Yesus nompakabelo sambaꞌa tau nipakagila nu seta
5
Naopu etu naratamo Yesus ante anaguru-anaguruna ri sambote Rano Galilea ri bagia to Gerasa.
2 Iwetu Yesus nanaꞌu nggari sakaya Iꞌa nitomunaka sambaꞌa langgai to nesuwu nggari tatongo dayo. Langgai etu nipakagila nu seta
3 pade iꞌa aga netoꞌo ri tatongo dayo-dayo. Iꞌa mana namala nipoꞌu ntau nau damo nipoꞌu ante rante.
4 Nadea ngganimo kadana bo palena nipoꞌu ntau ante rante. Tapi rante nipompoꞌu iꞌa etu naopu pura nidapana, pade ase to nipasua nipombabalanggu kadana nikotona pura. Daꞌa ria kamba sambaꞌa tau to nompakule mantaꞌamaka iꞌa.
5 Eo wengi iꞌa aga nalau-nalau ri dayo bo ri bulu-buluna ante nongare-ngare pade nompakabela korona mboto ante watu.
6 Tempo Yesus danakawao nikitana, nangowamo iꞌa mpaka ri jaꞌina pade nekadede nombasomba Yesus.
7 Nongaremo iꞌa ante suara namangga, “Yesus, Ana nu Alatala to Neliu Nggalangana, nuapa urusamu ante aku eꞌi? Aku merapi riara sanga Alatala, neꞌe mompandasa aku!”
8 Niulina iwetu sabana Yesus nompakau seta etu iweꞌi: “Seta to najaꞌa, pesuwumo iko nggari jaꞌi ntau eꞌi!”
9 Pade nekutanamo Yesus ka tau etu, “Isema sangamu?”
Nesonomo tau etu, “Sangaku ‘Njobu-njobu,’ sabana nadea mpuꞌu kami.”
10 Pade mpanggani-nggani tau etu nerapi ante mpuꞌu-mpuꞌu rarana ka Yesus ala seta-seta etu neꞌe rapopalaina nggari bagia etu.
11 Namosu ante petoꞌo etu nadea mpuꞌu wawu nangelo panggonina ri kente nu bulu.
12 Jadi seta-seta riara ntau etu nerapi ka Yesus, “Pakaumo kami mesua riara wawu-wawu etu!”
13 Nangulimo Yesus, “Kaumo gusaꞌa!” Jadi nesuwumo seta-seta etu nggari jaꞌi ntau paneꞌa pade nesuamo ira riara wawu-wawu nadea etu. Sangga nipesua seta-seta, nangowamo wawu-wawu etu notingganawu nggari wiwi bingge mpaka riara rano sampe namate natala puramo. Kadea nu wawu etu kira-kira ronjobu onguna.
14 Tempo tau-tau to nombajagai wawu-wawu nanggita nuapa to najadi nangowamo ira nompatolele kajadia etu riara ngata ira pade riara ngata-ngata to namosuna. Sangga nangepe tesa etu, nalaumo tau dea nanggita nuapa to najadi.
15 Tempo ira narata ri jaꞌi Yesus nikita ira tau to nipesua njobu-njobu seta etu nekatoko ri setu. Nopakeamo iꞌa pade nanoto balimo pekirina. Nanggita etu naeka puramo ira.
16 Pade tau-tau to nanggita kajadia etu notesa ka tau-tau ntanina nuapa to najadi ri jaꞌi ntau to nipesua seta pade nuapa woꞌu to najadi ri jaꞌi wawu-wawu.
17 Naopu etu pue ngata ri setu nerapi ante mpuꞌu-mpuꞌu ka Yesus ala Iꞌa mompalasi bagia ira etu.
18 Tempo Yesus nesawi sakaya naratamo tau to nipesua seta paneꞌa nerapi ante mpuꞌu-mpuꞌu ala iꞌa mamala malau mpasanggani-nggani ante Yesus.
19 Tapi Yesus daꞌa nompaloga iꞌa. Niulina, “Neꞌe. Panjilimo komi mpaka ri jaꞌi sampesuwumu pade tesa ka ira nuapa to nipowia i Pue ka komi. Uli ka ira iwenu i Pue naasi matana nanggita komi.”
20 Jadi nalaumo tau etu pade nompamulamo iꞌa mompatolele ka tau-tau ri Bagia Sampulu Ngata ewa nuapa to nipowia Yesus ka iꞌa. Nangepe tesana etu nasumara puramo tau.
Tesa ana Yairus ante besi to nanggabe baju Yesus
21 Pade Yesus newote bali ante sakaya mpaka ri sambote rano. Sangga narata ri setu nadea mpuꞌu tau nasiromu nantaguni Iꞌa. Tempo Iꞌa da ri wiwi rano
22 naratamo sambaꞌa topanggeniaka ri sapo mpodade nto Yahudi to nosanga ka Yairus. Sangga nikitana Yesus naratamo iꞌa nekadede ri ngayona
23 pade nerapi ante mpuꞌu-mpuꞌu ri jaꞌina, “Uma, anaku besi najuꞌa ntomo, sakedika namate. Kuperapi ane mamala kamaimo ri jaꞌina pade dikamo pale Komi ri korona ala iꞌa mabelo bali pade daꞌa mamate!”
24 Nangepe etu nalaumo Yesus nosanggani-nggani ante Yairus. Nadea mpuꞌu tau nantuki ira sampe nosiaso-aso nombawinggu Yesus.
25 Ri setu naria sambaꞌa besi to najuꞌa nangote lei sampulu rompaemo kasaena.
26 Mpanggani-ngganimo iꞌa nipakuli sando-sando sampe naopu puramo mbara-mbara to naria ri jaꞌina nipobaluna nipombabayari sando-sando etu. Tapi daꞌa ntoto ria gunana. Juꞌana aga nantambai kajaꞌana.
27 Tempo besi etu nangepe kareba Yesus, nalaumo iꞌa ri tatongo ntau dea nompakamosu Yesus nggari purina. Pade nikabena baju Yesus,
28 sabana nipekirina, “Nau aga bajuna kukabe, kana mabelo juꞌaku.”
29 Sangga nanggabe baju Yesus, kaliu-liu nenontomo lei to niotena, pade nirasaina riara korona nabelomo juꞌana.
30 Tempo etu woꞌu Yesus nombarasai naria kuasa nesuwu nggari jaꞌina. Jadi Iꞌa nompeili tau dea etu pade nekutana, “Isema nanggabe bajuku paneꞌa?”
31 Nesonomo anaguru-anaguruna ka Iꞌa, “Guru, nikita Komi mbotomo tau dea damo nosiaso eꞌi. Iwenu sampe Komi nekutana, ‘Isema nanggabe Aku?’”
32 Tapi Yesus kana nompenoto ri ntalilina mangelo tau to nanggabe Iꞌa.
33 Besi etu ninjanina nuapa to najadi ri korona. Jadi ante nolalete bo naeka rarana nekadedemo iꞌa ri ngayo Yesus pade nipangakuna ka Iꞌa pura-pura nuapa to najadi paneꞌa.
34 Nangepe etu nangulimo Yesus ka Iꞌa, “Anaku, sabana komi nomparasaya Aku nabelomo juꞌamu. Panjilimo ante mabelo. Daꞌa mana komi majuꞌa iwetu.”
35 Tempo Yesus danotesa, naratamo bara sakuya mbaꞌa tau nggari sapo Yairus, topanggeniaka ri sapo mpodade etu. Nangulimo ira ka Yairus, “Uma, namatemo anamu. Nabelopa neꞌe mana mompakasusa guru malau mpaka ri sapomu.”
36 Tapi Yesus daꞌa nompariara tesa ira etu. Niulina ka Yairus, “Neꞌe maeka! Parasayamo Aku!”
37 Pade daꞌa nipaloga Yesus tau dea nantuki Iꞌa mpaka ri sapo Yairus. Aga ira i Petrus, Yakobus bo Yohanes tuaꞌi Yakobus to nipalogana mantuki Iꞌa.
38 Tempo ira narata ri sapo Yairus, Yesus nanggita tau-tau nakanano mpuꞌu. Naria tau notumangi bo nantete ante suara namangga.
39 Nesuamo Yesus raranjapo pade niulina ka ira, “Nokuya komi nakanano bo nantete iwetu? Ngana etu daꞌa namate. Iꞌa aga napisi.”
40 Nangepe etu ira aga nompongiri-ngiri Iꞌa.
Tapi Yesus nompopalai ira pura-pura nggariara njapo etu. Pade nipakenina indo uma nu ngana etu ante tolumbaꞌa anaguruna to nosanggani ante Iꞌa, pade nesuamo ira ri tombi ngana etu.
41 Pade nisoko Yesus pale ngana besi etu ante nanguli, “Talita kum.” Batuana, “Ngana besi, kuuli ka iko, pembangumo.”
42 Kaliu-liu nembangumo ngana besi etu pade nompamulamo iꞌa nolumako. Umuru nu ngana besi etu sampulu rompaemo. Nanggita kajadia etu nogumaa mpuꞌumo ira ri setu.
43 Pade Yesus nombatagi ira, “Neꞌe ntoto motesa ka tau ntanina nuapa to najadi ri seꞌi!” Pade niparentana woꞌu ala ngana besi etu rawai panggoni sakedi.