Yesus nompakabelo sambaꞌa tau najuꞌa
14
Tempo Eo Mpenonto nalaumo Yesus nanggoni ri sapo sambaꞌa topanggeniaka nto Parisi. Pura-pura tau to naria ri setu nanggita bo nompariara Yesus.
2 Sampegoli naratamo sambaꞌa tau najuꞌa ri ngayo Yesus. Kadana ante palena nebangga puramo.
3 Nanggita tau etu nekutanamo Yesus ri jaꞌi guru-guru agama ante tau-tau to Parisi to naria ri setu, “Nantuki Atura-atura agama mamala kita mompakabelo tau najuꞌa tempo Eo Mpenonto bara daꞌa?”
4 Guru-guru agama ante tau-tau to Parisi etu aga nekalino, daꞌa ria ira nesono. Pade Yesus nanjoko pale ntau to najuꞌa etu pade nipakabelona, pade nipakauna nalai.
5 Naopu etu niulina ka guru-guru agama ante tau-tau to Parisi etu, “Ane maria ana komi bara japi komi manawu riara lowu tempo Eo Mpenonto, natantumo komi masasinta malau mangonggotaka ngana etu bara japi etu nggariara lowu eo etu woꞌu, naupa eo etu Eo Mpenonto!”
6 Naopu nangepe tesa Yesus etu, daꞌa ria sambaꞌa to namala nesono.
Pokainggu tau to naede rarana
7 Tempona etu Yesus nanggita torata-torata ri posusa to Parisi etu nompelisi pekatoko-pekatoko to neliu nggabelona. Sabana etu Iꞌa nompatuduki ira pura-pura ante saongu porapa iweꞌi:
8 “Ane rapana komi ragaga malau mpaka ri posusa neꞌe komi malau mekatoko ri ompa to nipakasadia ka totuꞌa. Sabana bara maria sambaꞌa tau ntanina ri setu to neliu nibila.
9 Pade pue njapo to nombagaga komi rombaꞌa kana marata pade manguli ka komi, ‘Merapi ampu, petoꞌo eꞌi nipakasadia ka torata eꞌi. Komi kana molinja ri petoꞌo ntanina.’” Pade niuli Yesus, “Natantu kana maeya mata komi molinja mekatoko ri talikuna.
10 Sabana etu ane komi ragaga malau mpaka ri posusa, pelisimo petoꞌo ri talikuna ala pue njapo marata manguli ka komi, ‘Wegaku, kamai mekatoko ri ompa ntotuꞌa eꞌi.’ Ante inggumu etu komi kana rabila ri ngayo pura-pura torata ntanina.
11 Sabana butu mbaꞌa tau to nompakalanga rarana kana rapakaede, tapi tau to nompakaede rarana kana rapakalanga.”
12 Naopu etu nangulimo Yesus ka pue njapo ri setu, “Ane komi mombagaga tau marata manggoni ri posusa ntongo eo bara tempo nggawengina, neꞌe komi mombagaga roa-roamu, bara sampesuwu-sampesuwumu bara tau to nosinggamosu ka komi to nasugina, sabana banepia ira kana mombagaga komi woꞌumo. Ane iwetu powiamu to nabelona etu kana rabalasi ira.
13 Jadi ane komi mowia posusa, gagamo tau to nakasiasina, tau to nakeruna, tau to napungguna pade tau to naburona.
14 Ane komi mowia iwetu komi kana ragane, sabana tau-tau etu paneꞌa daꞌa mamala mombabalasi powiamu to nabelona etu. Powiamu etu kana rabalasi Alatala tempona tau-tau to nabelona rapakatuwu bali nggari kamatena.”
Porapa posusa mponika
15 Tempona sambaꞌa tau to nanggoni mpasanggani-nggani ri posusa etu nangepe tesa Yesus paneꞌa iꞌa nanguli, “Natantu nasana mpuꞌumo tau to mamala manggoni mpasanggani-nggani ante Alatala ri posusa bete ri suruga.”
16 Nangepe tesa ntau etu Yesus nombatesa saongu porapa iweꞌi: “Sanggani tempo sambaꞌa tau nowia posusa bete pade nadea tau nigagana.
17 Naratamo tempo nompamula nosusa pade nipakauna batuana malau manguli ka pura-pura tau to nigagana iweꞌi: ‘Kamaimo, nasadia puramo.’
18 Tapi nompamulamo ira pura-pura sambaꞌa bo sambaꞌa merapi ampu. Sambaꞌa nanguli ka batua to narata ri jaꞌina, ‘Aku dako nangoli salimpu tana. Aku kana malau momparesa tana etu. Merapi ampu, aku daꞌa majadi momai!’
19 Pade nangulimo tau ntanina, ‘Aku dako nangoli japi sampulu onguna. Aku malau weꞌi-weꞌi mompembai mopajeko ante japi-japi etu. Merapi ampu, aku daꞌa majadi momai!’
20 Pade nangulimo tau ntanina, ‘Aku dako norongo, jadi sabana etu daꞌa namala aku momai!’
21 Nanjilimo batua etu mpaka ri jaꞌi pue njapo etu, pade niulina ka iꞌa nuapa pura to nipotanje ntau to nigaga etu. Nangepe tesa batua etu narau mpuꞌumo rara pue njapo etu, pade niulina ka batuana etu, ‘Weꞌi-weꞌi kalaumo masasinta ri jala-jala bete ante ri jala-jala nggedi ri ngata eꞌi pade mangelo tau to nakasiasina, tau to nakeruna, tau to naburona ante tau to napungguna. Kenimo ira pura-pura ri seꞌi!’
22 Jadi nalaumo batua etu nantuki pura nuapa to nipakau pue njapo etu ka iꞌa. Naopu etu nalaumo batua etu notesa ka pue njapo, ‘Uma, to nipakaumu naopumo nikawiaku. Nadeamo tau narata tapi danariapa petoꞌo to naloga to daꞌapa niisi.’
23 Pade nangulimo pue njapo ka batuana etu, ‘Ane iwetu, kalaumo mpaka ri jala-jala bete pade jala-jala nggedi ri sawaliku ngata. Pasuꞌumo tau-tau marata ala maponu sapoku!
24 Natantu daꞌa ria sambaꞌa tau to nigagaku pangane to mamala marata manggoni mpasanggani-nggani ri posusaku eꞌi!’”
Iwenu majadi topantuki Yesus
25 Nadea mpuꞌu tau nalau mpasanggani-nggani ante Yesus. Pade negolimo Iꞌa notesa ka ira,
26 “Ane sambaꞌa tau madota majadi topantuki Aku iꞌa kana mompotowe Aku neliupa nggari pompotowena ka indo umana, rongona ante ana-anana, sampesuwu-sampesuwuna, ante korona mboto woꞌu. Ane iꞌa daꞌa nompotowe Aku neliupa nggari ira pura-pura ante korona mboto woꞌu daꞌa mamala iꞌa majadi topantuki Aku.
27 Isema-sema daꞌa madota manjumbuaka kayu pomparikana pade malau mantuki Aku daꞌa masipato majadi topantuki Aku. a
28 Ane rapana maria sambaꞌa nggari komi madota mowia saongu sapo to nabetena, natantumo daꞌapa iꞌa nompamula mombabangu iꞌa kana mekatoko mombabila ntani doina bara magana mompakatoka sapona bara daꞌa.
29 Sabana ane dako ratinjana maopumo doina mompakatoka sapona etu natantumo pura-pura tau to manggita powiana etu kana mompongiri iꞌa.
30 Ira kana manguli, ‘A, nadoyo tau eꞌi! Iꞌa nompamula nowia sapona tapi daꞌa nipakulena mompakatoka sapo etu.’
31 Iwetu woꞌu ane sambaꞌa magau malau mosibali ka magau ntanina to narata mosibali ante iꞌa. Natantumo daꞌapa iꞌa malau iꞌa kana mekatoko mompekiri ntani ruru ane tantarana sampulu njobu mbaꞌana nompakule mosibali ka tantara rompulu njobu mbaꞌana nggari magau ntanina etu.
32 Ane ranjanina daꞌa rapakule tantarana mosibali ka tantara magau ntanina etu, natantumo tempo balina etu danakawao iꞌa kana mombasuro tau malau mpaka ri jaꞌi magau ntanina etu merapi mosinggabelo.
33 Jadi iwetu woꞌu ante komi to madota majadi topantuki Aku. Pekirimo mpakabelo-belo ntani ruru, sabana daꞌa ria tau mamala majadi topantuki Aku ane iꞌa daꞌa manggabasaka pura-pura nuapa to naria ri jaꞌina.”
Porapa gara to namelina