Isema to neliu nggalanga katuwuna riara Poparenta nu Alatala
18
Tempo etu naratamo anaguru Yesus ri jaꞌina nompekutana Iꞌa, “Guru, isema to meliu nggalanga katuwuna riara Poparenta nu Alatala banepia?”
2 Nangepe etu Yesus nompokio sambaꞌa ngana nggedi pade nipopekanggorena ri tatongo anaguruna,
3 pade niulina ka ira, “Aku mpuꞌu-mpuꞌu notesa ka komi, ane komi daꞌa majea bo majadi nasimbayu ewa ngana nggedi eꞌi, komi daꞌa mamala majadi todea riara Poparenta nu Alatala.
4 Jadi tau to mompakaede rarana pade majadi ewa ngana nggedi eꞌi, iꞌamo to meliu nggalanga katuwuna riara Poparenta nu Alatala.
5 Pade isema-sema mantarima sambaꞌa ngana nggedi ewa eꞌi sabana iꞌa nantuki Aku iꞌa woꞌu mantarima Aku.
6 Tapi isema-sema mombabagiu sambaꞌa ngana nggedi sampe iꞌa mowia silaka, nabelopa ane saongu watu bete rasoꞌo ri tambolona pade iꞌa ratajiaka riara ntasi to nandalana.
7 Nandasamo tau-tau ri dunia sabana nadeamo to nompakanawu ira riara silaka. Kana maria to manawu riara silaka tapi mandasa mpuꞌumo tau to mompakanawu ira.
8 Jadi ane palemu atau kadamu manggeni komi mowia silaka agina pale atau kadamu etu ratompo pade ratajiaka. Nabelopa komi mesua matuwu mabelo riara suruga ante pale bara kada mapudu iwetu pade ratajiaka riara apu to najela sampe ri kasae-saena ante palemu bo kadamu magana.
9 Pade ane matamu manggeni komi mowia silaka agina rasuꞌi tajiaka ongu matamu. Nabelopa komi mesua matuwu mabelo riara suruga ante momata sabingga pade ratajiaka riara apu naraka ante mata to maganana.
10 Jadi pakabelo-belo, neꞌe manjauru ngana nggedi ewa ngana eꞌi. Sabana kuuli ka komi malaeka-malaeka to nombajagai ira bate-batena naria ri ngayo Umaku ri suruga. [
11 Pade Aku, Ana nu Manusia narata ri dunia ala mompakasalama tau-tau to natontona.”]
Porapa bimba to natontona
12 “Rapana maria sambaꞌa tau nompatuwu bimba satu onguna pade naria saongu bimba natonto, nuapa rapowiana? Iwenu pombaratamu? Natantumo iꞌa kana mompalasi bimbana siompulu bo sasio etu ri buluna pade malau mangelo bimbana saongu to natonto etu.
13 Parasayamo Aku, ane raratana bali bimba etu meliu nggadamba rarana manggita saongu bimba etu pade manggita siompulu bo sasio bimba to daꞌa natonto.
14 Iwetu woꞌu Uma komi ri suruga daꞌa madota sambaꞌa nggari tatongo ngana nggedi eꞌi malipo pomparasayana.”
Nuapa masipato rapowiata ane sampesuwuta mowia sala ri jaꞌita
15 “Ane maria sampesuwumu mowia sala ri jaꞌimu, kalau komi ri jaꞌina pade tesamo pakanoto ka iꞌa salana. Kawiamo etu nggalino, aga komi rombaꞌa. Ane iꞌa mantarima pantesamu kasintuwumu ante iꞌa kana mabelo bali.
16 Tapi ane iꞌa daꞌa madota mantarima pantesamu keni woꞌumo sambaꞌa atau rombaꞌa roamu majadi sabi pantesamu ante iꞌa. Sabana riara Buku Nagasa naria nitulisi iweꞌi: ‘Ane maria tau nipangadu kana maria rombaꞌa atau tolumbaꞌa sabi motesa mompakanoto kasalana.’ a
17 Ane iꞌa daꞌa madota mantarima pantesa ira, kenimo iꞌa ri ngayo ntodea topomparasaya. Pade ane iꞌa daꞌa madota mantarima tesa belo nggari jaꞌi todea etu, iꞌa kana rareke komi nasimbayu ewa tau daꞌa nosinjani ante Alatala bo tau-tau topomperapi balasitee to najaꞌana.
18 Aku mpuꞌu-mpuꞌu notesa ka komi, nuapa to nitagi komi ri dunia eꞌi, etu nitagi woꞌu ri suruga. Pade nuapa to nipaloga komi ri dunia eꞌi, nipaloga woꞌu ri suruga.
19 Pade kuuli woꞌu ka komi ane maria rombaꞌa komi ri dunia eꞌi mosaongu rara mosambaya merapi sangele, posambaya komi etu kana rapoiyo Umaku ri suruga.
20 Sabana ri umba-umba tau nasiromu riara sangaku nau aga rombaꞌa atau tolumbaꞌa, Aku mboto naria ri setu nosanggani-nggani ante ira.”
Porapa ewa sambaꞌa batua daꞌa madota mombaampungi roana
21 Naopu etu naratamo i Petrus nompekutana Yesus, “Pue, ane maria sampesuwuku mowia sala ri jaꞌiku, sampe sakuya nggani aku kana mombaampungi iꞌa? Bara sampe pitunggani?”
22 Nesonomo Yesus, “Daꞌa aga pitunggani, tapi sampe noatu nggani. b
23 Sabana Pue Alatala nasimbayu ewa magau riara porapa eꞌi: Naria sambaꞌa magau to madota momparesa inda-inda nu batuana.
24 Tempo iꞌa nompamula nomparesa inda ira, naria sambaꞌa batua niposintingayo ante iꞌa to noinda juta-juta rupia. c
25 Tapi batua etu daꞌa nompakule mombabayari indana etu. Jadi nangulimo magau, ‘Ane iwetu pobalumo batua etu mpasanggani-nggani ante rongona, ana-anana bo pura-pura mbara-mbara riara njapona rapombabayari indana ri jaꞌiku etu!’
26 Nangepe etu nekadedemo batua etu ri ngayo magau nerapi ante mpuꞌu-mpuꞌu rarana, ‘Magau, posabara ntanimo ruru ri jaꞌiku. Pura-pura indaku etu kana kubayari mpakaopu!’
27 Nangepe etu, naasimo mata magau nanggita batuana etu. Jadi nikabasakana batua etu pade indana etu nipakaopunamo.
28 Tempo batua etu nesuwu ri sawalikuna iꞌa nosintomu ante roana to noinda ri jaꞌina bara sakuya atu njobu rupia. d Nisokona tambolo roana etu pade nikojena ante nanguli, ‘Bayari puramo indamu ri jaꞌiku!’
29 Pade nekadedemo roana etu ri ngayona nerapi ante mpuꞌu-mpuꞌu rarana, ‘Posabara ntanimo ruru, wega. Indaku pura-pura etu kana kubayari mpakaopu.’
30 Tapi batua etu daꞌa madota mantarima pomperapi roana etu. Iꞌa aga nalau nombasuaraka roana riara tarunggu sampe pura-pura indana etu rabayarina mpakaopu.
31 Tempo batua-batua ntanina nanggita nuapa to nipowia batua etu ka roana, nasusa mpuꞌumo rara ira. Jadi nalaumo ira mpaka ri jaꞌi magau nantesa ka iꞌa pokainggu batuana paneꞌa.
32 Sangga nangepe tesa etu, magau nompokio batua to najaꞌa powiana etu pade niulina, ‘Iko sambaꞌa batua to najaꞌa mpuꞌu! Pura-pura indamu to nadea mpuꞌu etu nipakaopukumo sabana iko nerapi ri jaꞌiku.
33 Nokuya iko daꞌa naasi matamu nanggita roamu nasimbayu ewa aku naasi mataku nanggita iko?’
34 Jadi nabilisi mpuꞌu rara magau ri jaꞌi batuana etu. Niwaina batua etu ka topeboba riara tarunggu sampe iꞌa mombabayari mpakaopu pura-pura indana.”
35 Yesus nompakaopu tesana ante nanguli, “Iwetu woꞌu Umaku ri suruga mompowia ka komi ane komi daꞌa mombaampungi sampesuwumu ante mpuꞌu-mpuꞌu raramu!”