Yesus nangontiaka topanggeniaka agama Yahudi
23
Naopu etu nangulimo Yesus ka tau dea bo anaguru-anaguruna,
2 “Guru-guru agama bo tau-tau to Parisi nipakakuasa mompatuduki Atura-atura i Musa ka komi.
3 Etu sampe komi masipato mantuki bo matundu riara pepatuduki ira. Tapi neꞌe mompasiala pokainggu ira, sabana ira mboto daꞌa nantuki pepatuduki to nipatuduki ira ka komi.
4 Ira nompakadea atura-atura bo ada-ada to natomo ratuki, pade ira nompasuꞌu tau mantuki atura-atura bo ada-ada etu. Tapi ira mboto daꞌa madota mantulungi tau mantuki atura-atura bo ada-ada etu.
5 Pura-pura powia ira aga nipowia ala rakita ntau. Ira nompake talidangga to narembana to niisi ante tesa-tesa nu Alatala, pade ira nompakandate wua nu pakea ira ala manoto ka tau ntanina ira natutu nantuki Atura-atura agama.
6 Nadamba rara ira nekatoko ri pekatoko ntotuꞌa ri posusa bo petoꞌo to nibila ri sapo mpodade.
7 Nadamba mpuꞌu rara ira ane ira rabila ntau ri potomu pade ane ira nipokio ntau Guru.
8 Tapi ane komi, neꞌe komi madota rabila bo rauli Guru iwetu, sabana aga sambaꞌa lau gurumu, etumo Kristus. Pade komi pura-pura nosampesuwu sambaꞌa bo sambaꞌa.
9 Pade neꞌe mompakalanga tau ri dunia eꞌi ante mompokio ira Uma, sabana aga sambaꞌa lau to masipato rauli Uma, etumo Umamu ri suruga.
10 Pade neꞌe woꞌu komi madota rauli Topanggeniaka, sabana aga sambaꞌa lau to masipato rauli Topanggeniaka, etumo Kristus.
11 Tapi tau to nalanga katuwuna ri tatongo komi iꞌamo tau to nantulungi komi.
12 Tau to mompakalanga rarana mboto kana rapakaede, pade tau to mompakaede rarana mboto kana rapakalanga.
13 Tapi mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Komi nombalawa tau ntanina majadi todea riara Poparenta nu Alatala. Komi mboto daꞌa madota majadi todeana pade komi aga nombalawa tau ntanina to madota majadi todeana.
[
14 Mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Komi nombabagiu tobalu-tobalu besi ala mombarata sapo ira. Pade komi nantabuniaka pokainggu komi to najaꞌa etu ante nosambaya nasae-sae. Etu sampe meliu nggatomo pesuku to rapawela ka komi banepia.]
15 Mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Naraji mpuꞌu komi nompatuduki tau ntanina mantuki pepatuduki komi. Komi nalau nombawote tasi bo nolumako nakawao ri kabatana ala mangelo sambaꞌa tau mesua agamamu. Sangga nesuapa iꞌa agamamu iꞌa nipajadi komi sambaꞌa tau masipato mesua riara naraka to ronggani kajaꞌana nggari komi mboto.
16 Mandasa mpuꞌumo komi topanggeniaka-topanggeniaka to naburo! Komi nompatuduki iweꞌi: ‘Ane sambaꞌa tau nojanji ante nanguli sanga Sapo Mpepue, iꞌa daꞌa nipoꞌu pojanjina. Tapi ane iꞌa nojanji ante nanguli bulawa riara Sapo Mpepue, iꞌa nipoꞌu pojanjina etu.’
17 Nadoyo mpuꞌu komi! Komi ewa tau naburo! Umbana to neliu nggapokona, bulawa atau Sapo Mpepue to nompakagasa bulawa to naria riarana? Natantumo Sapo Mpepue to napokona!
18 Komi woꞌu nompatuduki tau iweꞌi: ‘Isema-sema nojanji ante nanguli meja mpesomba ri Sapo Mpepue iꞌa daꞌa nipoꞌu pojanjina etu. Tapi ane iꞌa nojanji ante nanguli pesomba to nipesomba ri bunggu meja mpesomba etu, iꞌa nipoꞌu pojanjina etu.’
19 Komi mpuꞌu-mpuꞌu ewa toburo! Umbana to neliu nggapokona, pesomba ka Alatala atau meja mpesomba? Natantumo meja mpesomba ri Sapo Mpepue etumo to nompakagasa pesomba to nipesomba ri bungguna!
20 Sabana etu ane sambaꞌa tau nojanji ante nanguli meja mpesomba batuana iꞌa nojanji ante nanguli meja mpesomba nosanggani ante pura-pura nuapa to nipesomba ri bungguna.
21 Pade ane sambaꞌa tau nojanji ante nanguli Sapo Mpepue, etu nasimbayu ewa iꞌa nojanji ante nanguli Sapo Mpepue bo Alatala to netoꞌo ri sapo etu!
22 Pade ane sambaꞌa tau nojanji ante nanguli suruga etu nasimbayu ewa iꞌa nojanji ante nanguli sanga pekatoko nu Alatala ri suruga bo Alatala to nekatoko ri bungguna!
23 Mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Sabana komi nombawai ka Alatala sabagia nggari sampulu bagia nggari rampa-rampa ri lalowomu ewa karanggada, nggulasi bo muguntumpa. Tapi parenta-parenta to napokona daꞌa ntoto nituki komi, ewa parenta moinggu manoa, maasi mata ri jaꞌi roamu bo matutu mantuki janjimu. Kakonona parenta-parenta to napokona etu paraluu ratuki komi, tapi neꞌe rakalinga atura-atura ntanina etu woꞌu.
24 Komi nasimbayu ewa tau naburo madota mombanini tau ntanina! Komi nasimbayu ewa tau to nanggaliaka karomu nggari panginu komi, tapi binata nabete ewa unta niome komi!
25 Mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Komi norama sanggiri bo tubu ri bagia sawalikuna, tapi isi riarana aga niago komi nggari jaꞌi ntau ante daꞌa ria kabasa-basana.
26 Komi mpuꞌu-mpuꞌu ewa tau naburo! Pegasa ntanimo ruru bagia riara nu sanggiri ala bagia sawalikuna woꞌu magasa!
27 Mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Komi nasimbayu ewa dayo to nicee naputi. Ri sawalikuna nagaya mpuꞌu, tapi riarana aga naria wuku-wuku ntomate bo mpengele-ngele to nawau.
28 Iwetu woꞌu komi. Riara mpanggita ntau komi nireke tau nanoa. Tapi riara ntaꞌi komi aga naria bagiu bo kajaꞌana!
29 Mandasa mpuꞌumo komi guru-guru agama bo tau-tau to Parisi! Komi aga nabelo ri lenje! Komi nompakabelo dayo nabi-nabi Alatala nggaolu bo nombawera mpakagaya dayo nu tau-tau nanoa nggaolu.
30 Komi nanguli, ‘Ane kami natuwu tempo totuꞌata nggaolu, kami daꞌa ntoto nasintuwu nompatesi nabi-nabi!’
31 Ante iwetu komi mboto nompangaku koromu muli-muli ntau to nompatesi nabi-nabi nggaolu.
32 Jadi tambai pakaganamo silaka-silaka nu totuꞌa komi nggaolu etu!
33 Umba komi, topebagiu! Umba komi muli tau-tau najaꞌa! Daꞌa ntoto mamala komi mombakabasaka koromu nggari pesuku riara naraka banepia!
34 Epemo mpakabelo-belo! Aku kana mompakau ka komi nabi-nabi bo tau-tau nanoto bo guru-guru mompatuduki tesaku ka komi. Maria sanu rapatesi komi, maria sanu to rapaku komi ri kayu parika, pade maria sanupa to raporo komi riara sapo-sapo mpodade komi. Pade maria sanupa to raraga-raga komi nggari saongu ngata mpaka ri ngata to rakalau ira.
35 Jadi kaopuna komi to natuwu weꞌi-weꞌi kana mombatanggu lei nu tau-tau nanoa rarana to nipatesi ri dunia eꞌi, nompamula nggari lei i Habel to nanoa rarana sampe ri lei i Zakharia, ana i Berekia to nipatesi ri lalowo Sapo Mpepue ri olo nu Sapo Mpepue bo meja mpesomba.
36 Aku mpuꞌu-mpuꞌu notesa ka komi, komi to natuwu weꞌi-weꞌi kana mombatanggu pura-pura kajaꞌa ntotuꞌa komi nggaolu etu!”
Yesus nantangi pue ngata Yerusalem sabana ira daꞌa nadota mantarima Iꞌa
37 “Umba komi to Yerusalem, pue ngata Yerusalem! Komi nompatesi nabi-nabi pade komi nombarempe ante watu tau-tau to nisuro Alatala mpaka ri jaꞌimu! Nadea ngganimo Aku madota manggalendu komi pura-pura nasimbayu ewa manu nombaruta anana, tapi komi daꞌa madota.
38 Epemo! Sapo Mpepue eꞌi a kana rapalasi Alatala.
39 Sabana kuuli ka komi, komi mana manggita Aku sampe Aku marata bali ri dunia pade komi mantotoaka Aku ante manguli, ‘Perapi Pue mombagane Magau to narata niposumba Alatala!’”