KAREBA BELO TO NITULISI
YOHANES
To niposumba Alatala
1
Ri lamba pamulana naria mamimo to niposumba Alatala. a Iꞌa nosanggani-nggani ante Alatala, pade Iꞌamo Alatala.
2 Nggari lamba pamulana Iꞌa nosanggani-nggani ante Alatala.
3 Iꞌamo to nompajadi pura-pura to nariana. Daꞌa ria sangaya to najadi ane daꞌa nggari Iꞌa.
4 Iꞌamo puꞌu katuwua, pade Iꞌamo to nanggeni reme ka manusia.
5 Nau dunia eꞌi narumau ante kajaꞌana, reme etu newanta. Karumau nu dunia daꞌa ntoto namala mompakalipo reme etu.
6 Naria sambaꞌa tau narata nisuro Alatala, sangana Yohanes.
7 Iꞌa narata ewa sambaꞌa sabi motesa mompakanoto isema reme etu ala nggari tesana pura-pura manusia mamala momparasaya.
8 Iꞌa mboto daꞌa reme etu, iꞌa aga notesa mompakanoto isema reme etu.
9 Reme to nakonona Iꞌamo to niposumba Alatala to narata ri dunia nompakareme pura-pura manusia.
10 Iꞌa njau nariamo ri dunia pade nggari Iꞌa sampe dunia nipajadi. Tapi tempo Iꞌa narata manusia ri dunia daꞌa nangginjani Iꞌa.
11 Iꞌa narata ri ngatana mboto, tapi todeana daꞌa nadota mantarima Iꞌa.
12 Tapi isema-sema to nantarima Iꞌa bo nomparasaya Iꞌa, ira niwai ka kuasa majadi ana-ana nu Alatala.
13 Ira najadi ana-ana nu Alatala daꞌa sabana nipoanaka totuꞌa ira, atau nggari dota manusia bara dota sambaꞌa uma. Tapi Alatala mbotomo to nompajadi ira anana.
14 To niposumba Alatala etu netimbali najadi manusia pade Iꞌa netoꞌo ri tatongota ri dunia eꞌi. Pade kita nanggita kuasa bo kagayana to nipogumaa, etumo kuasa bo kagayana to nitarimana nggari jaꞌi Umana ewa Anana sambaꞌa lau. Iꞌa mpuꞌu-mpuꞌu neliu towe belona pade nggari Iꞌamo kita mangginjani Alatala.
15 Yohanes nompakanoto ka todea isemana To niposumba Alatala etu. Nongaremo iꞌa, “Eꞌimo Iꞌa to nipatujuku bopia tempo aku nanguli kana maria to marata ri puriku to neliu nggabete kuasana nggari aku, sabana nggari lamba pamulana naria mamimo Iꞌa daꞌapa aku nesuwu.”
16 Iꞌa mpuꞌu-mpuꞌu neliu towe belona, daꞌa ria kaopu-opuna rasi to niwaina ka kita.
17 Nggari nabi i Musa kita nantarima Atura-atura agama. Tapi nggari Yesus Kristus kita mpuꞌu-mpuꞌu mangginjani Alatala bo towe belona ka kita.
18 Daꞌapa naria sambaꞌa tau to nanggita Alatala. Tapi Anana to sambaꞌa lau to naroo ri jaꞌina, Iꞌamo to nompopokita Alatala ka kita.
Tesa Yohanes Topediu ewa korona mboto
19 Topanggeni-topanggeni agama Yahudi ri ngata Yerusalem nompakau bara sakuya mbaꞌa roa ira ante tau-tau to Lewi malau mpaka ri jaꞌi Yohanes Topediu ala mompekutana iꞌa iweꞌi: “Isema kakonona komi eꞌi?”
20 Nangepe etu notesamo Yohanes mpakanoto, “Aku eꞌi daꞌa Magau to Mompakasalama to nijanji Alatala.”
21 Pade sangganipa ira nompekutana iꞌa, “Ane iwetu, isema ntoto tanu komi? Bara komi eꞌimo nabi Elia?”
Nesonomo Yohanes, “Daꞌa.”
Pade nekutana woꞌumo ira, “Bara komi eꞌimo nabi to nijanji Alatala marata banepia?” b
Nesonomo Yohanes, “Daꞌa.”
22 Pade nanguli woꞌumo ira, “Ane iwetu, uli ka kami isema kakonona komi etu ala mamala ratesa kami ka tau-tau to nompakau kami eꞌi. Iwenu pantesa komi ewa koromu mboto?”
23 Nesonomo Yohanes, “Aku eꞌimo to nitesa nabi Yesaya nggaolu iweꞌi:
‘Naria sambaꞌa tau nongare-ngare ri karawa baina:
pakanoa jala i Pue!’” (Yes. 40:3)
24 Ri tatongo tau-tau to nipakau mpaka ri jaꞌi Yohanes naria woꞌu bara sakuya mbaꞌa tau to Parisi.
25 Ira woꞌu nompekutana iꞌa, “Ane komi daꞌa Magau to Mompakasalama, daꞌa woꞌu nabi Elia, bo daꞌa nabi to nijanji Alatala marata, nokuya komi nombadiu tau?”
26 Nesonomo Yohanes, “Aku nombadiu tau ante ue ewa tandaina najeamo ira nggari silaka ira. Tapi ri tatongo komi naria sambaꞌa tau anu daꞌapa ninjani komi.
27 Iꞌa etu marata ri puriku. Tapi Iꞌa neliu nggabete kuasana nggari aku sampe aku daꞌa masipato mombawole lui sapatuna.”
28 Pura-pura etu najadi ri ngata Betania ri sambote Binangga Yordan ri petoꞌo Yohanes nombadiu tau. c
Yohanes nanguli Yesus Ana Bimba nu Alatala
29 Kaeona etu Yohanes nanggita Yesus narata mpaka ri jaꞌina, pade niulina ka tau-tau ri setu, “Kitamo! Etumo Ana Bimba nu Alatala to mompakalipo silaka manusia!
30 Iꞌa etumo to niuliku bopia tempo aku nanguli ka komi kana marata sambaꞌa tau ri puriku to neliu nggabete kuasana nggari aku, sabana nggari lamba pamulana naria mamimo Iꞌa daꞌapa aku nesuwu.
31 Bopia aku daꞌapa nangginjani Iꞌa etu Magau to Mompakasalama. Tapi patuju karataku mombadiu tau ante ue ala Iꞌa rapopanjani ka tau-tau to Israel.”
32 Pade naria woꞌu tesa Yohanes ntanina iweꞌi: “Aku nanggita Nosa Nagasa nu Alatala nanaꞌu nggari langi nolenje mpotonji banggebodo netuꞌu ri korona.
33 Tempo etu daꞌapa ninjaniku Iꞌa Magau to Mompakasalama. Tapi Alatala to nompakau aku mombadiu tau ante ue nanguli ka aku bopia, ‘Ane iko manggita Nosa Nagasaku manaꞌu metuꞌu ri jaꞌi sambaꞌa tau, Iꞌa etumo to mombadiu tau ante Nosa Nagasaku.’”
34 Pade nanguli woꞌumo Yohanes, “Ante mataku mboto aku nanggita kajadia etu pade iweꞌimo tesaku ka komi: Iꞌa etumo Ana nu Alatala!”
Anaguru Yesus pamulana
35 Kaeona etu naria woꞌumo Yohanes ri setu nosanggani-nggani ante rombaꞌa topantuki iꞌa.
36 Tempo ira nanggita Yesus noliu ri setu, nangulimo Yohanes, “Kitamo! Etumo Ana Bimba nu Alatala!”
37 Tempo rombaꞌa topantuki Yohanes etu nangepe nuapa to niulina, nalaimo ira nantuki Yesus.
38 Yesus neili ntaliku nanggita ira rombaꞌa nantuki Iꞌa. Pade nipekutanana ka ira, “Nuapa nielo komi?”
Nesonomo ira rombaꞌa, “Rabi (batuana Guru), ri umba nipetoꞌo Komi?”
39 Nesonomo Yesus, “Mai kita komi mbotomo.” Tempo etu kira-kira tinti ampa ngguwiana. Jadi nalau mpuꞌumo ira rombaꞌa nanggita petoꞌo Yesus. Pade ira netoꞌo mpasanggani ante Iꞌa eo etu.
40 Nggari ira rombaꞌa to nangepe tesa Yohanes pade nantuki Yesus eo etu sambaꞌa nosanga ka Andreas, sampesuwu i Simon Petrus.
41 Jadi nalaimo Andreas nasalisa nangelo sampesuwuna i Simon pade niulina ka iꞌa, “Nirata kamimo Mesias!” (Batuana Mesias Magau to Mompakasalama to nijanji Alatala. Ane riara Basa Yunani batuana Kristus.)
42 Pade nikeninamo i Simon mpaka ri jaꞌi Yesus.
Tempo ira narata ri setu Yesus nanggita i Simon pade niulina, “Iko Simon ana Yohanes. Tapi nompamula weꞌi-weꞌi iko kana rapoposanga i Kefas.” (Sanga Kefas riara Basa Yunani i Petrus. Batuana Kefas bo Petrus etumo “watu”.)
Yesus nompokio Filipus pade Natanael mantuki Iꞌa
43 Kaeona etu Yesus nopatuju malau mpaka ri Bagia Galilea. Iꞌa nomposintomu i Filipus, pade niulina ka iꞌa, “Kamaimo, tukimo Aku.”
44 Filipus etu tau nggari ngata Betsaida, etumo ngata nipetoꞌo Andreas bo i Petrus.
45 Pade nalaumo i Filipus nomposirata ka i Natanael pade niulina ka iꞌa, “Nirata kamimo tau to nitesa nabi i Musa riara buku-buku Atura nu Alatala pade to nitesa nabi-nabi nggaolu, etumo Yesus nggari ngata Nazaret, ana Yusuf.”
46 Tapi nesonomo i Natanael, “A! Daꞌa ntoto ria to nabelona meumba nggari ngata Nazaret!”
Nanguli i Filipus ka iꞌa, “Kamaimo. Kita komi mbotomo!” Pade nalau mpuꞌumo i Natanael.
47 Tempo Yesus nanggita i Natanael narata ri jaꞌina, Iꞌa nanguli, “Kitamo! Eꞌimo mpuꞌu-mpuꞌu sambaꞌa tau to Israel! Daꞌa ntoto naria to nadenggona riara ntaꞌina.”
48 Nangepe etu nangulimo i Natanael ka Yesus, “Iwenu sampe Komi nangginjani aku?”
Nesonomo Yesus, “Daꞌapa i Filipus nalau nompokio komi, Aku nanggita komi ri wayo kayu ara guria.”
49 Sangga nangepe etu nangulimo i Natanael, “Guru, Komimo Ana nu Alatala! Komimo mpuꞌu-mpuꞌu Magau nto Israel!”
50 Nangulimo Yesus ka iꞌa, “Komi nomparasaya sabana Aku nanguli ka komi Aku nanggita komi ri wayo kayu ara guria. Tapi komi kana manggita kajadia to meliu nggabete nggari kajadia etu.”
51 Pade niuli Yesus woꞌu ka iꞌa, “Aku mpuꞌu-mpuꞌu notesa ka komi, komi kana manggita langi matibea pade mukita woꞌu malaeka-malaeka Alatala aga manaꞌu bo mepone ri jaꞌiku, Ana nu Manusia.”