PAMULA NU BAGO YESUS (3:1-4:11)
Tesa Yohanes Topediu
3
Tempo etu naratamo Yohanes Topediu nompatuduki ri karawa baina Bagia Yudea.
2 Niulina, “Kajeamo komi nggari silakamu sabana namosumo tempona Alatala moparenta ri dunia ewa magau!”
3 Yohanes etu tau to nipatuju riara tesa i Pue to niboto nabi Yesaya nggaolu iweꞌi:
“Naria sambaꞌa tau nongare-ngare ri karawa baina iweꞌi:
Pakasadiamo jala ka i Pue!
Pakanoa jala to ratukina!” (Yes. 40:3)
4 Yohanes etu nompake pakea nggari wulu nu unta. Iꞌa nosulepe kulimba pade panggonina nggaboro bo ue wani.
5 Nadeamo tau narata ri jaꞌina nggari ngata Yerusalem bo njumaongu Bagia Yudea bo pura-pura bagia namosu Binangga Yordan.
6 Ira pura-pura nompangaku silaka ira pade nidiu Yohanes ri Binangga Yordan ewa tandaina najeamo ira nggari silaka ira.
7 Tempo Yohanes nanggita nadea tau to Parisi bo tau-tau to Saduki narata radiu, niulina ka ira, “Komi topebagiu nasimbayu ewa ule! Isema nanguli komi mamala malai ala neꞌe mawela pesuku Alatala to marata? Etu daꞌa nakono!
8 Ane mpuꞌu-mpuꞌu komi najeamo nggari silakamu, popokitamo etu ante pokainggumu to nabelo.
9 Neꞌe rapekiri komi iweꞌi: ‘Kami eꞌi muli Abraham. Pesuku Alatala etu daꞌa rapawela ka kami.’ Etu daꞌa woꞌu nakono! Sabana kuuli ka komi, ane Alatala madota, watu-watu eꞌi mamala rapajadina muli Abraham.
10 Weꞌi-weꞌi nasadiamo baliu rapotowo kayu sampe ri kale-kalena. Ane daꞌa ntoto ria wuana to nabelo, kayu etu kana ratowo pade ratajiaka riara apu.
11 Aku eꞌi nombadiu komi ante ue ewa tandaina najeamo komi nggari silakamu. Tapi maliu aku kana marata sambaꞌa to neliu nggakuasa nggari aku sampe nau aga manjoko sapatuna aku daꞌa masipato. Iꞌa kana mombadiu komi ante Nosa Nagasa nu Alatala bo apu.
12 Iꞌa nasimbayu ewa sambaꞌa tau nombawaro pae. Nariamo tapi ri palena. Iꞌa kana mombawaro pura-pura paena sampe magasa, pade pae to namonona kana rabolina riara logona. Tapi warana kana rapalabuna riara apu to daꞌa ria kapaya-payana.”
Yesus nidiu Yohanes
13 Tempo etu naratamo Yesus nggari Bagia Galilea mpaka ri Binangga Yordan ala radiu Yohanes.
14 Tapi Yohanes nompoara pomperapina etu. Niulina, “Kakonona akumo to masipato radiu Komi, daꞌa si Komi marata ri jaꞌiku ala radiu.”
15 Tapi nangulimo Yesus ka iꞌa, “Diumo Aku weꞌi-weꞌi, sabana ante iwetu kita mompowia pura-pura to nipodota Alatala.” Nangepe etu nasitujumo Yohanes mombadiu Yesus.
16 Naopu nidiu nesoremo Yesus nggari ue. Pade ewa nisuka tempona etu woꞌu langi natebea pade nikitana Nosa Nagasa nu Alatala nanaꞌu ri jaꞌina ewa sambaꞌa tonji banggebodo.
17 Pade nariamo suara nggari suruga nanguli, “Eꞌimo Anaku to nipotoweku. Iꞌamo to nikonoa raraku.”