Pepatuduki Yesus ewa posompo porongo
10
Naopu etu Yesus nompalasi petoꞌo etu pade nalau mpaka ri Bagia Yudea bo bagia sambote Binangga Yordan. Ri setu nadea woꞌu tau narata nantaguni Iꞌa, pade ewa kabiasana Yesus nompatuduki ira.
2 Naria bara sakuya mbaꞌa tau to Parisi narata ri jaꞌi Yesus ala mompesoba Iꞌa. Nekutanamo ira ka Yesus, “Nantuki Atura-atura agamata mamala sambaꞌa langgai mombasompo rongona besi?”
3 Nesonomo Yesus, “Nuapa to niparenta nabi i Musa ka komi?”
4 Nesono ira, “Musa nompaloga posompo porongo ane langgai mombawai sura tala ka rongona besi.”
5 Nanguli woꞌumo Yesus ka ira, “Atura etu nitulisi i Musa ka komi sabana nakoꞌo gaga rara komi!
6 Tapi daꞌa iwetu ri lamba pamulana tempo Alatala nompajadi dunia. Iꞌa nompajadi manusia langgai bo besi.
7 Etumo sabana sambaꞌa langgai kana mompalasi indo umana pade maroo ri jaꞌi rongona besi,
8 pade ira rombaꞌa kana majadi sambaꞌa. Ira mana rauli rombaꞌa, tapi damo sambaꞌa.
9 Sabana etu nuapa to nipakasaongu Alatala, neꞌe rapopogaꞌa manusia!”
10 Tempo ira raranjapomo nekutana woꞌumo anaguru Yesus ka Iꞌa ewa pepatudukina paniꞌa.
11 Nangulimo Yesus ka ira, “Isema-sema mombasompo rongona besi pade momporongo besi ntanina, iꞌa nireke nebualo.
12 Pade ane besi mogaꞌa ante rongona langgai pade raporongo langgai ntanina, iꞌa woꞌu nireke nebualo.”
Yesus nombagane ngana-ngana
13 Naopu etu naratamo tau-tau nanggeni ana-ana ira mpaka ri jaꞌi Yesus ala Iꞌa mombadika palena ri koro ira pade mombagane ira. Tapi anaguru-anaguruna nanggarau tau-tau etu.
14 Nanggita etu naraumo rara Yesus sampe niulina ka anaguru-anaguruna, “Pakambamo ngana-ngana etu marata ri jaꞌiku! Neꞌe ratagi ira, sabana aga tau-tau to noinggu ewa ngana-ngana eꞌi to masipato majadi todea riara Poparenta nu Alatala.
15 Aku mpuꞌu-mpuꞌu notesa ka komi, daꞌa ria sambaꞌa tau namala majadi todea riara Poparenta nu Alatala ane iꞌa daꞌa mekou ri jaꞌi Alatala nasimbayu ewa ngana-ngana eꞌi.”
16 Pade nisalungguna ngana-ngana etu sambaꞌa bo sambaꞌa pade nidikana palena ri koro ira ala mombagane ira.
Nakaja mpuꞌu tau nakalumana majadi todea riara Poparenta nu Alatala
17 Tempo Yesus nompapola polumakona, naria sambaꞌa tau nangowa nantotoaka Iꞌa. Nekadedemo iꞌa ri ngayo Yesus ante nanguli, “Guru to nabelona, nuapa masipato kupowia ala mombarata katuwua mabelo sampe ri kasae-saena?”
18 Nesonomo Yesus, “Nokuya komi nanguli Aku nabelo? Daꞌa ria tau ntanina to nabelona, aga Pue Alatala.
19 Natantu ninjanimu parenta-parenta Alatala to nanguli, ‘Neꞌe mepatesi, neꞌe mogau sala ante tau daꞌa rongomu mboto, neꞌe mangangga, neꞌe modawa ri ngayo ntopotangara, neꞌe mebagiu, pade bilamo indo umamu.’”
20 Nesonomo tau etu, “Guru, parenta-parenta etu nitukiku puramo nggari kakediku.”
21 Pade Yesus nombalele mata tau etu ante towena, pade niulina ka iꞌa, “Aga sangelepa to nakura ri jaꞌimu. Kalau pobalu puramo kakalumanamu pade palelemo doina ka tau-tau nakasiasi ala murata kakalumana ri suruga. Maopu etu kamai, tukimo Aku.”
22 Nangepe tesa Yesus etu nabalimo lenje ntau etu sampe nalaimo iꞌa ante nasusa rara, sabana nadea mpuꞌu kakalumanana.
23 Naopu etu Yesus nanggita anaguru-anaguruna to nantalili Iꞌa pade niulina ka ira, “Nakaja mpuꞌu tau nakalumana majadi todea riara Poparenta nu Alatala.”
24 Nangepe etu natekaja mpuꞌumo rara anaguruna etu. Tapi Yesus nompapola tesana ka ira, “Ana-anaku, nakaja mpuꞌu tau majadi todea riara Poparenta nu Alatala.
25 Nagampapa saongu binata to nabetena ewa unta mesua ri bolo jaru pade sambaꞌa tau nakalumana majadi todea riara Poparenta nu Alatala.”
26 Nangepe etu nantambai naingu anaguruna sampe ira notesa sambaꞌa bo sambaꞌa, “Ane iwetu natantumo daꞌa ria sambaꞌa tau to mamala rapakasalama!” a
27 Yesus nombalele mata ira pade nanguli, “Ane aga nggari manusia, natantu daꞌa mamala majadi. Tapi daꞌa iwetu ante Alatala. Sabana pura-pura mamala majadi ane Iꞌa madota.”
28 Naopu etu nangulimo i Petrus ka Yesus, “Kita weꞌi, Pue. Kami eꞌi nompalasi pura-pura nuapa to naria ri jaꞌi kami pade nantuki Komi.”
29 Nangulimo Yesus, “Aku mpuꞌu-mpuꞌu notesa ka komi, butu mbaꞌa tau to nompalasi sapona bara sampesuwuna, bara indo umana, bara anana bo tinaluna sabana nantuki Aku bo nanggeni Kareba Belo,
30 natantumo iꞌa kana mombarata bali riara nggatuwuna weꞌi-weꞌi satu nggani kadeana nggari nuapa to nipalasina. Iꞌa kana mombarata sapo bo sampesuwu langgai ante sampesuwu besi, indo, ngana-ngana bo tinalu, nau ante pepandasa. Pade ri tempo nggapurina iꞌa kana mombarata katuwua mabelo sampe ri kasae-saena.
31 Tapi nadea tau to nalanga katuwuna weꞌi-weꞌi kana majadi tau to naede katuwuna banepia. Pade nadea woꞌu tau to naede katuwuna weꞌi-weꞌi kana majadi tau to nalanga katuwuna banepia.”
Yesus nombaboto katolungganina ewa jala nggamatena banepia
32 Tempo Yesus ante anaguruna riara mpolumako ira mpaka ri ngata Yerusalem Yesus nolumako njambaꞌana ri koluna. Nakini-kini rara anaguruna nompekiri nuapa majadi ri jaꞌi Yesus ri setu, pade naeka woꞌu rara tau-tau ntanina to nantuki ira nggari purina. Pade sangganipa Yesus nompokio anaguruna sampulu rombaꞌa ri jaꞌina pade nompamulamo Iꞌa notesa ka ira nuapa to majadi ri jaꞌina.
33 Niulina, “Epemo mpakabelo-belo! Weꞌi-weꞌi kita mantende mpaka ri ngata Yerusalem. Ri setu Aku, Ana nu Manusia kana rapobalu ka balengga-balengga topanggeni agama bo guru-guru agama. Pade ira mompakatantu riara potangara Aku kana rapatesi. Pade Aku kana rawai ka tau-tau daꞌa to Yahudi,
34 pade Aku kana rapongei-ngei bo ratailu ira. Pade Aku kana raporo ira mpakandasa pade kaopuna rapatesi ira. Tapi ri eo katolueona Aku kana matuwu bali.”
Pomperapi Yakobus bo Yohanes
35 Naopu etu Yakobus bo Yohanes ana i Zebedeus nompakamosu Yesus pade nanguli, “Guru, nisarumaka kami nuapa raperapi kami kana rapoiyo Komi.”
36 Nekutana Yesus ka ira, “Nuapa to nipodota komi ala kupowia ka komi?”
37 Nesonomo ira, “Palogamo kami mekatoko moparenta mpasanggani-nggani ante Komi tempo Komi moparenta ante nakuasa ewa magau banepia, sambaꞌa ri pangganamu pade sambaꞌa ri panggeimu.”
38 Nangulimo Yesus ka ira, “Daꞌa ninjani komi nuapa to niperapi komi etu. Iwenumo? Rapakule komi manggolo pepandasa nasimbayu ewa pepandasa to rapawela ka Aku, pade mantaꞌamaka kasusa ewa to kurasai banepia?”
39 Nesonomo ira, “Rapakule!”
Pade nangulimo Yesus ka ira, “Natantumo komi kana manggolo pepandasa nasimbayu ewa pepandasa to rapawela ka Aku, pade komi kana mombarasai nuapa to kurasai.
40 Tapi daꞌa Aku to nakuasa mompakatantu isema masipato mekatoko ri pangganaku bara ri panggeiku. Petoꞌo etu bagia ira to nipakatantu Umakumo.”
41 Nangepe nuapa to niperapi Yakobus bo Yohanes sampulu mbaꞌa anaguru Yesus ntanina nanggarau ira rombaꞌa etu.
42 Tapi Yesus nompokio ira pura-pura mpaka ri jaꞌina pade niulina ka ira, “Ninjani komi mbotomo ira to nireke topoparenta tau-tau daꞌa nosinjani ante Alatala nabiasa nomparenta todea ira ante nasombo. Pade topanggeniaka-topanggeniaka ira nompandasa todea ira.
43 Tapi daꞌa masipato komi moinggu iwetu! Kakonona kana iweꞌi: Isema-sema nggari tatongo komi to madota malanga panggana iꞌa etu kana majadi topantulungi roana.
44 Pade isema-sema to madota majadi to nalanga katuwuna kana majadi batua komi pura-pura.
45 Sabana Aku, Ana nu Manusia mboto daꞌa narata ri dunia eꞌi ala ratulungi ntau tapi ala mantulungi tau, pade ala mombawai koroku rapatesi mantolo silaka-silaka ntau dea.”
Yesus nompakabelo mata Bartimeus
46 Naopu etu naratamo Yesus ante anaguruna ri ngata Yerikho. Tempo Yesus nesuwu nggari ngata etu nosanggani ante anaguruna bo nadea mpuꞌu tau ntanina, ri setu naria sambaꞌa toburo nosanga ka i Bartimeus, ana i Timeus, nekatoko nerapi-rapi ri wiwi jala.
47 Tempo iꞌa nangepe lele Yesus to Nazaret noliu ri setu, nompamulamo iꞌa nongare, “Yesus, Muli i Daud, potowemo aku eꞌi!”
48 Nadea tau nangontiaka iꞌa ante nanguli, “Neꞌe makanano! Pekalinomo iko!”
Tapi iꞌa aga nantambai nongare ante suara to namangga, “Muli i Daud, potowemo aku!”
49 Nangepe etu nenontomo Yesus, pade niulina ka tau ri setu, “Pokiomo iꞌa wemai.”
Jadi ira nompokio toburo etu ante nanguli, “Pakaroo raramu! Pekanggoremo. Iꞌa nompokio iko.”
50 Nangepe etu nipalewanamo buyana pade nompari-mpari nekanggore nalau nantotoaka Yesus.
51 Pade nekutanamo Yesus ka iꞌa, “Nuapa to mupodota kupowia ka iko?”
Nesonomo toburo etu, “Guru, to nipodotaku ala mataku mamala mekita!”
52 Pade nangulimo Yesus ka iꞌa, “Panjilimo. Nabelomo matamu sabana iko nomparasaya.” Kaliu-liu nabelomo mata ntoburo etu. Pade nalaumo iꞌa nantuki Yesus riara mpolumakona.