KABARAKA-KABARAKA TO NIPOWIA YESUS ALA MOMPOPOKITA KUASANA (8:1-9:34)
Yesus nompakabelo sambaꞌa tau najuꞌa bete
8
Sangga notuapa Yesus nggari bunggu nu bulu, nadeamo tau nantuki Iꞌa.
2 Tempo etu naratamo sambaꞌa tau najuꞌa bete notimbakotu nombasomba Yesus, pade niulina, “Pue, ane Komi madota, Komi mamala mompakabelo juꞌaku eꞌi.”
3 Nangepe etu Yesus nangojo palena nanjoko tau etu ante nanguli, “Aku madota. Nabelomo juꞌamu!” Pade kaliu-liu nabelomo juꞌa ntau etu.
4 Pade nangulimo Yesus ka iꞌa, “Tora-tora, neꞌe mutesa ka isema-sema nuapa to najadi ri jaꞌimu. Tapi kalaumo komi mompopokita koromu ka topanggeni agama ala rakitana nabelomo juꞌamu. Pade waimo ka Alatala pesomba ewa to niparenta i Musa ala mompopokita ka tau pura-pura nabelomo juꞌamu.” a
Yesus nompakabelo juꞌa sambaꞌa batua nu balengga tantara Roma
5 Tempo Yesus nesua ri ngata Kapernaum naratamo sambaꞌa balengga tantara Roma mpaka ri jaꞌina. Iꞌa nerapi ante mpuꞌu-mpuꞌu rarana ka Yesus,
6 “Pue, batuaku najuꞌa ntomo ri sapoku ria. Iꞌa aga naturu ri setu sabana napunggu, pade nandasa mpuꞌu niepena.”
7 Nangulimo Yesus ka iꞌa, “Aku malau mompakabelo iꞌa.”
8 Tapi nangulimo balengga tantara etu, “Uma, aku eꞌi daꞌa masipato mantarima Komi riara njapoku. Aga ulimo sambela rombela pade batuaku etu kana mabelo.
9 Ninjaniku etu sabana aku woꞌu sambaꞌa tau to natundu ri jaꞌi balenggaku. Pade naria anabua-anabuaku to natundu ri jaꞌiku woꞌu. Ane aku manguli ka sambaꞌa anabuaku, ‘Kalaumo,’ iꞌa kana malau. Pade ane aku manguli ka anabuaku ntanina, ‘Kamaimo ri seꞌi,’ iꞌa kana momai. Pade ane aku manguli ka batuaku, ‘Powiamo etu,’ iꞌa kana mowia etu.”
10 Sangga nangepe tesa etu nasumaramo Yesus, pade niulina ka tau dea to nantuki Iꞌa, “Aku mpuꞌu-mpuꞌu notesa ka komi, nau ri jaꞌi ntau to Yahudi daꞌa ria sanggani nirataku pomparasaya ntau to naroso ewa pomparasaya ntau eꞌi!
11 Kuuli ka komi, tempo banepia madea tau daꞌa to Yahudi kana majadi todea nu Alatala. Ira marata nggari sabingga kamataeona bo kasolona pade mekatoko manggoni madamba-damba mpasanggani-nggani ante Abraham, Ishak bo Yakub riara Poparenta nu Alatala.
12 Tapi tau-tau to Yahudi mboto to masipato majadi todea riara Poparenta nu Alatala daꞌa mamala. Ira aga ratajiaka ri karumauna makawao nggari jaꞌi Alatala, pade ri setu ira aga mageo-geo bo mosinggiki baga ante kasusa rara.”
13 Pade nangulimo Yesus ka balengga tantara etu, “Panjilimo. Nuapa to niparasayamu etu kana majadi.” Pade ri tempo etu woꞌu nabelomo juꞌa nu batuana.
Yesus nompakabelo juꞌa matuꞌa besi i Petrus
14 Naopu etu nalaumo Yesus mpaka ri sapo i Petrus. Ri setu nikitana matuꞌa besi i Petrus aga noturu sabana najuꞌa pane.
15 Nanggita etu Yesus nanjoko pale nu besi etu pade kaliu-liu nabelomo juꞌana. Naopu etu nembangumo besi etu nalau nangala panggoni nikenina ka Yesus.
16 Sangga nangguwiapa naratamo tau nanggeni roa ira to nipesua seta mpaka ri jaꞌi Yesus. Ante nanguli sambela Iꞌa nompopalai seta-seta nggari jaꞌi ntau. Pade pura-pura tau to najuꞌana woꞌu nipakabelona.
17 Etu najadi ala madupamo tesa Alatala to niboto nabi Yesaya nggaolu iweꞌi: “Iꞌamo to nanggolo kasusata bo nompakabelo juꞌa-juꞌata.” b
Tau-tau to madota majadi topantuki Yesus
18 Naria saeo nadea tau nantalili Yesus. Nanggita etu nangulimo Iꞌa ka anaguruna, “Kamaimo kita mpaka ri sambote rano.”
19 Tempo etu naria sambaꞌa guru agama to narata ri jaꞌi Yesus ante nanguli, “Guru, ri umba-umba rakalau Komi aku kana mantuki Komi.”
20 Nangulimo Yesus ka iꞌa, “Asulako naria bolona rapaturuna bo tonji naria jumuna, tapi Aku, Ana nu Manusia daꞌa ria petoꞌo kupaturu.”
21 Naopu etu nangulimo sambaꞌa topantuki Iꞌa ntanina, “Pue, paloga ntanimo ruru aku manjili mombatana umaku. Naopu etu pade aku momai mantuki Komi.”
22 Tapi nangulimo Yesus ka iꞌa, “Tukimo Aku! Waikamo tau-tau namate mombatana tau to namatena.”
Yesus nompopenonto poiri naramboso ante balumba bete
23 Naopu etu Yesus nesawi sakaya mpasanggani-nggani ante anaguruna, pade nalaimo ira nosakaya.
24 Tempo ira nosakaya sampegoli naratamo poiri naramboso nompakabete balumba ri rano sampe sakaya ira nibungu nu balumba. Tapi tempo etu Yesus naturu nalumpi.
25 Jadi nalaumo anaguruna nombalike Iꞌa ante nanguli, “Pue, tulungimo! Mamatemo kita!”
26 Nangulimo Yesus ka ira, “Nokuya komi naeka? Komi tanu tau to nakura pomparasaya!” Naopu etu nekanggoremo Iꞌa pade nanguli, “Poiri ante balumba, penontomo!” Pade kaliu-liu naoto puramo rano etu.
27 Nanggita kajadia etu nasumara puramo anaguruna sampe ira nanguli, “Isema tanu kakonona tau eꞌi sampe poiri bo balumba natundu ri jaꞌina?”
Yesus nompakabelo rombaꞌa tau nipakagila nu seta
28 Naopu etu naratamo ira ri sambote rano ri bagia nto Gadara. Naratapa ira ri setu nesuwumo rombaꞌa tau nggari tatongo dayo-dayo nosintomu ka Yesus. Ira rombaꞌa etu nipesua seta. Nagila mpuꞌumo ira sampe daꞌa ria tau nabia moliu ri setu.
29 Nongare-ngaremo ira rombaꞌa, “O, Ana nu Alatala! Nuapa urusamu ante kami, mai mompandasa kami nau daꞌapa tempona?”
30 Daꞌa nakawao nggari setu nadea wawu nangelo panggonina.
31 Jadi seta-seta to nesua riara ntau rombaꞌa etu nerapi ka Yesus, “Ane Komi mompopalai kami nggari jaꞌi ntau eꞌi, palogamo kami mesua ri jaꞌi wawu-wawu etu!”
32 Nangulimo Yesus ka seta-seta etu, “Palaimo!” Jadi nesuwumo seta-seta nggari jaꞌi ntau rombaꞌa etu pade nolinja nesua ri jaꞌi nu wawu-wawu. Iwetu nipesua seta-seta nangowa puramo wawu etu notingganawu nggari wiwi bingge mpaka riara rano sampe namate natala riara rano.
33 Sangga nanggita kajadia etu nalaimo tau-tau topanggatono wawu mpaka riara ngata. Pade nitesa ira puramo nuapa to najadi ri jaꞌi wawu ira bo ri jaꞌi ntau rombaꞌa to nipesua seta paneꞌa.
34 Nangepe etu nalaumo pura-pura pue ngata mosirata ka Yesus. Sangga naratapa ri jaꞌi Yesus nerapimo ira ante mpuꞌu-mpuꞌu rara ala Iꞌa mompalasi bagia ira etu.