Yesus nangontiaka topanggeniaka nto Yahudi ante porapa ewa posusa mponika
22
Yesus nombatesa porapa ntanina ka topanggeniaka nto Yahudi. Niulina,
2 “Tempo Alatala moparenta namala rarapaka ewa sambaꞌa magau to nompowia posusa mponika anana langgai.
3 Iꞌa nompakau batua-batuana malau mompokio pura-pura tau to nigagana mantuki posusa etu. Tapi ira pura-pura to nigaga etu daꞌa nadota nalau.
4 Jadi magau etu nompakau batua-batua ntanina ante tewai iweꞌi: ‘Kau uli ka ira to nigagaku, nasadia puramo. Japi bo ana-ana japi to naboyana naopumo nisambale, pade nasadia puramo. Kamaimo mantuki posusaku eꞌi!’
5 Tapi ira pura-pura to nipokio iwetu daꞌa ntoto nompariara pegaga etu. Ira aga mbau nalau nompowia bagona mboto. Naria to nalau mpaka ri tinalu pade naria ntanina nalau nombaurusi podagana,
6 naria sanupa nanjoko batua-batua to nipakau magau etu pade nombaboba bo nompatesi ira.
7 Sangga nangepe nuapa to najadi etu, narau mpuꞌumo rara magau etu. Iꞌa nompakau tantara-tantarana malau mompatesi topepatesi-topepatesi etu pade mompalabu ngata ira.
8 Naopu etu nipokiona woꞌumo batua-batuana pade niulina ka ira, ‘Nasadiamo posusa mponika anaku, tapi ira to nigagaku daꞌa masipato momai ri posusa eꞌi.
9 Jadi kalaumo komi mpaka ri jala-jala jama pade isema-sema raposirata komi, pokiomo ira momai ri posusata eꞌi.’
10 Jadi nalaumo batua-batuana mpaka ri jala-jala jama nompasiromu pura-pura tau to niposirata ira, nabeloka tau-tau to nabelo rarana, nabeloka tau-tau najaꞌa sampe kaopuna naponu puramo sapo posusa etu ante torata.
11 Pade nesuamo magau manggita torata-torata. Ri tatongo torata ri setu nikitana sambaꞌa tau daꞌa nopakea pakea mposusa.
12 Nekutanamo magau ka tau etu, ‘Wega, nokuya komi nesua ri seꞌi daꞌa nopakea mposusa?’ Tapi tau etu daꞌa ria notingo.
13 Pade nangulimo magau ka batuana, ‘Soꞌomo palena bo kadana pade tajiakamo iꞌa ri sawalikuna ri petoꞌo narumau. Ri setu iꞌa kana mageo bo mosinggiki baga ante kasusana.’”
14 Pade Yesus nompakaopu porapana iweꞌi: “Nadea tau nipokio tapi nakura to nipelisi.”
To Parisi nompasimbuku mangelo kasala tesa Yesus ante nekutana ewa mombabayari balasitee
15 Naopu etu nalaumo tau-tau to Parisi mowia sintuwu iwenu ira mamala mangelo kasala tesa Yesus.
16 Ira nompakau bara sakuya mbaꞌa topantuki ira nosanggani ante bara sakuya mbaꞌa tau to nosabingga ante Magau Herodes malau mpaka ri jaꞌi Yesus. Naratapa ri setu nangulimo ira to nipakau etu ka Yesus, “Guru, ninjani kami Komi sambaꞌa tau to nanoa rara. Komi nompatuduki ante nanoto pokainggu to masipato riara mpanggita Alatala. Komi daꞌa naeka ri jaꞌi isema-sema sabana Komi daꞌa nompoposisala manusia.
17 Jadi tulungi tesa ka kami pombarata Komi. Nantuki Atura-atura agama masipato mombabayari balasitee ka Magau Kaisar bara daꞌa?”
18 Tapi Yesus nangginjani patuju ira to najaꞌana. Etu sampe Iꞌa nanguli, “Umba komi, topebagiu! Nokuya komi nompasimbuku mangelo kasala tesaku?
19 Popokita ka Aku sampeka doi salaka to nipake komi mombabayari balasitee.” Jadi ira nompopokita ka Iꞌa sampeka doi salaka.
20 Pade nekutanamo Yesus, “Gambara bo sanga isema to naria ri doi eꞌi?”
21 Nesonomo ira, “Gambara bo sanga Magau Kaisar.”
Jadi nangulimo Yesus ka ira, “Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala!”
22 Sangga nangepe pesono Yesus etu, nogumaamo ira. Jadi kaopuna nalaimo ira nompalasi Iꞌa.
To Saduki nekutana ewa tau matuwu bali banepia
23 Ri eo etu woꞌu naria bara sakuya mbaꞌa tau to Saduki narata ri jaꞌi Yesus. Ane to Saduki, iramo tau-tau to Yahudi to nomparasaya tau namate daꞌa mana matuwu bali banepia.
24 Jadi ira nompekutana Yesus, “Guru, nabi i Musa nompatuduki iweꞌi: ‘Ane maria sambaꞌa langgai namate daꞌa noana, sampesuwuna langgai kana momporongo besi baluna etu ala ana ira rombaꞌa etu majadi muli sampesuwuna to namatena etu.’ a
25 Naria ri tatongo kami ira nosampesuwu pitumbaꞌa langgai bayangi. Ulumbuana norongomo tapi daꞌapa ira njamboko noana namatemo iꞌa. Naopu etu baluna etu niporongo tuaꞌina.
26 Tapi daꞌapa ira noana tuaꞌina etu woꞌu namate. Pade iwetumo najadi ante katolumbaꞌana sampe ri sampesuwuna kapitumbaꞌana.
27 Kaopuna besi etu woꞌu namate.
28 Jadi tempo tau namate matuwu bali banepia, besi etu rongo isema nggari ira pitumbaꞌa, sabana iꞌa niporongo ira pura-pura?”
29 Nesonomo Yesus, “Nasala pompekiri komi sabana daꞌa ninjani komi isi Buku Nagasa, pade daꞌa woꞌu ninjani komi kuasa nu Alatala.
30 Tempo tau namate matuwu bali banepia, katuwu ira kana masimbayu ewa malaeka-malaeka ri suruga, ira mana morongo bara raporongo.
31 Iwenumo? Daꞌapa nibasa komi nuapa to nitesa Alatala ka komi riara Buku Nagasa ewa tau namate matuwu bali? Iꞌa nanguli iweꞌi:
32 ‘Akumo Alatala Abraham, Alatala Ishak bo Alatala Yakub.’ b Ninjanita Pue Alatala daꞌa Alatala ntau to namatena, tapi Iꞌa Alatala ntau to natuwuna. Jadi nanotomo Abraham, Ishak bo Yakub mana namate.”
33 Sangga nangepepa pepatuduki Yesus etu, nogumaa puramo tau dea.
To Parisi nangelo kasala tesa Yesus ante pompekutana ewa parenta Alatala
34 Tempo tau-tau to Parisi nangepe lele tau-tau to Saduki nekalino mbotomo sabana nidagi Yesus, nasiromumo ira ri jaꞌina.
35 Pade sambaꞌa nggari tatongo ira, etumo sambaꞌa guru agama, nompasimbuku nangelo kasala tesa Yesus ante nekutana iweꞌi:
36 “Guru, nggari pura-pura parenta ri Atura-atura agamata umbana to neliu nggapokona?”
37 Nesonomo Yesus, “‘Potowemo Pue Alatalamu ante mpuꞌu-mpuꞌu raramu, ante pura-pura katuwumu, pade ante pura-pura pekirimu.’ c
38 Etumo parenta pamulana to neliu nggapokona.
39 Pade parenta karongelena to nasimbayu ante parenta pamulana iweꞌi: ‘Potowemo sanggamanusiamu nasimbayu ewa komi nompotowe koromu mboto.’ d
40 Rongele parenta etu puꞌu nu pura-pura Atura agama bo pepatuduki nu nabi-nabi nggaolu.”
Yesus nompekutana to Parisi isema Magau to Mompakasalama
41 Tempo tau-tau to Parisi danasiromu ri setu, nekutanamo Yesus ka ira,
42 “Iwenu pombarata komi ewa Magau to Mompakasalama to nijanji Alatala? Muli isema Iꞌa?”
Nesonomo ira, “Muli Magau Daud.”
43 Nangulimo Yesus, “Ane iwetu, nuapa sabana i Daud nompokio Iꞌa Puena? Sabana ante pekeniaka Nosa Nagasa nu Alatala i Daud nanguli iweꞌi:
44 ‘Pue Alatala nanguli ka Pueku,
kamai pekatokomo ri sabingga ngganaku
sampe Aku mompowia pura-pura balimu mekou ri jaꞌimu.’ (Mzm. 110:1)
45 Jadi ane Magau to Mompakasalama niuli i Daud Puena, iwenu sampe Iꞌa nireke aga muli i Daud?”
46 Daꞌa ria sambaꞌa tau namala mombasono Yesus. Pade nompamula nggari eo etu daꞌa mana naria tau nabia mompekutana Iꞌa.