Yesus nompakabelo sambaꞌa topunggu
9
Naopu etu nesawi sakayamo Yesus nanjili mpaka ri sambote rano sampe narata ri ngata to nipetoꞌona.
2 Ri setu naratamo bara sakuya mbaꞌa tau nombakowa roa ira to napunggu naturu ri ompa paturuna mpaka ri jaꞌi Yesus. Sangga nanggita karoso nu pomparasaya ira, nangulimo Yesus ka topunggu etu, “Anaku, pakaroso raramu. Silaka-silakamu niampungimo.”
3 Nangepe tesa Yesus etu bara sakuya mbaꞌa guru agama ri setu nompekiri riara ntaꞌi ira, “Tau eꞌi nompakakedi Alatala!”
4 Tapi ninjani Yesusmo pompekiri ira. Etu sampe Iꞌa nanguli ka ira, “Nokuya komi nompekiri najaꞌa iwetu riara ntaꞌimu?
5 Umba to neliu nggamuda rauli, ‘Silakamu niampungimo,’ atau manguli, ‘Pekanggore pade polumakomo?’ Natantu neliu nggamuda manguli, ‘Silakamu niampungimo.’
6 Tapi Aku mompopokita ka komi Aku, Ana nu Manusia nakuasa mombaampungi silaka-silaka manusia ri dunia eꞌi.” Pade nangulimo Iꞌa ka topunggu etu, “Pekanggoremo! Onggotaka ompa paturumu pade patinggulimo!”
7 Nangepe etu nekanggoremo topunggu etu, pade nanjilimo iꞌa mpaka ri sapona mboto.
8 Nanggita kajadia etu naekamo rara ntau dea ri setu. Pade ira nantoiya Alatala sabana Iꞌa nombawai kuasa to nabetena ewa etu ka manusia.
Yesus nompokio Matius majadi anaguruna
9 Naopu etu nalaimo Yesus nggari setu. Tempo Iꞌa noliu ri ngata etu nikitana sambaꞌa topomperapi balasitee nekatoko riara kantorona. Sangana i Matius. Nangulimo Yesus ka iꞌa, “Kamaimo, tukimo Aku!” Nangepe etu nekanggoremo Matius pade nalaumo iꞌa nantuki Yesus.
10 Naopu etu Yesus ante anaguruna nalau nanggoni ri sapo i Matius. Pade ri setu nadea woꞌu topomperapi balasitee bo tau-tau ntanina to nasilaka nasiromu nanggoni mpasanggani ante ira.
11 Sangga nanggita etu nangulimo bara sakuya mbaꞌa tau to Parisi ka anaguru Yesus, “Nokuya gurumu nanggoni mpasanggani-nggani ante topomperapi balasitee bo tau-tau to nasilaka?”
12 Tesa ira etu niepe Yesus. Jadi niulina ka ira, “Daꞌa tau to naroso korona paraluu rapakuli dokutoro, aga tau to najuꞌana.
13 Kau pegurumo batua nu tesa Alatala to nanguli iweꞌi: ‘To nipodotaku ala komi maasi mata ri jaꞌi tau ntanina. Daꞌa nipodotaku binata-binata rakeni rasambale ka Aku.’ a Sabana patuju karataku ri dunia eꞌi daꞌa mompokio tau-tau to nanoa rarana, tapi ala mompokio tau-tau nasilaka.”
Pompekutana ewa mapuasa
14 Naliu etu naratamo bara sakuya mbaꞌa topantuki Yohanes Topediu mpaka ri jaꞌi Yesus. Nekutanamo ira ka Iꞌa, “Kami bo tau-tau to Parisi naoso napuasa nantuki ada-ada agamata. Nokuya anaguru Komi daꞌa napuasa?”
15 Nesonomo Yesus ka ira ante porapa iweꞌi: “Masipato torata mapuasa bo masusa rara ri posusa mponika tempo boti langgai danosanggani ante ira? Natantumo daꞌa! Tapi kana marata tempona boti langgai raala nggari jaꞌi ira. Tempo etu pade ira mapuasa.”
Pepatuduki Yesus to nabou bo ada-ada agama Yahudi daꞌa namala ratuki sanggani
16 Nanguli woꞌumo Yesus, “Daꞌa ria sambaꞌa tau nombatampala baju to narantana ante tampala kae to nabouna. Sabana tampala kae to nabouna etu kana mosimpakuru mompakaseri baju to narantana etu sampe mantambai kajaꞌana seri nu baju etu.
17 Iwetu woꞌu ante ue anggur. Daꞌa ria sambaꞌa tau nombaisi ue anggur to nabouna riara pombolina to nasae. Sabana ane iwetu ue anggur to nabouna kana morende mompakaposo pombolina etu sampe masowe wetumo ue anggur pade marugi pombolina. Ue anggur to nabouna kana raisi riara pomboli to nabouna woꞌu. Ante iwetu pura-pura kana mabelo, nabeloka ue anggur, nabeloka pombolina.” b
Tesa ana Yairus ante besi to nanggabe baju Yesus
18 Tempo Yesus danotesa, naratamo sambaꞌa topanggeniaka ri sapo mpodade nto Yahudi. Nekadedemo iꞌa ri ngayo Yesus ante nanguli, “Anaku besi lako-lakopa namate. Tapi kamaimo mpaka ri sapoku, dikamo palemu ri korona pade iꞌa kana matuwu bali.”
19 Nangepe etu nekanggoremo Yesus nalau nantuki tau etu. Pade anaguruna woꞌu nantuki Iꞌa.
20 Ri tatongo jala naria sambaꞌa besi to sampulu rompaemo nangote lei. Iꞌa nompakamosu Yesus nggari talikuna pade nikabena tampa nu baju Yesus,
21 sabana nipekirina, “Nau aga bajuna kukabe kana mabelomo juꞌaku.”
22 Tempona etu Yesus nompeili nanggita besi etu. Pade niulina ka iꞌa, “Anaku, pakaroso raramu. Sabana iko nomparasaya Aku, nabelomo juꞌamu.” Pade tempo etu woꞌu nabelomo juꞌa nu besi etu.
23 Naopu etu napolamo Yesus mpaka ri sapo ntopanggeniaka ri sapo mpodade paneꞌa. Narata ri setu nikitana tau nantawui sasuli bo tau dea nakanano.
24 Niulina ka ira, “Palaimo komi pura-pura! Ngana besi etu daꞌa namate. Iꞌa aga napisi.” Nangepe tesa etu, ira aga nompongiri-ngiri Yesus.
25 Tapi naopu ira pura-pura nipopalaina, nesuamo Yesus ri jaꞌi ngana besi, nisokona palena pade kaliu-liu natuwu balimo iꞌa.
26 Naopu etu natolelemo kareba kajadia etu sampe ri njumaongu ngata ri bagia etu.
Yesus nompakabelo mata rombaꞌa toburo
27 Tempona Yesus nompapola polumakona nggari setu ri tatongo jala naria rombaꞌa toburo nantuki Iꞌa ante nongare-ngare, “Muli i Daud! Potowemo kami!”
28 Tempo Yesus nesua riara saongu sapo, nesua woꞌumo toburo rombaꞌa etu nompakamosu Iꞌa. Pade nekutanamo Iꞌa ka ira, “Niparasaya komi Aku nakuasa mompakabelo matamu?”
Nesono ira, “Niparasaya kami, Pue.”
29 Naopu etu Yesus nanggabe mata ira ante nanguli, “Majadimo nantuki nuapa to niparasaya komi!”
30 Kaliu-liu nabelomo mata ira rombaꞌa. Pade Yesus nantagi ira ante mpuꞌu-mpuꞌu. Niulina, “Neꞌe ntoto ratesa ka tau-tau ntanina nuapa to najadi ri jaꞌimu etu.”
31 Tapi sangga nalaipa nggari setu ira nompatolele kareba Yesus ri njumaongu bagia etu.
Yesus nompakabelo sambaꞌa tau nabobo
32 Sangga nalaipa rombaꞌa toburo paneꞌa, naria woꞌumo sambaꞌa tau nikeni mpaka ri jaꞌi Yesus. Tau etu nabobomo sabana nipesua seta.
33 Jadi tempo seta etu nipopalai Yesus nggari jaꞌina nasowamo iꞌa notesa. Nanggita kajadia etu nasumara mpuꞌumo todea sampe ira nanguli, “Kajadia ewa etu daꞌapa sanggani nikita ntau ri tana Israel eꞌi!”
34 Tapi nangulimo tau-tau to Parisi ri setu, “A, tau eꞌi aga nompopalai seta ante kuasa nggari jaꞌi Magau nu Seta mboto!”
YESUS NOMPATUDUKI ANAGURUNA (9:35-11:1)
Naasi mata Yesus nanggita todea to daꞌa nomparasaya
35 Naopu etu nalaumo Yesus nompebutu ngata. Iꞌa nopaguru ri sapo-sapo mpodade ira bo nompatolele Kareba Belo to nanguli iwenumo ane Alatala moparenta ri dunia. Pade nipakabelona pura-pura tau to najuꞌa bo nalente korona.
36 Tempo Iꞌa nanggita todea, naasi mpuꞌumo matana, sabana nandasamo ira pade daꞌa ria tau nantulungi ira ewa bimba daꞌa ria topoewuna.
37 Pade nangulimo Yesus ka anaguruna, “Nadeamo tau nasadia mantarima Kareba Belo. Ira nasimbayu ewa pae to natasamo, namalamo rakato. Tapi tau topokato daꞌa nadeaka.
38 Sabana etu komi kana merapi ka Pue ntinalu etu ala Iꞌa mompakau tau malau mokato.”