Yesus nompakabelo juꞌa sambaꞌa batua nu balengga tantara Roma
7
Naopu Yesus notesa ka tau dea nalaumo Iꞌa mpaka ri ngata Kapernaum.
2 Ri setu naria sambaꞌa balengga tantara Roma. Pade naria woꞌu sambaꞌa batua to nipotowena. Batua etu najuꞌa ntomo.
3 Tempo balengga tantara etu nangepe kareba Yesus nipakauna bara sakuya mbaꞌa totuꞌa nto Yahudi mpaka ri jaꞌi Yesus merapi ala Iꞌa marata mompakabelo batuana to najuꞌa etu.
4 Tempo totuꞌa nto Yahudi narata ri jaꞌi Yesus ira mpuꞌu-mpuꞌu nerapi tulungi ka Iꞌa. Niuli ira, “Balengga tantara eꞌi kana masipato ratulungi Komi,
5 sabana iꞌa nompotowe kita to Yahudi pade iꞌa woꞌu nombawai doi nombabangu sapo mpodade kami.”
6 Nangepe etu nalaumo Yesus mpasanggani-nggani ante ira mpaka ri jaꞌi balengga tantara etu. Tempo ira namosu ri sapona balengga tantara etu nompakau roana malau mantomunaka Yesus ante manguli, “Uma, daꞌa paraluu Komi marata ri sapoku, sabana aku daꞌa masipato mantarima Komi riara njapoku.
7 Aku mboto woꞌu daꞌa masipato marata ri jaꞌimu. Aga ulimo sambela rombela pade batuaku etu kana mabelo.
8 Ninjaniku iꞌa kana mabelo sabana aku woꞌu sambaꞌa tau to natundu ri jaꞌi balenggaku. Pade naria anabua-anabua to natundu ri jaꞌiku woꞌu. Ane aku manguli ka sambaꞌa anabua, ‘Kalaumo,’ iꞌa kana malau. Pade ane aku manguli ka anabua ntanina, ‘Kamaimo seꞌi,’ iꞌa kana momai. Pade ane aku manguli ka batuaku, ‘Powiamo eꞌi,’ iꞌa kana mowia etu.”
9 Tempo Yesus nangepe tesa etu nasumaramo Iꞌa, pade niulina ka tau dea to nantuki Iꞌa, “Natantu mpuꞌu pomparasaya tau etu! Nau ri jaꞌi ntau to Israel daꞌa ria sanggani nirataku pomparasaya ntau to naroso ewa pomparasaya ntau eꞌi!”
10 Naopu etu nanjilimo tau to nipakau balengga tantara etu. Tempo ira narata ri sapo balengga tantara etu, nabelomo batua to najuꞌa etu.
Yesus nompakatuwu bali sambaꞌa kabilasa to namate
11 Daꞌa nasaeka nggari setu nalaumo Yesus mpaka ri saongu ngata to nosanga ka ngata Nain. Anaguru-anaguruna nosanggani ante Iꞌa pade nadea mpuꞌu tau ntanina nantuki Iꞌa.
12 Tempo Yesus namosu bobaa mesua riara ngata etu nikitanamo topokowa tomate nesuwu nggariara ngata etu. Tomate etu ngana langgai to sambaꞌana lau, ana nggari sambaꞌa besi tobalu. Nadea woꞌu tau nggari ngata etu nantuki tobalu etu.
13 Tempo Yesus nanggita tobalu etu, naasimo matana, pade niulina ka iꞌa, “Neꞌe mana motumangi.”
14 Pade nalaumo Yesus nompakamosu pokowa ntomate etu pade nisokona. Tau-tau nokowa tomate etu nenonto, pade notesamo Yesus, “E, kabilasa, Aku manguli ka iko, pembangumo!”
15 Pade nembangumo kabilasa to namate etu. Iꞌa nekatoko pade nompamula notesa-tesa. Naopu etu Yesus nombawai iꞌa ka indona.
16 Nanggita etu naekamo pura-pura tau ri setu, pade nompamulamo ira nombatoiya Alatala. Niuli ira, “Sambaꞌa nabi to nabetena narata ri tatongota. Naratamo Alatala mompakabelo todeana.”
17 Naopu etu natolelemo kareba Yesus etu ka pura-pura tau ri Bagia Yudea, pade ri bagia ntanina to namosuna woꞌu.
Yesus ante anaguru Yohanes Topediu
18 Anaguru-anaguru Yohanes Topediu nombatesa ka iꞌa pura-pura nuapa to nipowia Yesus. Nangepe etu Yohanes nompokio rombaꞌa anaguruna,
19 pade nipakauna ira malau mompekutana Yesus. Niuli Yohanes, “Uli ka Iꞌa iweꞌi: ‘Komi eꞌimo Magau to Mompakasalama to nijanji Alatala, bara damariapa ntanina to rapopea kami?’”
20 Pade nalaumo ira rombaꞌa mpaka ri jaꞌi Yesus pade nanguli, “Yohanes nompakau kami mekutana ri jaꞌi Komi iweꞌi: ‘Komi eꞌimo Magau to Mompakasalama to nijanji Alatala, bara damariapa to rapopea kami?’”
21 Tempona etu nadea tau najuꞌa nipakabelo Yesus, pade nadea seta nipopalaina nggari jaꞌi ntau, pade nadea toburo nipakabelona sampe namala ira nekita bali.
22 Jadi nesonomo Yesus ka ira to nipakau Yohanes etu, “Panjilimo komi mpaka ri jaꞌi Yohanes, pade tesamo ka iꞌa pura-pura nuapa to niepe pade nikita komi. Tau naburo namala nekita, tau napunggu namala nolumako, tau najuꞌa bete nipakabelo bali, tau nabongo namala neepe, tau namate nipakatuwu bali, pade Kareba Belo nggari jaꞌi Alatala nipatolele ka tau napakasi.
23 Nabelo ntotomo tau to daꞌa nokanggaura nomparasaya Aku.”
24 Sangga nalaipa tau to nipakau Yohanes etu, nompamulamo Yesus notesa ka tau dea etu ewa katuwu Yohanes. Niulina, “Nuapa patuju komi nalau ranggarawana bopia? Aga manggita wio niburu mpoiri gusaꞌa guseꞌi? Natantu daꞌa iwetu.
25 Jadi nuapa patuju komi malau gusetu? Ala manggita sambaꞌa tau to nopakea nagaya? Natantu daꞌa woꞌu, sabana tau nopakea nagaya pade nagana katuwuna iwetu aga netoꞌo ri sapo magau.
26 Jadi nuapa patuju komi malau gusetu? Ala manggita sambaꞌa nabi? Nakono! Toramo! Yohanes neliu nggari nabi-nabi ntanina,
27 sabana iꞌamo tau to nitesa riara Buku Nagasa iweꞌi:
‘Kitamo! Aku mompakau batuaku mokolu nggari jaꞌimu,
ala iꞌa mompakasadia jala ka Komi.’” (Mal. 3:1)
28 Nanguli woꞌumo Yesus, “Riara dunia eꞌi daꞌapa ria sambaꞌa tau to neliu nggalanga katuwuna nggari Yohanes. Tapi tau to neliu nggaede katuwuna riara Poparenta nu Alatala iꞌapa neliu nggalanga katuwuna nggari jaꞌi Yohanes.”
29 Tempona pura-pura tau nangepe tesa Yesus, ira ante topomperapi balasitee woꞌu nasituju ante nia Alatala, sabana ira pura-pura nidiu Yohanes ewa tandaina najeamo ira nggari silaka-silaka ira.
30 Tapi to Parisi ante guru-guru agama daꞌa nadota nantarima nia Alatala ka ira. Etumo sabana ira daꞌa nadota radiu Yohanes.
31 Pade niuli Yesus woꞌumo, “Aku motesa mompakanoto ka komi inggu tau-tau tempo weꞌi-weꞌi.
32 Ira nasimbayu ewa ngana-ngana nekatoko ri potomu, to nggari sampetoꞌona nompongare roana to santanina iweꞌi: ‘Kami nantawui sasuli ala mompakadamba rara komi, tapi komi daꞌa ria nadamba. Kami nodade nasusa, tapi komi daꞌa ria notumangi.’
33 Tempo Yohanes etu narata, iꞌa napuasa pade daꞌa nanginu anggur, pade niuli komi, ‘Iꞌa nipesua nu seta!’
34 Aku, Ana nu Manusia narata nanggoni ante nanginu, pade niuli komi, ‘Kitamo tau etu! Nadoko, to nalangu, wega ntopomperapi balasitee ante tau to nadea silakana!’
35 Naupa damo iwetu, kabelo nu Alatala manoto rakita wuana riara nggatuwu ntau to nantarima kabelo nu Alatala etu.”
Yesus ri sapo Simon
36 Naria sambaꞌa tau to Parisi nosanga ka i Simon nombagaga Yesus manggoni mpasanggani ri sapona. Jadi nalaumo Yesus mpaka ri sapona pade nekatoko nanggoni mpasanggani-nggani.
37 Ri ngata etu naria woꞌu sambaꞌa besi bajinga. Tempona iꞌa nangepe Yesus naria nanggoni ri sapo Simon tau to Parisi etu, nalaumo iꞌa nanggeni saongu botolo nggedi to nipowia nggari watu pualam to niisi minya to neliu nggawongina.
38 Iꞌa narata nompakamosu kada Yesus nggari talikuna pade nageo. Pade ue matana nisasiina ka kada Yesus, pade nipeꞌena kada Yesus ante woꞌona sampe nabai. Naopu etu kada Yesus niekina pade nitolina minya wongi etu.
39 Sangga nanggita etu, notesamo i Simon riara ntaꞌina, “Tau eꞌi kakonona daꞌa sambaꞌa nabi. Ane Iꞌa sambaꞌa nabi natantu ranjanina isema besi to nanjoko Iꞌa etu, sabana besi etumo tunggai nowia silaka riara nggatuwuna.”
40 Tapi nangulimo Yesus ka i Simon, “Simon, naria sangaya kutesa ka komi.”
Nesonomo i Simon, “Iyo, tesamo nuapa, Guru.”
41 Pade nanguli Yesus, “Naria rombaꞌa tau to noinda ri jaꞌi ntau to nompopoinda doina. Sambaꞌa nanginda limatu mpeka doi salaka pade sambaꞌa nanginda lima mpeka doi salaka. a
42 Tau rombaꞌa topanginda doi etu daꞌa mana nompakule mombabayari mpakaopu inda ira etu. Jadi nanguli pue nu doi ka ira rombaꞌa etu iweꞌi: ‘Doiku to niinda komi rombaꞌa etu mana kutuntu ka komi.’” Pade nanguli Yesus ka i Simon, “Ri olo ira rombaꞌa etu isema to neliu nompotowe pue doi etu?”
43 Nangulimo i Simon, “Pombarataku tau to nelabi kadea indana etu to neliu pompotowena.”
Nesono Yesus, “Pombaratamu etu nakono.”
44 Naopu etu Yesus nompeili besi etu ante nanguli ka i Simon, “Nikitamu besi eꞌi? Tempo Aku narata ri sapomu daꞌa nipakasadiamu ue kupombarama kadaku nantuki ada kita to Yahudi. Tapi besi eꞌi nombarama kadaku ante ue matana pade nipakabaina ante woꞌona.
45 Komi daꞌa nombatotoaka Aku ante nombaeki Aku. Tapi besi eꞌi daꞌa ria kabasana nombaeki kadaku nggari lamba karataku ri seꞌi.
46 Komi daꞌa nombatoli minya wongi ri balenggaku, tapi besi eꞌi nombatoli minya wongi ri kadaku.
47 Jadi kuuli ka komi, Simon, nggari kabete towe besi eꞌi nantujuraka silakana to nadeana etu niampungi Alatalamo. Ane tau niampungi aga sakedi aga sakedi woꞌu pompotowena.”
48 Pade nangulimo Yesus ka besi etu, “Silaka-silakamu naopu puramo niampungi.”
49 Naopu etu nompamulamo tau-tau ntanina to nekatoko nanggoni mpasanggani ante Yesus notesa sambaꞌa bo sambaꞌa, “Isema tau eꞌi sampe Iꞌa namala mombaampungi silaka!”
50 Tapi nangulimo Yesus ka besi etu, “Sabana iko nomparasaya nipakasalamamo iko. Patinggulimo iko ante mabelo!”