Porapa ewa sambaꞌa toposawu pae
4
Naria sanggani Yesus nompamula woꞌumo nopaguru ri wiwi rano. Ri setu nadea mpuꞌu tau narata nantatiku Iꞌa. Sabana etu Iꞌa nalau nekatoko riara saongu sakaya to nolanto ri bunggu ue rano, pade tau dea nenggore ri kabatana.
2 Pade nompamulamo Iꞌa nompatuduki mpengele-ngele pepatuduki ka ira ante nompake porapa. Riara porapana etu niulina iweꞌi:
3 “Epemo! Naria sambaꞌa tau nalau nosawu pae.
4 Tempo iꞌa nosawu naria sanu pae nanawu ri wiwi jala. Pade naratamo tonji-tonji nantunggu pae etu sampe naopu.
5 Naria woꞌu sanu pae nanawu ri bunggu watu-watu to nakura tanana. Pae etu nasasinta natuwu sabana tana aga sakedi lau.
6 Tapi sangga napanepa eo nalelemo pae lako natuwu etu. Nangau puramo sabana daꞌa nandalaka kalena.
7 Pade naria woꞌu sanu pae nanawu raranggarui. Natuwumo karui etu nangoo pae etu sampe daꞌa ria aselena.
8 Pade naria woꞌu sanu pae nanawu ri tana to naboyana. Pae etu naboya pade nowua nabelo. Naria to nowua tolumpulu nggani kadeana, naria sanu onompulu nggani pade naria woꞌu nowua satu nggani kadeana.”
9 Pade nanguli woꞌumo Yesus ka ira, “Isema-sema naria talingana, epemo mpakabelo-belo tesaku eꞌi.”
Patuju Yesus nompatuduki tau dea ante porapa
10 Tempo Yesus damo njambaꞌana naratamo topantuki-topantuki Iꞌa ante sampulu rombaꞌa anaguruna nerapi ala Iꞌa mompakanoto ka ira batuana porapa etu.
11 Nangulimo Yesus ka ira, “Komimo to nipaloga mangginjani tesa ewa Poparenta nu Alatala to nitabuniaka nggari lamba pamulana. Tapi ane tau-tau ntanina, ira kana rapatuduki ante porapa-porapa
12 ala
‘Naupa ira bate-batena manggita
daꞌa mesua ri pekiri ira,
naupa ira bate-batena mompetalinga
daꞌa ranjani ira batuana tesa etu.
Etu majadi ala neꞌe ira majea
pade raampungi nu Alatala.’” (Yes. 6:9-10)
Yesus nompakanoto batuana porapa ewa toposawu pae
13 Pade nangulimo Yesus ka ira, “Ane komi daꞌa namala mangginjani batuana porapa eꞌi iwenu komi mangginjani porapa-porapa ntanina?
14 Toposawu pae etu nirapaka ewa tau nompatolele Tesa nu Alatala.
15 Pae to nanawu ri wiwi jala nasimbayu ewa tau-tau to nangepe Tesa nu Alatala, tapi kaliu-liu narata Magau nu Seta nangala tesa etu to lako nesua riara pekiri ira.
16 Pae to nanawu ri bunggu watu-watu to nakura tanana nasimbayu ewa tau-tau to nangepe Tesa nu Alatala pade kaliu-liu nantarima tesa etu ante nadamba rara.
17 Tapi Tesa etu daꞌa norali riara ntaꞌi ira sampe ira daꞌa naroo nomparasaya. Tempo ira nombarata kasusa bo pepandasa sabana nomparasaya Tesa nu Alatala etu, kaliu-liu ira nokanggaura.
18 Pade pae to nanawu raranggarui nasimbayu ewa tau-tau to nangepe Tesa nu Alatala pade nantarima Tesa etu.
19 Tapi ira nakini rara nantora katuwu ira ri dunia eꞌi. Ira aga nompekiri kakalumana pade ira naino ka mpengele-ngele mbara-mbara ri dunia. Pura-pura etu nombalawa Tesa nu Alatala sampe daꞌa ria aselena riara nggatuwu ira.
20 Pade pae to nanawu ri tana to naboyana nasimbayu ewa tau-tau to nangepe Tesa nu Alatala pade nantarima Tesa etu riara ntaꞌi ira. Kaopuna naria asele nggari Tesa etu riara nggatuwu ira. Naria sanu tolumpulu nggani kadeana, naria onompulu nggani kadeana pade naria sanupa satu nggani kadeana.”
Porapa ewa poindo
21 Pade nanguli woꞌumo Yesus ka ira, “Natantumo poindo daꞌa nikeni rara njapo pade niungo riara tonda bara ri wayo ranja mpaturu. Tapi poindo etu kana raboli ri kalangana.
22 Sabana pura-pura nuapa to nitabuniaka weꞌi-weꞌi kana rapakanoto banepia, pade pura-pura nuapa anu daꞌapa nanoto ka tau weꞌi-weꞌi kana ranjani ntau pura-pura banepiana.
23 Isema-sema naria talingana, epemo mpakabelo-belo tesaku eꞌi!”
24 Pade nanguli woꞌumo Yesus ka ira, “Pariara ntaꞌimo nuapa to niepe komi! Ane komi mpuꞌu-mpuꞌu mompasimbuku mompariara ntaꞌi Tesa etu, kana ratambai ka komi pangginjani ewa Tesa etu.
25 Sabana isema-sema mompariara ntaꞌi Tesa nu Alatala kana ratambai ka ira pangginjani ewa Tesa etu. Tapi isema-sema daꞌa mompariara ntaꞌi Tesa nu Alatala etu, pangginjani Tesa etu to naria ri jaꞌina kana raala nggari jaꞌina.”
Pantambai kadea nu todea riara Poparenta nu Alatala nggari Alatala mboto daꞌa manusia
26 Pade nangulimo Yesus, “Pantambai kadea ntau to majadi todea riara Poparenta nu Alatala nasimbayu ewa sambaꞌa tau nosawu ri tinaluna.
27 Tempo nggawengina iꞌa naturu. Tempo eona iꞌa nembangu pade pae to nisawuna nantambai eona nantambai kabetena, naupa daꞌa ninjanina iwenu sampe etu najadi.
28 Tana etu mbotomo to nompowia pae etu matuwu. Pamulana nesuwu kadana pade bulina pade panggaopuna wuanamo.
29 Ane natasamo pae nompamula tau etu nokato sabana temponamo mokato.”
Porapa ewa wua kayu to nakedina
30 Nanguli woꞌumo Yesus, “Pantambai kadea ntau to majadi todea riara Poparenta nu Alatala namala rapakasimbayu ewa nuapa? Porapa nuapa kupake mompakanoto etu?
31 Etu nasimbayu ewa saongu wua kayu nakedi mpuꞌu to nituja ri tinalu ntau. Wua kayu etu to neliu nggakedina nggari pura-pura wua kayu ri dunia.
32 Tapi ane nitujamo pade natuwupa, iꞌamo to neliu nggabetena nggari tuja-tuja ntanina. Raꞌa-raꞌana majadi mabete sampe tonji-tonji marata mowia jumuna ri kauluna.”
33 Iwetumo Yesus nompaguru tau dea ante nompake nadea porapa ewa etu nantuki pompakule ira mantarima tesa etu.
34 Iꞌa bate-batena nompake porapa ane notesa ka tau dea. Tapi tempo Iꞌa nosanggani-nggani ante anaguruna Iꞌa notarangga mpakanoto pura-pura tesana ka ira.
Yesus nompopenonto poiri naramboso bo balumba-balumba bete
35 Ri kaede eo etu woꞌu nangulimo Yesus ka anaguru-anaguruna, “Kamaimo kita mosakaya mpaka ri sambote rano eꞌi.”
36 Jadi anaguru-anaguru Yesus nompalasi tau dea pade nesawi sakaya to nipesawi Yesus. Pade nalaumo ira mpasanggani-nggani ante Iꞌa. Naria bara sakuya ongu sakaya ntanina nosanggani-nggani ante ira.
37 Tempo ira nosakaya naratamo poiri naramboso mpuꞌu pade nompamulamo balumba-balumba bete nombarumpa sakaya ira sampe ue rano nesua riarana sakedika ira natala.
38 Tempo etu Yesus naturu ante nompake luna ri bagia puri nu sakaya etu. Jadi nalaumo anaguru-anaguruna nombalike Iꞌa. Nangulimo ira ka Iꞌa, “Guru, nokuya Komi nompalamba kita matala?”
39 Nangepe etu nembangumo Yesus pade nomparenta poiri bo balumba-balumba bete, “Penontomo bo kalinomo!” Naopu etu nenontomo poiri pade naotomo ue rano etu.
40 Pade nangulimo Yesus ka anaguruna, “Nokuya komi naeka? Nokuya komi daꞌa nomparasaya Aku?”
41 Nanggita kajadia etu naeka mpuꞌumo anaguru-anaguruna. Nosimpekutanamo ira sambaꞌa bo sambaꞌa, “Isema tanu kakonona tau eꞌi sampe poiri bo balumba nantuki parentana?”