To Parisi nangontiaka Yesus sabana anaguruna nompui gando ri Eo Mpenonto
6
Tempo Eo Mpenonto Yesus ante anaguruna noliu ri tinalu gando. Ri setu nompamulamo anaguruna nompui pae sakedi, nipioyo ira pade nionta ira.
2 Nanggita powia ira etu nangulimo bara sakuya mbaꞌa tau to Parisi ri setu, “Nokuya komi nombaliunaka Atura-atura agamata ante nowia to nitagi ri Eo Mpenonto?”
3 Nesonomo Yesus, “Iwenumo? Daꞌapa nibasa komi tesa riara Buku Nagasa ewa powia i Daud nggaolu tempona iꞌa ante roa-roana naoro taꞌi?
4 Iꞌa nesua riara Sapo Alatala pade nialana roti to nipesomba ka Alatala ri setu. Nikonina roti etu pade niwaina woꞌu ka roa-roana. Tapi kakonona nantuki Atura-atura agamata roti etu aga mamala rakoni topanggeni-topanggeni agama, daꞌa tau ntanina.”
5 Pade niuli Yesus woꞌumo, “Aku, Ana nu Manusiamo to nakuasa ri Eo Mpenonto.”
Tau to namate palena sabingga nipakabelo Yesus
6 Tempo Eo Mpenonto ntanina, nesuamo Yesus ri sapo mpodade nto Yahudi pade nopaguru. Ri setu naria sambaꞌa tau namate pale ngganana.
7 Bara sakuya mbaꞌa guru agama bo tau to Parisi nompariara mpakabelo-belo manggita ane Yesus mompakabelo tau najuꞌa etu tempo Eo Mpenonto, sabana ira madota mangelo sala ri jaꞌi Yesus ala ira mamala mompangadu Iꞌa.
8 Tapi ninjani Yesus pompekiri ira. Jadi nangulimo Iꞌa ri jaꞌi ntau to namate palena etu, “Pembangumo, kamai pekanggoremo ri tatongona seꞌi!” Nangepe etu nembangumo tau etu nalau nekanggore ri setu.
9 Pade nekutanamo Yesus ka ira pura-pura, “Nantuki Atura-atura agama nuapa to nipaloga ka kita rapowia ri Eo Mpenonto? Mowia to nabelona bara to najaꞌana? Mompakasalama koro ntau bara mompatesi tau?”
10 Naopu Yesus nekutana iwetu Iꞌa nanggita ntalili ri jaꞌi ntau dea etu. Pade nangulimo Iꞌa ka tau namate palena etu, “Ojomo palemu!” Tau etu nangojo palena, pade nabelo balimo palena etu.
11 Tapi naopu nanggita etu narau mpuꞌumo rara guru-guru agama bo tau-tau to Parisi etu. Pade nompamulamo ira nolibu mantesa nuapa mamala rakawia ri jaꞌi Yesus.
Yesus nompelisi sampulu rombaꞌa anaguruna
12 Tempona etu Yesus nantende mpaka ri saongu bulu pade ri setu Iꞌa nosambaya ka Umana Pue Alatala njambengi ntua.
13 Sangga naeompadondo, nipokiona puramo tau to nantuki Iꞌa, pade nipelisina sampulu rombaꞌa nggari tatongo ira majadi surona.
14 To nipelisina etumo: i Simon, to nidaena i Petrus, Andreas tuaꞌi i Simon, Yakobus, Yohanes, i Filipus, i Bartolomeus,
15 i Matius, i Tomas, Yakobus ana Alfeus, i Simon to Zelote,
16 Yudas ana Yakobus, ante Yudas Iskariot to najadi topobalu Yesus.
Yesus nompatuduki bo nompakabelo tau-tau najuꞌa
17 Naopu etu notuamo Yesus ante anaguruna nggari bulu etu sampe narata ri kadelena. Ri setu naria nadea topantuki Iꞌa ntanina pade nadea tau to narata nggari umba-umba ri bagia nto Yahudi, nggari ngata Yerusalem bo nggari ngata Tirus ante ngata Sidon to ri wiwi ntasi.
18 Ira narata ala mangepe tesa Yesus pade ala rapakabelo nggari juꞌa ira pura-pura. Ira to nipesua seta woꞌu narata pade nipakabelona.
19 Pura-pura tau nompasimbuku manggabe koro Yesus sabana naria kuasa nesuwu nggari korona to nompakabelo juꞌa ira pura-pura.
Tau to nasana bo tau to nandasa
20 Yesus nanggita topantuki-topantuki Iꞌa pade niulina,
“Nasana mpuꞌumo komi to nakasiasina,
sabana komimo to najadi todea riara Poparenta nu Alatala.
21 Nasana mpuꞌumo komi to naoro weꞌi-weꞌi,
sabana komi kana rapakabosu.
Nasana mpuꞌumo komi to notumangi weꞌi-weꞌi,
sabana komi kana rapakadamba.
22 Nasana mpuꞌumo komi ane komi raporau rara ntau,
rapatani ntau, rasalai ntau, bo sanga komi rapakawau ntau
sabana komi topantuki Aku, Ana nu Manusia.
23 Iwetu woꞌu nikawia totuꞌa ira nggaolu ka nabi-nabi Alatala. Ane etu majadi, kana madamba mpuꞌu rara komi sabana nadea mpuꞌu rasi to nipakasadia ka komi ri suruga.
24 Tapi mandasa mpuꞌumo komi to nakalumana weꞌi-weꞌi,
sabana nirata komi puramo nuapa to nompakadamba.
Mana ria ntanina.
25 Mandasa mpuꞌumo komi to nagana panggoni weꞌi-weꞌi,
sabana komi kana maoro.
Mandasa mpuꞌumo komi to nadamba rara weꞌi-weꞌi,
sabana komi kana masusa rara pade motumangi.
26 Mandasa mpuꞌumo komi to nitoiya pura-pura tau,
sabana iwetu woꞌu nipowia totuꞌa ira nggaolu ka nabi-nabi topodawa.” a
Mompotowe balimu
27 “Tapi kuuli ka komi to nangepe tesaku weꞌi-weꞌi: Potowemo balimu, powia belo ka tau to nomporau rara komi.
28 Perapi belo ka tau to nombajanjiaka komi pade posambaya woꞌu ka tau to nowia najaꞌa ri jaꞌimu.
29 Ane maria tau mombasapa kalimpi ngganamu, wai ka iꞌa woꞌu kalimpi njidimu. Ane maria tau mangala buyamu, wai ka iꞌa woꞌu bajumu.
30 Ane maria tau merapi ri jaꞌimu kana rawai ka iꞌa. Pade ane mbara-mbaramu rapangangga ntau neꞌe mana muperapi anu to nialana.
31 Nuapa-nuapa to mupodota rapowia ntau ka komi, iwetu woꞌu komi mowia ri jaꞌi ira.
32 Ane komi aga nompotowe tau to nompotowe komi, neꞌe rasarumaka Alatala mombawai rasi ka komi, sabana tau nasilaka woꞌu nowia iwetu.
33 Ane komi nowia nabelo aga ka tau to nowia anu nabelo ka komi, natantu komi daꞌa rareke tau to nabelo rarana, sabana tau nasilaka woꞌu nowia iwetu.
34 Pade ane komi nompopoinda doimu aga ka tau to nompakule mompopanjili doi etu, natantu komi daꞌa rareke tau to nabelo, sabana tau nasilaka woꞌu nompopoinda doi ira ka tau nasilaka ntanina ane ranjani ira tau etu nompakule mompopanjili doi etu.
35 Kakonona daꞌa iwetu! Komi kana mompotowe balimu, pade powia anu mabelo ka ira. Komi kana mombawai ka tau ante mana mompopea balasina. Ane komi mowia iwetu rasimu kana madea bo komi majadi ana-ana nu Alatala, sabana Iꞌa woꞌu nowia to nabelo ka tau daꞌa ninjanina notarima kasi bo woꞌu ka tau najaꞌa.
36 Komi woꞌu kana mabelo rara nasimbayu ante Uma komi Pue Alatala.”
Neꞌe komi sakedi-sakedi mompakasala tau
37 “Neꞌe komi sakedi-sakedi mompakasala tau ala neꞌe komi rapakasala Alatala. Neꞌe komi sakedi-sakedi mompakatantu tau nasala rasuku ala neꞌe komi rasuku Alatala. Ampungimo tau ntanina ala komi woꞌu raampungi Alatala.
38 Wai ka tau ntanina ala Alatala woꞌu mombawai ka komi. Ane komi mombawai madea kana madea woꞌu rarata komi. Kadeana etu masimbayu ewa posuka to naponu to niparoꞌo ante nigagoya ala namala raisi woꞌu sampe mabubuaka. Komi kana rabalasi nantuki posuka to nipake komi ante tau ntanina.”
39 Naopu etu Yesus nombatesa woꞌumo saongu porapa ka topantuki-topantuki Iꞌa iweꞌi: “Daꞌa namala sambaꞌa toburo mombanini toburo ntanina. Natantu ira rombaꞌa kana manawu riara lowu.
40 Daꞌa ria sambaꞌa anaguru neliu nggapande nggari guruna. Tapi ane matamapa, iꞌa kana masimbayu ante guruna.
41 Nokuya komi namala nanggita silaka roamu to nakedina ewa mpuli ri matana, tapi silaka komi mboto to nabetena ewa baloti ri matamu mboto daꞌa ria nikitamu?
42 Iwenu komi mamala manguli ka iꞌa, ‘Sampesuwuku, kamai kukaliaka mpuli nggari matamu,’ iꞌapa baloti ri matamu mboto daꞌa nikitamu? Komi topebagiu! Kaliaka ntani ruru baloti ri matamu mboto. Ante iwetu komi mamala manggita ante manoto ala manggaliaka mpuli nggari mata roamu etu!”
Kayu ante wuana
43 “Daꞌa naria kayu nabelo nowua daꞌa nabelo. Daꞌa woꞌu naria kayu daꞌa nabelo nowua nabelo.
44 Pura-pura kayu ninjani nggari wuana. Natantu lemo ntasi daꞌa nowua mpolonja, bo walaa winti manu daꞌa nowua ntimu.
45 Iwetu woꞌu manusia. Tau nalusu rarana, powiana ante tesana nabelo sabana to niboli riara ntaꞌina nabelo pura. Pade tau najaꞌa rarana, powiana ante tesana kana majaꞌa sabana to niboli riara ntaꞌina aga to najaꞌana. Nuapa to nitesa ntau aga nantuki nuapa to naria riara ntaꞌina.”
Isema anaguru to nakonona
46 Nangulimo Yesus, “Nokuya komi nanggasangai Aku Pue tapi komi daꞌa nantuki nuapa to niuliku?
47 Kana kupopokita ka komi kasimbayu inggu ntau to narata ri jaꞌiku to nangepe pade nantuki tesaku!
48 Iꞌa nasimbayu ewa sambaꞌa topowia sou to nombakae mpakandala pade nowia pondasi ri bunggu watu. Tempo ue nanggabuntu nombarumpa sapo etu, sapo etu daꞌa nogoya sabana nibangu ri bunggu pondasi to naroso.
49 Tapi ane tau aga nangepe tesaku tapi daꞌa nantuki tesa etu, iꞌa nasimbayu ewa tau to nowia sapona ri bunggu tana, daꞌa nipowiana pondasi. Tempo ue nanggabuntu nombarumpa sapo etu, kaliu-liu sapo etu nadungga, pade najaꞌa mpuꞌu kagerona.”