POWIA BO PEPATUDUKI YESUS RI NGATA YERUSALEM (Pasal 21-23)
Yesus nitomunaka pue ngata Yerusalem ewa sambaꞌa magau
21
Tempo namosumo ira ri ngata Yerusalem, naratamo ira ri ngata Betfage ri kente nu Bulu Zaitun. Ri setu Yesus nompakau rombaꞌa anaguruna mokolu ka Iꞌa.
2 Niulina ka ira, “Kalaumo komi mpaka ri ngata to namosu ri ngayota etu. Ane marata ri setu komi kana mombarata saongu keledai nitataka mpasanggani-nggani ante anana. Wolemo kalorona pade umbu mpaka wemai.
3 Ane maria tau mompekutana komi, uli ka ira, ‘Pue paraluu mompake keledai eꞌi. Damo rapopanjilina ngina.’ Pade tau etu kana mompaloga komi manggeni binata etu.”
4 Etu najadi ala madupa tesa Alatala to niboto nabi nggaolu iweꞌi:
5 “Ulimo ka pue ngata Sion, a
kitamo, ri setumo Magau komi marata!
Iꞌa naede mpuꞌu rarana, Iꞌa nesawi keledai,
etumo saongu keledai to namudana.” b (Za. 9:9)
6 Jadi nalaumo rombaꞌa anaguru Yesus nompowia ewa nitewaina ka ira.
7 Niumbu iramo keledai ante anana mpaka ri jaꞌi Yesus. Narata ri setu nilampi ira pakea ri bunggu keledai etu pade nesawimo Yesus ri bungguna.
8 Tempo Yesus noliu ri jala jama nadea mpuꞌu tau nombajini buya ira ri jala, pade naria sanu nangala tawa-tawa kayu nitale-tale ira ri tatongo jala ewa tandai pebila ira ka Yesus.
9 Pade nongare-ngaremo todea to nokolu ka Yesus nosanggani ante ira to nantuki ri purina,
“Ratoiyata Muli i Daud!
Perapi Pue mombagane Magau to narata niposumba Alatala!
Ratoiyata Alatala ri suruga!”
10 Sangga nesuapa Yesus ri ngata Yerusalem nakanano mpuꞌumo pura-pura tau ri setu ante nasana rara. Ira nosimpekutana sambaꞌa bo sambaꞌa, “Isema kakonona tau etu?”
11 Nesonomo tau dea to nantuki Iꞌa, “Iꞌamo Yesus, nabi nggari ngata Nazaret ri Bagia Galilea!”
Yesus nompopalai topotomu nggariara Sapo Mpepue
12 Naopu etu nalaumo Yesus nesua ri lalowo Sapo Mpepue pade nipopalaina pura-pura topotomu nggari setu. Nisumbolinakana meja-meja ntoposinjula doi bo kadera-kadera nu topobalu-balu tonji banggebodo.
13 Niulina ka ira, “Riara Buku Nagasa naria nitulisi iweꞌi: ‘Sapoku kana rauli sapo mposambaya.’ c Tapi komi ri seꞌi nompajadi Sapo Mpepue eꞌi petoꞌo parampo!”
14 Naopu etu naratamo tau-tau naburo bo tau-tau nakejo kadana mpaka ri jaꞌi Yesus riara Sapo Mpepue. Pade Iꞌa nompakabelo ira.
15 Tapi tempo balengga-balengga topanggeni agama bo guru-guru agama nanggita kabaraka-kabaraka to nipowia Yesus pade nangepe ngana-ngana ri Sapo Mpepue nongare-ngare ‘Ratoiyata Muli i Daud’, narau mpuꞌumo rara ira.
16 Nangulimo ira ka Yesus, “Niepemu nuapa to nitesa ngana-ngana eꞌi? Nokuya komi daꞌa nombatagi ira?”
Nesonomo Yesus, “Niepekumo. Iwenumo? Daꞌapa nibasa komi nuapa to nitulisi riara Buku Nagasa iweꞌi:
‘Pue, ngana-ngana
bo ngana-ngana nggedi danantomi
nipatudukimu mombatoiya bo mompakabete sangamu.’” (Mzm. 8:3)
17 Naopu etu nalaimo Yesus nompalasi ira. Nesuwu Iꞌa nggari ngata Yerusalem nalau mpaka ri ngata Betania. Naratapa ri setu noturumo Iꞌa sambengi.
Yesus nombajanjiaka sampuꞌu kayu ara
18 Kaeona mpandondo tempo Yesus ante anaguruna nolumako nanjili mpaka ri ngata Yerusalem, naoromo taꞌina.
19 Namosu jala nikitana sampuꞌu kayu ara. Jadi nalaumo Iꞌa nompakamosu kayu etu. Tapi daꞌa ria kamba saongu wua ara niratana, aga tawa-tawa bayangi. Etu sampe nitesana ka kayu etu, “Mompamula eo eꞌi, iko mana mowua!” Pade kaliu-liu nalelemo kayu etu.
20 Sangga nanggita kajadia etu nogumaamo rara anaguru-anaguruna. Nekutanamo ira ka Iꞌa, “Iwenu sampe kayu ara etu nasasinta nalele iwetu?”
21 Nesonomo Yesus, “Aku mpuꞌu-mpuꞌu notesa ka komi, ane komi momparasaya pade daꞌa molenga-lenga rara komi woꞌu mamala mowia ewa to nipowiaku ka kayu etu. Pade daꞌa aga iwetu, komi kana mamala manguli ka bulu eꞌi, ‘Polinjamo, potingganawu riara ntasi,’ pade natantumo etu kana majadi.
22 Nuapa-nuapa raperapi komi riara mposambayamu, natantumo kana ratarima komi ane komi momparasaya.”
Topanggeniaka nto Yahudi nekutana ewa kuasa Yesus
23 Sangga naratapa ri ngata Yerusalem nesuamo Yesus riara Sapo Mpepue pade nopaguru ri setu. Tempo Iꞌa danopaguru naratamo balengga-balengga topanggeni agama bo totuꞌa-totuꞌa nto Yahudi. Nekutanamo ira ka Yesus, “Ante kuasa nggari umba Komi nompopalai topotomu nggari Sapo Mpepue yowi? Isema nombawai kuasa etu ka Komi?”
24 Nesonomo Yesus, “Naria woꞌu sangaya kupekutana ka komi ntani ruru. Ane komi mombasono pompekutanaku eꞌi, Aku mompopanjani ka komi isema to nombawai kuasa ka Aku mompowia mpengele-ngele etu.
25 Ulimo ka Aku isema nombawai kuasa ka Yohanes Topediu nombadiu tau? Alatala atau manusia?”
Pade nosimpekutana to Yahudi etu sambaꞌa bo sambaꞌa, “Iwenu kita mombasono Iꞌa? Ane kita manguli kuasa Yohanes nggari jaꞌi Alatala Iꞌa kana manguli ka kita, ‘Ane iwetu nokuya komi daꞌa nomparasaya Yohanes?’
26 Tapi ane kita manguli kuasana nggari jaꞌi manusia, kita kana maeka ri jaꞌi ntau dea, sabana ira pura-pura nomparasaya Yohanes mpuꞌu-mpuꞌu sambaꞌa nabi.”
27 Jadi nesonomo ira ka Yesus, “Daꞌa ninjani kami nggari umba kuasana.”
Pade nanguli Yesus ka ira, “Ane iwetu daꞌa woꞌu kutesa ka komi ante kuasa nggari umba Aku nowia mpengele-ngele etu.”
Yesus nangontiaka topanggeniaka nto Yahudi ante porapa ewa rombaꞌa ngana
28 Pade nekutanamo Yesus ka topanggeniaka nto Yahudi etu, “Iwenu pombarata komi ewa tesa iweꞌi? Naria sambaꞌa uma noana rombaꞌa ngana langgai. Iꞌa nanguli ka anana ulumbua, ‘Anaku, kalaumo iko mokarajaa eona eꞌi ri tinalu to nipotuja anggur ria.’
29 Pade nesono ana ulumbua, ‘Iyo, uma. Aku malau.’ Tapi kakonona iꞌa daꞌa nalau.
30 Pade nalau woꞌumo uma etu mpaka ri jaꞌi anana karombaꞌana pade niulina, ‘Anaku, kalaumo iko mokarajaa eona eꞌi ri tinalu to nipotuja anggur ria.’
Tapi nesonomo ngana etu, ‘Manaku!’ Tapi naliu etu nanjosomo rarana sampe nalau mpuꞌumo iꞌa nokarajaa ri tinalu.”
31 Pade nekutana Yesus ka topanggeniaka nto Yahudi etu, “Jadi nggari ngana rombaꞌa etu isemana to nantuki dota nu umana?”
Nesonomo ira, “Ngana karombaꞌana.”
Nanguli Yesus ka ira, “Aku mpuꞌu-mpuꞌu notesa ka komi, tau-tau najaꞌa ewa topomperapi balasitee bo besi-besi bajinga to mokolu majadi todea riara Poparenta nu Alatala, daꞌa komi.
32 Sabana Yohanes Topediu narata nompatuduki ka komi jala to nanoana, pade komi daꞌa nomparasaya iꞌa. Tapi topomperapi balasitee bo besi-besi bajinga nomparasaya iꞌa. Pade naupa komi nanggita etu komi daꞌa najea, komi daꞌa ntoto nomparasaya.”
Yesus nangontiaka topanggeniaka nto Yahudi ante porapa ewa topokarajaa tinalu to najaꞌa
33 Pade nanguli woꞌumo Yesus ka ira, “Epe woꞌumo porapa ntanina iweꞌi: Naria sambaꞌa pue ntinalu to nombatuja anggur ri tinaluna. Niwala ntikuna tinalu etu pade nikaena lowu petoꞌo parewa rapompea wua anggur. Pade nipowiana sou panggatono tinalu etu. Naopu etu nipajana tinalu etu ka bara sakuya mbaꞌa topokarajaa, pade nalaumo iꞌa mpaka ri ngata ntanina.
34 Sangga naratapa tempona mompui wua anggur nipakaunamo bara sakuya mbaꞌa batuana malau mpaka ri jaꞌi topokarajaa tinalu etu ala mantarima bagiana nggari wua anggur.
35 Tapi topokarajaa tinalu etu nanjoko batua to nipakauna, pade naria to niboba ira, naria sanupa nipatesi ira, pade naria to nirempe ira ante watu.
36 Naopu etu sangganipa woꞌu pue ntinalu nompakau batua ntanina neliu nggadea nggari pamulana mpaka ri jaꞌi ntopokarajaa tinalu. Tapi ira aga nipowia ntopokarajaa tinalu nasimbayu ewa batua-batua pamulana.
37 Kaopuna nipakaunamo anana mboto. Nipekirina, ‘Natantumo ira kana mekou ri jaꞌi anaku mboto!’
38 Tapi tempo topokarajaa tinalu etu nanggita ana pue ntinalu etu, nangulimo ira sambaꞌa bo sambaꞌa, ‘Kitamo! Etumo ana pue ntinalu to majadi pue ntinalu banepia. Kamaimo kita mompatesi iꞌa ala tinalu eꞌi raalata majadi bagiata.’
39 Jadi nisoko iramo ana pue ntinalu etu pade iꞌa nikeni ira mpaka ri sawaliku tinalu etu pade nipatesi ira.”
40 Pade nekutanamo Yesus ka topanggeniaka nto Yahudi etu, “Jadi ane pue ntinalu etu manjili nuapa rapowiana ka topokarajaa-topokarajaa tinaluna etu?”
41 Nesonomo ira, “Natantumo iꞌa kana mompatesi ira to najaꞌa etu pade mombapaja tinalu etu ka tau ntanina to madota mombawai ka iꞌa bagiana nggari asele ntinalu ane marata tempo mpowuana.”
42 Pade nangulimo Yesus ka ira, “Natantumo nibasa komi tesa riara Buku Nagasa to nanguli iweꞌi:
‘Watu to nitajiaka ntopowia sapo,
watu etumo to najadi palo mpondasi to neliu nggaroso.
Etu nipowia i Pue,
sangele powia to nipogumaa matata.’” (Mzm. 118:22-23)
43 Nanguli woꞌumo Yesus ka ira, “Jadi kuuli ka komi, bagia komi riara Poparenta nu Alatala kana raala nggari jaꞌi komi pade rawai ka tau-tau ntanina to nompowia pokainggu to masipato ka todea nu Alatala.
44 Pade isema-sema to nanawu ri bunggu watu etu kana marege pade isema-sema raparumpi watu etu kana marege majadi sowu.”