Porapa ewa tobalu ante topotangara to nadenggona
18
Naopu etu Yesus nombatesa ka anaguru-anaguruna saongu porapa mompatuduki ira ala maoso mosambaya, neꞌe maopu rara.
2 Niulina, “Ri saongu ngata naria sambaꞌa topotangara to daꞌa nekou ri jaꞌi Alatala pade daꞌa woꞌu nombabila sanggamanusiana.
3 Pade ri ngata etu naria woꞌu sambaꞌa besi tobalu. Iꞌa tunggai narata ri jaꞌi ntopotangara etu nerapi tulungi ante nanguli, ‘Tulungimo aku mantingayo baliku!’
4 Pamulana topotangara etu daꞌa nadota mantulungi tobalu etu. Tapi kaopuna nipekirina, ‘Naupa aku daꞌa nekou ri jaꞌi Alatala pade daꞌa woꞌu nombabila sanggamanusiaku,
5 aginamo aku mantulungi tobalu eꞌi sabana iꞌa nombabago aku. Ane aku daꞌa mantulungi iꞌa, iꞌa kana marata-rata mompakalenge aku.’”
6 Pade nangulimo Yesus ka anaguru-anaguruna, “Epemo mpakabelo-belo nuapa to nitesa topotangara to nadenggo etu!
7 Ane tau to nadenggo rarana madota mantulungi tobalu to nerapi-rapi ri jaꞌina, neꞌepa rauli Alatala. Natantumo Iꞌa kana mantulungi todeana to nipelisina to daꞌa nenonto mekakai ri jaꞌina. Neꞌe rapekiri komi Iꞌa nompakasae-sae pade mantulungi ira.
8 Natantumo Iꞌa kana masasinta mantulungi ira. Tapi tempo Aku, Ana nu Manusia marata bali ri dunia eꞌi, natantumo tau to mpuꞌu-mpuꞌu nomparasaya Aku daꞌa madea.”
Porapa ewa to Parisi bo topomperapi balasitee
9 Pade Yesus nombatesa woꞌu saongu porapa ri jaꞌi ntau to nompekiri aga iramo tau to nabelona pade tau ntanina daꞌa ria gunana.
10 Niulina, “Naria rombaꞌa tau nalau mpaka ri Sapo Mpepue mosambaya, sambaꞌa to Parisi pade sambaꞌa topomperapi balasitee.
11 Tau to Parisi etu nenggore pade nosambaya riara ntaꞌina, ‘Pue Alatala, aku nosukuru ri jaꞌimu sabana aku eꞌi daꞌa nasimbayu ante tau ntanina, etumo tau topebagiu, tau to nadenggo rarana, ante tau to nebualo. Aku nosukuru aku daꞌa nasimbayu ante topomperapi balasitee etu.
12 Ronggani santipa aku napuasa pade aku nombawai ka Pue sabagia nggari sampulu bagia nggari pura-pura pombarataku.’
13 Tapi tempo topomperapi balasitee etu nosambaya iꞌa nenggore nggawao. Daꞌa nabia iꞌa nakantingoa ri langi. Ante nanjoso rara iꞌa nanjapa-njapa bombarana ante nanguli, ‘Pue Alatala, potowemo aku, sabana aku eꞌi sambaꞌa tau nasilaka.’”
14 Pade nangulimo Yesus, “Tempona ira rombaꞌa nanjili, natantumo topomperapi balasitee etumo to nikonoa Alatala, daꞌa tau to Parisi to nalanga rarana etu. Sabana isema-sema to nompakalanga rarana kana rapakaede, pade isema-sema to nompakaede rarana, kana rapakalanga.”
Yesus nombagane ngana-ngana
15 Nadea tau nanggeni ana-ana ira mpaka ri jaꞌi Yesus ala Iꞌa mombadika palena ri ngana-ngana etu mombagane ira. Tapi tempo anaguru-anaguru Yesus nanggita etu, ira nanggarau tau-tau etu.
16 Tapi Yesus nompokio ngana-ngana etu pade niulina ka anaguru-anaguruna, “Pakambamo ngana-ngana etu marata ri jaꞌiku! Neꞌe ratagi ira, sabana aga tau to noinggu ewa ngana-ngana eꞌi to masipato majadi todea riara Poparenta nu Alatala.
17 Toramo! Daꞌa ria sambaꞌa tau namala majadi todea riara Poparenta nu Alatala ane iꞌa daꞌa mekou ri jaꞌi Alatala nasimbayu ante ngana-ngana eꞌi.”
Yesus ante topanggeniaka nto Yahudi to nasugi
18 Naria sambaꞌa topanggeniaka nto Yahudi nekutana ri jaꞌi Yesus, “Guru to nabelona, nuapa masipato kupowia ala aku mamala mombarata katuwua mabelo sampe ri kasae-saena?”
19 Nesonomo Yesus, “Nokuya komi nanguli Aku nabelo? Daꞌa ria ntanina nabelo, aga Pue Alatala.
20 Natantumo ninjanimu parenta Alatala to nanguli, ‘Neꞌe mogau sala ante tau daꞌa rongomu mboto, neꞌe mepatesi, neꞌe mangangga, neꞌe modawa ri ngayo ntopotangara, pade bilamo indo umamu.’”
21 Nesonomo tau etu, “Parenta-parenta etu nitukiku puramo nggari kakediku.”
22 Sangga nangepe etu nangulimo Yesus ka tau etu, “Danariapa sangaya to masipato mupowia. Pobalumo pura-pura mbara-mbaramu pade palelemo doina etu ka tau-tau nakasiasi ala murata kakalumana ri suruga. Maopu etu kamai, tukimo Aku!”
23 Tapi sangga nangepe tesa Yesus etu nasusamo rara topanggeniaka etu, sabana iꞌa sambaꞌa tau nakalumana mpuꞌu.
24 Ninjani Yesusmo nasusa rara ntau etu. Etu sampe niulina, “Nakaja mpuꞌu tau nakalumana majadi todea riara Poparenta nu Alatala.
25 Nagampapa saongu binata to nabetena ewa unta mesua ri bolo jaru pade sambaꞌa tau nakalumana majadi todea riara Poparenta nu Alatala.”
26 Pade nangulimo tau-tau to nangepe tesa Yesus etu, “Ane iwetu natantumo daꞌa ria sambaꞌa tau to mamala rapakasalama!” a
27 Nangulimo Yesus, “Anu daꞌa nipakule manusia nipakule nu Alatala.”
28 Naopu etu nangulimo i Petrus ka Yesus, “Kita weꞌi, Pue. Kami eꞌi nompalasi pura-pura nuapa to naria ri jaꞌi kami pade nantuki Komi.”
29 Pade nangulimo Yesus ka ira, “Aku mpuꞌu-mpuꞌu notesa ka komi, isema-sema to nompalasi sapona bara rongona bara sampesuwuna bara indo umana bara anana sabana nantuki Alatala,
30 iꞌa kana mombarata bali riara nggatuwuna weꞌi-weꞌi neliu nggadea nggari nuapa to nipalasina. Pade ri tempo nggapurina iꞌa kana mombarata katuwua mabelo sampe ri kasae-saena.”
Yesus nombaboto katolungganina ewa jala nggamatena
31 Yesus nompokio sampulu rombaꞌa anaguruna nalau mpasanggani-nggani, pade niulina ka ira, “Epemo mpakabelo-belo! Weꞌi-weꞌi kita mantende mpaka ri ngata Yerusalem. Pade ri setu pura-pura nuapa to nitulisi nabi-nabi ewa Aku, Ana nu Manusia kana madupa.
32 Aku kana rawai ka tau-tau daꞌa to Yahudi pade rapongei-ngei ira, rauli sinjaꞌi pade ratailu ira.
33 Aku kana raporo ira mpakandasa pade kaopuna rapatesi ira. Tapi ri eo katolueona Aku kana matuwu bali.”
34 Pura-pura nuapa to nitesa Yesus etu daꞌa ninjani anaguru-anaguruna. Tempona etu nitabuniaka ka ira batuana nggari tesa etu, pade daꞌa ninjani ira nuapa patuju nu tesa Yesus etu.
Yesus nompakabelo sambaꞌa toburo
35 Tempona Yesus ntora narata ri ngata Yerikho, naria sambaꞌa tau naburo nekatoko nerapi-rapi ri wiwi jala.
36 Tempo niepena gosa ntau dea noliu ri setu, nipekutanana ka tau-tau to namosu iꞌa, “Nuapa eꞌi?”
37 Nangulimo ira, “Yesus tau nggari ngata Nazaret etu moliu ri seꞌi.”
38 Nangepe etu nongaremo tau to naburo etu, “Yesus, Muli i Daud, potowemo aku eꞌi!”
39 Tau-tau to nokolu ka Yesus nangontiaka toburo etu ante nanguli, “Neꞌe makanano! Pekalinomo iko!”
Tapi toburo etu nantambai nongare ante suara to namangga, “Muli i Daud, potowemo aku!”
40 Nangepe etu, nenontomo Yesus, pade nipekikenina toburo etu mpaka ri jaꞌina. Tempona toburo etu narata ri jaꞌina, nekutanamo Yesus ka iꞌa,
41 “Nuapa to mupodota kupowia ka iko?”
Nesonomo toburo etu, “Pue, to nipodotaku ala mataku mamala mekita!”
42 Pade nangulimo Yesus ka iꞌa, “Kitamo! Nabelomo matamu sabana iko nomparasaya!”
43 Kaliu-liu nabelomo mata ntoburo etu, pade nalaumo iꞌa nantuki Yesus ante nombatoiya Pue Alatala. Tempona pura-pura tau dea ri setu nanggita kajadia etu, ira pura-pura nantoiya Alatala.