Porapa ewa wakele to nadenggo rarana
16
Yesus nombatesa ka topantuki-topantuki Iꞌa porapa eꞌi woꞌu: “Naria sambaꞌa tau nasugi to naria sambaꞌa wakelena nombaurusi kakalumanana. Tau nasugi etu nangepe kareba nggari jaꞌi tau ntanina to nanguli wakelena etu nompakaopu kakalumanana.
2 Jadi nipokiona wakelena etu pade niulina, ‘Natantu mpuꞌu tesa niepeku ewa inggumu! Weꞌi-weꞌi kawia pakagana suramu ewa panggawiamu nombaurusi kakalumanaku, sabana komi mana mamala majadi wakeleku.’
3 Nangepe etu nompekirimo wakele etu riara ntaꞌina, ‘Hai, iwenumo aku eꞌi? Balenggaku eꞌi madota manggabasaka aku. Nuapa kukawia ngina? Ane aku motonggo daꞌa mana kupakule. Ane merapi-rapi ri jala maeya mataku.
4 A, iweꞌimo akalaku! Ane aku rakabasaka kana madea roaku to madota mantarima aku ri sapo ira.’
5 Jadi nalaumo iꞌa nompokio pura-pura tau to noinda ri jaꞌi balenggana. Niulina ka tau pamulana, ‘Sakuyamo indamu ri jaꞌi balenggaku?’
6 Nesonomo tau etu, ‘Satu ongu gumba lana.’
Nangulimo wakele etu, ‘Eꞌimo sura inda komi. Kamaimo pekatoko ri seꞌi, masasinta ratulisi komi limampulu ongu gumba.’
7 Pade niulina ka tau ntanina, ‘Sakuyamo indamu?’
Nesonomo tau etu, ‘Sanjobu karu ose.’
Pade nangulimo wakele etu, ‘Eꞌimo sura inda komi. Tulisimo waluatu karu.’
8 Tempo tau nasugi etu nangepe nuapa to nikawia wakelena to nadenggo rarana etu iꞌa nombatoiya wakelena etu sabana nataꞌu akalana.” Pade Yesus nompakaopu tesana iweꞌi: “Tau-tau to nadenggo rarana ri dunia eꞌi neliu nggapandepa nompakasiayu bago ira nggari tau-tau to nanoa rara to natuwu riara karemena.
9 Pade kuuli woꞌu ka komi, pakemo kakalumana dunia eꞌi, naupa najaꞌa, rapombarata roa ala tempona kakalumana dunia mana ria olina komi kana ratarima ri petoꞌo to nabelona ri suruga.
10 Tau to namala niparasaya ante mbara-mbara sakedi namala woꞌu niparasaya ante mbara-mbara to nadea. Tapi tau to nadenggo rarana ante mbara-mbara sakedi nadenggo woꞌu rarana ante mbara-mbara to nadeana.
11 Jadi ane komi daꞌa namala niparasaya ante kakalumana nggari dunia to najaꞌana eꞌi, natantumo daꞌa ria to madota momparasaya ka komi kakalumana to nabelona nggari suruga.
12 Pade ane komi daꞌa namala niparasaya ante mbara-mbara tau ntanina, natantumo daꞌa ria to madota mombawai ka komi kakalumana majadi bagiamu.
13 Daꞌa namala sambaꞌa tau majadi batua nggari rombaꞌa madika. Sabana iꞌa kana magigi rarana ri jaꞌi madika to sambaꞌana pade mompotowe madika ntanina etu. Atau iꞌa kana mombabila madika to sambaꞌana pade momporau rara madika ntanina etu. Iwetu woꞌu ante komi. Daꞌa mamala komi mepue sanggani ka Alatala bo manjarumaka mbara-mbara ri dunia eꞌi.”
Yesus notesa ka to Parisi
14 Tau-tau to Parisi nangepe pura-pura to nitesa Yesus paneꞌa. Pade ira nompongiri Yesus sabana ira nompotowe doi.
15 Tapi nangulimo Yesus ka ira, “Komi tau to nantakono inggu komi mboto ri ngayo tau ntanina, tapi Alatala nangginjani isi rara ntaꞌimu. Daꞌa nipokonona pokainggumu iwetu. Toramo! Nuapa to nabelo nantuki pombarata manusia, etumo to nipojaꞌa rara Alatala.
16 Atura-atura agama Yahudi pade nuapa to nipatuduki nabi-nabi ka kita nipatolele sampe karata Yohanes Topediu. Nompamula nggari tempo etu Kareba Belo ewa Alatala ante Poparentana nipatolele ka tau-tau sampe weꞌi-weꞌi. Pade pura-pura tau nompasimbuku mpuꞌu nosimpago mesua riara Poparenta nu Alatala etu.
17 Neliu nggagampapa langi bo dunia malipo pade saongu huruf nggari Atura-atura agama etu rapakalipo.”
18 Pade nanguli woꞌumo Yesus, “Isema-sema to nombasompo rongona besi pade nomporongo besi ntanina iꞌa etu nebualo. Pade tau to nomporongo besi to nisompomo, iꞌa woꞌu topebualo.”
Tesa tau nasugi ante Lazarus
19 Nanguli woꞌumo Yesus, “Naria sambaꞌa tau nasugi, pakeana nasuli mpuꞌu olina, katuwuna eo-eo nabelo.
20 Naria woꞌu sambaꞌa tau nakasiasi nosanga ka i Lazarus. Korona pura-pura nabaka. Iꞌa nabiasa nikeni ntau mpaka ri pewobo ntau nasugi etu.
21 Nisarumakana bara mamala iꞌa manggoni rombo panggoni to nanawu nggari meja ntau nasugi etu. Pade asu-asu woꞌu narata nombajila bakana.
22 Naratamo tempona tau nakasiasi etu namate pade iꞌa nikeni malaeka mpaka ri petoꞌo to nibila ri sinjori Abraham ri suruga. Tau nasugi etu woꞌu namate pade nitana. Pade iꞌa nitajiaka riara naraka.
23 Ri setu iꞌa nandasa mpuꞌu. Tempona iꞌa nantingoa ri kalangana nikitana Abraham ri petoꞌo nakawao ante i Lazarus ri sinjorina ri setu.
24 Pade nongaremo tau nasugi etu, ‘Umaku, Abraham, potowemo aku! Pakaumo i Lazarus mantonomaka sanggoya palena ri ue pade marata mombasasii jilaku, sabana nandasa mpuꞌumo aku riara apu eꞌi!’
25 Tapi nesonomo Abraham, ‘Toramo, anaku, iko nadamba-damba katuwumu nggari kakedi-kedimu sampe iko namate, tapi i Lazarus eꞌi tau nandasa. Weꞌi-weꞌi iꞌa nipakadamba ri seꞌi, tapi iko nipakandasa.
26 Ntanina nggari etu, ri olo kita eꞌi naria limba to nandalana ala tau nggari seꞌi daꞌa namala gusetu, pade tau nggari setu daꞌa namala momai guseꞌi.’
27 Nangepe etu nangulimo tau nasugi etu, ‘Ane iwetu, kuperapi ka komi, pakaumo i Lazarus mpaka ri sapo nu umaku.
28 Danariapa limambaꞌa sampesuwuku ri setu. Pakaumo i Lazarus malau mompopanjani ka ira ala neꞌe ira woꞌu mesua ri petoꞌo to nandasa eꞌi.’
29 Tapi nesonomo Abraham, ‘Nariamo buku-buku i Musa ante buku-buku nabi-nabi ri jaꞌi ira. Palambamo ira mantuki nuapa to nitulisi riara buku-buku etu!’
30 Tapi nesonomo tau nasugi etu, ‘Etu daꞌa nagana, Uma. Tapi ane maria tau namate matuwu bali malau mpaka ri jaꞌi ira, kana majea ira nggari silaka-silaka ira.’
31 Tapi nesonomo Abraham, ‘Daꞌa nakono! Ane ira daꞌa nantuki tesa to nitewai i Musa ante nabi-nabi ntanina, naudamo tomate matuwu bali, daꞌa woꞌu rapompangala ira.’”