Markus i

KAREBA BELO TO NITULISI

MARKUS

Tesa nompakanoto isi buku

Buku eꞌi nitulisi sambaꞌa tau to Yahudi to nosanga ka i Markus. Iꞌa nantuki i Petrus, anaguru i Pue Yesus riara mpolumakona nanggeni Kareba Belo. Tesa-tesa to niepe i Markus nggari jaꞌi Petrus, etumo to nitulisina riara bukuna eꞌi. Buku eꞌi nitulisi i Markus ka tau-tau daꞌa to Yahudi ala ira woꞌu mamala mangginjani Kareba Belo nggari jaꞌi Alatala.

Isi buku eꞌi nantesa powia i Pue Yesus bo pepatudukina ka topantuki Iꞌa. Yesus nompatolele Kareba Belo to nanguli Pue Alatala nompamula noparenta ewa magau ri dunia eꞌi (1:14-15). Yesus nakuasa nompakabelo tau-tau najuꞌa pade nompopalai seta-seta nggari jaꞌi ntau to nipesua seta. Tapi naupa iwetu topanggeniaka-topanggeniaka nto Yahudi nangewa Yesus, pade kaopuna ira nasintuwu mompatesi Iꞌa (3:6). Tapi Yesus daꞌa nalai nggari jaꞌi ira. Kakonona Iꞌa mboto nombaboto ira kana mompatesi Iꞌa (8:31; 9:31; 10:33-34). Iꞌa nompakatantu kana malau mpaka ri ngata Yerusalem sabana patuju karatana ri dunia ala mombawai korona rapatesi mantolo silaka manusia (10:45). Naopu Yesus nipatesi Iꞌa natuwu bali pade neore mpaka ri suruga.

Patuju i Markus to napokona nantulisi bukuna eꞌi ala mompakanoto Yesus Magau to Mompakasalama bo Ana nu Alatala mboto. (Kitamo 1:1, 11, 24; 3:11; 5:7; 8:29; 9:7; 14:61-62; 15:39.)

Isi buku to napokona iweꞌi:

1. Pamula nu bago Yesus (1:1-13)

2. Yesus nompamula nompatuduki todea pade nompopokita kuasana ri Bagia Galilea (1:14-3:6)

3. Yesus nompapola bagona ri Bagia Galilea (3:7-6:13)

4. Bago Yesus ri sawaliku Bagia Galilea (6:14-8:30)

5. Polumako Yesus mpaka ri ngata Yerusalem (8:31-10:52)

6. Powia bo pepatuduki Yesus ri ngata Yerusalem (11:1-13:37)

7. Yesus nisoko pade nipatesi (14:1-15:47)

8. Yesus natuwu bali (16:1-20)