Topanggeniaka nto Yahudi nekutana ewa kuasa Yesus
20
Naria sanggani Yesus nopaguru bo nompatolele Kareba Belo ka tau-tau riara Sapo Mpepue. Tempo etu naratamo balengga-balengga topanggeni agama, guru-guru agama ante totuꞌa-totuꞌa nto Yahudi,
2 pade nangulimo ira ka Iꞌa, “Uli ka kami ante kuasa nggari umba Komi nompopalai topotomu nggari Sapo Mpepue? Isema nombawai kuasa etu ka Komi?”
3 Nesonomo Yesus, “Daꞌapa Aku mombasono pompekutanamu naria woꞌu sangaya kupekutana ka komi. Uli ka Aku
4 isema nombawai kuasa ka Yohanes Topediu mombadiu tau? Alatala atau manusia?”
5 Pade nompamulamo ira nosipekutana sambaꞌa bo sambaꞌa, “Iwenu kita mombasono Iꞌa? Ane kita manguli kuasa Yohanes nggari jaꞌi Alatala Iꞌa kana manguli ka kita, ‘Ane iwetu nokuya komi daꞌa nomparasaya Yohanes?’
6 Tapi ane kita manguli kuasana nggari jaꞌi manusia, natantumo pura-pura tau ri seꞌi kana mombarempe kita ante watu sampe mamate sabana ira pura-pura nomparasaya Yohanes mpuꞌu-mpuꞌu sambaꞌa nabi.”
7 Jadi nesonomo ira ka Yesus, “Daꞌa ninjani kami nggari umba kuasana.”
8 Pade nangulimo Yesus ka ira, “Ane iwetu daꞌa woꞌu kutesa ka komi ante kuasa nggari umba Aku nowia mpengele-ngele etu.”
Porapa ewa topokarajaa tinalu to najaꞌa
9 Naopu etu Yesus nombatesa ka tau dea porapa iweꞌi: “Naria sambaꞌa tau to nombatuja anggur ri tinaluna. Naopu etu nipajana tinalu etu ka bara sakuya mbaꞌa topokarajaa pade nalaimo iꞌa mpaka ri ngata ntanina netoꞌo ri setu nasae.
10 Sangga naratapa tempona mompui wua anggur nipakaunamo sambaꞌa batuana malau mpaka ri jaꞌi ntopokarajaa tinalu etu ala mantarima bagiana nggari asele ntinalu etu. Tapi topokarajaa tinalu etu nombaboba batua etu pade nompakau iꞌa nanjili ante pale ntoya.
11 Naopu etu pue ntinalu etu nompakau woꞌumo sambaꞌa batua ntanina, tapi batua etu woꞌu niboba pade nipakaeya ntopokarajaa etu, pade nipakau nanjili ante pale ntoya woꞌu.
12 Sangganipa pue ntinalu etu nompakau batua katolumbaꞌana. Tapi batua etu woꞌu niboba sampe nalei pade nitajiaka ira mpaka ri sawaliku tinalu etu.
13 Kaopuna nangulimo pue ntinalu etu, ‘Aginamo aku mompakau anaku mboto to nipotoweku malau mpaka ri jaꞌi ira. Natantumo ira kana mekou ri jaꞌina.’
14 Tapi tempona topokarajaa tinalu etu nanggita ana pue ntinalu etu, nangulimo ira sambaꞌa ka roa ntanina, ‘Eꞌimo iꞌa, ana pue ntinalu. Kamaimo kita mompatesi iꞌa ala tinalu eꞌi raalata majadi bagiata.’
15 Pade iꞌa nikeni ira mpaka ri sawaliku tinalu etu pade nipatesi ira.”
Pade nangulimo Yesus ka tau to nangepe porapa etu, “Tempo pue ntinalu etu matingguli mpaka ri tinaluna etu, nuapa rapowiana?
16 Natantumo iꞌa kana mompatesi topokarajaa etu pura-pura, pade mombapaja tinalu etu ka tau-tau ntanina.”
Nangepe etu nangulimo tau dea ka Yesus, “A, daꞌa mamala majadi iwetu!”
17 Tapi Yesus nanggita ira ante notesa, “Kana majadi iwetu banepia sabana etumo batuana tesa to nitulisi riara Buku Nagasa iweꞌi:
‘Watu to nitajiaka ntopowia sapo,
watu etumo to najadi palo mpondasi to neliu nggaroso.’” (Mzm. 118:22)
18 Pade nanguli woꞌumo Yesus, “Isema-sema to manawu ri watu etu kana marege, pade isema-sema to raparumpi watu etu kana marege majadi sowu.”
Tau nekutana ewa pombayari balasitee
19 Ninjani guru-guru agama Yahudi bo balengga-balengga topanggeni agama porapa etu nipawela Yesus ka ira. Sabana etu ira madota manjoko Iꞌa tempona etu woꞌu, tapi ira naeka ka tau dea.
20 Jadi ira nangelo loga to nabelona ala mamala manjoko Yesus. Ira nombasogo bara sakuya mbaꞌa tau tumoni-moni ira tau to nanoa rarana. Tapi tau-tau etu nipakau ira mangelo kasala tesa Yesus ala Iꞌa mamala rakeni rapangadu ri ngayo Gubernur.
21 Jadi nalaumo ira ri jaꞌi Yesus pade nanguli, “Guru, ninjani kami pura-pura nuapa to nitesa bo to nipatuduki Komi etu nakono. Ninjani kami woꞌu Guru daꞌa nompoposisala tau, aga nompatuduki dota Alatala to nakonona ka pura-pura tau.
22 Sabana etu uli ka kami nantuki Atura-atura agama masipato mombabayari balasitee ka Magau Kaisar bara daꞌa?”
23 Tapi ninjani Yesus bagiu ira etu. Jadi niulina,
24 “Popokita ka Aku sampeka doi salaka. Gambara ante sanga isema to naria ri doi etu?”
Nesonomo ira, “Gambara bo sanga Magau Kaisar.”
25 Pade nangulimo Yesus ka ira, “Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala.”
26 Kaopuna daꞌa ria nirata ira nau aga sakedi kasala nggari tesa Yesus ri ngayo ntau dea. Ira aga nekalino ante nogumaa nangepe pesono Yesus etu.
To Saduki nekutana ewa tau matuwu bali banepia
27 Naria bara sakuya mbaꞌa to Saduki narata ri jaꞌi Yesus. Ane to Saduki etu, ira to Yahudi to nomparasaya tau namate daꞌa mana matuwu bali nggari kamatena banepia.
28 Nangulimo ira ka Yesus, “Guru, nabi i Musa nantulisi atura eꞌi ka kita: ‘Ane rapana maria sambaꞌa langgai norongo pade tau etu namate daꞌapa ria anana, sampesuwuna mboto kana momporongo baluna etu ala muli ira rombaꞌa etu majadi muli sampesuwuna to namatena etu.’ a
29 Naria ira nosampesuwu pitumbaꞌa langgai bayangi. Ulumbuana norongomo tapi daꞌapa ira njamboko noana namatemo iꞌa.
30 Jadi tuaꞌina karombaꞌana nomporongo baluna etu, tapi daꞌapa ira noana iꞌa woꞌu namate.
31 Iwetu woꞌu to najadi ante tuaꞌina katolumbaꞌana sampe ri kapapitumbaꞌana.
32 Pade kaopuna besi etu woꞌu namate.
33 Jadi tempo tau to namate matuwu bali nggari kamatena banepia besi etu rongo isema, sabana iꞌa niporongo ira pitumbaꞌa?”
34 Pade nesonomo Yesus ka ira, “Ane tau-tau ri dunia eꞌi, ira norongo bo niporongo.
35 Tapi ane tau-tau to masipato rapakatuwu Alatala bali pade matuwu ri suruga tempo etu, ira daꞌa mana morongo bara raporongo.
36 Ira mana morongo sabana ira mana mamate-mate. Ira kana masimbayu ante malaeka i Pue. Ira majadi ana-ana Alatala sabana ira naopu nipakatuwu bali nggari kamatena.
37 Pade nabi i Musa mboto nompakanoto ka kita tomate kana matuwu bali. Riara mpotulisina ewa santungu gumbu to najelana daꞌa nikoni nu apu nikasangaina Pue Alatala, ‘Alatala Abraham, Alatala Ishak bo Alatala Yakub.’ b
38 Ninjanita Pue Alatala daꞌa Alatala ntau to namatena, tapi Iꞌa Alatala ntau to natuwuna. Jadi ane Pue Alatala nikasangai i Musa Alatala Abraham, Ishak ante Yakub, etu batuana ira daꞌa tau to namate tapi tau to natuwuna, sabana riara mpanggita Alatala, pura-pura tau danatuwu.”
39 Naopu Yesus notesa iwetu nangulimo bara sakuya mbaꞌa guru agama ri setu ka Iꞌa, “Nabelo mpuꞌu pesono Guru.”
40 Ira nanguli iwetu sabana nikita ira to Saduki etu mana nabia mekutana ri jaꞌi Yesus.
Yesus notesa ka guru agama ewa Magau to Mompakasalama
41 Pade nangulimo Yesus ka ira, “Iwenu sampe tau nanguli Magau to Mompakasalama to nijanji Alatala aga muli Magau Daud?
42 Riara buku Mazmur i Daud mboto nanguli iweꞌi:
‘Pue Alatala nanguli ka Pueku,
kamai pekatokomo ri sabingga ngganaku,
43 sampe Aku mompowia pura-pura balimu mekou ri jaꞌimu.’ (Mzm. 110:1)
44 Jadi ane Magau to Mompakasalama niuli i Daud Puena, iwenu sampe Iꞌa nireke aga muli i Daud?”
Yesus nompopatora neꞌe moinggu ewa guru-guru agama
45 Tempo tau dea danangepe tesa Yesus, nangulimo Iꞌa ka topantuki-topantuki Iꞌa,
46 “Pakabelo-belo ala neꞌe komi moinggu ewa guru-guru agama. Ira aga nompokono nanjayo-njayo nobaju nandoe ala rabila ntau, pade ira aga madota rabila ntau tempo ira ri potomu. Tempo ira nesua riara Sapo Mpodade ira aga madota mekatoko ri petoꞌo-petoꞌo to nibilana. Waꞌa woꞌu tempo ira ri posusa. Ira aga madota rabila ntodea ri setu.
47 Ira nombabagiu tobalu-tobalu besi ala mombarata sapo besi-besi etu. Pade ira nantabuniaka pokainggu ira to najaꞌana ante nosambaya nasae-sae. Etu sampe meliu nggatomo pesuku to rapawela ka ira banepia!”