)