Yesus nitomunaka pue ngata Yerusalem ewa sambaꞌa magau
11
Tempo Yesus ante anaguruna namosumo ante ngata Yerusalem, naratamo ira ri ngata Betfage bo ngata Betania ri kente nu Bulu Zaitun. Ri setu Yesus nompakau rombaꞌa anaguruna mokolu ka Iꞌa.
2 Niulina ka ira, “Kalaumo komi mpaka ri ngata to namosuna ri setu. Tempona komi mesua rara ngata komi kana mombarata saongu ana keledai nitataka ri setu to daꞌapa sanggani nipesawi ntau. Wolemo ana keledai etu nggari potatakana pade umbumo wemai.
3 Pade ane maria tau mompekutana komi, ‘Nokuya komi nombawole ana keledai etu?’ uli ka tau etu, ‘Pue paraluu mompake ana keledai eꞌi. Damo rapopanjilina ngina.’”
4 Jadi nalaumo ira rombaꞌa etu pade nirata ira mpuꞌu saongu ana keledai nitataka ri wiwi jala namosu pewobo saongu sapo. Pade niwole iramo ana keledai etu nggari potatakana.
5 Tempo etu nekutanamo bara sakuya mbaꞌa tau to nenggore ri setu, “Nuapa nipowia komi? Nokuya komi nombawole ana keledai etu?”
6 Pade nesonomo ira nantuki tewai to nitesa Yesus ka ira. Nangepe etu tau-tau etu nompaloga ira nanggeni ana keledai nggari setu.
7 Jadi ana keledai etu niumbu ira mpaka ri jaꞌi Yesus. Narata ri setu nilampi ira ante buya, pade nesawimo Yesus ri bungguna.
8 Nadea tau ri setu nombajini buya ira ri jala pade naria woꞌu tau nombatale rangga-rangga kayu nggedi to nanggamatana to niala ira nggari pampa ewa tandai pebila ira ka Yesus.
9 Pade nongare-ngaremo pura-pura tau, nabeloka ira ri koluna, nabeloka ira ri purina. Ira nanguli,
“Ratoiyata Alatala!
Perapi Pue mombagane Magau to narata niposumba Alatala! a
10 Perapi Pue mombagane poparenta nu Magau to maratana,
etumo poparenta Muli nu umata Magau Daud.
Ratoiyata Alatala ri suruga!”
11 Tempo Yesus nesua riara ngata Yerusalem nalaumo Iꞌa mpaka ri Sapo Mpepue nanggita pura-pura nuapa to naria ri setu. Naopu etu nalaimo Iꞌa mpaka ri ngata Betania nosanggani ante anaguruna sampulu rombaꞌa sabana nangguwiamo.
Yesus nombajanjiaka sampuꞌu kayu ara
12 Kaeona mpadondo tempo ira nalai nggari ngata Betania, naoromo taꞌi Yesus.
13 Pade danggawao Iꞌa nanggita sampuꞌu kayu ara to noroyamo. Jadi nalaumo Iꞌa nompakamosu kayu etu ala manggita ane maria wuana. Tapi tempona Iꞌa narata ri setu daꞌa ria kamba saongu wuana niratana aga tawana bayangi, sabana daꞌapa tempo mpowuana.
14 Pade Iꞌa nombajanjiaka kayu ara etu ante nanguli, “Neꞌe mana maria wuamu rakoni ntau sampe ri kasae-saena.” Tesana etu niepe anaguruna.
Yesus nompopalai topotomu nggariara Sapo Mpepue
15 Pade naratamo ira ri ngata Yerusalem. Sangga naratapa ri setu nesuamo Yesus riara Sapo Mpepue, pade nompamulamo Iꞌa nompopalai topotomu nggari setu. Nisumbolinakana meja-meja ntoposinjula doi bo kadera-kadera ntopobalu tonji banggebodo.
16 Pade daꞌa nipalogana kamba sambaꞌa manggeni mbara-mbara nantuki jala moliu ri lalowo Sapo Mpepue.
17 Pade nipatudukina tau dea ri setu iweꞌi: “Riara Buku Nagasa naria nitulisi iweꞌi: ‘Sapoku kana rauli sapo mposambaya tau njumangata.’ b Tapi komi eꞌi nompajadi Sapo Mpepue eꞌi petoꞌo parampo!”
18 Balengga-balengga topanggeni agama bo guru-guru agama nangepe kajadia etu. Jadi nompamulamo ira mangelo jala mompatesi Yesus sabana naekamo rara ira ri jaꞌina nanggita pura-pura tau nogumaa nangepe pepatudukina.
19 Tempo ntora mawengimo nalai woꞌumo Yesus ante anaguruna nggariara ngata etu.
Pepatuduki Yesus ewa kayu ara to nijanjiakana
20 Kaeona mpadondo tempo ira noliu ri jala mpaka ri ngata Yerusalem nikita ira kayu ara to nijanjiaka Yesus yowi. Nangau puramo sampe ri kalena.
21 Pade natetoramo rara i Petrus kajadia yowi ante kayu etu. Niulina ka Yesus, “Kitamo, Guru. Kayu ara to nijanjiaka Komi yowi nangau puramo!”
22 Nangulimo Yesus, “Parasayamo ri jaꞌi Alatala!
23 Aku mpuꞌu-mpuꞌu notesa ka komi, komi mamala manguli ka bulu eꞌi, ‘Polinjamo, potingganawu riara ntasi.’ Pade etu kana majadi ane komi daꞌa morompenga pekirimu pade manjarumaka nuapa to niuli komi etu kana majadi.
24 Sabana etu kuuli ka komi, ane komi merapi sangele ka Pue Alatala, parasayamo pomperapimu etu kana madupa, pade nuapa to niperapimu etu kana ratarima komi.
25 Pade tempo komi mekanggore mosambaya ane maria kasala roamu ri jaꞌimu, ampungi ntani ruru iꞌa ala Umamu to naria ri suruga woꞌu mombaampungi sala-salamu. [
26 Tapi ane komi daꞌa mombaampungi roamu, natantumo Umamu ri suruga woꞌu daꞌa mombaampungi sala-salamu.”]
Topanggeniaka nto Yahudi nekutana ewa kuasa Yesus
27 Pade narata woꞌumo ira ri ngata Yerusalem. Tempona Yesus nolumako ri lalowo Sapo Mpepue naratamo balengga-balengga topanggeni agama, guru-guru agama bo totuꞌa-totuꞌa nto Yahudi.
28 Nekutanamo ira ka Iꞌa, “Ante kuasa nggari umba Komi nompopalai topotomu nggari Sapo Mpepue yowi? Isema nombawai kuasa etu ka Komi?”
29 Nesonomo Yesus, “Naria woꞌu sangaya kupekutana ka komi ntani ruru. Sonomo pompekutanaku eꞌi pade Aku manguli ka komi ante kuasa nggari umba Aku nowia mpengaya-ngaya etu.
30 Ulimo ka Aku, isema nombawai kuasa ka Yohanes Topediu nombadiu tau? Alatala atau manusia?”
31 Pade nosimpekutanamo ira sambaꞌa bo sambaꞌa, “Iwenu kita mombasono Iꞌa? Ane kita manguli kuasa Yohanes nggari jaꞌi Alatala natantumo Iꞌa kana manguli ka kita iweꞌi: ‘Ane iwetu nokuya komi daꞌa nomparasaya Yohanes?’
32 Tapi daꞌa mamala kita manguli kuasa Yohanes nggari jaꞌi manusia!” Niuli ira iwetu apa naeka ira ri jaꞌi ntau dea, sabana tau dea nomparasaya Yohanes mpuꞌu-mpuꞌu sambaꞌa nabi.
33 Jadi nesonomo ira ka Yesus, “Daꞌa ninjani kami nggari umba kuasana.”
Pade nangulimo Yesus ka ira, “Ane iwetu daꞌa woꞌu kutesa ka komi ante kuasa nggari umba Aku nowia mpengele-ngele etu.”