Besi-besi to nantulungi Yesus
8
Daꞌa nasae nggari setu nalaumo Yesus nompebutu ngata nompatolele Kareba Belo iweꞌi: “Nompamulamo Pue Alatala noparenta ri dunia weꞌi-weꞌi.” Anaguruna sampulu rombaꞌa nalau mpasanggani-nggani ante Iꞌa, pade
2 naria woꞌu bara sakuya mbaꞌa besi to nantuki ira. Besi-besi etu to nipesua seta bopia bo nawela nompengaya juꞌa to nipakabelo Yesus. Sambaꞌa nggari jaꞌi ira nosanga ka i Maria Magdalena. Naria papitu seta nipopalai Yesus nggari jaꞌina.
3 Naria woꞌu Yohana rongo i Khuza, topomboli doi Magau Herodes. Pade naria woꞌu i Susana ante nadeapa besi ntanina. Ira nantuki Yesus bo nantulungi Iꞌa ante anaguru-anaguruna nggari mbara-mbara ira mboto.
Porapa ewa sambaꞌa toposawu
4 Nadea tau narata mpaka ri jaꞌi Yesus nggari bara sakuya ngata. Tempo nadeamo ira nasiromu Yesus nombatesa ka ira saongu porapa.
5 “Naria sambaꞌa tau nalau nosawu pae. Tempo iꞌa nosawu naria sanu pae nanawu ri wiwi jala, pade nilonggo ntau ante nitunggu tonji sampe naopu.
6 Naria woꞌu sanu pae nanawu ri bunggu watu-watu to nakura tanana. Pae etu natuwu tapi daꞌa nasaeka nalele sabana daꞌa naria ue nombabangga kalena.
7 Naria woꞌu sanu pae to nanawu raranggarui. Natuwumo karui etu mpasanggani-nggani ante pae, pade nangoo pae etu sampe namate.
8 Pade naria woꞌu sanu pae nanawu ri tana to naboyana pade nowua satu ngganina kadeana.”
Naopu notesa iwetu nangulimo Yesus, “Isema-sema naria talingana, epemo mpakabelo-belo tesaku eꞌi!”
9 Naopu etu nekutanamo topantuki-topantuki Yesus ka Iꞌa, “Nuapa batuana porapa etu?”
10 Nesonomo Yesus, “Komimo to nipaloga mangginjani tesa ewa Poparenta nu Alatala to nitabuniaka nggari lamba pamulana. Tapi tau ntanina nipatuduki ante porapa ala naupa ira mangantoaka daꞌa mamala ira manggita, pade naupa ira mangepe daꞌa mamala ira mangginjani batuana tesa etu.
11 Iweꞌimo batuana porapa etu. Pae etu Tesa nu Alatala.
12 Pae to nanawu ri wiwi jala nasimbayu ewa tau-tau to nangepe Tesa nu Alatala tapi Magau nu Seta narata tunggai nompakalinga rara ira nggari tesa to niepe ira ala neꞌe ira momparasaya pade rapakasalama.
13 Pae to nanawu ri bunggu watu-watu to nakura tanana nasimbayu ewa tau-tau to nangepe Tesa nu Alatala pade nantarima tesa etu ante nadamba rara. Tapi pomparasaya ira daꞌa naroso nasimbayu ewa tuja-tuja daꞌa naroso pokalena. Tempo Magau nu Seta narata mompesoba ira, nokanggauramo ira momparasaya.
14 Pae to nanawu raranggarui nasimbayu ewa tau-tau to nangepe Tesa nu Alatala. Tapi ira aga nasiwu-siwu nompekiri katuwu ira mboto pade ira aga naino ka doi pade madota matuwu masana ri dunia. Etu pura-pura nompakapii pekiri ira sampe Tesa nu Alatala daꞌa ria gunana riara nggatuwu ira.
15 Pae to nanawu ri tana to naboyana nasimbayu ewa tau-tau to nanoa bo nabelo rarana. Ira nangepe Tesa nu Alatala pade tesa etu niboli ira riara ntaꞌi. Tesa etu mpuꞌu-mpuꞌu nituki ira sampe nadea mpuꞌu wuana to nabelo riara nggatuwu ira.”
Porapa ewa poindo
16 “Daꞌa ria tau nantunju poindo niungona riara tonda atau ri wayo ranja mpaturu. Tapi poindo etu kana rabolina ri kalangana ala pura-pura tau to mesua riara njapo kana rawantana.
17 Etu nombagambara ka kita, pura-pura nuapa to nitabuniaka weꞌi-weꞌi kana rapakanoto banepiana, pade nuapa anu daꞌapa nanoto weꞌi-weꞌi kana matebonggaraka pade ranjani ntau banepiana.
18 Jadi pakabelo-belo iwenu komi mangepe Tesa nu Alatala, sabana isema mantarima Tesa etu kana ratambai ka iꞌa pangginjani ewa tesa etu. Tapi isema daꞌa mantarima Tesa etu, pangginjani Tesa etu to nipekirina ninjanina kana raala nggari jaꞌina.”
Indo bo sampesuwu-sampesuwu Yesus
19 Naria sanggani indona ante sampesuwu-sampesuwu Yesus narata mosintomu ka Iꞌa. Tempona etu daꞌa namala ira nosintomu ka Iꞌa sabana nadea tau nantalili Iꞌa nangepe tesana.
20 Naria sambaꞌa tau nalau nanguli ka Yesus, “Uma, naria indomu bo sampesuwu-sampesuwumu ri sawalikuna. Ira madota mosintomu ka Komi.”
21 Tapi nangulimo Yesus ka tau pura-pura, “Isema-sema mangepe Tesa nu Alatala pade mantuki nuapa to niulina, ira etumo indoku bo sampesuwu-sampesuwuku.”
Yesus nompopenonto poiri naramboso ante balumba bete
22 Naria sanggani Yesus ante anaguru-anaguruna nesawi sakaya. Pade niulina ka ira, “Kamaimo kita mosakaya mpaka ri sambote rano.” Pade nanggaliwomo ira.
23 Tempo ira nosakaya Yesus noturu nalumpi ri tatongo anaguru-anaguruna. Sampegoli naratamo poiri naramboso nantawui sakaya etu pade najadimo balumba bete. Nompamulamo ue rano nesua riara sakaya, sakedika ira matala.
24 Nanggita etu nalaumo anaguruna nombalike Yesus pade nanguli, “Guru, Guru! Nandasamo kita!”
Nangepe tesa etu nembangumo Yesus pade nomparenta poiri ante balumba etu, “Poiri ante balumba, penontomo!” Pade nenontomo poiri ante balumba etu pade rano etu najadi nalino.
25 Pade nangulimo Yesus ka anaguru-anaguruna, “Nokuya komi daꞌa nomparasaya Aku?”
Nasumara ante naekamo anaguru-anaguruna etu. Pade notesamo ira sambaꞌa bo sambaꞌa, “Isema tanu kakonona tau eꞌi sampe poiri ante balumba nantuki parentana?”
Yesus nompakabelo sambaꞌa tau nipakagila nu seta
26 Naopu etu Yesus ante anaguru-anaguruna nosakaya sampe narata ri bagia to Gerasa, to nosinjambote ante Bagia Galilea.
27-29 Tempona Yesus nanaꞌu ri tana Iꞌa nitotuaka sambaꞌa langgai nggari ngata etu to nipesua seta. Nasaemo iꞌa nelaya. Daꞌa mana madota iꞌa metoꞌo ri sou, iꞌa aga madota metoꞌo ri dayo-dayo. Nadea ngganimo iꞌa nipesua seta sampe naupa palena ante kadana nipoꞌu rante bo iꞌa nikatono mpuꞌu-mpuꞌu, danamalapa rante etu nidapana, pade iꞌa nipasuꞌu seta-seta nalau riara karawa baina.
Sangga nikitana Yesus nalaumo iꞌa nongare ri jaꞌina. Pade Yesus nompakau seta nesuwu nggari jaꞌi ntau etu. Nangepe etu tau to nipesua seta etu notimbakotu ri ngayo Yesus pade nekakai, “Yesus, Ana nu Alatala to Neliu Nggalanga. Nuapa urusamu ante aku? Aku merapi neꞌe rapandasa aku!”
30 Pade nekutanamo Yesus ka tau etu, “Isema sangamu?”
Nesonomo tau etu, “Sangaku ‘Njobu-njobu.’” Niulina iwetu sabana nadea mpuꞌu seta riarana.
31 Naopu etu seta-seta etu nerapi ante mpuꞌu-mpuꞌu ka Yesus, “Neꞌe rapakau kami malau rapandasa Alatala sampe ri kasae-saena!” a
32 Namunji ri setu nadea wawu nangelo panggonina ri kente-kente nu bulu. Jadi seta-seta etu nerapi mpuꞌu-mpuꞌu ri jaꞌi Yesus ala ira rapaloga mesua ri jaꞌi wawu etu. Nangepe etu Yesus nompaloga ira.
33 Jadi nesuwumo seta-seta etu nggari jaꞌi ntau etu nolinja nesua ri jaꞌi wawu-wawu. Naopu etu nangowamo wawu-wawu etu notingganawu nggari wiwi bingge mpaka riara rano sampe namate natala.
34 Tempo tau topanggatono wawu etu nanggita nuapa to najadi ri wawu etu, nalaumo ira nantesa kajadia etu riara ngata ira pade riara ngata-ngata ntanina to namosu ri setu.
35 Nangepe tesa ira nalaumo tau dea nanggita nuapa to najadi. Tempo ira narata ri jaꞌi Yesus nikita ira tau to nipesua seta etu natikabasakamo nggari jaꞌi seta-seta etu. Iꞌa nekatoko namunji kada Yesus. Nopakeamo iꞌa pade nabelo balimo pekirina. Nanggita etu naeka puramo ira.
36 Ira to nanggita kajadia etu notesa ka tau-tau ntanina iwenu tau etu nipakabelo Yesus.
37 Pade pura-pura tau riara Bagia Gerasa etu nerapi ante mpuꞌu-mpuꞌu rara ka Yesus ala Iꞌa mompalasi bagia ira etu sabana naeka puramo ira. Jadi nalaimo Yesus nesawi sakaya manjili.
38 Tau to nikabasaka nggari jaꞌi seta-seta etu nerapi ante mpuꞌu-mpuꞌu ri jaꞌi Yesus ala iꞌa woꞌu mamala malau mpasanggani ante Yesus.
Tapi nangulimo Yesus ka tau etu,
39 “Panjilimo, patolele ka tau nuapa to nikawia Alatala ri jaꞌimu.” Pade nalaumo tau etu notesa ka pura-pura tau riara ngata nuapa to nikawia Yesus ri jaꞌina.
Tesa ana Yairus ante besi to nanggabe baju Yesus
40 Tempo Yesus nanjili nggari sambote rano Iꞌa nitomunaka tau dea ante nadamba sabana ira aga nompopea-pea karatana.
41 Tempo etu naratamo sambaꞌa topanggeniaka ri sapo mpodade nto Yahudi to nosanga ka Yairus. Notimbakotumo iꞌa ri ngayo Yesus pade niperapina ante mpuꞌu-mpuꞌu rarana ala Yesus malau ri sapona,
42 sabana anana sambaꞌa lau, etumo anana besi noumuru sampulu rompae najuꞌa ntomo. Nangepe etu nalaumo Yesus mpaka ri sapona.
Tempo ira nalau mpaka gusaꞌa nadea tau nosimpii nawela nombawinggu Yesus.
43 Ri setu naria woꞌu sambaꞌa besi to sampulu rompaemo nangote lei. Daꞌa ria to namala mompakabelo iꞌa.
44 Besi etu nompakamosu Yesus nggari talikuna pade nikabena wiwi baju Yesus. Tempona etu kaliu-liu nenontomo lei to niote besi etu.
45 Tempo etu nekutanamo Yesus, “Isema nanggabe Aku paneꞌa?”
Pura-pura tau nesapu, pade nangulimo i Petrus, “Guru, ri seꞌi nadea tau nosimpii ka kita. Komi nawela niwinggu ira.”
46 Tapi nangulimo Yesus, “Naria tau nanggabe Aku paniꞌa. Ninjaniku sabana nirasaiku naria kuasa nesuwu nggari jaꞌiku.”
47 Sangga ninjani besi etu powiana paniꞌa daꞌa namala ratabuniaka, naratamo iꞌa ante naeka pade nekadede ri ngayo Yesus. Pade nitesana ka tau dea ri setu, “Eꞌimo sabana aku nanggabe baju Yesus. Sampulu rompaemo aku nangote lei, tapi naopu aku nanggabe baju Yesus kaliu-liu nenontomo lei to nioteku.”
48 Naopu etu notesamo Yesus ka iꞌa, “Anaku, sabana komi nomparasaya Aku, nabelomo juꞌamu. Patinggulimo komi ante mabelo.”
49 Tempona Yesus danotesa ka besi etu, naratamo sambaꞌa tau nggari sapo Yairus. Nanguli iꞌa ka Yairus, “Uma, namatemo anamu. Neꞌe mana mompakasusa Guru malau mpaka ri sapomu.”
50 Tapi tempo Yesus nangepe tesa etu, nangulimo Iꞌa ka Yairus, “Neꞌe maeka! Parasayamo Aku, pade anamu kana matuwu.”
51 Sangga naratapa ira ri sapo Yairus, Yesus daꞌa nompaloga tau nesua ri tombi ngana etu ante Iꞌa. Aga i Petrus, Yohanes, Yakobus bo indo uma nu ngana etu namala nesua nosanggani ante Iꞌa.
52 Tempo etu pura-pura tau ri setu notumangi pade nageo mpajea nantangi ngana etu sabana namatemo iꞌa. Tapi nangulimo Yesus ka ira, “Neꞌe mana komi motumangi! Ngana etu daꞌa namate, iꞌa aga napisi.”
53 Nangepe etu ira aga nompongiri-ngiri Yesus, sabana ninjani ira ngana besi etu mpuꞌu-mpuꞌu namatemo.
54 Tapi Yesus nalau nesua nanjoko pale ngana etu pade niulina, “Ngana, pembangumo!”
55 Tempo etu woꞌu narata bali nosa nu ngana etu, pade kaliu-liu iꞌa nembangu. Naopu etu Yesus nompakau indo umana mompakoni ngana etu.
56 Sangga nanggita kajadia etu nasumara mpuꞌumo totuꞌa ngana etu. Tapi Yesus nombatagi ira, “Neꞌe ratesa ka tau ntanina nuapa to najadi ri seꞌi.”