Yesus ante Zakheus
19
Sangga naratapa ri ngata Yerikho nesuamo Yesus nombaliunaka ngata etu.
2 Ri ngata etu naria sambaꞌa balengga topomperapi balasitee, sangana i Zakheus. Nakalumana mpuꞌu iꞌa.
3 Iꞌa madota manggita Yesus, tapi daꞌa namala sabana naede korona pade nadea mpuꞌu tau nantalili Yesus.
4 Jadi Zakheus nokolu nangowa mpaka ri sampuꞌu kayu ri wiwi jala, tau dea ri purina. Narata ri setu iꞌa nompone kayu etu pade nekatoko ri pangana ala iꞌa mamala manggita Yesus tempona Iꞌa moliu ri setu.
5 Tempo Yesus narata ri wayo nggayu etu Iꞌa nantingara ri panga nu kayu etu nanggita i Zakheus, pade niulina, “Zakheus, panaꞌumo masalisa, sabana Aku madota mpaka ri sapomu eo eꞌi.”
6 Nangepe etu nompari-mparimo i Zakheus nanaꞌu pade nikenina Yesus mpaka ri sapona ante nadamba rarana.
7 Tapi sangga nanggita etu nokagagutu-gutumo pura-pura tau sambaꞌa bo sambaꞌa, “Daꞌa nabelo Yesus nalau nesai nosanggani ante tau to nadenggo rarana etu!”
8 Tempo Yesus ri sapona nekanggoremo i Zakheus pade niulina ka Yesus, “Pue, santongo mbara-mbaraku kana kuwai ka tau to nakasiasi. Pade isema-sema to nibagiuku, aku kana mompopanjili ka ira patanggani kadeana.”
9 Nangepe etu nangulimo Yesus, “Tesamu etu tandaina komi saongu njapo nipakasalamamo eona eꞌi, sabana nasimbayu ante Abraham totuꞌamu nggaolu, komi woꞌu nomparasaya Alatala.
10 Komi nipakasalama sabana etumo patuju Ana nu Manusia narata ri dunia. Aku narata mangelo ante mompakasalama tau-tau to nalipo riara silaka ira.”
Porapa ewa doi bulawa
11 Tempona tau-tau danangepe tesa Yesus etu, Iꞌa nompapola tesana ka ira ante saongu porapa. Nitesana porapa eꞌi ka ira sabana namosumo Iꞌa ri ngata Yerusalem pade niparasaya ntodea Pue Alatala kana kaliu-liu mompamula moparenta ri dunia.
12 Jadi Yesus nombatesa ka ira porapa eꞌi: “Sambaꞌa madika nopatuju malau mpaka ri ngata nakawao ala ralanti majadi magau, pade naopupa ralanti manjili mpaka ri ngatana mboto ala moparenta ri setu.
13 Daꞌapa iꞌa nalau nipokiona ruru sampulu mbaꞌa batuana pade niwaina ka ira simbau sampeka doi bulawa. Pade niulina ka ira, ‘Doi eꞌi rapogoli komi sampe aku manjili.’ Naopu etu nalaimo iꞌa.
14 Tapi tau-tau ri ngatana ri setu nagigi rara ri jaꞌina. Jadi nipakau ira topanggeni tesa mpaka ri ngata nakawao to nikalauna etu. Narata ri setu nangulimo topanggeni tesa etu ka magau to nakuasa ri setu, ‘Kami daꞌa madota madika eꞌi majadi magau ri bagia kami.’
15 Tapi madika etu kana nilanti najadi magau ri bagia ira. Pade naopu etu nanjilimo iꞌa mpaka ri ngatana mboto.
Narata ri sapona nipokiona sampulu mbaꞌa batuana to niwaina ka doi bulawa etu marata ri jaꞌina. Sangga naratapa ira nekutanamo iꞌa ka ira, ‘Sakuyamo ana nu doiku nipogoli komi?’
16 Naratamo batuana pamulana ri ngayona pade nanguli, ‘Magau, doi bulawamu sampeka etu nipogoliku najadi sampulu.’
17 Pade nangulimo magau etu ka batuana etu, ‘Nabelomo! Komi batua to nabelona. Komi namala niparasaya ante mbara-mbara sakedi. Sabana etu komi kana rapajadi topoparenta sampulu ngata.’
18 Pade naratamo batua karombaꞌana ri ngayo magau pade nanguli, ‘Magau, doimu sampeka nipogoliku najadi alima.’
19 Pade nangulimo magau ka iꞌa, ‘Komi kana rapajadi topoparenta lima ngata.’
20 Pade naratamo batua ntanina nanguli, ‘Magau, eꞌimo doi bulawa sampeka to niwai komi ka aku. Nibunguku ante kae pade nitabuniakaku ri petoꞌo to nabelona.
21 Naeka aku ri jaꞌi komi, sabana ninjaniku komi sambaꞌa tau to nasoa. Komi nangala anu daꞌa niboli komi, pade nangala asele ri tinalu anu daꞌa nituja komi.’
22 Nangepe etu nesonomo magau ka batua etu, ‘Iko eꞌi sambaꞌa batua to najaꞌa! Tesamu mboto kupake mombatangara iko. Ninjanimu aku sambaꞌa tau nasoa. Aku nangala anu daꞌa niboliku pade aku nangala asele ri tinalu anu daꞌa nitujaku.
23 Ane iwetu nokuya iko daꞌa nombawai doiku etu ka tau to nompopoana doi ala tempona aku marata mamala kuala mpanjili doiku ante anana?’
24 Pade niuli magau etu ka tau-tau to naria ri setu, ‘Alamo doi bulawana sampeka etu rawai ka batua to naria doi bulawana sampulu mpeka etu.’
25 Tapi nangulimo tau-tau etu ka magau, ‘Magau, nariamo doina sampulu mpekana!’
26 Nesonomo magau etu, ‘Nakonomo etu, tapi toramo! Isema to naria nadea kana ratambai ka iꞌa. Tapi isema naria aga sakedi, etu woꞌu kana raala mpakaopu nggari jaꞌina.
27 Pade weꞌi-weꞌi kenimo ri ngayoku bali-baliku etu to daꞌa nadota mantarima aku majadi magau ira. Patesimo ira pura-pura ri ngayoku seꞌi!’”
Yesus nitomunaka pue ngata Yerusalem ewa sambaꞌa magau
28 Naopu Yesus notesa etu pura-pura nalaumo Iꞌa nokolu ka ira mpaka ri ngata Yerusalem.
29 Tempo namosumo Iꞌa ri ngata Betfage bo ngata Betania ri Bulu Zaitun, nipakauna rombaꞌa anaguruna mokolu ka Iꞌa.
30 Niulina ka ira, “Kalaumo komi mpaka ri ngata to namosumo ri ngayota etu. Tempona komi mesua ri saꞌa komi kana mombarata saongu ana keledai nitataka to daꞌapa sanggani nipesawi ntau. Wolemo ana keledai etu nggari potatakana pade umbumo wemai.
31 Ane maria tau mompekutana komi, ‘Nokuya komi nombawole ana keledai etu?’ tesa ka tau etu, ‘Pue paraluu mompake keledai eꞌi.’”
32 Jadi nalaumo rombaꞌa anaguru Yesus to nipakau mokolu etu, pade nirata ira nasimbayu ewa nuapa to niuli Yesus etu.
33 Tempona ira nombawole ana keledai etu, nekutanamo puena ka ira, “Nokuya komi nombawole ana keledai etu?”
34 Nesonomo ira, “Pue paraluu mompake keledai eꞌi.”
35 Naopu etu niumbu iramo ana keledai etu mpaka ri jaꞌi Yesus. Niboli ira pakea ri bengo keledai etu, pade Yesus nitulungi ira nesawi ri bengona. Naopu etu nalaumo ira pura-pura.
36 Tempona Yesus noliu ante keledai etu, tau-tau nombajini buya ira ri jala nombatomunaka Iꞌa.
37 Tempo Yesus ntora narata ri ngata Yerusalem ri jala to notua nggari Bulu Zaitun etu, nompamulamo pura-pura todea topantuki Iꞌa etu nongare-ngare nantoiya Alatala ante nadamba rara sabana pura-pura kabaraka to nikita ira.
38 Nongare-ngaremo ira,
“Perapi Pue mombagane Magau to narata niposumba Alatala!
Nosinggabelomo kita ante Alatala!
Ratoiyata Alatala ri suruga!”
39 Tempo etu naria bara sakuya mbaꞌa to Parisi nggari olo ntau dea etu nongare ka Iꞌa, “Guru, neꞌe rapakamba topantuki-topantuki Komi notesa iwetu!”
40 Tapi nesonomo Yesus, “Parasayamo Aku, ane ira daꞌa motesa iwetu, natantumo watu-watu eꞌi kana mongare mombatoiya Alatala!”
Yesus nantangi pue ngata Yerusalem
41 Tempo namosumo Yesus ri ngata Yerusalem pade nikitana ngata etu ri ngayona, notumangimo Iꞌa nantangi pue ngata etu.
42 Niulina, “Nabelo mpuꞌumo ane eo eꞌi komi mangginjani nuapa to raparaluu rakawia komi ala maria posinggabelo ri ngatamu eꞌi. Tapi kakonona daꞌa ninjani komi.
43 Sabana etu kana marata tempona ngata komi rapatiku pade raewa balimu. Ngatamu kana rawala ntiku ira sampe komi mana mamala mesuwu. Pade komi ralawa mpii nggari umba-umba.
44 Ngatamu kana ragero pade komi pura-pura kana rapatesi ira. Daꞌa mana maria watu to nipake komi nowia ngata eꞌi rapakamba ira mosisunju nau kamba saongu, sabana daꞌa ninjani komi tempo Alatala narata mompakasalama komi.”
Yesus nesua riara Sapo Mpepue
45 Naopu etu nalaumo Yesus nesua riara Sapo Mpepue. Ri setu nompamulamo Iꞌa nompopalai topotomu to naria ri setu.
46 Niulina ka ira, “Riara Buku Nagasa naria nitulisi iweꞌi: ‘Sapoku kana majadi sapo mposambaya.’ a Tapi komi ri seꞌi nompajadi Sapo Mpepue eꞌi petoꞌo parampo!”
47 Naopu etu eo-eo Yesus nesua nopaguru riara Sapo Mpepue. Balengga-balengga topanggeni agama ante guru-guru agama bo totuꞌa-totuꞌa nto Yahudi danangelo jala mompatesi Iꞌa.
48 Tapi daꞌa nirata ira jala mowia etu sabana pura-pura tau mpuꞌu-mpuꞌu madota mangepe tesana.