YESUS NISOKO NITANGARA PADE NIPATESI (Pasal 26-27)
Topanggeniaka agama Yahudi nasintuwu mompatesi Yesus
26
Sangga naopupa Yesus nompatuduki etu pura-pura nangulimo Iꞌa ka anaguru-anaguruna,
2 “Ninjani komimo damo nepua Eo Bete Paska. Pade Aku, Ana nu Manusia kana rawai ka baliku ala rapaku ri kayu parika.”
3 Tempo etu nasiromumo balengga-balengga topanggeni agama bo totuꞌa-totuꞌa nto Yahudi ri sapo nu Balengga Topanggeni Agama to nosanga ka i Kayafas.
4 Ira nasintuwu manjoko Yesus nggalino pade mompatesi Iꞌa.
5 Tapi nanguli ira sambaꞌa ka roana, “Neꞌe kita mowia etu tempo Eo Bete ala neꞌe majadi kakanano ri tatongo ntau dea.”
Sambaꞌa besi nantoli minya wongi ri balengga Yesus
6 Tempo Yesus ante anaguru-anaguruna naria ri ngata Betania ira nesai ri sapo ntau nosanga ka i Simon to najuꞌa bete bopia.
7 Tempo ira ri setu naratamo sambaꞌa besi nanggeni saongu botolo nipowia nggari watu to niisi minya wongi to nasuli mpuꞌu olina. Tempo Yesus nekatoko nanggoni naratamo besi etu nombatoli minya wongi etu ri balengga Yesus ewa tandai pebilana ka Iꞌa.
8 Tapi sangga nanggita powia besi etu naraumo rara anaguru-anaguru Yesus. Ira nanguli, “Nokuya minya wongi etu aga nipakarugi sinjaꞌi?
9 Kakonona minya wongi etu mamala rapobalu ante olina to nadea pade doi olina rawai ka tau-tau nakasiasi!”
10 Yesus nangginjani pompekiri ira, jadi niulina ka ira, “Nokuya komi nompakasusa besi eꞌi? Nuapa to nipowiana ka Aku nabelo.
11 Tau-tau nakasiasi bate-batena maria ri tatongo komi, tapi Aku daꞌa batena mosanggani ante komi.
12 Ante nombatoli minya eꞌi ri jaꞌiku iꞌa nompakasadia koroku ratana banepia.
13 Aku mpuꞌu-mpuꞌu notesa ka komi, ri umba-umba ri dunia Kareba Belo rapatolele, powia nu besi eꞌi kana ratesa woꞌu ala mombatora iꞌa.”
Yudas nonia mompobalu Yesus ka balina
14 Naopu etu sambaꞌa nggari sampulu rombaꞌa anaguru Yesus to nosanga ka Yudas Iskariot nalau mpaka ri jaꞌi balengga-balengga topanggeni agama
15 pade niulina, “Ane aku mombawai Yesus riara mpale komi, nuapa rawai komi ka aku?” Nangepe etu ira nombawai ka iꞌa tolumpulu mpeka doi salaka.
16 Pade nompamula nggari tempo etu Yudas nangelo loga to nabelona mombawai Yesus riara mpale balina.
Yesus nanggoni panggoni Posusa Paska ante anaguruna
17 Ri eo pamulana Posusa Roti Daꞌa Nidika Ragi naratamo anaguru-anaguru Yesus nompekutana Iꞌa, “Guru, ri umba petoꞌo mupokono rakalau kami ala mompakasadia panggoni Posusa Paska ka Komi?”
18 Nesonomo Iꞌa, “Kalaumo komi mpaka ri ngata Yerusalem ri jaꞌi yanu, pade ulimo ka iꞌa iweꞌi: ‘Guru nanguli, mana masaeka Aku ri seꞌi. Aku madota mantuki Eo Bete Paska ri sapomu mpasanggani-nggani ante anaguru-anaguruku.’”
19 Pade nalaumo anaguru-anaguruna nompowia ewa to nipakau Yesus ka ira, pade nipakasadia iramo panggoni Posusa Paska.
20 Tempo nawengimo nekatokomo Yesus nanggoni mpasanggani-nggani ante sampulu rombaꞌa anaguruna.
21 Tempo ira nanggoni nangulimo Yesus, “Aku mpuꞌu-mpuꞌu notesa ka komi, sambaꞌa nggari tatongo komi kana mompobalu Aku ka baliku.”
22 Nangepe etu nasusa mpuꞌumo rara ira, pade nekutanamo ira sambaꞌa bo sambaꞌa ka Iꞌa, “Pue, daꞌa aku eꞌi to nipatujumu?”
23 Nesonomo Yesus, “Tau to mombatome roti riara tubu mpasanggani-nggani ante Aku, iꞌamo to mompobalu Aku.
24 Aku, Ana nu Manusia kana mamate ewa to nitulisi riara Buku Nagasa. Tapi mandasa mpuꞌumo tau to mompobalu Aku etu! Nabelopa ane tau etu daꞌa niote ri dunia.”
25 Naopu etu nekutanamo Yudas to mompobalu Yesus ngina, “Guru, daꞌa aku eꞌi to nipatujumu?”
Nesonomo Yesus, “Iwetu pangulimu.”
Yesus nompakatantu ada mombatora Iꞌa
Mrk. 14:22-26; Luk. 22:15-20; 1Kor. 11:23-25
26 Tempo ira nanggoni Yesus nangala roti pade nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ante nanguli, “Alamo roti eꞌi, pade konimo. Eꞌimo koro bataku.”
27 Naopu etu nialana woꞌu saongu sanggiri panginu, niulina tarima kasi ka Pue Alatala, pade niwaina ka ira ante nanguli, “Inu komi puramo panginu eꞌi,
28 sabana eꞌimo leiku to rapatiti ka tau dea ngina ala mompakaasa Pojanji Alatala ante manusia. Leiku eꞌi rapatiti ka tau dea ala silaka-silaka ira mamala raampungi.
29 Parasayamo tesaku eꞌi. Nompamula weꞌi-weꞌi Aku mana manginu anggur sampe marata tempona banepia Aku manginu anggur to nabouna mpasanggani-nggani ante komi riara Poparenta Umaku.”
30 Naopupa ira nodade nombatoiya Alatala nalaumo ira mpaka ri Bulu Zaitun.
Yesus nombaboto Petrus mombasapu Iꞌa ngina
31 Pade nangulimo Yesus ka anaguru-anaguruna, “Wengi eꞌi komi pura-pura kana mokanggaura momparasaya tempo manggita nuapa to majadi ri jaꞌiku, sabana naria Tesa Alatala to nitulisi riara Buku Nagasa iweꞌi:
‘Aku kana mompatesi topoewu
sampe bimba-bimbana mosimpotatare.’ (Za. 13:7)
32 Tapi tempo Aku matuwu bali Aku mokolu ka komi mpaka ri Bagia Galilea.”
33 Nangepe etu nangulimo i Petrus, “Naupa ira pura-pura mokanggaura momparasaya tempo manggita nuapa to majadi ri jaꞌimu, aku eꞌi daꞌa!”
34 Tapi nangulimo Yesus ka iꞌa, “Aku mpuꞌu-mpuꞌu notesa ka iko, wengina eꞌi woꞌu daꞌapa manu moraꞌo, tolungganimo iko mombasapu Aku.”
35 Nesonomo i Petrus, “Nau aku mamate mpasanggani ante Komi aku daꞌa ntoto mombasapu Komi!” Pade iwetu woꞌu to niuli pura-pura anaguruna ntanina.
Yesus nosambaya ri Getsemani
36 Naopu etu naratamo Yesus ante anaguru-anaguruna ri saongu petoꞌo to nosanga ka Getsemani. Narata ri setu nangulimo Iꞌa ka ira, “Pekatokomo ri seꞌi. Aku malau ri saꞌa mosambaya.”
37 Nikenina i Petrus bo rombaꞌa ana i Zebedeus mpasanggani-nggani. Pade nompamulamo Iꞌa nasusa bo nandasa rarana.
38 Niulina ka ira, “Nasusa mpuꞌumo raraku, ewa mamate nirasaiku! Popeamo ri seꞌi, pade komi kana mainga-inga mpasanggani-nggani ante Aku!”
39 Naopu etu napolamo Yesus sakedi pade nekadede Iꞌa sampe ri tana pade nosambaya. Niulina, “Uma, ane mamala kuperapi ala kasusa bo kapari eꞌi neꞌe rapawela ka Aku eꞌi. Tapi neꞌe dotaku majadi, aga dotamu mboto!”
40 Naopu etu nanjilimo Iꞌa ri jaꞌi anaguruna tolumbaꞌa etu. Niratana ira pura-pura napisi. Pade niulina ka i Petrus, “Kitamo! Daꞌa nipakule komi mosanggani ka Aku nau aga sajaa?
41 Komi kana mainga bo mosambaya ala neꞌe komi mawela pesoba! Riara ntaꞌimu naria dota mompowia to nabelona, tapi koromu daꞌa nompakule.”
42 Naopu etu nalau woꞌumo Yesus njambaꞌana karongganina nosambaya. Niulina, “Uma, ane kasusa bo kapari eꞌi kana rapawela ka Aku pade daꞌa namala rapakakawao nggari jaꞌiku, pakambamo dotamu majadi.”
43 Naopu etu narata woꞌumo Iꞌa ri jaꞌi anaguruna. Niratana ira aga napisi woꞌumo sabana naluru mpuꞌu mata ira.
44 Pade sangganipa woꞌu Iꞌa nompalasi ira pade nalau nosambaya katolungganina. Posambayana nasimbayu ante posambayana paneꞌa.
45 Naopu nosambaya narata woꞌumo Iꞌa ri jaꞌi anaguruna pade niulina ka ira, “Iwenumo? Danapisi bo nangosaraka komi? Kitamo! Naratamo tempona Aku, Ana nu Manusia rawai riara mpale tau-tau nasilaka.
46 Pembangumo! Kitamo! Naratamo tau to nompobalu Aku! Kamaimo kita mantomunaka iꞌa.”
Yesus nisoko
47 Tempo Yesus danotesa naratamo Yudas, sambaꞌa nggari sampulu rombaꞌa anaguruna. Pade nosanggani ante iꞌa naria tau dea nanggeni guma bo pato to nipakau balengga-balengga topanggeni agama bo totuꞌa-totuꞌa nto Yahudi.
48 Daꞌapa ira nomai Yudas nompakatantu ka ira tandaina ala ranjani ira ri umbana Yesus. Niulina, “Isema ngina kueki, etumo Iꞌa. Soko komimo Iꞌa!”
49 Jadi sangga naratapa Yudas ri setu iꞌa kaliu-liu nompakamosu Yesus pade nanguli, “Tabe, Guru!” Pade niekina Yesus.
50 Nangulimo Yesus ka iꞌa, “Umba, wega, etumo patujumu nomai ri seꞌi?” a Pade kaliu-liu tau dea etu nompakamosu Yesus pade nanjoko Iꞌa.
51 Nanggita etu sambaꞌa nggari anaguru to nosanggani ante Yesus nangosu gumana nantimbe batua nu Balengga Topanggeni Agama sampe napudu talingana.
52 Nangulimo Yesus ka anaguruna etu, “Boli mpanjilimo gumamu ri petoꞌona! Sabana isema-sema mantimbe ante guma kana mamate ratimbe ante guma woꞌu.
53 Iwenumo? Daꞌa ninjanimu ane Aku merapi tulungi nggari jaꞌi Umaku Iꞌa nasalisa mompakau njobu-njobu malaekana mantulungi Aku? b
54 Tapi ane etu majadi daꞌa madupa tesa to nitulisi riara Buku Nagasa nggaolu to nanguli eꞌi pura-pura kana majadi ri jaꞌiku.”
55 Pade ri tempo etu nangulimo Yesus ka tau dea ri setu, “Iwenumo? Niuli komi Aku eꞌi sambaꞌa parampo sampe komi kana marata ante guma bo pato manjoko Aku? Eo-eo Aku nekatoko nopaguru ri Sapo Mpepue. Nokuya komi daꞌa nanjoko Aku tempo etu?
56 Tapi pura-pura etu kana majadi ala madupa tesa to nitulisi nabi-nabi nggaolu ri Buku Nagasa.” Naopu etu nalaimo pura-pura anaguruna nompalasi Iꞌa.
Yesus nikeni ri ngayo Polibu Bete Agama nto Yahudi
57 Pade ira to nanjoko Yesus nanggeni Iꞌa mpaka ri sapo nu Balengga Topanggeni Agama to nosanga ka i Kayafas. Tempo etu guru-guru agama bo totuꞌa-totuꞌa nto Yahudi nasiromu nolibu ri setu.
58 Petrus nantuki ira nggawao sampe narata ri lalowo sapo Balengga Topanggeni Agama. Narata ri setu nesuamo iꞌa nekatoko mpasanggani-nggani ante topojaga-topojaga sabana iꞌa madota mangginjani nuapa majadi ante Yesus.
59 Tempo etu balengga-balengga topanggeni agama bo pura-pura Topolibu Bete Agama nto Yahudi etu nompasimbuku mangelo tau modawa mompakanoto kasala Yesus ala Iꞌa mamala rasuku mamate.
60 Tapi naupa nadea tau narata nodawa ala mombanawusaka Iꞌa daꞌa ria nirata ira kasalana. Kaopuna naria rombaꞌa tau nantingayo Polibu Bete etu
61 pade nanguli, “Naria sanggani tau eꞌi nanguli iweꞌi: ‘Aku nompakule mombagero Sapo Mpepue eꞌi pade mombabangu mpanjili sapo etu riara tolumbengi.’”
62 Naopu etu nekanggoremo Balengga Topanggeni Agama nanguli ka Yesus, “Iwenumo? Naria pesonomu ewa tesa-tesa nu sabi eꞌi to nanguli Komi atau daꞌa?”
63 Tapi naupa daꞌa ria salana Yesus aga nekalino. Pade sangganipa Balengga Topanggeni Agama nanguli ka Iꞌa, “Ante sanga Alatala to Natuwuna, aku nompakau Iko ulimo ka kami ane Iko Magau to Mompakasalama, Ana nu Alatala!”
64 Nesonomo Yesus, “Ewa niuli komi nakono. Pade kuuli ka komi, kana marata tempona banepia komi kana manggita Aku, Ana nu Manusia mekatoko ri sabingga nggana nu Alatala to Nakuasana. Pade komi kana manggita Aku manaꞌu nggari langi riara kulimu.”
65 Nangepe etu Balengga Topanggeni Agama nombaseri pakeana tandaina narau mpuꞌu rarana. Pade niulina ka Topolibu Bete, “Iꞌa nompakakedi Alatala! Rapokuya kita mangelo sabi-sabi ntanina? Niepe komi mbotomo tesana nompakakedi Alatala!
66 Iwenu pombarata komi?”
Nesonomo ira Topolibu Bete, “Iꞌa masipato rasuku mamate!”
67 Naopu etu tau-tau ri setu nantailu lenje Yesus pade nombajaguru Iꞌa. Naria sanupa to nanjapa Iꞌa
68 ante nanguli, “E, Magau to Mompakasalama, ulimo isema nombasapa Iko!”
Petrus nombasapu Yesus
69 Tempo etu i Petrus nekatoko ri sawalikuna ri lalowo sapo etu. Tempo iꞌa ri setu sambaꞌa batua besi nompakamosu iꞌa pade nanguli, “Iko woꞌu sambaꞌa tau nosanggani ante Yesus to Galilea etu!”
70 Tapi i Petrus nesapu ri ngayo ira pura-pura, “Daꞌa nakono! Daꞌa ninjaniku patuju tesamu!”
71 Naopu etu i Petrus nalau ri pewobo wala lalowo. Ri setu sambaꞌa batua besi ntanina nanggita iꞌa pade nanguli ka tau-tau ri setu, “Tau eꞌi woꞌu nosanggani-nggani ante Yesus to Nazaret etu.”
72 Tapi i Petrus nesapu woꞌumo ante metunda, “Daꞌa ninjaniku tau etu!”
73 Daꞌa nasae kaolona tau-tau to nenggore ri setu nompakamosu i Petrus pade nanguli ka iꞌa, “Natantumo iko sambaꞌa roana, sabana nanoto nggari tesamu iko woꞌu to Galilea!”
74 Pade nompamulamo i Petrus netunda bo nojanji. Niulina, “Daꞌa ntoto ninjaniku tau etu!” Pade iwetu i Petrus notesa kaliu-liu noraꞌomo manu.
75 Nangepe etu natetoramo rarana ewa tesa Yesus paneꞌa to nanguli, “Daꞌapa manu moraꞌo ngina, tolungganimo iko mombasapu Aku.” Pade nesuwumo i Petrus nggari setu nalau nageo nakanjodu-njodu ante nasusa mpuꞌu rarana.