KAREBA BELO TO NITULISI
YOHANES
Tesa nompakanoto isi buku
Buku eꞌi nitulisi Yohanes, sambaꞌa anaguru i Pue Yesus to nabiasa niuli riara buku eꞌi “anaguru to nipotowe Yesus.” Iꞌa mboto nanggita pura-pura kajadia to nitesa riara buku eꞌi.
Riara buku eꞌi i Pue Yesus niuli “To Niposumba Alatala.” Iꞌamo to nisuro Alatala nomai riara dunia netimbali majadi manusia pade netoꞌo ri tatongo ira. Patuju nu buku eꞌi ala pura-pura tau to nombabasa tesa eꞌi mamala momparasaya Yesus Ana nu Alatala, Magau to Mompakasalama to nijanji Alatala, pade ala ira mombarata katuwua mabelo sampe ri kasae-saena (20:31).
Pasal rongu sampe pasal sampulu rongu nantesa pitungele tandai to nipogumaa to nipowia i Pue Yesus. Tandai-tandai etu nompakanoto Yesus mpuꞌu-mpuꞌu Magau to Mompakasalama to nakuasa. Butu nggani naria tandai to nipogumaa naria woꞌu pepatuduki i Pue Yesus ka tau dea. Nggari pepatuduki etu nanotomo nuapa patuju Yesus nowia tandai to nipogumaa etu.
Isi buku to napokona iweꞌi:
1. Pompamulana (1:1-18)
2. Yohanes Topediu bo anaguru i Pue Yesus pamulana (1:19-51)
3. Pokarajaa i Pue Yesus ri tatongo ntau dea (pasal 2 - 12)
4. Pepatuduki i Pue Yesus ka anaguru-anaguruna (pasal 13 - 17)
5. Yesus namate nipaku ri kayu parika pade natuwu bali katolueona (pasal 18 - 21)