Yesus nipesoba Magau nu Seta
4
Naopu etu Yesus nikeni Nosa Nagasa nu Alatala nantende mpaka ri karawa baina ala rapesoba Magau nu Seta.
2 Ri setu patampulu eo patampulu mbengi Yesus daꞌa nanggoni nuapa-nuapa. Naopu etu naoro mpuꞌumo taꞌina.
3 Pade naratamo Magau nu Seta nompakamosu Iꞌa ante nanguli, “Ane Iko mpuꞌu-mpuꞌu Ana nu Alatala pakaumo watu-watu eꞌi majadi roti.”
4 Tapi nesonomo Yesus, “Naria nitulisi riara Buku Nagasa iweꞌi: Daꞌa aga nggari roti manusia mamala matuwu, tapi nggari pura-pura tesa to nitesa nu Alatala.” a
5 Naopu etu Yesus nikeni Magau nu Seta mpaka ri ngata Yerusalem, ngata to nagasana etu, pade Iꞌa nituꞌuna ri wumbu nu Sapo Mpepue.
6 Pade niulina ka Yesus, “Ane Iko Ana nu Alatala, potingganawumo Iko nggari seꞌi mpaka ri tana. Iko daꞌa ria mokuya sabana naria nitulisi riara Buku Nagasa iweꞌi:
‘Pue Alatala kana mompakau malaeka-malaekana mombajagai iko.
Ira kana mantinande iko ante pale ira,
ala kadamu neꞌe mawela watu.’” (Mzm. 91:11-12)
7 Tapi nesonomo Yesus ka iꞌa, “Naria woꞌu nitulisi riara Buku Nagasa to nanguli iweꞌi: ‘Neꞌe iko mombasoba Pue Alatalamu!’” b
8 Pade sangganipa Yesus nikeni Magau nu Seta mpaka ri bunggu bulu to nalanga mpuꞌu. Pade nipopokitana ka Iꞌa pura-pura poparenta to naria riara dunia eꞌi ante mpengele-ngele kuasana.
9 Pade niulina ka Iꞌa, “Pura-pura etu kana kuwai ka Iko ane Iko mekadede mombasomba aku.”
10 Tapi nesonomo Yesus ka iꞌa, “E, Magau nu Seta, palaimo iko nggari seꞌi! Sabana naria nitulisi riara Buku Nagasa iweꞌi: ‘Iko kana mombasomba Pue Alatalamu. Aga Iꞌamo to masipato mupepue.’” c
11 Nangepe etu nalaimo Magau nu Seta nompalasi Yesus, pade naratamo malaeka-malaeka i Pue nantulungi Iꞌa.
BAGO YESUS RI BAGIA GALILEA (4:12-14:12)
Yesus nompamula bagona ri Bagia Galilea
12 Tempo Yesus nangepe lele Yohanes Topediu nitarunggu, natinggulimo Iꞌa mpaka ri Bagia Galilea.
13 Narata ri setu nolinjamo Iꞌa nggari ngata Nazaret nalau netoꞌo ri ngata Kapernaum ri wiwi Rano Galilea ri Bagia Zebulon bo Naftali.
14 Nipowiana iwetu ala madupamo tesa i Pue to niboto nabi Yesaya nggaolu iweꞌi:
15 “Tana Zebulon bo tana Naftali
ri jala mpaka ri rano ri sambote Binangga Yordan,
ri Bagia Galilea to nipetoꞌo tau-tau daꞌa to Yahudi.
16 Tau-tau to natuwu ri karumauna ri setu
nanggita reme to nabetena.
Ira to naeka-eka mamate
niwanta nu rememo.” (Yes. 8:23-9:1)
17 Nompamula nggari tempo etu Yesus nompatolele ka tau-tau iweꞌi: “Kajeamo nggari silaka komi, sabana namosumo tempona Alatala moparenta ri dunia ewa magau.”
Yesus nompelisi anaguruna pamulana
18 Naria sanggani Yesus nolumako ri wiwi Rano Galilea. Ri setu Iꞌa nanggita rombaꞌa tau nosampesuwu, etumo i Simon to nidae i Petrus ante tuaꞌina Andreas. Tempo etu ira nantendeaka jala nompemala bau ri rano etu sabana ira topompemala bau.
19 Nangulimo Yesus ka ira, “Kamaimo, tukimo Aku pade Aku mompatuduki komi mangelo tau majadi topantuki Alatala.”
20 Nangepe etu kaliu-liu ira rombaꞌa nompalasi jala ira ri setu pade nalau nantuki Yesus.
21 Naopu etu napolamo Yesus sampe Iꞌa nanggita rombaꞌapa tau nosampesuwu, etumo Yakobus bo Yohanes ana-ana i Zebedeus. Tempo etu ira nompakabelo jala ira riara saongu sakaya mpasanggani-nggani ante uma ira i Zebedeus. Yesus nompokio ira rombaꞌa mantuki Iꞌa.
22 Nangepe etu kaliu-liu ira nompalasi sakaya bo uma ira pade nalau nantuki Yesus.
Yesus nompatuduki bo nompakabelo juꞌa ntau dea
23 Nalaumo Yesus nompebutu ngata ri Bagia Galilea. Ri ngata-ngata etu Iꞌa nompatuduki tau ri sapo mpodade nto Yahudi pade Iꞌa nompatolele Kareba Belo to nanguli mana masaeka Alatala moparenta ri dunia ewa magau. Pade nipakabelona pura-pura tau to najuꞌa bo nalente.
24 Karebana natolele mpaka ri umba-umba ri Bagia Siria, sampe tau-tau nanggeni ka Iꞌa pura-pura roana to nawela mpengele juꞌa bo kasusana, tau-tau nipesua seta, tau-tau nadola, pade tau-tau napunggu. Pade Yesus nompakabelo ira pura-pura.
25 Nadea mpuꞌu tau to nantuki Iꞌa. Naria ira nggari Bagia Galilea, Bagia Sampulu Ngata, ngata Yerusalem, Bagia Yudea pade naria ira nggari bagia sambote Binangga Yordan.