Porapa bimba to natonto
15
Naria sanggani nadea topomperapi balasitee bo tau-tau ntanina to daꞌa nabelo inggu ira narata nangepe tesa Yesus.
2 Nanggita etu nompamulamo tau-tau to Parisi ante guru-guru agama nanggangua. Niuli ira, “A, daꞌa nabelo tau eꞌi! Iꞌa nasintuwu ante tau to najaꞌa bo nanggoni mpasanggani ante ira!”
3 Nangepe tesa ira Yesus nombatesa ka ira porapa eꞌi:
4 “Rapana maria sambaꞌa nggari komi mompatuwu bimba satu onguna pade matonto saongu, nuapa rapowiana? Natantumo rapalasina siompulu bo sasio ongu etu ranggarawana pade malau raelona bimba to natonto etu sampe raratana.
5 Pade ane raratana bimba etu kana rasumbuakana manjili ante kadamba rarana.
6 Marata ri sapona iꞌa kana mompasiromu roa-roana ante tau to nosinggamunji ante iꞌa pade manguli, ‘Kamaimo kita madamba-damba, sabana bimbaku to natontona etu nirataku bali!’
7 Iwetu woꞌu ri suruga. Neliu nggadambapa Alatala ante malaekana manggita sambaꞌa tau najaꞌa powiana to majea nggari silakana pade manggita siompulu bo siombaꞌa tau to nanoa rarana to mana paraluu majea.”
Porapa doi to natonto
8 Yesus nompapola tesana ante porapa ntanina iweꞌi: “Rapana maria sambaꞌa besi nomboli doi salaka sampulu mpekana pade matonto sampeka, nuapa rapowiana? Natantumo iꞌa kana mombatunju poindo mosewe pura-pura sapona mangelo mpakabelo-belo sampe raratana doina to natonto etu.
9 Pade ane doi etu raratana iꞌa kana mompokio roa-roana ante tau-tau to nosinggamunji ante iꞌa pade manguli, ‘Kamaimo kita madamba-damba, sabana doiku to natontona nirataku bali.’
10 Iwetu woꞌu malaeka-malaeka Alatala. Nadamba mpuꞌu rara ira ane sambaꞌa tau najaꞌa powiana majea nggari silakana.”
Porapa ngana to natonto
11 Pade notesa woꞌumo Yesus ante porapa eꞌi: “Naria sambaꞌa uma noana rombaꞌa langgai.
12 Notesamo ana kaopu ka umana, ‘Uma, wai ka akumo bagiaku nggari kakalumanamu.’ Nangepe tesa etu umana nombabagi kakalumanana ka ira rombaꞌa.
13 Bara sakuya mbengi kaliuna ngana kaopuna etu nompobalu bagiana to niwai nu umana ka iꞌa. Naopu etu nialana doi etu pade nalaimo iꞌa mpaka ri ngata ntau to nakawao. Sangga naratapa ri setu nipakaopunamo doina ante natuwu nantuki dotana mboto ante noinggu najaꞌa.
14 Sangga naopu puramo doina, najadimo oromate ri ngata etu sampe iꞌa nompamula namateoro.
15 Jadi nalaumo iꞌa nokarajaa ri jaꞌi sambaꞌa tau ri ngata etu. Tau etu nompakau iꞌa malau mpaka ri tinalu mompakoni wawu.
16 Ri setu iꞌa madota manggoni mugu-mugu to niwai ka wawu etu sabana naoro mpuꞌu taꞌina. Tapi naupa iwetu daꞌa ria sambaꞌa tau narata nombawai panggoni ka iꞌa.
17 Kaopuna nanotomo rarana, pade nipekirina, ‘Tau-tau to nokarajaa ka umaku panggoni ira daꞌa naopu-opu, tapi aku ri seꞌi namateoromo.
18 Weꞌi-weꞌi aku kana manjili bali ri jaꞌi umaku pade kana kuuli ka iꞌa iweꞌi: Uma, nasilakamo aku ri jaꞌi Alatala ante ri jaꞌi komi woꞌu.
19 Aku mana masipato rauli anamu. Uma, ulimo aku aga tau topokarajaa ri jaꞌimu.’
20 Naopu nompekiri iwetu, nanggaliwomo iꞌa nanjili mpaka ri jaꞌi umana.
Tempo iꞌa danakawao nikita umanamo. Naasi mpuꞌumo mata umana nanggita anana sampe iꞌa nangowa nantomuaka iꞌa. Narata ri jaꞌi anana nikalipuinamo pade niekina.
21 Pade nangulimo anana etu ka umana, ‘Uma, nasilakamo aku ri jaꞌi Alatala ante ri jaꞌi komi woꞌu. Aku mana masipato rauli anamu.’
22 Tapi umana nompokio batua-batuana pade niulina ka ira, ‘Kau ala masasinta baju to neliu nggabelona rapasua ka iꞌa, pade pasua ka woꞌu sinji ri koyampalena ante sapatu ri kadana.
23 Maopu etu kau ala komi japi to naboyana rasambale komi. Kita kana manggoni madamba-damba,
24 sabana anaku eꞌi ewa namatemo, tapi tempona weꞌi-weꞌi natuwu bali. Iꞌa natontomo, tapi weꞌi-weꞌi narata bali.’ Jadi ira nanggawia posusa pade nompamula madamba-damba.
25 Tempona ira nosusa, anana ulumbua ri tinalu. Tempona iꞌa nanjili namunji ri sapo niepena musi-musi ante dero-dero.
26 Nipokiona sambaꞌa batua pade nipekutanana, ‘Nuapa to najadi ri sapo setu?’
27 Nesonomo batua etu, ‘Tuaꞌi komi to natontona narata bali. Pade uma komi nompakau kami nanjambale japi to naboyana sabana tuaꞌimu narata ante nabelo.’
28 Nangepe etu naraumo anana ulumbua paneꞌa sampe daꞌa madota iꞌa mesua riara njapo. Jadi nesuwumo umana nantanara iꞌa ala iꞌa mesua riara njapo.
29 Tapi nangulimo iꞌa ka umana, ‘Nompae-mpaemo aku nokarajaa ka komi ewa batuamu. Daꞌa ria sanggani aku nombaliunaka parenta komi. Tapi daꞌapa ria sanggani komi nanjambale ka aku nau kamba saongu towau ala aku madamba-damba ante roa-roaku.
30 Damo narata anamu to nompakaopu mbara-mbara kakalumana komi nikenina nongei-ngei ka bajinga, pade komi nanjambale japi ka iꞌa etu.’