Kita kana majea nggari silakata
13
Tempona etu naria tau notesa ka Yesus ewa nuapa to najadi ri jaꞌi bara sakuya mbaꞌa to Galilea. Ira nipatesi Gubernur Pilatus tempona ira nanggeni pesomba ka Alatala ri Sapo Mpepue.
2 Naopu nangepe tesa etu nangulimo Yesus, “Nipekiri komi to Galilea etu nipatesi sabana silaka ira neliu nggadea nggari to Galilea ntanina.
3 Tapi daꞌa ntoto nakono! Toramo! Ane komi daꞌa majea nggari silakamu komi woꞌu kana rapatesi pura.
4 Tora komimo tau sampulu walumbaꞌa to namate ri Siloam tempona ira nirumpi sapo to nalangana. Nipekiri komi kajadia etu nantujuraka silaka ira neliu nggadea nggari pura-pura tau ntanina to netoꞌo ri ngata Yerusalem etu.
5 Tapi daꞌa ntoto nakono! Sangganipa kuuli ka komi, ane komi daꞌa majea nggari silakamu, natantumo komi woꞌu kana rapatesi.”
Porapa kayu ara to daꞌa nowua
6 Naopu etu Yesus nombatesa woꞌumo saongu porapa iweꞌi: “Naria sampuꞌu kayu ara nituja ri tinalu ntau. Pade naria sanggani pue ntinalu etu nalau nangelo wua nggari kayu etu. Narata ri tinalu nielona wua kayu etu tapi daꞌa ria kamba saongu wuana niratana.
7 Jadi niulina ka topanggatono tinalu etu, ‘Kita weꞌi! Tolumpae ka eꞌimo aku narata nangelo wua nggari kayu eꞌi, tapi daꞌa ria kamba saongu wuana nirataku. Agina ratowo kayu eꞌi. Daꞌa ria gunana, aga nompakarugi tana.’
8 Tapi nesonomo topanggatono tinalu etu, ‘Uma, rapakambata ntani ruru kayu eꞌi matuwu sampaepa. Aku mombatonggo tana ri puꞌuna pade mombapupu mompakaboya iꞌa.
9 Rakitata. Bara mpae marata iꞌa mowua. Tapi ane daꞌa mowua kayu eꞌi kana ratowota.’”
Yesus nompakabelo sambaꞌa besi nabunggu tempo Eo Mpenonto
10 Tempo Eo Mpenonto Yesus nopaguru riara saongu sapo mpodade.
11 Ri setu naria sambaꞌa besi to najuꞌa sampulu walumpaemo kasaena apa nipesua seta to nompakajuꞌa iꞌa. Iꞌa nabunggu daꞌa namala nekanggore nanoa.
12 Tempona Yesus nanggita besi etu Iꞌa nompokio pade notesa ka iꞌa, “Indo, weꞌi-weꞌi nabelomo juꞌamu.”
13 Pade nidikana palena ri koro nu besi etu pade kaliu-liu nanoamo koro nu besi etu, pade nompamulamo iꞌa nombatoiya Alatala.
14 Tapi tempo topanggeniaka ri sapo mpodade etu nanggita Yesus nompakabelo tau najuꞌa etu ri Eo Mpenonto, naraumo rarana. Pade niulina ka todea ri setu, “Riara santipa naria aono eo to nipakatantu ka kita nanggawia. Kamaimo komi rapakabelo ri eo-eo etu, aga neꞌe ri Eo Mpenonto!”
15 Nangepe tesa etu notesamo Yesus ri jaꞌi topanggeniaka ri sapo mpodade etu, “Topebagiu tanu komi! Tempo Eo Mpenonto komi pura-pura nombakabasaka japimu bara jaramu pade nikeni nesuwu rapopoinu.
16 Ri seꞌi weꞌi-weꞌi naria sambaꞌa besi, muli Abraham, to nipesua seta sampulu walumpaemo kasaena. Natantumo iꞌa woꞌu masipato rakabasaka nggari kuasa Magau nu Seta etu ri Eo Mpenonto!”
17 Pesono Yesus etu nompakaeya mata pura-pura balina ri setu. Tapi pura-pura tau ntanina nadamba rara nanggita pura-pura anu nabelo to nikawia Yesus etu.
Rongele porapa to nompakanoto tau-tau nomparasaya kana mantambai kadeana
18 Naopu etu nangulimo Yesus, “Pantambai kadea ntau to majadi todea riara Poparenta nu Alatala namala rapakasimbayu ewa nuapa? Porapa nuapa kupake mompakanoto etu?
19 Etu nasimbayu ewa saongu wua kayu to nakedi mpuꞌu to niala sambaꞌa tau nitujana ri tinaluna. Wua kayu etu natuwu pade najadi sampuꞌu kayu bete. Pade nadea tonji narata nowia jumuna ri lolo nggayu etu.”
20 Pade nanguli woꞌumo Yesus, “Porapa nuapa ntanina mamala kupake mompakanoto pantambai kadea ntau to majadi todea riara Poparenta nu Alatala?
21 Etu nasimbayu ewa ragi to niala sambaꞌa besi pade niposigalona ante patampulu lite labu nu gando. Kaopuna pura-pura labu nu gando etu nebombo.”
Jala mesua ri Poparenta nu Alatala nirapaka ewa pewobo to napii
22 Tempo Yesus nompapola polumakona mpaka ri ngata Yerusalem Iꞌa noliu ri kota-kota bo ngata-ngata pade nopaguru.
23 Ri saongu ngata naria sambaꞌa tau narata nekutana ka Yesus, “Uma, aga sakedi lau tau to rapakasalama?”
Nesonomo Yesus ka tau-tau ri setu,
24 “Komi pura-pura kana mompasimbuku ante mpuꞌu-mpuꞌu mesua ri pewobo to napiina. Sabana toramo! Nadea tau kana mompasimbuku mesua tapi daꞌa ria mamala.
25 Kana marata tempona pue njapo membangu mombalawa pewobo. Pade komi aga menggore ri sawalikuna mantinggede pewobo etu ante manguli, ‘Uma, bea ka kami pewobo!’ Tapi pue njapo etu kana mesono, ‘Daꞌa ninjaniku komi pade nggari umba komi!’
26 Pade komi kana manguli woꞌumo, ‘Kami nanggoni nanginu mpasanggani-nggani ante komi, pade komi woꞌu nopaguru ri tatongo ngata-ngata kami nggaolu!’
27 Tapi pue njapo etu kana mesono woꞌumo ka komi, ‘Daꞌa ninjaniku nggari umba komi. Palaimo komi nggari seꞌi! Komi pura-pura tau najaꞌa!’
28 Pade tempo komi manggita Abraham, Ishak ante Yakub nosanggani-nggani ante pura-pura nabi nosusa madamba-damba ri suruga, komi kana mageo bo mosinggiki baga ante kasusa rara sabana komi aga nipasuma nggari setu.
29 Tau-tau ntanina daꞌa to Yahudi kana marata nggari umba-umba ri dunia mantuki posusa Alatala ri suruga etu. Ira marata nggari pebuluna bo kasolona, pade nggari tasina bo puluna.
30 Toramo! Tempona etu tau ri purina etu kana majadi ri koluna, pade tau ri koluna kana majadi ri purina.”
Yesus nantangi pue ngata Yerusalem
31 Tempona etu woꞌu naria bara sakuya mbaꞌa to Parisi narata ri jaꞌi Yesus pade nanguli, “Komi kana malai nggari seꞌi, sabana Magau Herodes madota mompatesi Komi!”
32 Tapi nesonomo Yesus, “Kau uli ka tau topebagiu etu iweꞌi: ‘Aku daꞌapa malai nggari seꞌi sabana eo eꞌi ante naile Aku mompopalai seta-seta pade mompakabelo tau-tau najuꞌa. Danepuapa Aku mompakaopu panggawiaku.’”
33 Pade nangulimo Yesus ka tau ri setu, “Naupa iwetu aku kana mompapola woꞌu polumakoku mpaka ri ngata Yerusalem eo eꞌi, naile ante nepua, sabana daꞌa nabelo ane sambaꞌa nabi rapatesi ri petoꞌo ntanina nggari ngata Yerusalem.
34 Umba komi to Yerusalem, pue ngata Yerusalem! Komi nompatesi nabi-nabi pade komi nombarempe ante watu tau-tau to nisuro Alatala mpaka ri jaꞌimu! Nadea ngganimo Aku madota manggalendu komi pura-pura nasimbayu ante manu nombaruta anana, tapi komi daꞌa madota.
35 Epemo! Alatala mana nosanggani ante komi. Kuuli ka komi, komi mana manggita Aku sampe Aku marata bali ri dunia pade komi mantotoaka Aku ante manguli, ‘Perapi Pue mombagane Magau to narata niposumba Alatala.’”