9
Pade niulina woꞌu ka ira, “Aku mpuꞌu-mpuꞌu notesa ka komi, naria bara sakuya mbaꞌa tau ri tatongo komi ri seꞌi daꞌapa mamate ane daꞌapa rakita ira Alatala mompamula moparenta ante kuasana.”
Yesus nipakareme Alatala ri bunggu nu bulu
2 Onombengi kaliuna Yesus nanggeni i Petrus, Yakobus bo Yohanes mpasanggani-nggani nalau nantende mpaka ri saongu bulu to nalangana. Ri setu aga ira mboto, daꞌa ria tau ntanina. Tempo ira ri setu sampegoli nabalimo lenje Yesus ri ngayo ira.
3 Pakeana nabula njuꞌu damo nenggila. Daꞌa ria sambaꞌa tau ri dunia eꞌi to mamala mantapasi pakeana ewa kagasana bo kabulana pakea Yesus etu.
4 Pade ira tolumbaꞌa nanggita nabi Elia bo nabi i Musa nggaolu notesa-tesa ante Yesus.
5 Nanggita etu nangulimo i Petrus ka Yesus, “Guru, nasana mpuꞌu kami ri seꞌi. Nabelopa kami mowia toluongu pakumpa ri seꞌi, saongu ka Komi, saongu ka i Musa bo saongu ka Elia.”
6 Kakonona daꞌa ninjani i Petrus nuapa to masipato ratesana sabana naeka mpuꞌumo rara ira tolumbaꞌa.
7 Tempo etu naratamo kulimu nombabungu ira pura-pura, pade nggariara kulimu etu niepe ira suara nanguli, “Eꞌimo Anaku to nipotoweku. Epe komimo tesana!”
8 Sampida mata lau ira nanggita ntalili, mana nikita ira tau rombaꞌa paniꞌa. To nikita ira damo Yesus njambaꞌana.
9 Tempo ira notua nggari buluna etu Yesus nompopatora ka ira, “Neꞌe motesa ka isema-sema nuapa to nikita komi paniꞌa ane daꞌapa Aku, Ana nu Manusia matuwu bali nggari tatongo ntau to namatena.”
10 Ira nompariara popatora Yesus etu, tapi ira nosimpekutana sambaꞌa bo sambaꞌa nuapa patuju Yesus nanguli, “Matuwu bali nggari tatongo ntau to namatena.”
11 Pade nekutanamo ira ka Iꞌa, “Nuapa sabana guru-guru agama nanguli nabi Elia kana mokolu marata pade Magau to Mompakasalama?”
12 Nesonomo Yesus, “Nakonomo tesa ira. Nabi Elia kana mokolu marata ala mompakasiayu mpengele-ngele. Tapi ane iwetu, nuapa patuju nu tesa to nitulisi riara Buku Nagasa to nanguli Ana nu Manusia kana mombarasai madea kasusa pade rasalai ntau dea?
13 Tapi kuuli ka komi, kakonona naratamo nabi Elia, pade tau-tau nompowia ka iꞌa nantuki dota ira, nasimbayu ewa to nitulisi nggaolu riara Buku Nagasa ewa iꞌa.” a
Yesus nompakabelo sambaꞌa kabilasa to nipesua seta
14 Tempo Yesus, i Petrus, Yakobus pade Yohanes nanjili ri jaꞌi anaguruna ntanina, nikita ira tau dea nantalili anaguru-anaguruna etu. Pade naria bara sakuya mbaꞌa guru agama nosisono-sono ante anaguru Yesus.
15 Tempo tau dea nanggita Yesus natekajamo ira, pade ira nangowa nantomunaka Iꞌa.
16 Nekutanamo Yesus ka ira, “Nuapa to niposinjono komi paniꞌa?”
17 Nesonomo sambaꞌa nggari tatongo ntau dea etu, “Guru, aku nanggeni anaku mpaka ri jaꞌimu sabana iꞌa nipesua seta to nompakabobo iꞌa.
18 Butu nggani seta etu nesua ri jaꞌina iꞌa nidungganakana mpaka ri tana. Pade ngangana nawura, bagana nosinggiki pade korona najadi nakoꞌo. Niperapiku ka anagurumu ala ira mompopalai seta etu, tapi ira daꞌa nompakule.”
19 Nangepe etu nangulimo Yesus ka ira, “Iwenu tanu komi? Komimo tau mpuꞌu-mpuꞌu daꞌa nomparasaya! Sakuyapa kasaena Aku kana mosanggani ante komi? Sakuyapa kasaena Aku kana mosabara ri jaꞌi komi? Keni wemaimo ngana etu!”
20 Pade nikeni iramo ngana etu ri jaꞌi Yesus. Tempo seta riara ngana etu nanggita Yesus, kaliu-liu iꞌa nombabaga ngana etu sampe iꞌa nadungga pade notinggaduli ante ngangana nawura.
21 Pade nekutanamo Yesus ka uma nu ngana etu, “Sakuyamo kasaena anamu nombarasai iweꞌi?”
Nesonomo umana, “Da nggari kakedina.
22 Nadea ngganimo iꞌa nipakadungga seta etu riara apu atau ri ue ala mompatesi iꞌa. Tapi ane Komi mamala mowia bara nuapa ka anaku eꞌi, potowemo kami! Tulungimo kami!”
23 Nangulimo Yesus ka iꞌa, “Pangulimu, ‘Ane Komi mamala mowia bara nuapa.’ Tapi kakonona pura-pura namala majadi ka tau to nomparasaya!”
24 Kaliu-liu nongaremo uma nu ngana etu, “Aku nomparasayamo! Tapi tulungimo, pomparasayaku eꞌi danalente!”
25 Sangga Yesus nanggita tau dea nangowa nantatiku Iꞌa, niparentana seta etu iweꞌi: “Palaimo iko, seta to nompakabobo pade nompakabongo ngana eꞌi! Palaimo iko pade neꞌe mana mesua ri jaꞌina!”
26 Nangepe etu nesuwumo seta etu ante nongare pade nombajuanaka mpakagai ngana etu. Iwetu seta nesuwu nggari jaꞌina, ngana etu ewa tomate sampe tau dea nanguli, “Namatemo iꞌa.”
27 Tapi Yesus nanjoko pale ngana etu pade nantulungi iꞌa nembangu. Pade nembangumo ngana etu.
28 Tempo Yesus nesua raranjapo ante anaguruna, nekutanamo ira ka Iꞌa, “Pue, iwenu sampe kami daꞌa nompakule nompopalai seta etu paniꞌa?”
29 Nesonomo Yesus, “Seta ewa etu daꞌa namala rapopalai ante akala ntanina. Tapi aga ante posambaya.”
Yesus nombaboto sangganipa ewa kamatena banepia
Mat. 17:22-23; Luk. 9:43b-45
30 Naopu etu Yesus ante anaguruna nompalasi petoꞌo etu nompapola polumako ira noliu ri Bagia Galilea. Patuju Yesus ala neꞌe ranjani ntau mpaka ri umba Iꞌa,
31 sabana Iꞌa nompatuduki anaguru-anaguruna. Nangulimo Iꞌa ka ira, “Aku, Ana nu Manusia kana rawai ka baliku, pade Aku kana rapatesi ira. Tapi ri eo katolueona Aku kana matuwu bali.”
32 Tapi daꞌa ninjani anaguru Yesus patuju nu tesana etu, pade naekamo rara ira nompekutana batuana ri jaꞌina.
Anaguru Yesus nosinggarau isemana nggari tatongo ira to neliu nggalanga katuwuna
33 Naratamo ira ri ngata Kapernaum. Sangga nesuapa ira raranjapo nekutanamo Yesus ka anaguruna, “Nuapa to niposinggarau komi ri jala paniꞌa?”
34 Tapi ira aga nekalino sanggani, sabana ri jala paniꞌa ira nosinggarau ka isema to neliu nggalanga katuwuna nggari tatongo ira.
35 Nanggita etu Yesus nekatoko ri setu pade nipokiona anaguruna sampulu rombaꞌa etu mpaka ri jaꞌina. Pade niulina ka ira, “Isema-sema madota majadi to neliu nggalanga katuwuna iꞌa kana majadi to neliu nggaede nggari roana, pade iꞌa kana majadi batua nu roana pura-pura.”
36 Pade nialana sambaꞌa ngana nggedi nikenina ri tatongo ira pura-pura. Pade nikalipuina ngana etu ante nanguli ka ira,
37 “Isema-sema nantarima sambaꞌa ngana nggedi ewa ngana eꞌi sabana iꞌa topomparasaya Aku, iꞌa nantarima Aku. Pade isema-sema to nantarima Aku daꞌa aga Aku to nitarimana, tapi iꞌa woꞌu nantarima Umaku to nompakau Aku.”
Tau daꞌa nangewa komi iꞌa roa komi
38 Pade nangulimo Yohanes ka Yesus, “Guru, kami nanggita sambaꞌa tau nompopalai seta ante kuasa nggari sanga Komi. Tau etu nitagi kami sabana iꞌa daꞌa topantuki kita.”
39 Tapi nangulimo Yesus, “Neꞌe komi mombatagi iꞌa, sabana daꞌa ria tau to nompowia kabaraka ante kuasa nggari sangaku to namala manguli sinjaꞌi Aku.
40 Isema-sema daꞌa nangewa kita, ira roata.
41 Aku mpuꞌu-mpuꞌu notesa ka komi, isema-sema mombawai ka komi ue inu sabana komi topantuki Kristus, natantumo iꞌa kana mombarata tambona banepia.
Neꞌe mompakeni roamu mowia silaka pade neꞌe mantuki dota raramu mowia silaka
42 Pade isema-sema mombabagiu sambaꞌa ngana nggedi sampe iꞌa mowia silaka, nabelopa ane saongu watu bete rasoꞌo ri tambolona pade iꞌa ratajiaka riara ntasi.
43 Ane palemu manggeni komi mowia silaka, tompomo palemu etu! Nabelopa komi mesua matuwu mabelo riara suruga ante pale mapudu pade ratajiaka riara naraka ante pale to maganana, etumo riara apu to daꞌa ntoto ria kapaya-payana. [
44 Ri setu kaule daꞌa ria kamatena pade apu daꞌa ria kapaya-payana.]
45 Pade ane kadamu manggeni komi mowia silaka, tompomo kadamu etu! Nabelopa komi mesua matuwu mabelo riara suruga ante kada mapudu pade ratajiaka riara naraka ante kada to maganana. [
46 Ri setu kaule daꞌa ria kamatena pade apu daꞌa ria kapaya-payana.]
47 Pade ane matamu manggeni komi mowia silaka, suꞌi kaliakamo matamu etu! Nabelopa komi mesua matuwu mabelo riara suruga ante momata sabingga pade ratajiaka riara naraka ante mata to maganana.
48 Ri setu kaule daꞌa ria kamatena pade apu daꞌa ria kapaya-payana.
49 Butu mbaꞌa tau pokaingguna kana rapakagasa riara mpanggita Alatala ante apu [nasimbayu ewa pesomba nipakagasa ante gara.] b
50 Gara nabelo, tapi ane gara majadi nameli, iwenupa woꞌu mompakapaga bali? Iwetu woꞌu komi kana mompopokita belo riara nggatuwumu, pade tunggai mosinggabelo ante roa ntanina.”