Porapa ewa tau nigaji nokarajaa ri tinalu ntau
20
Yesus nanguli, “Tempo Alatala moparenta Iꞌa masimbayu ewa porapa eꞌi: Naria sambaꞌa tau to naria tinalu nipotuja anggur. Nasadondo mpuꞌu iꞌa nesuwu nggari sapona nalau mangelo tau ragajina mokarajaa ri tinaluna.
2 Iꞌa nomposirata bara sakuya mbaꞌa topokarajaa pade niulina ka ira, ‘Kalaumo komi mokarajaa ri tinaluku ria, pade kuwai ka komi simbau sampeka doi salaka majadi gajimu saeo.’ Nasitujumo ira, pade iꞌa nompakau ira malau mokarajaa ri tinaluna.
3 Tinti sasio mpadondona nalau woꞌumo pue ntinalu etu mopaelo topokarajaa ntanina. Nikitana bara sakuya mbaꞌa tau ri potomu aga nekatoko-toko waꞌamo.
4 Niulina ka ira, ‘Kalaumo komi mokarajaa ri tinaluku ria, damo kuwai ka komi gaji to masipatona.’ Jadi nalau mpuꞌumo ira nokarajaa.
5 Tinti sampulu rongu nalau woꞌumo pue ntinalu etu mopaelo topokarajaa ntanina. Niulina ka ira, ‘Kalau komi mokarajaa ri tinaluku, damo kuwai ka komi gaji to masipatona.’ Pade waꞌa woꞌu nipowiana tinti toluongu ngguwiana.
6 Kira-kira tinti alima ngguwiana nalau woꞌumo pue ntinalu etu mopaelo topokarajaa ntanina. Niposiratana bara sakuya mbaꞌa tau aga nekatoko-toko daꞌa ria pokarajaana. Nekutanamo iꞌa ka ira, ‘Nokuya komi aga nekatoko njaneo, daꞌa nokarajaa?’
7 Nesonomo ira, ‘Daꞌa naria tau nombagaji kami.’
Pade nanguli pue ntinalu etu, ‘Ane iwetu, kalaumo komi mokarajaa ri tinaluku.’ Nangepe etu nalaumo ira.
8 Sangga nasolopa eo nangulimo pue ntinalu etu ka mandorona, ‘Pokio puramo topokarajaa pade bayari puramo gaji ira mompamula nggari ira to lako nompamula nokarajaa tinti alima ngguwiana sampe marata ri jaꞌi ira to nokarajaa nggari mpadondona.’
9 Naratamo topokarajaa to nompamula nokarajaa tinti alima ngguwiana, pade ira niwai simbau sampeka doi salaka.
10 Iwetu woꞌu sampe narata ri jaꞌi topokarajaa to nokarajaa nggari mpadondona. Ira nompekiri riara ntaꞌi iweꞌi: ‘Natantumo kami kana rawai meliu nggadea sabana kami nokarajaa njaneo.’ Tapi gaji to niwai ka ira nasimbayu ante tau ntanina etu, aga simbau sampeka doi salaka.
11 Naopu ira nantarima gaji nompamulamo ira nongua-ngua ka pue ntinalu etu ante nanguli,
12 ‘Tau-tau topokarajaa to narata ngguwiana nokarajaa aga sajaa lau. Kami eꞌi nokarajaa ntomo njaneo ri kapanena, tapi komi nombawai gaji ka ira nasimbayu ante kami!’
13 Nangulimo pue ntinalu ka sambaꞌa nggari tatongo ira, ‘Sampesuwu, aku daꞌa nasala ri jaꞌi komi. Nikasitujutamo gajimu kana sampeka doi salaka saeo.
14 Jadi alamo gaji komi pade panjilimo. Aku madota mombawai gaji ka tau to narata ri purina nasimbayu ewa to niwaiku ka komi.
15 Natantu aku namala mowia nantuki dotaku ante doiku mboto! Bara nasiriati rara komi nanggita aku mowia nabelo ri jaꞌi tau ntanina?’”
16 Pade Yesus nompakaopu porapa etu ante nanguli, “Iwetu woꞌumo banepiana tau-tau to ri purina weꞌi-weꞌi kana majadi ri koluna. Pade tau-tau to ri koluna weꞌi-weꞌi kana majadi tau-tau to ri purina.”
Yesus nombaboto katolungganina ewa jala nggamatena
17 Tempo etu Yesus riara mpolumakona mpaka ri ngata Yerusalem. Riara mpolumakona Iꞌa nanggeni sampulu rombaꞌa anaguruna mompatani nggari jaꞌi ntau dea pade niulina ka ira,
18 “Epemo mpakabelo-belo! Weꞌi-weꞌi kita eꞌi mantende mpaka ri ngata Yerusalem. Ri setu Aku, Ana nu Manusia kana rawai ka balengga-balengga topanggeni agama bo guru-guru agama. Pade ira mompakatantu riara potangara Aku kana rapatesi.
19 Maopu etu Aku kana rawai ka tau-tau daꞌa to Yahudi pade rapongei-ngei ira bo raporo mpakandasa. Pade kaopuna Aku kana rapaku ira ri kayu parika sampe mamate. Tapi ri eo katolueona Aku kana matuwu bali.”
Pomperapi indo Yakobus bo Yohanes
20 Naliu etu naratamo rongo i Zebedeus ntalianana ri jaꞌi Yesus. Nekadedemo iꞌa ri ngayo Yesus sabana naria sangele pomperapina.
21 Nekutanamo Yesus ka iꞌa, “Indo, nuapa nipodotamu?”
Nesonomo indo etu, “Tempo Komi majadi Magau palogamo ana-anaku eꞌi mekatoko moparenta mpasanggani-nggani ante Komi, sambaꞌa ri pangganamu, pade sambaꞌa ri panggeimu.”
22 Tapi nesonomo Yesus ka ira, “Daꞌa ninjani komi nuapa niperapi komi. Iwenumo? Rapakule komi manggolo pepandasa nasimbayu ewa pepandasa to rapawela ka Aku?”
Nesonomo ira, “Rapakule!”
23 Pade nanguli Yesus ka ira, “Nakono komi kana manggolo pepandasa nasimbayu ewa to rapawela ka Aku. Tapi daꞌa Aku to nakuasa mompakatantu isema masipato mekatoko ri pangganaku bara ri panggeiku. Petoꞌo etu bagia ira to nipakatantu Umaku.”
24 Tempo sampulu mbaꞌa anaguru Yesus ntanina nangepe pomperapi etu, narau mpuꞌumo rara ira ri jaꞌi rombaꞌa to nosampesuwu etu.
25 Etu sampe Yesus nompokio ira pura-pura pade niulina ka ira, “Ninjani komi mbotomo topoparenta-topoparenta tau-tau daꞌa to Yahudi nomparenta todea ira ante nasombo, pade topanggeniaka-topanggeniaka ira nompandasa todea ira.
26 Tapi daꞌa masipato komi moinggu iwetu! Kakonona kana iweꞌi: isema-sema nggari tatongo komi to madota malanga panggana iꞌa etu kana majadi topantulungi roana.
27 Pade isema-sema madota majadi to nalanga katuwuna kana majadi batua komi
28 nasimbayu ewa Aku, Ana nu Manusia. Aku daꞌa narata ri dunia eꞌi ala ratulungi ntau tapi ala mantulungi tau, pade ala mombawai koroku rapatesi mantolo silaka-silaka ntau dea.”
Yesus nompakabelo mata rombaꞌa tau naburo
29 Tempo Yesus ante anaguru-anaguruna nompalasi ngata Yerikho, nadea mpuꞌu tau nantuki Iꞌa.
30 Ri setumo naria rombaꞌa tau naburo nekatoko ri wiwi jala. Tempo ira nangepe lele Yesusmo to noliu ri jala etu, nongare-ngaremo ira, “Pue, Muli i Daud! Potowemo kami!”
31 Tapi tau dea to nantuki Yesus nangontiaka ira rombaꞌa ante nanguli, “Neꞌe makanano! Pekalinomo!” Tapi tau-tau naburo etu nantambai nongare ante suara to namangga, “Pue, Muli i Daud! Potowemo kami!”
32 Nangepe ira nongare-ngare nenontomo Yesus, pade nipokiona ira. Pade nekutanamo Iꞌa ka ira, “Nuapa to rapodota komi kupowia ka komi?”
33 Nesono ira rombaꞌa, “Pue, to nipodota kami ala mata kami mamala mekita.”
34 Naasi mpuꞌu mata Yesus nanggita ira rombaꞌa. Jadi niojona palena nanggabe mata ira. Pade kaliu-liu nabelomo mata ira. Pade nalaumo ira rombaꞌa nantuki Yesus.