Yesus nompamula nompelisi anaguru-anaguruna
5
Naria sanggani Yesus nekanggore nopaguru ri wiwi rano Genesaret. a Tau dea nantalili Iꞌa nangepe Tesa nu Alatala.
2 Tempo etu Iꞌa nanggita rongu sakaya ri wiwi rano etu. Pura-pura topompemala bau nanaꞌu nggari sakaya-sakaya etu nantapasi jala ira.
3 Yesus nesawi saongu sakaya, etumo sakaya i Simon Petrus, pade nipakauna i Simon nanggeni sakaya etu makawao sakedi nggari wiwi rano. Yesus nekatoko ri bunggu sakaya etu, pade nggari setu Iꞌa nompaguru tau dea.
4 Sangga naopupa Iꞌa nompaguru tau dea niulina ka i Simon, “Keni mpaka ri kandalana sakayamu pade tendeaka jalamu mompemala bau.”
5 Nesonomo i Simon, “Guru, njambengi ntuamo kami nompemala bau tapi daꞌa ria kamba sambaꞌa nirata kami. Tapi sabana guru nompakau kami, kami mantendeaka jala sangganipa mompemala bau.”
6 Sangga nituki ira panguli Yesus etu nadea mpuꞌu bau nirata ira sampe jala ira naponu, ntora naseri.
7 Jadi ira nanggabe roa ira ri sakaya ntanina marata mantulungi ira. Naratamo roa-roa ira pade ira mpasanggani-nggani nangisi bau etu riara rongu sakaya etu. Naponu pura rongu sakaya etu niisi bau sampe sakaya etu sakedika natala.
8 Tempo i Simon Petrus nanggita etu, notimbakotumo iꞌa ri ngayo Yesus ante nanguli, “Neꞌe mamosu ri jaꞌiku, Pue, apa aku sambaꞌa tau nasilaka!”
9 Niulina iwetu sabana iꞌa ante tau-tau to nosanggani-nggani ante iꞌa nasumara nanggita kadea nu bau to namala nijala ira.
10 Iwetu woꞌu roa-roa i Simon, etumo Yakobus bo Yohanes, ana-ana i Zebedeus.
Pade nangulimo Yesus ka i Simon, “Neꞌe maeka. Komi nokolu topangelo bau, tapi mompamula weꞌi-weꞌi komi majadi topangelo manusia majadi topantuki Alatala.”
11 Naopu etu ira nanggeni rongu sakaya etu mpaka ri wiwi rano. Pade ira tolumbaꞌa nompalasi pura-pura etu nalau nantuki Yesus.
Yesus nompakabelo sambaꞌa tau najuꞌa bete
12 Naria sanggani Yesus naria ri saongu ngata. Ri setu naria sambaꞌa langgai korona najuꞌa bete. Tempona iꞌa nanggita Yesus naratamo iꞌa notimbakotu ri ngayona pade nerapi mpuꞌu-mpuꞌu ka Iꞌa, “Pue, ane Komi madota, Komi mamala mompakabelo juꞌaku eꞌi.”
13 Nangepe etu Yesus nangojo palena nanjoko tau etu ante nanguli, “Aku madota. Nabelomo juꞌamu!” Kaliu-liu juꞌa ntau etu nabelo.
14 Pade Yesus nantagi tau etu, “Neꞌe mutesa ka tau nuapa to najadi ri koromu. Tapi kalaumo komi mompopokita koromu ka topanggeni agama ala rakitana nabelomo juꞌamu. Pade waimo ka Alatala pesomba ewa to niparenta i Musa ala mompopokita ka tau pura-pura nabelomo juꞌamu.”
15 Naupa tau etu nitagi iwetu, kareba Yesus natiepe ri umba-umba sampe nadea mpuꞌu tau narata ala mangepe tesana pade ala rapakabelo nggari juꞌa ira.
16 Tapi sanggani-sanggani Yesus nalau mpaka ri petoꞌo to nakalinoana pade nosambaya ri setu.
Yesus nompakabelo sambaꞌa topunggu
17 Naria sanggani Yesus nopaguru. Tempo etu naria bara sakuya mbaꞌa tau to Parisi ante guru-guru agama nekatoko nangepe Iꞌa ri setu. Ira narata nggari pura-pura ngata to naria ri Bagia Galilea ante Bagia Yudea bo nggari ngata Yerusalem woꞌu. Kuasa nggari jaꞌi Pue Alatala naria ri jaꞌi Yesus sampe Iꞌa namala mompakabelo tau-tau to najuꞌana.
18 Tempona etu naratamo bara sakuya mbaꞌa tau nombakowa sambaꞌa tau topunggu noturu ri ompa paturuna. Ira nompasimbuku manggeni tau etu mesua rara njapo ala iꞌa ratuꞌu ri ngayo Yesus.
19 Tapi daꞌa namala ira manggeni topunggu etu mesua sabana tau-tau ri setu neliu nggadea. Sabana etu nalaumo ira nepone ri bunggu ata sapo etu. Narata ri bunggu ata nibongga ira ata etu pade niulu ira tau najuꞌa etu ante parewa mpoturuna ri ngayo Yesus ri tatongo ntau dea etu.
20 Tempo Yesus nanggita karoso pomparasaya ira Iꞌa nanguli, “Sampesuwu, silakamu niampungimo.”
21 Nangepe etu nompamulamo guru-guru agama ante tau-tau to Parisi ri setu nompekiri riara ntaꞌi ira, “Najaꞌa mpuꞌu tau eꞌi! Iꞌa nompakakedi Alatala! Daꞌa ria tau namala mombaampungi silaka, aga Alatala mboto!”
22 Ninjani Yesus pompekiri guru-guru agama ante tau to Parisi etu. Jadi niulina ka ira, “Nokuya komi nompekiri iwetu riara ntaꞌimu?
23 Umba to neliu nggamuda rauli, ‘Silakamu niampungimo,’ atau manguli, ‘Pekanggoremo pade polumakomo?’ Natantu neliu nggamuda manguli, ‘Silakamu niampungimo.’
24 Tapi Aku mompopokita ka komi Aku, Ana nu Manusia nakuasa mombaampungi silaka-silaka manusia ri dunia eꞌi.” Pade nipakauna topunggu etu, “Pekanggoremo, onggotaka ompa paturumu pade patinggulimo!”
25 Nangepe etu nekanggoremo topunggu etu ri tatongo ntau dea pade nionggotakana ompa paturuna nanjili ante nombatoiya bo nombabila sanga Alatala.
26 Nanggita etu nogumaa puramo tau ri setu pade ira nombatoiya bo nombabila sanga Alatala. Ante naeka mpuꞌu rara ri jaꞌi Alatala ira nanguli, “Eona eꞌi nikitatamo nuapa anu to nipogumaa.”
Yesus nompokio Lewi mantuki Iꞌa
27 Naopu etu nesuwumo Yesus nggari sapo etu pade nikitana sambaꞌa tau topomperapi balasitee to nosanga ka i Lewi nekatoko riara kantoro topomperapi balasitee. Nangulimo Yesus ka iꞌa, “Kamaimo, tukimo Aku!”
28 Nangepe etu nekanggoremo i Lewi pade nipalasina pura-pura panggawiana nalau nantuki Yesus.
29 Naopu etu i Lewi nanggawia posusa ka Yesus ri sapona. Nadea topomperapi balasitee ante tau-tau ntanina nanggoni mpasanggani-nggani ante ira ri posusa etu.
30 Naopu nanggita Yesus nalau ri posusa mpasanggani-nggani ante i Lewi, nonguamo bara sakuya mbaꞌa tau to Parisi ante guru-guru agama to nantuki pepatuduki to Parisi. Nangulimo ira ka topantuki-topantuki Yesus, “Nokuya komi pura-pura nanggoni pade nanginu mpasanggani-nggani ante topomperapi balasitee bo tau-tau to nasilaka?”
31 Nesonomo Yesus, “Daꞌa tau to naroso korona paraluu rapakuli dokutoro, aga tau to najuꞌana.
32 Aku daꞌa narata mompokio tau to nanoa rarana tapi aga narata mompokio tau nasilaka ala ira majea nggari silaka-silaka ira.”
Tau nekutana ewa mapuasa
33 Pade nekutanamo tau ka Yesus, “Topantuki-topantuki Yohanes naoso napuasa pade nosambaya. Iwetu woꞌu topantuki-topantuki to Parisi. Tapi topantuki-topantuki Komi aga nanggoni bo nanginu. Nokuya ira daꞌa napuasa?”
34 Nesonomo Yesus ka ira ante porapa iweꞌi: “Masipato komi mompakau toratamu mapuasa ri posusa mponika ane boti langgai danosanggani ante ira? Natantu daꞌa!
35 Tapi kana marata tempona boti langgai etu raala nggari jaꞌi ira. Pade tempo etumo ira kana mapuasa.” b
Pepatuduki Yesus to nabou bo ada-ada agama Yahudi daꞌa namala ratuki sanggani
36 Naopu etu Yesus nombatesa ka ira porapa iweꞌi: “Daꞌa ria sambaꞌa tau manjeri baju to nabouna rapotampalana ka baju to narantana, sabana ane iwetu baju to nabouna etu kana maseri, pade kae rapotampala etu daꞌa woꞌu nabelo rakita ri baju to narantana etu.
37 Iwetu woꞌu ante ue anggur. Daꞌa ria sambaꞌa tau nombaisi ue anggur to nabouna riara pombolina to nasae, sabana ane iwetu ue anggur to nabouna etu kana morende mompakaposo pombolina etu sampe masowe wetumo ue anggur pade marugi pombolina.
38 Kakonona, ue anggur to nabouna kana raboli riara pombolina to nabouna woꞌu.
39 Tau nabiasa nanginu anggur to nasaena daꞌa madota manginu to nabouna, sabana niulina, ‘Nabelopa anggur to nasaena.’”