Pewai besi tobalu to nakasiasi
21
Ri Sapo Mpepue Yesus nanggita tau to nakalumana nombasuaraka doi ira nadea riara peti mpesomba ri setu.
2 Nikitana woꞌu sambaꞌa besi tobalu to nakasiasi mpuꞌu nombasuaraka rompeka doi tambaga to nakura mpuꞌu olina.
3 Sangga nanggita etu nangulimo Iꞌa, “Aku mpuꞌu-mpuꞌu notesa ka komi, pewai tobalu to nakasiasi etu neliu nggadea nggari pewai ntau pura-pura,
4 sabana ira nombawai nggari labi nu doi ira. Tapi naupa tobalu eꞌi nakasiasi mpuꞌu iꞌa nombawai pura-pura doi to naria ri jaꞌina.”
Yesus nombaboto kagero nu Sapo Mpepue
5 Naria bara sakuya mbaꞌa topantuki Yesus notesa ka Iꞌa, “Sapo Mpepue eꞌi nipakaramba mpuꞌu ante watu-watu to nagaya-gaya pade ante mbara-mbara to narambana to niwai ntau ka Alatala.”
Nangepe etu nangulimo Yesus,
6 “Kana marata tempona banepia pura-pura to nikita komi eꞌi kana ragero sanggani sampe daꞌa mana maria watu eꞌi rapakamba mosisunju, nau kamba saongu. Pura-pura kana ragero.”
Tandaina namosumo karata Yesus bali ri dunia
7 Pade nekutanamo ira ka Yesus, “Guru, nepia etu pura-pura majadi? Nuapa tandaina to mompakatantu namosumo tempona pura-pura to niuli Komi etu majadi?”
8 Nesonomo Yesus, “Pakabelo-belo ala neꞌe komi rabagiu, sabana madea tau kana marata mompobalu sangaku. Maria sambaꞌa manguli, ‘Akumo Magau to Mompakasalama!’ Pade maria woꞌu to manguli, ‘Naratamo tempona Yesus marata bali ri dunia!’ Tapi neꞌe komi mantuki ira.
9 Pade neꞌe komi maeka ane mangepe kareba posimpatesi ante posiewa. Etu pura-pura kana majadi ntani ruru. Tapi etu daꞌapa tandaina kaopu nu dunia.”
10 Pade niulina woꞌumo, “Tempo etu tau-tau nggari sangata kana mosibali ka tau-tau to sangatana, pade magau simbau magau kana mosiewa.
11 Kana maria lingu to naroꞌona. Ri umba-umba ri dunia kana maria kamateoro ante juꞌa mpendai njilele. Pade ri langi maria tandai-tandaina to mompakaeka tau.
12 Tapi daꞌapa pura-pura etu majadi komi kana rasoko ntau ntani ruru pade rapandasa ira. Komi kana ratangara ri polibu nto Yahudi pade rasuaraka riara tarunggu. Pade komi rakeni woꞌu ri ngayo magau-magau ante gubernur-gubernur sabana komi nomparasaya Aku.
13 Etumo loga to nabelo ka komi mompakanoto ka ira isema Aku.
14 Pakasaongumo raramu neꞌepa ruru mompekiri nuapa rauli komi mombasono ira,
15 sabana tempona etu woꞌumo Aku mboto kana mombawai ka komi pompekiri to nabelona ala komi mamala motesa mombasono ira. Etu sampe balimu daꞌa mamala mombabali tesamu atau mombasapu nuapa to rauli komi.
16 Tempona etu indo umamu, sampesuwu sararamu ante roamu kana mombasoko ante mombakeni komi ri jaꞌi ntopotangara. Pade maria bara sakuya mbaꞌa nggari komi to rapatesi ira.
17 Komi kana raporau rara pura-pura tau sabana komi nomparasaya Aku.
18 Tapi naupa iwetu komi kana rapakasalama Alatala. Sambalaa wulu woꞌo nggari balenggamu daꞌa malipo.
19 Pakaroso pomparasayamu ri jaꞌiku sabana ante iwetu komi mamala mombarata katuwua mabelo sampe ri kasae-saena.”
Yesus nombaboto kagero ngata Yerusalem
20 “Ane rakita komi ngata Yerusalem eꞌi rapatiku tantara balina natantumo ranjani komi mana masaeka ngata eꞌi rapakagero.
21 Tempona etu tau-tau to naria ri Bagia Yudea eꞌi kana mangowa malai mpaka ri buluna. Pade tau-tau to naria riara ngata Yerusalem kana malai nggari ngata eꞌi. Pade tau to naria ri sawalikuna neꞌe mesua riarana,
22 sabana eo etumo tempo Alatala mombasuku to Yahudi. Etu mompakadupa pura-pura to nitulisi nabi-nabi Alatala nggaolu.
23 Ri eo etu mandasa mpuꞌumo besi-besi to matiana bo ira to danompatomi. Pura-pura tau ri ngata eꞌi kana mandasa mpuꞌu sabana etumo tempo Alatala marata mombasuku to Yahudi.
24 Kana maria to Yahudi rapatesi ante guma, pade maria ntanina to rasoko ratawani balina rakeni mpaka ri umba-umba ri dunia. Pade tempona etu ngata Yerusalem eꞌi kana mamala ka tau-tau daꞌa to Yahudi pade raparenta ira sampe nagana tempona to nipakatantu Alatala ka ira.”
Karata Ana nu Manusia bali ri dunia
25 “Pade kana maria tandai-tandai rakita komi ri mata eo, ri wula ante ri betuꞌe-betuꞌe. Ri dunia eꞌi pura-pura tau kana mawiora rarana ante maingu mangepe pogu balumba bete moruu ewa guntu.
26 Tempona etu tau-tau kana malipo rarana nggari eka ira mompekiri nuapa to majadi ri dunia, sabana kuasa-kuasa to naria ri langi kana ragagoya pura.
27 Naopu pura-pura etu majadi ira kana manggita Aku, Ana nu Manusia manaꞌu riara kulimu ante kuasa bo karemeku to nipogumaa.
28 Tempo pura-pura kajadia etu mompamula majadi, pakasadia koromu pade mantingoa ri langi, sabana sampalaipa maratamo Aku, Magau to Mompakasalama komi.”
Porapa ewa sampuꞌu kayu ara
29 Pade Yesus nombatesa saongu porapa ka topantuki-topantuki Iꞌa iweꞌi: “Kitamo kayu ara ante pura-pura kayu ntanina.
30 Ane rakita komi kayu noroya, natantumo ninjani komi namosumo eo mapane.
31 Iwetu woꞌu ane komi manggita kajadia-kajadia to nitesaku paniꞌa, kana ranjani komi mana masaeka Alatala marata moparenta ri dunia.
32 Aku mpuꞌu-mpuꞌu notesa ka komi, kajadia-kajadia etu kana majadi daꞌapa pura-pura tau to natuwu weꞌi-weꞌi mamate.
33 Langi bo dunia kana malipo tapi tesaku kana maroo sampe ri kasae-saena.”
Kita kana masadia mompopea karata Yesus
34 Pade nangulimo Yesus, “Komi kana mainga. Neꞌe komi makako gaga aga mosusa-susa bo manginu mpakalangu-langu pade aga mompekiri anu niparaluu komi matuwu eo-eo. Ane komi daꞌa mainga, ante daꞌa ranjani-njani komi Aku, Ana nu Manusia eꞌi kana marata ri jaꞌi komi nasimbayu ewa tonji daꞌa ninjani-njanina sampegoli iꞌa nisoꞌo tinggolu.
35 Iwetu woꞌu pura-pura manusia ri dunia eꞌi. Ante daꞌa ranjani-njani ira sampegoli Aku, Ana nu Manusia kana marata ri jaꞌi ira pura-pura.
36 Sabana etu komi kana mainga-inga. Neꞌe menonto-nonto merapi doa ala komi mompakule mantaꞌamaka pura-pura kajadia etu ante masalama, pade ala komi mamala mantingayo Aku, Ana nu Manusia.”