POLUMAKO YESUS MPAKA RI NGATA YERUSALEM (Pasal 19-20)
Pepatuduki Yesus ewa posompo porongo
19
Naopu Yesus nombatesa etu pura-pura nalaimo Iꞌa nompalasi Bagia Galilea nalau mpaka ri Bagia Yudea ri sambote Binangga Yordan.
2 Nadea mpuꞌu tau nantuki Iꞌa pade ri setu Iꞌa nompakabelo juꞌa-juꞌa ira.
3 Pade naratamo bara sakuya mbaꞌa tau to Parisi madota mangelo sala Yesus. Ira nompekutana Iꞌa iweꞌi: “Nantuki Atura-atura agamata mamala sambaꞌa langgai mombasompo rongona besi ante mpengele-ngele sabana?”
4 Nesonomo Yesus, “Iwenumo? Daꞌapa nibasa komi to nitulisi riara Buku Nagasa nggaolu? Ri lamba pamulana Topompajadi manusia nompajadi sambaꞌa langgai bo sambaꞌa besi.
5 Pade naopu etu niulina, ‘Etumo sabana langgai kana mompalasi indo umana pade malau maroo ri jaꞌi rongona besi, pade ira rombaꞌa kana majadi sambaꞌa.’ a
6 Jadi riara mpanggita Alatala ira rombaꞌa etu daꞌa mana rombaꞌa tapi sambaꞌa. Sabana etu nuapa to nipakasaongu Alatala, neꞌe rapopogaꞌa manusia.”
7 Pade nekutana woꞌumo tau-tau to Parisi ka Iꞌa, “Ane iwetu, nuapa sabana i Musa nompakau langgai mombawai sura tala ka rongona besi pade mombasompo iꞌa?”
8 Nesonomo Yesus, “Musa nompaloga komi mombasompo rongomu iwetu sabana nakoꞌo gaga rara komi. Tapi ri lamba pamulana daꞌa iwetu.
9 Jadi epe komi tesaku eꞌi. Isema-sema mombasompo rongona besi pade momporongo besi ntanina naupa rongona pamulana etu daꞌa nogau sala ante langgai ntanina, tau etu nireke nebualo.”
10 Naopu etu anaguru-anaguru Yesus nanguli ka Iꞌa, “Ane iwetu kasusana atura mporongo nabelopa ane tau daꞌa morongo!”
11 Nesonomo Yesus, “Daꞌa pura-pura tau mamala mantarima pantesa etu, aga ira to nipakatantu Alatala.
12 Sabana naria tau daꞌa namala morongo sabana daꞌa nagana sipana nesuwu nggariara indona. Naria woꞌu tau daꞌa namala morongo sabana nitunggai nigero ntau sipana. Pade naria woꞌu tau daꞌa norongo sabana dotana mboto, ala ira maloga mantui bago i Pue. Isema-sema mompakule mantarima pepatuduki eꞌi kana ratarimana.”
Yesus nombagane ngana-ngana
13 Naria sanggani nadea mpuꞌu tau nanggeni ana-ana ira mpaka ri jaꞌi Yesus ala Iꞌa mombadika palena ri koro ira pade mosambaya ka ira. Tapi anaguru-anaguru Yesus nanggarau tau-tau etu.
14 Nanggita etu nangulimo Yesus ka anaguru-anaguruna, “Pakambamo ngana-ngana etu marata ri jaꞌiku! Neꞌe ratagi ira, sabana aga tau to noinggu ewa ngana-ngana eꞌi to masipato majadi todea riara Poparenta nu Alatala.”
15 Pade nidikana palena ri balengga ngana-ngana etu ala mombagane ira. Naopu etu nalaimo Iꞌa nggari setu.
Nakaja tau nakalumana majadi todea riara Poparenta nu Alatala
16 Naria saeo sambaꞌa tau nompakamosu Yesus pade nekutana, “Guru, powia nuapa to nabelona to masipato kupowia ala aku mamala matuwu mabelo sampe ri kasae-saena?”
17 Nesonomo Yesus, “Nuapa sabana komi nompekutana Aku ewa powia to nabelona? Daꞌa ria ntanina to nabelo aga Pue Alatala. Ane komi madota matuwu mabelo sampe ri kasae-saena, tukimo parenta-parenta Alatala.”
18 Pade nekutana woꞌumo tau etu, “Parenta-parenta umbana?”
Nesonomo Yesus, “Neꞌe mepatesi, neꞌe mogau sala ante tau daꞌa rongomu mboto, neꞌe mangangga, neꞌe modawa ri ngayo ntopotangara,
19 bilamo indo bo umamu, pade potowemo sanggamanusiamu nasimbayu ewa komi nompotowe koromu mboto.”
20 Nangulimo tau etu ka Yesus, “Parenta-parenta etu nitukiku puramo. Nuapapa woꞌu to masipato kukawia?”
21 Nesono Yesus, “Ane komi madota majadi mabelo ntoto, kalau pobalu puramo mbara-mbaramu pade palelemo doi olina etu ka tau-tau nakasiasi ala murata kakalumana ri suruga. Maopu etu kamai, tukimo Aku!”
22 Nangepe tesa Yesus etu nalaimo tau etu ante nasusa rarana, sabana iꞌa sambaꞌa tau to nakalumana mpuꞌu.
23 Naopu etu nangulimo Yesus ka anaguru-anaguruna, “Aku mpuꞌu-mpuꞌu notesa ka komi, nakaja mpuꞌu tau nakalumana majadi todea riara Poparenta nu Alatala.
24 Pade kuuli woꞌu ka komi, nagampapa saongu binata to nabetena ewa unta mesua ri bolo jaru pade sambaꞌa tau nakalumana majadi todea riara Poparenta nu Alatala.”
25 Sangga nangepe pantesa Yesus etu, natekaja mpuꞌumo rara anaguruna sampe ira nanguli, “Ane iwetu natantumo daꞌa ria sambaꞌa tau to mamala rapakasalama!” b
26 Yesus nompenaa ira pade nanguli, “Ane aga nggari manusia, natantu daꞌa mamala majadi. Tapi ane nggari Alatala pura-pura mamala majadi.”
27 Pade nangulimo i Petrus, “Kita weꞌi, Pue. Kami eꞌi nompalasi pura-pura nuapa to naria ri jaꞌi kami pade nantuki komi. Nuapa rarata kami banepia?”
28 Nesonomo Yesus ka ira, “Aku mpuꞌu-mpuꞌu notesa ka komi, tempo Alatala mompakabou mpengele-ngele banepia, Aku, Ana nu Manusia kana mekatoko ri pekatoko magau to nagayana. Pade tempo etu woꞌu komi to nantuki Aku kana mekatoko ri sampulu rongu pekatoko magau ntanina mombatangara muli nu sampulu rombaꞌa ana Israel.
29 Isema-sema to nompalasi sapona bara sampesuwuna, bara indo umana, bara ana-anana, bara tinaluna sabana nantuki Aku, tau etu kana mombarata bali satu nggani kadeana. Pade iꞌa woꞌu mombarata katuwua mabelo sampe ri kasae-saena.
30 Tapi nadea tau to nalanga katuwuna weꞌi-weꞌi kana majadi tau to naede katuwuna banepia. Pade nadea woꞌu tau to naede katuwuna weꞌi-weꞌi kana majadi tau to nalanga katuwuna banepia.”