Porapa ewa topokarajaa tinalu to najaꞌa
12
Pade nompamulamo Yesus notesa ka topanggeniaka-topanggeniaka nto Yahudi ante porapa. Niulina, “Naria sambaꞌa tau nombatuja anggur ri tinaluna. Naopu etu tinalu etu niwala ntikuna, pade nikaena saongu lowu petoꞌo parewa rapompea wua anggur. Nikawiana woꞌu sou panggatono tinalu. Naopu etu nipajana tinalu etu ka bara sakuya mbaꞌa topokarajaa pade nalaimo iꞌa mpaka ri ngata ntanina.
2 Sangga naratapa tempona mompui wua anggur nipakaunamo sambaꞌa batua malau mpaka ri jaꞌi ntopokarajaa tinaluna etu ala mantarima bagiana nggari asele tinalu nipotuja anggur etu.
3 Tapi ira aga nombasoko batua etu pade nombaboba iꞌa pade nompakau iꞌa manjili ante pale ntoya.
4 Naopu etu pue ntinalu nompakau woꞌumo sambaꞌa batuana ntanina mpaka ri jaꞌi ntopokarajaa tinalu. Tapi iꞌa woꞌu niboba ira sampe nabela balenggana, pade iꞌa mpuꞌu-mpuꞌu nipakaeya ira.
5 Naliu etu pue ntinalu etu nompakau woꞌumo batua to santanina mpaka ri jaꞌi ntopokarajaa tinalu. Tapi iꞌa aga nipatesi ira. Pade iwetu woꞌu to nipowia ira ante batua-batua ntanina. Naria to niboba ira, pade naria ntanina to nipatesi ira.
6 Kaopuna naboli damo sambaꞌa lau ri jaꞌi pue ntinalu, etumo anana mboto to nipotowena. Anana etu nipakauna mpaka ri jaꞌi ntopokarajaa tinalu. Nipekirina, ‘Natantumo ira kana mekou ri jaꞌi anaku mboto.’
7 Tapi iwetu nanggita ana nu pue ntinalu etu, nangulimo topokarajaa etu sambaꞌa bo sambaꞌa, ‘Kitamo! Etumo ana pue ntinalu to majadi pue ntinalu banepia. Kamaimo kita mompatesi iꞌa ala tinalu eꞌi raalata majadi bagiata.’
8 Jadi nisoko iramo ana pue ntinalu etu pade iꞌa nipatesi ira, pade watabakuna nitajiaka ira ri sawaliku tinalu etu.”
9 Pade nekutanamo Yesus ka topanggeniaka nto Yahudi etu, “Jadi nuapa to rapowia pue ntinalu etu? Natantumo iꞌa kana marata mompatesi topokarajaa tinalu etu pade mombapaja tinalu etu ka tau-tau ntanina.
10 Natantumo nibasa komi tesa riara Buku Nagasa to nanguli iweꞌi:
‘Watu to nitajiaka ntopowia sapo
watu etumo to najadi palo mpondasi to neliu nggaroso.
11 Etu nipowia i Pue,
sangele powia to nipogumaa matata.’” (Mzm. 118:22-23)
12 Nangepe etu topanggeniaka nto Yahudi etu nompasimbuku mangelo jala manjoko Yesus, sabana ninjani ira porapa Yesus etu nipawela ka ira. Tapi ira naeka ka tau dea. Jadi nalaimo ira nompalasi Iꞌa.
To Parisi nangelo kasala tesa Yesus ante nekutana ewa mombabayari balasitee
13 Naopu etu topanggeniaka-topanggeniaka nto Yahudi etu nompakau bara sakuya mbaꞌa to Parisi ante bara sakuya mbaꞌa anabua Magau Herodes malau mangelo kasala tesa Yesus.
14 Sangga naratapa ira ri jaꞌi Yesus nangulimo ira, “Guru, ninjani kami Komi sambaꞌa tau to nanoana. Komi daꞌa ntoto naeka ka isema-sema sabana Komi daꞌa nompoposisala manusia. Komi batena nompatuduki ante nanoto pokainggu nuapa to masipato riara mpanggita Alatala. Jadi tulungi ulimo ka kami nantuki Atura-atura agama masipato mombabayari balasitee ka Magau Kaisar bara daꞌa?
15 Masipato kami mombabayari etu bara daꞌa?”
Tapi ninjani Yesus patuju ira aga mebagiu. Jadi niulina ka ira, “Nokuya komi mangelo kasala tesaku? Keni ka Aku wemai sampeka doi salaka ala kukita!”
16 Pade nikeni ira mpuꞌumo sampeka doi etu. Pade nekutanamo Iꞌa ka ira, “Gambara ante sanga isema to naria ri doi eꞌi?”
Nesonomo ira, “Gambara ante sanga Magau Kaisar.”
17 Pade nangulimo Yesus ka ira, “Ane iwetu, waimo ka Magau Kaisar nuapa to masipato rawai ka Magau Kaisar, pade waimo ka Alatala nuapa to masipato rawai ka Alatala!”
Nangepe pesono Yesus etu, nogumaamo ira.
To Saduki nangelo kasala tesa Yesus ante pompekutana ewa tau matuwu bali banepia
18 Naopu etu naratamo bara sakuya mbaꞌa tau to Saduki ri jaꞌi Yesus. Iramo tau-tau to Yahudi to nomparasaya tau namate daꞌa mana matuwu bali banepia. Jadi nekutanamo ira ka Yesus,
19 “Guru, nabi i Musa nantulisi atura eꞌi ka kita: ‘Ane maria sambaꞌa langgai norongo pade daꞌapa rongona noana namatemo iꞌa, sampesuwuna mboto kana momporongo baluna etu ala muli ira rombaꞌa majadi muli sampesuwuna to namatena etu.’ a
20 Naria ira nosampesuwu pitumbaꞌa langgai bayangi. Ulumbuana norongomo, tapi daꞌapa ira njamboko noana namatemo iꞌa.
21 Pade tuaꞌina karombaꞌana nomporongo baluna etu. Tapi daꞌapa ira noana iꞌa woꞌu namate. Pade waꞌa woꞌu to najadi ante katolumbaꞌana
22 sampe ri kapapitumbaꞌana. Daꞌa ria sambaꞌa ira nomboli ngana ka besi etu. Kaopuna besi etu woꞌu namate.
23 Jadi to rapekutana kami ka Guru iweꞌi: Tempona tau-tau namate matuwu bali banepia, besi etu rongo isema, sabana iꞌa niporongo ira pitumbaꞌa?”
24 Nesonomo Yesus ka ira, “Nasalamo pompekiri komi sabana daꞌa ninjani komi isi Buku Nagasa pade daꞌa woꞌu ninjani komi kuasa nu Alatala.
25 Tempo tau namate matuwu bali banepia, katuwu ira kana masimbayu ewa malaeka-malaeka ri suruga. Ira mana morongo bo mana raporongo.
26 Iwenumo? Daꞌapa nibasa komi nuapa to nitesa riara Buku nabi i Musa ewa tau namate matuwu bali? Ri ayat-ayat to nantesa kajadia ante santungu gumbu to najelana daꞌa nikoni nu apu, Alatala nanguli ka i Musa, ‘Akumo Alatala Abraham, Alatala Ishak bo Alatala Yakub.’ b
27 Ninjanita Pue Alatala daꞌa Alatala ntau to namatena, tapi Iꞌa Alatala ntau to natuwuna. Jadi nanotomo Abraham, Ishak bo Yakub mana namate. Nasalanjalamo pompekiri komi etu!”
Parenta Alatala to neliu nggapokona
28 Tempo etu naratamo sambaꞌa guru agama ri jaꞌi Yesus. Niepenamo tesa Yesus ante tau-tau Saduki paniꞌa pade niepena pesono Yesus nabelo mpuꞌu. Jadi nekutanamo iꞌa ka Yesus, “Guru, parenta Alatala umbana to neliu nggapokona?”
29 Nesonomo Yesus, “To neliu nggapokona iweꞌi: ‘Umba komi tau-tau to Israel, Pue Alatalata, Pueta sambaꞌa lau.
30 Potowemo Pue Alatalamu ante mpuꞌu-mpuꞌu raramu, pade ante pura-pura katuwumu, pade ante pura-pura pekirimu, pade ante pura-pura karoso koromu.’ c
31 Pade parenta karongelena iweꞌi: ‘Potowemo sanggamanusiamu nasimbayu ewa komi nompotowe koromu mboto.’ d Daꞌa ria parenta ntanina to neliu nggapokona nggari rongele parenta etu.”
32 Pade nangulimo guru agama etu ka Iꞌa, “Nakono mpuꞌu, Guru. Nakonomo tesa komi nanguli Alatala aga sambaꞌa lau pade daꞌa ria to ntanina, aga Iꞌa.
33 Pade ewa niuli komi manusia kana mompotowe Alatala ante mpuꞌu-mpuꞌu rarana, ante pura-pura pekirina pade ante pura-pura karoso korona. Pade masipato kita mompotowe sanggamanusiata ewa korota mboto. Etu neliu nggabelo nggari mombawai pesomba to nitunu bo pewai-pewai ntanina ka Alatala.”
34 Sangga nangepe guru agama etu notesa ante nanoto iwetu, nangulimo Yesus ka iꞌa, “Komi ntoramo najadi todea riara Poparenta nu Alatala.”
Nompamula nggari setu mana ria sambaꞌa to nabia nompekutana Yesus.
Posinggamosu Yesus ante Magau Daud
35 Tempo Yesus nopaguru ri Sapo Mpepue nekutanamo Iꞌa ka tau dea ri setu, “Iwenu sampe guru-guru agama nanguli Magau to Mompakasalama aga muli i Daud?
36 Magau Daud mboto ante pekeniaka Nosa Nagasa nu Alatala nanguli iweꞌi:
‘Pue Alatala nanguli ka Pueku,
kamai pekatokomo ri sabingga ngganaku
sampe Aku mompowia pura-pura balimu mekou ri jaꞌimu.’ (Mzm. 110:1)
37 Jadi ane Magau to Mompakasalama niuli i Daud Puena, iwenu sampe Iꞌa nireke aga muli i Daud?”
Sangga nangepe tesa Yesus etu nadamba mpuꞌumo rara ntau dea.
Yesus nompopatora ala neꞌe mantuki pokainggu guru-guru agama
38 Tempo Yesus nopaguru Iꞌa nanguli, “Pakabelo-belo ala neꞌe komi moinggu ewa guru-guru agama. Ira aga nompokono manjayo-njayo nompake baju ndoe ala rapogumaa ntau, pade ira aga nompokono rabila ntau riara potomu.
39 Ira aga nompokono mekatoko ri petoꞌo to nibilana riara sapo mpodade bara ri petoꞌo ntotuꞌa ri posusa.
40 Ira nombabagiu tobalu-tobalu besi ala mombarata sapo ira. Pade ira nantabuniaka pokainggu ira to najaꞌana etu ante nosambaya nasae-sae. Etu sampe meliu nggatomo pesuku to rapawela ka ira banepia!”
Yesus nombatoiya sambaꞌa besi tobalu to nakasiasi
41 Naria sanggani Yesus nekatoko nantingayo peti mpesomba ri Sapo Mpepue pade nompariara iwenu tau mombasuaraka doi ira riara peti etu. Nadea tau to nasugina narata nombasuaraka doi ira riara peti mpesomba etu. Nadea mpuꞌu pewai ira.
42 Pade narata woꞌu sambaꞌa besi tobalu to nakasiasi mpuꞌu nombasuaraka doina rompeka doi tambaga to nakura mpuꞌu olina.
43 Pade Yesus nompokio anaguruna ri jaꞌina, pade niulina ka ira, “Aku mpuꞌu-mpuꞌu notesa ka komi, besi tobalu to nakasiasi etumo to nadeapa pewaina nggari pura-pura tau ntanina to nombasuaraka doina riara peti mpesomba etu.
44 Sabana ira aga nombawai nggari labi nu doi ira, tapi tobalu besi etu nombawai ante kapepana. Iꞌa nombawai pura-pura doi to naria ri jaꞌina, etumo pura-pura katuwuna.”