Limambaꞌa randoo to nainga ante limambaꞌa randoo nakanjalia
25
“To majadi tempo Aku marata bali ri dunia nasimbayu ewa porapa eꞌi: Naria sampulu mbaꞌa randoo nalau mantomunaka boti langgai, simbau nanggeni poindona.
2 Limambaꞌa nggari tatongo ira nadoyo, pade limambaꞌa ira nanoto.
3 Ira to nadoyona nanggeni poindo tapi daꞌa nipakasadia ira lana rapombasowo.
4 Tapi ira to nanotona nanggeni poindo pade nipakasadia ira woꞌumo lana rapombasowo.
5 Nasae mpuꞌu karata boti langgai sampe naluru mata pade napisi puramo ira.
6 Ntongo wengi naria tau nongare, ‘Ritumo boti langgai! Kamaimo mantomunaka iꞌa!’
7 Nangepe etu kaliu-liu nembangumo sampulu mbaꞌa randoo etu pade simbau nompakasadia poindona.
8 Pade nangulimo randoo-randoo to nadoyona ka roana to nanotona, ‘Wega, wai ka kami sakedi lanamu. Mapayamo poindo kami eꞌi!’
9 Tapi nesonomo ira to nanotona, ‘Neꞌena, sabana daꞌa magana ngina lana rapombasowo poindo kami bo poindo komi. Kalaumo komi mangoli lana ri jaꞌi ntopobalu lana.’
10 Jadi nalaumo randoo-randoo to nadoyona mangoli lana. Tapi tempo ira da ri tatongo jala lau mangelo lana naratamo boti langgai. Pade randoo-randoo to nasadia poindona nesua rara njapo nosusa mpasanggani ante boti langgai. Sangga nesuapa ira nipikumo pewobo.
11 Naopu etu narata woꞌumo limambaꞌa randoo to nadoyo paneꞌa. Pade nongaremo ira nggari sawalikuna, ‘Pue njapo, tulungi bea ka kamimo pewobo!’
12 Tapi nesonomo boti langgai etu, ‘Daꞌa ntoto ninjaniku isema komi!’”
13 Pade Yesus nompakaopu porapana iweꞌi: “Etu sampe komi kana mainga-inga, sabana daꞌa ninjani komi eona bo tempo karataku.”
Rombaꞌa batua to naraji ante sambaꞌa batua to nasondo rarana
14 “To majadi tempo Aku marata bali nasimbayu ewa porapa eꞌi: Sambaꞌa madika nopatuju malau mpaka ri ngata nakawao. Daꞌapa iꞌa nalau nipokiona batua-batuana pade niwaina ka ira kakalumanana.
15 Sambaꞌa niwaina ka limanjobu mpeka doi bulawa, sambaꞌapa niwaina ka ronjobu mpeka doi bulawa, pade sambaꞌapa niwaina ka sanjobu mpeka doi bulawa. Ira niwai ka doina nantuki pompakule ira mompoposaro doi. Naopu etu nanggaliwomo madika etu.
16 Tau to niwai ka limanjobu mpeka doi bulawa kaliu-liu nalau nompoposaro doi etu sampe niratana sarona limanjobu mpekana.
17 Iwetu woꞌu tau to niwai ka ronjobu mpeka doi bulawa nalau nompoposaro doina etu sampe niratana sarona ronjobu mpekana.
18 Tapi tau to niwai ka sanjobu mpeka doi bulawa etu nalau nombakae lowu ri tana pade nitabuniakana doi nggari madikana etu ri lowu.
19 Nasae mpuꞌumo madika etu pade natingguli bali. Sangga naratapa ri setu nipokionamo batua-batuana ala mombareke saro nu doina.
20 Naratamo batua to niwai ka limanjobu mpeka doi bulawa etu nanggeni doi ante saro limanjobu mpeka to niratana. Pade niulina, ‘Madika, komi nombawai ka aku limanjobu mpeka doi bulawa bopia. Kitamo! Eꞌimo ana nu doi etu limanjobu mpekana.’
21 Nangulimo madika, ‘Nabelomo! Komi sambaꞌa batua to nabelo to natutu nantui bago to niparasaya ka komi. Komi namala niparasaya ante mbara-mbara sakedi. Sabana etu kana kuparasaya ka komi mbara-mbara madea. Kamaimo madamba-damba mpasanggani ante aku.’
22 Pade narata woꞌumo batua to niwai ka ronjobu mpeka doi bulawa. Nangulimo iꞌa, ‘Madika, komi nombawai ka aku ronjobu mpeka doi bulawa bopia. Kitamo! Eꞌimo ana nu doi etu ronjobu mpekana.’
23 Nangulimo madika, ‘Nabelomo! Komi sambaꞌa batua to nabelo to natutu nantui bago to niparasaya ka komi. Komi namala niparasaya ante mbara-mbara sakedi. Sabana etu kana kuparasaya ka komi mbara-mbara madea. Kamaimo madamba-damba mpasanggani ante aku.’
24 Naopu etu naratamo batua to niwai ka sanjobu mpeka doi bulawa. Nangulimo iꞌa, ‘Madika, ninjaniku komi sambaꞌa tau to nasoa. Komi nangala asele ri tinalu anu daꞌa nituja komi, pade komi nangala anu daꞌa nisawu komi.
25 Naekamo raraku. Jadi aku nalau nantabuniaka doi komi rara lowu. Kita weꞌi! Eꞌimo doi komi, madika.’
26 Pade nangulimo madika, ‘Iko sambaꞌa batua to najaꞌa bo nasondo rarana! Ninjanimu aku nangala asele nggari tinalu anu daꞌa nitujaku, pade aku nangala anu daꞌa nisawuku.
27 Ane iwetu nokuya komi daꞌa nombawai doiku etu ka tau nompoposaro doi ala tempo aku narata mamala kuala mpanjili doiku etu ante sarona?’
28 Pade niuli madika ka batuana ntanina, ‘Alamo doi bulawa sanjobu mpeka etu nggari jaꞌina, rawai ka batua to naria sampulu njobu mpeka!
29 Sabana isema to naria madea kana ratambai ka iꞌa sampe madea mpuꞌu ri jaꞌina. Tapi isema to naria aga sakedi, etu woꞌu kana raala mpakaopu nggari jaꞌina.
30 Pade tajiakamo batua to daꞌa ria gunana etu mpaka ri sawalikuna ri karumauna. Ri setu iꞌa kana mageo bo mosinggiki bagana ante masusa rara.’”
Eo Mpotangara ri kaopu nu dunia
31 “Tempo Aku, Ana nu Manusia manjili bali ri dunia ante kuasaku ewa magau nosanggani ante malaeka-malaekaku, Aku kana mekatoko ri pekatoko magau to nagayana.
32 Pade pura-pura manusia ri dunia kana rapasiromu ri ngayoku pade Aku kana mompopogaꞌa ira majadi robingga nasimbayu ewa sambaꞌa topoewu nompopogaꞌa bimbana nggari towauna.
33 Tau-tau to nanoana kana rapasiromu ri sabingga ngganaku, pade tau-tau to najaꞌana kana rapasiromu ri sabingga njidiku.
34 Pade Aku kana manguli ka ira ri sabingga ngganaku iweꞌi: ‘Kamaimo komi to nigane Umaku. Pesuamo riara Poparentaku! Naria petoꞌo ri seꞌi to nipakasadia ka komi nggari lamba pamulana.
35 Sabana tempo Aku naoro taꞌiku komi nombawai ka Aku panggoni. Tempo nabai tamboloku, komi nombawai ka Aku panginu. Tempo Aku najadi torata komi nantarima Aku raranjapomu.
36 Tempo Aku daꞌa ria pakeaku komi nombawai ka Aku pakea. Tempo Aku najuꞌa komi nantalioda Aku. Tempo Aku riara tarunggu komi narata nanggita Aku.’
37 Pade tau-tau to nanoa etu kana manguli, ‘Pue, ipiamo kami nanggita Komi naoro taꞌi pade nombawai ka Komi panggoni, bara nanggita Komi nabai tambolo pade nombawai ka Komi panginu?
38 Ipiamo Komi najadi torata pade kami nantarima Komi raranjapo kami, bara nanggita Komi daꞌa nopakea pade nombawai ka Komi pakea?
39 Ipiamo kami nanggita Komi najuꞌa bara riara tarunggu pade kami nalau nantalioda Komi?’
40 Pade Aku kana mombasono ira, ‘Aku mpuꞌu-mpuꞌu notesa ka komi, nuapa to nipowia komi ka sampesuwu-sampesuwuku nau aga sambaꞌa to naede katuwuna, nasimbayu ewa komi nompowia etu ka Aku.’
41 Maopu etu Aku kana manguli ka ira ri sabingga njidiku, ‘Palaimo nggari jaꞌiku komi to nijanjiaka Umaku! Palaimo riara apu to najela sampe ri kasae-saena to nipakasadia ka Magau nu Seta ante malaeka-malaeka to nantuki iꞌa.
42 Sabana tempo Aku naoro taꞌiku komi daꞌa nombawai ka Aku panggoni. Tempo nabai tamboloku komi daꞌa nombawai ka Aku panginu.
43 Tempo Aku najadi torata komi daꞌa nantarima Aku raranjapomu. Aku daꞌa nopakea tapi komi daꞌa nombawai ka Aku pakea. Aku najuꞌa pade Aku nitarunggu, tapi komi daꞌa narata nantalioda Aku.’
44 Pade ira kana manguli ka Aku, ‘Pue, ipiamo kami nanggita Komi naoro taꞌi, bara nabai tambolomu? Ipiamo Komi najadi torata, bara daꞌa nopakea, bara najuꞌa, bara nitarunggu pade kami daꞌa nantulungi Komi?’
45 Pade Aku kana mombasono ira, ‘Aku mpuꞌu-mpuꞌu notesa ka komi, tempo komi daꞌa nadota mantulungi sampesuwu-sampesuwuku to naede katuwuna nasimbayu ewa komi daꞌa nadota mantulungi Aku.’”
46 Pade Yesus nompakaopu tesana ante nanguli, “Pura-pura tau to najaꞌa etu kana rasuku sampe ri kasae-saena. Tapi tau-tau to nanoa etu kana matuwu mabelo sampe ri kasae-saena.”