KAREBA BELO TO NITULISI
MARKUS
Yohanes Topediu nompakasadia tau dea mantarima Yesus Kristus
1
Tesa eꞌimo pamulana Kareba Belo to nombatesa Yesus Kristus, Ana nu Alatala.
2 Naria tesa Alatala to nitulisi nabi Yesaya nggaolu iweꞌi:
“Kita weꞌi! Aku nompakau batuaku mokolu nggari jaꞌimu
ala iꞌa mompakasadia jala ka Komi. (Mal. 3:1)
3 Naria sambaꞌa tau nongare-ngare ri karawa baina iweꞌi:
‘Pakasadiamo jala ka i Pue!
Pakanoa jala to ratukina!’” (Yes. 40:3)
4 Ewa to nitulisi etu iwetu woꞌu Yohanes Topediu neumba ri karawa baina. Iꞌa nompatuduki tau dea iweꞌi: “Kajeamo komi nggari pokainggumu to najaꞌana. Pade komi kana radiu ala silaka-silakamu raampungi nu Alatala.”
5 Pade naratamo tau-tau ri jaꞌina nggari njumaongu Bagia Yudea bo pura-pura pue ngata Yerusalem. Ira pura-pura nompangaku silaka ira pade nidiu Yohanes ri Binangga Yordan ewa tandaina najeamo ira nggari silaka ira etu.
6 Pakea Yohanes nikawia nggari wulu nu unta pade sulepena nikawia nggari kulimba, pade panggonina nggaboro bo ue wani.
7 Iꞌa nompatolele tesa ka tau dea iweꞌi: “Damariapa ngena to maratana nggari puriku to neliu nggakuasa nggari aku. Nau aga motungga mombawole lui sapatuna aku eꞌi daꞌa ntoto masipato.
8 Aku eꞌi nombadiu komi ante ue ewa tandaina najeamo komi nggari silakamu. Tapi Iꞌa kana mombadiu komi ante Nosa Nagasa nu Alatala.”
Yesus nidiu Yohanes ri Binangga Yordan
Mat. 3:13-17; Luk 3:21-22
9 Tempo etu naratamo Yesus nggari ngata Nazaret ri Bagia Galilea, pade Iꞌa nidiu Yohanes ri Binangga Yordan.
10 Iwetu Yesus nesore nggari ue nikitana langi natebea pade Nosa Nagasa nu Alatala nanaꞌu ri jaꞌina ewa sambaꞌa tonji banggebodo.
11 Pade naria suara nggari suruga nanguli, “Ikomo Anaku to nipotoweku. Ikomo to nikonoa raraku.”
Yesus nipesoba Magau nu Seta
12 Naopu etu kaliu-liu Nosa Nagasa nu Alatala nanggeni Yesus mpaka ri karawa baina.
13 Pade Yesus netoꞌo ri setu patampulu mbengi kasaena nipesoba Magau nu Seta. Iꞌa nosanggani-nggani ante binata-binata naila ri setu, pade malaeka-malaeka i Pue narata nantulungi Iꞌa.
Yesus nompokio patambaꞌa topompemala bau mantuki Iꞌa
14 Naliu Yohanes Topediu nitarunggu, nalaumo Yesus mpaka ri Bagia Galilea nompatolele Kareba Belo nggari jaꞌi Alatala.
15 Niulina, “Naratamo tempona to nipakatantu Alatala. Namosumo tempona Alatala moparenta ri dunia eꞌi ewa magau. Kajeamo komi nggari pokainggu komi to najaꞌana, pade parasayamo Kareba Belo nggari jaꞌi Alatala!”
16 Tempona Yesus nolumako ri wiwi Rano Galilea Iꞌa nanggita i Simon ante tuaꞌina Andreas. Tempo etu ira nantendeaka jala nompemala bau ri rano etu sabana ira topompemala bau.
17 Nangulimo Yesus ka ira, “Kamaimo, tukimo Aku, pade Aku mompatuduki komi mangelo tau majadi topantuki Alatala.”
18 Nangepe tesa etu kaliu-liu ira rombaꞌa nompalasi jala ira ri setu pade nalau nantuki Yesus.
19 Naopu etu Yesus nompapola polumakona sakedi pade nikitana Yakobus, ana i Zebedeus, bo tuaꞌina Yohanes riara saongu sakaya nompakabelo jala ira.
20 Iwetu Yesus nanggita ira nangulimo Iꞌa ka ira, “Kamaimo, tukimo Aku.” Nangepe etu ira rombaꞌa nompalasi uma ira riara sakaya nosanggani-nggani ante tau-tau to nigajina, pade nalaumo ira nantuki Yesus.
Yesus nompopalai seta nggari jaꞌi ntau to nipesua seta
21 Naopu etu naratamo Yesus ante topantuki-topantuki Iꞌa ri ngata Kapernaum. Pade ri Eo Mpenonto nesuamo Iꞌa ri sapo mpodade nto Yahudi pade nopaguru ri setu.
22 Nasumara mpuꞌu tau-tau to nangepe pepatudukina sabana akalana nopaguru nakuasa mpuꞌu, daꞌa ewa guru-guru agama.
23 Tempo etu riara sapo mpodade etu naria sambaꞌa tau to nipesua seta. Sampegoli nongaremo iꞌa ante suara namangga,
24 “E, Yesus to Nazaret! Nuapa madota mupowia ka kami? Komi narata mompakaropu kami? Ninjaniku isema Komi. Komimo to Nagasana nggari jaꞌi Alatala!”
25 Tapi Yesus nanggarau seta etu, “Pekalino! Palaimo nggari jaꞌi ntau etu!”
26 Nangepe etu seta etu nombagagoya-goya mpakagai tau etu pade nesuwumo iꞌa nggari jaꞌi ntau etu ante nongare-ngare.
27 Nanggita etu nasumara puramo tau ri setu sampe ira nosimpekutana sambaꞌa bo sambaꞌa, “Hai! Nuapa eꞌi? Sangele pepatuduki to nabouna. Ante kuasana Iꞌa nomparenta seta-seta malai pade seta-seta etu natundu nantuki parentana!”
28 Naopu etu nasalisa natolele kareba ewa Yesus sampe ri njumaongu Bagia Galilea.
Nadea tau najuꞌa nipakabelo Yesus
29 Sangga nesuwupa nggari sapo mpodade etu nalaumo Yesus mpasanggani-nggani ante Yakobus bo Yohanes mpaka ri sapo i Simon bo Andreas.
30 Riara njapo etu matuꞌa besi i Simon naturu ri paturuna sabana najuꞌa pane. Iwetu Yesus nesua rara njapo notesamo tau ri setu ka Iꞌa, “Guru, najuꞌa weꞌi matuꞌa besi i Simon.”
31 Jadi nalaumo Yesus nompakamosu besi etu. Nisokona palena pade nitulungina besi etu nembangu. Kaliu-liu nabelomo juꞌana, pade nompamulamo iꞌa nangala panggoni nikenina ka ira.
32 Ulungguwia etu tempo nasolomo eo, naratamo tau dea nanggeni roa-roa ira to najuꞌa bo tau-tau nipesua seta mpaka ri jaꞌi Yesus.
33 Pura-pura pue ngata etu nasiromu ri ngayo sapo to nipetoꞌo Yesus etu.
34 Pade Yesus nompakabelo nadea tau to nawela mpengele-ngele juꞌa, pade nadea seta nipopalaina nggari jaꞌi ntau dea. Daꞌa nipalogana seta-seta etu notesa sabana ninjani ira isema Iꞌa.
Yesus nalau nopaguru ri ngata-ngata ntanina ri Bagia Galilea
35 Dakampadondo njiina kaeona etu nembangumo Yesus nompalasi sapo etu. Pade nalaimo Iꞌa mpaka ri saongu petoꞌo to nakalinoana pade nosambaya ri setu.
36 Simon bo roa-roana nalau nangelo Iꞌa.
37 Sangga nirata irapa Yesus, nangulimo ira ka Iꞌa, “Guru, pura-pura tau nangelo Komi.”
38 Nangulimo Yesus ka ira, “Kamaimo kita mompapola polumakota mpaka ri ngata-ngata ntanina ala Aku mamala mompatolele Kareba Belo ka tau-tau ri setu woꞌu, sabana etumo patuju karataku eꞌi.”
39 Jadi nalaumo Iꞌa nompatolele Kareba Belo ri sapo-sapo mpodade ri njumaongu Bagia Galilea. Pade Iꞌa woꞌu nompopalai seta-seta nggari jaꞌi tau-tau to nipesua seta.
Yesus nompakabelo sambaꞌa tau najuꞌa bete
40 Naopu etu naratamo sambaꞌa tau to najuꞌa bete mpaka ri jaꞌi Yesus. Nekadedemo iꞌa ri ngayona pade nerapi ante mpuꞌu-mpuꞌu, “Pue, ane Komi madota, Komi mamala mompakabelo juꞌaku eꞌi.”
41 Nanggita tau etu naasi mpuꞌumo mata Yesus. Iꞌa nangojo palena nanjoko koro ntau etu, pade niulina ka iꞌa, “Aku madota. Kabelomo juꞌamu!”
42 Kaliu-liu nalinomo juꞌa ntau etu pade nabelo balimo korona.
43 Pade Yesus nompakau iꞌa nalai ante nompopatora iꞌa iweꞌi:
44 “Tora-tora, neꞌe mutesa ka isema-sema nuapa to najadi ri koromu. Tapi kalaumo komi mompopokita koromu ka topanggeni agama ala rakitana nabelomo juꞌamu. Pade waimo pesomba ka Alatala ewa to niparenta i Musa ala mompopokita ka tau pura-pura nabelomo juꞌamu.”
45 Tapi nalaumo tau etu nompatolele kajadia etu ka tau-tau ri umba-umba sampe Yesus mana namala mesua nggamata-mata riara ngata. Iꞌa aga netoꞌo ri sawaliku ngata ri petoꞌo nakalinoana. Tapi naupa iwetu tau dea danarata ri jaꞌina nggari umba-umba ngata.