Nia mompatesi Yesus
22
Tempona etu namosu ntoana posusa to niuli nto Yahudi Posusa Roti Daꞌa Nidika Ragi. Posusa etu to niuli ira woꞌu Posusa Paska. a
2 Balengga-balengga topanggeni agama ante guru-guru agama danangelo jala mompatesi Yesus nggalino, sabana ira naeka ri jaꞌi ntau dea.
3 Ri tempona etu nesuamo Magau nu Seta riara ntaꞌi Yudas Iskariot, sambaꞌa nggari sampulu rombaꞌa anaguru Yesus.
4 Naopu nipesua Magau nu Seta nalaumo Yudas mpaka ri jaꞌi balengga-balengga topanggeni agama ante balengga-balengga topojaga Sapo Mpepue ala motesa ante ira iwenu iꞌa mamala mompobalu Yesus ka ira.
5 Nangepe etu nadamba mpuꞌumo rara ira, pade ira nojanji mombawai doi ka iꞌa.
6 Yudas woꞌu nasituju ante nia ira, pade nalaimo iꞌa nggari setu mangelo loga to nabelona mombawai Yesus ka ira tempo daꞌa ria tau dea.
Anaguru-anaguru Yesus nompakasadia panggoni Posusa Paska
7 Naratamo eo mposusa Roti Daꞌa Nidika Ragi, etumo tempona manjambale ana bimba rakoni ri posusa etu.
8 Pade Yesus nompakau i Petrus bo Yohanes iweꞌi: “Kalau pakasadia ka kitamo panggoni Posusa Paska ala kita manggoni mpasanggani-nggani.”
9 Nekutanamo ira rombaꞌa, “Ri umba rapodota Komi rapompakasadia kami panggoni etu?”
10 Nesonomo Yesus, “Tempona komi mesua rara ngata sambaꞌa langgai manggeni gumba nu ue kana mosintomu ka komi. Tukimo iꞌa mpaka ri sapo to rakalauna.
11 Pade ulimo ka pue njapo ri setu, ‘Guru nompakau kami mompekutana komi, ri umbana tombi rapanggonina panggoni Posusa Paska mpasanggani-nggani ante anaguruna?’
12 Pade pue njapo etu kana mompopokita ka komi saongu tombi bete ri kalangana nagana ante parewana. Ri setumo rapompakasadia panggoni Posusa Paska ka kita.”
13 Jadi nalaumo i Petrus bo Yohanes nesua rara ngata. Pade to nirata ira ri setu nasimbayu pura ewa nuapa to niuli Yesus ka ira. Pade nipakasadia iramo panggoni Posusa Paska etu.
Yesus nompakatantu ada mombatora Iꞌa
14 Sangga naratamo tempona manggoni panggoni Posusa Paska etu, nekatokomo Yesus nanggoni mpasanggani-nggani ante anaguruna.
15 Nangulimo Yesus ka ira, “Nabete mpuꞌu raraku manggoni panggoni Paska eꞌi mpasanggani-nggani ante komi daꞌapa Aku rapandasa.
16 Parasayamo tesaku eꞌi! Aku mana manggoni panggoni Paska eꞌi sampe marata tempona batuana Posusa Paska to nakonona rapakadupa. Etu kana majadi tempo Pue Alatala marata momparenta manusia ri dunia eꞌi.”
17 Naopu etu niala Yesus saongu sanggiri panginu pade niulina tarima kasi ka Pue Alatala. Naopu etu niulina ka anaguru-anaguruna, “Alamo panginu eꞌi, pade inu komi mpasanggani-nggani.
18 Epemo! Nompamula weꞌi-weꞌi Aku mana manginu anggur sampe marata tempona banepia Alatala moparenta ri dunia eꞌi.”
19 Naopu etu niala Yesus woꞌumo roti pade niulina tarima kasi ka Pue Alatala. Pade roti etu nibingga-binggana pade nibagina ka ira ante nanguli, “Eꞌimo koro bataku to rawai mantolo silaka komi. Kawiamo ada eꞌi ala mombatora Aku.”
20 Sangga naopu ira nanggoni, iwetu woꞌu nikawiana ante panginu. Nialana saongu sanggiri pade niulina, “Panginu eꞌi tandai pojanji Alatala to nabouna ante manusia. Pojanji etu rapakaasa ante leiku to rapatiti ka komi.
21 Tapi kitamo! Tau to mompobalu Aku ka baliku ngina naria mpasanggani ante Aku ri seꞌi.
22 Aku, Ana nu Manusia kana mamate nantuki to nipakatantu Alatala ka Aku. Tapi mandasa mpuꞌumo tau to mompobalu Aku etu!”
23 Pade nompamulamo anaguru-anaguru Yesus nosipekutana sambaꞌa bo sambaꞌa, “Isema nggari tatongota eꞌi to mompobalu Yesus?”
Posinggarau ewa isema to neliu nggalanga katuwuna
24 Pade neumbamo posinggarau ri tatongo anaguru-anaguru Yesus bara isema nggari ira nireke to neliu nggalanga katuwuna.
25 Nangepe etu nangulimo Yesus ka ira, “Ri dunia eꞌi magau-magau nabiasa aga nompakau todea ira ala mompopokita kalanga nu katuwuna. Naupa iwetu ira madota rauli tau to nabelo rarana.
26 Tapi daꞌa masipato komi moinggu iwetu. Kakonona komi kana moinggu iweꞌi: To nalanga katuwuna nggari komi kana majadi nasimbayu ante to naedena, pade topanggeniaka komi kana majadi nasimbayu ante batua.
27 Isema to neliu nggalanga katuwuna? Tau to nekatoko nanggoni atau tau nombatande iꞌa? Natantumo tau to nekatoko nanggoni etu to neliu nggalanga katuwuna. Tapi Aku eꞌi, Pue komi, najadi nasimbayu ante tau nombatande komi.
28 Komimo to nosanggani-nggani ante Aku tempo Aku nipandasa.
29 Sabana etu nasimbayu ewa Umaku Pue Alatala mombawai ka Aku kuasa moparenta banepia, iwetu woꞌu Aku mombawai ka komi kuasa moparenta banepia.
30 Komi kana mosusa madamba-damba ante Aku tempo Aku majadi Magau. Pade komi kana mekatoko ri sampulu rongu pekatoko magau momparenta to Yahudi, etumo muli nggari sampulu rombaꞌa ana Israel.”
Yesus nombaboto Petrus mombasapu Iꞌa ngina
31 Pade nangulimo Yesus ka i Simon Petrus, “Simon, epemo tesaku! Magau nu Seta niwai Alatala ka logamo mompesoba komi pura-pura. Pesobana etu nasimbayu ewa tau nombawaro pae.
32 Tapi Aku naopumo nosambaya ka iko, Simon, ala iko daꞌa mokanggaura momparasaya Aku. Pade tempo iko matingguli bali momparasaya Aku, iko kana mompakaroso pomparasaya roamu woꞌu.”
33 Pade nesonomo i Petrus, “Pue, aku nasadia mesua riara tarunggu mpasanggani-nggani ante Komi, pade ane Komi rapatesi aku woꞌu nasadia mamate mpasanggani-nggani ante Komi!”
34 Tapi nesonomo Yesus, “Parasayamo Petrus, daꞌapa manu moraꞌo ngina bobaya tolungganimo iko mombasapu Aku.”
Anaguru Yesus kana mainga
35 Naopu etu nangulimo Yesus ka ira pura-pura, “Tempo komi nipakauku bopia nalau nompatolele Kareba Belo niuliku neꞌe rakeni doi bara batutu bara sapatu. Tempona komi nalau naria to nakura ri jaꞌi komi?”
Nesonomo ira, “Daꞌa ria nakura nuapa-nuapa.”
36 Pade nangulimo Yesus, “Nakonomo etu. Tapi weꞌi-weꞌi isema naria doi bara batutu kana rakenina. Pade isema daꞌa naria gumana kana rapobaluna baju rapangoli samata guma.
37 Etu paraluu weꞌi-weꞌi sabana kana rapakadupa nuapa to nitulisi riara Buku Nagasa ewa Aku iweꞌi: ‘Iꞌa kana rauli sambaꞌa tau to najaꞌa.’ b Nuapa to nitulisi etu kana madupa weꞌi-weꞌi.”
38 Pade nangulimo ira, “Pue, kitamo. Eꞌimo romata guma.”
Nesonomo Yesus, “Naganamo etu.”
Yesus nosambaya ri Bulu Zaitun
39 Pade nalaumo Yesus ante anaguru-anaguruna nantende ewa biasa mpaka ri Bulu Zaitun.
40 Sangga naratapa ri setu, nangulimo Yesus ka ira, “Posambayamo ala neꞌe komi mawela pesoba.”
41 Naopu etu nalaumo Iꞌa nakawao sakedi nggari jaꞌi ira, pade notimbakotumo Iꞌa nosambaya ka Pue Alatala iweꞌi:
42 “Umaku, ane mupodota, pakakawaomo nggari jaꞌiku kasusa bo kapari eꞌi! Tapi neꞌe dotaku to majadi, aga dotamu mboto.”
43 Naopu etu naratamo sambaꞌa malaeka nggari suruga nompakaroo rarana.
44 Pade nosambaya woꞌumo Yesus ante mpuꞌu-mpuꞌu, sampe inina najadi ewa lei natiti ri tana sabana nasusa mpuꞌu rarana.
45 Naopu nosambaya nalaumo Yesus nompakamosu anaguru-anaguruna. Niratana ira pura-pura napisi sabana naluru mata ante nasusa rara.
46 Pade niulina ka ira, “Nokuya komi napisi? Pembangumo pakanoto raramu pade posambayamo ala neꞌe komi mawela pesoba!”
Yesus nisoko
47 Tempona Yesus danotesa ka ira, naratamo bara sakuya mpulu mbaꞌa tau to nikeni Yudas sambaꞌa nggari sampulu rombaꞌa anaguru Yesus etu. Yudas nompakamunji Yesus ala mombaeki Iꞌa.
48 Tapi nangulimo Yesus ka iꞌa, “Yudas, iko nombaeki Aku ewa roamu, tapi kakonona iko mombawai Aku, Ana nu Manusia ka baliku.”
49 Tempona anaguru-anaguru Yesus to naria ri setu nanggita nuapa to majadi, nangulimo ira, “Pue, weꞌi-weꞌi kami mombatimbe ira ante guma?”
50 Pade sambaꞌa nggari ira nantimbe batua nu Balengga Topanggeni Agama sampe napudu talinga ngganana.
51 Tapi Yesus nombatagi ira, “Neꞌe mana metimbe!” Pade nialana talinga to nanawu etu nipatakana bali.
52 Pade nangulimo Yesus ka balengga-balengga topanggeni agama, balengga-balengga topojaga Sapo Mpepue bo totuꞌa-totuꞌa ngata to narata ri setu manjoko Iꞌa, “Iwenumo? Niuli komi Aku eꞌi parampo sampe komi kana marata ante guma bo pato manjoko Aku?
53 Eo-eo Aku naria nosanggani ante komi ri Sapo Mpepue tapi daꞌa nabia komi nanjoko Aku. Tapi damo wengina eꞌi pade narata komi manjoko Aku. Tempo rumau eꞌi woꞌumo Magau nu Seta nakuasa.”
Petrus nombasapu Yesus
54 Naopu etu Yesus nikeni ira mpaka ri sapo Balengga Topanggeni Agama. Petrus nantuki ira nggari purina nakawao sakedi sampe narata ri sapo etu.
55 Ri tatongo lalowo ri setu naria apu nipakawaa ntau raponeru. Jadi nalaumo i Petrus nekatoko ri tatongo ntau noneru ri setu.
56 Tempo iꞌa nekatoko namosu apu etu naria sambaꞌa batua besi nombalele mata iꞌa pade nanguli, “Tau eꞌi woꞌu naria nosanggani ante Yesus!”
57 Tapi i Petrus nesapu, niulina, “Daꞌa nakono! Daꞌa ninjaniku Iꞌa!”
58 Daꞌapa nasae naria woꞌu sambaꞌa tau ntanina ri setu nanggita i Petrus pade nanguli, “Iko woꞌu sambaꞌa nggari topantuki Yesus!”
Tapi nangulimo i Petrus, “Daꞌa nakono!”
59 Kira-kira saongu jaa kaliuna naria woꞌumo sambaꞌa tau ntanina nanguli, “Natantumo tau eꞌi topantuki Yesus, sabana iꞌa woꞌu sambaꞌa tau nggari Bagia Galilea!”
60 Tapi nesonomo i Petrus, “Daꞌa! Daꞌa ninjaniku nuapa patujumu!”
Tempo etu woꞌu, daꞌapa naopu i Petrus notesa, noraꞌomo manu.
61 Pade neilimo Yesus nanggita i Petrus. Ri setumo natitora rara i Petrus ewa nuapa to niuli Pue ka iꞌa pangane iweꞌi: “Daꞌapa manu moraꞌo ngina bobaya, tolungganimo iko mombasapu Aku.”
62 Pade nesuwumo i Petrus nggari setu nalau nageo nakanjodu-njodu.
Yesus nipongei-ngei bo niboba
63 Tau-tau nombajagai Yesus nompongei-ngei ante nombaboba Iꞌa.
64 Ira nombalamu matana pade nombaboba Iꞌa ante nanguli, “E, nabi! Ulimo isema to nombaboba Iko!”
65 Pade ira tunggai nanguli sinjaꞌi Iꞌa.
Yesus nikeni ri ngayo Polibu Bete Agama nto Yahudi
66 Naeompadondo nasiromumo totuꞌa-totuꞌa nto Yahudi, balengga-balengga topanggeni agama ante guru-guru agama, pade Yesus nikeni ri jaꞌi Polibu Bete Agama nto Yahudi etu.
67 Nangulimo ira ka Yesus, “Ane Iko Magau to Mompakasalama, ulimo ka kami!”
Nesonomo Yesus, “Aku daꞌa manguli nuapa-nuapa sabana natantumo komi daꞌa momparasaya tesaku,
68 pade ane Aku mekutana ri jaꞌi komi daꞌa madota komi mombasono pompekutanaku.
69 Tapi nompamula weꞌi-weꞌi Aku, Ana nu Manusia kana mekatoko ri petoꞌo to nibila ri panggana Alatala to nakuasa.”
70 Pade nekutanamo ira pura-pura, “Ane iwetu, Iko eꞌi Ana nu Alatala?”
Nesonomo Yesus, “Iyo, ewa to niuli komi etu, nakono.”
71 Pade nangulimo ira sambaꞌa bo sambaꞌa, “Ane iwetu daꞌa mana paraluu sabi ntanina. Niepeta mbotomo tesana!”