Yesus nitoli minya wongi ri ngata Betania
12
Onoeopa pade marata Eo Bete Paska nalaumo Yesus mpaka ri ngata Betania, ngata nipetoꞌo i Lazarus to nipakatuwu Yesus bali nggari kamatena bopia.
2 Ri setu ira nompowia posusa mombabila Iꞌa. Marta nantulungi nanggeni panggoni ka ira pade i Lazarus naria ri tatongo tau-tau to nekatoko nanggoni mpasanggani-nggani ante Yesus.
3 Tempo ira nekatoko ri setu i Maria nangala sabotolo minya wongi to nasuli mpuꞌu olina, kira-kira santongo lite isina. a Pade naratamo iꞌa nombatoli lana etu ri kada Yesus pade nipeꞌena ante woꞌona sampe nangau. Pade ranjapo etu pura-pura nawongi mpuꞌu soana nggari minya wongi etu.
4 Nanggita etu notesamo sambaꞌa anaguru Yesus to nosanga ka Yudas Iskariot to mompobalu Yesus banepia. Niulina,
5 “Nokuya minya to nasuli olina etu daꞌa nipobalu nte toluatu mpeka doi salaka b pade doi etu rawai ka tau nakasiasi?”
6 Kakonona Yudas daꞌa nantora tau nakasiasi, tapi iꞌa madota mompelea doi etu, sabana iꞌamo anaguru to niparasaya nombaboli doi ira, pade sanggani-sanggani iꞌa nompelea doi etu. Etu sampe iꞌa notesa iwetu.
7 Tapi nangulimo Yesus ka Yudas, “Palambamo iꞌa manggawia etu, sabana to nikawiana etu mantora eo pombatana Aku banepia.
8 Tau nakasiasi bate-batena maria ri tatongo komi, tapi Aku eꞌi daꞌa mana masaeka ri tatongo komi.”
Sintuwu balengga-balengga topanggeni agama mompatesi Lazarus
9 Nadeamo tau to Yahudi nangepe lele Yesus naria ri ngata Betania. Jadi nalaumo ira mpaka ri setu ala manggita Yesus pade ala manggita i Lazarus woꞌu to nipakatuwu Yesus bali nggari kamatena.
10 Jadi balengga-balengga topanggeni agama nasintuwu madota mompatesi i Lazarus woꞌu.
11 Sabana nggari i Lazarus etumo nadeamo tau to Yahudi daꞌa mana madota mantuki balengga-balengga topanggeni agama. Ira aga madota mantuki Yesus bo momparasaya Iꞌa.
Yesus nitomunaka ntau dea ri ngata Yerusalem ewa sambaꞌa magau
12 Naeo mpadondona nadeamo tau to narata ri ngata Yerusalem ala mantuki Posusa Paska etu nangepe lele Yesus nompakamosu ngata Yerusalem.
13 Jadi niala ira lolo tawa nggaluku c pade nalaumo ira nombatomunaka Yesus. Nongare-ngaremo ira,
“Ratoiyata Alatala!
Perapi Pue Mombagane Magau to narata niposumba i Pue!
Perapi Iꞌa mombagane Magau nto Israel!”
14 Yesus nosirata ka saongu ana keledai pade nipesawina. Kajadia etu nompakadupa tesa nitulisi riara Buku Nagasa iweꞌi:
15 “Neꞌe komi maeka, pue ngata Yerusalem! d
Kitamo! Magau komi marata nesawi ana keledai!” e (Za. 9:9)
16 Tempo etu daꞌapa ninjani anaguru-anaguruna batuana kajadia etu. Tapi naliu Yesus natuwu bali nggari kamatena pade neoremo mpaka ri suruga, nanotomo ka ira tesa-tesa nggari Buku Nagasa etu nantesa Yesus pade etumo to najadi ri jaꞌina.
17 Tempo etu ri ngata Yerusalem nadeamo tau to nosanggani-nggani ante Yesus tempo Iꞌa nompokio i Lazarus nggariara dayona pade nompakatuwu bali iꞌa. Ira batena nantesa ka tau ntanina kajadia etu.
18 Etumo sampe nadea tau nalau nantomunaka Yesus sabana niepe ira Yesusmo to nompowia kabaraka etu.
19 Nanggita etu nangulimo tau-tau to Parisi sambaꞌa bo sambaꞌa, “Nidagimo kita! Kitamo! Pura-pura tau ri dunia eꞌi nalau nantuki Iꞌa!”
Yesus nombaboto kamatena banepia
20 Ri tatongo ntau dea to nalau mepue ka Alatala ri ngata Yerusalem tempo Posusa Paska etu naria woꞌu bara sakuya mbaꞌa to Yunani.
21 Ira narata ri jaꞌi Filipus pade nanguli ka iꞌa, “Ane mamala kami woꞌu madota mosirata ka Yesus.” (Filipus etu tau nggari ngata Betsaida ri Bagia Galilea.)
22 Sangga nangepe pomperapi ira etu nalaumo i Filipus notesa ka Andreas pade ira rombaꞌa nalau nombatesa pomperapi etu ka Yesus.
23 Nangulimo Yesus ka ira, “Naratamo tempona Aku, Ana nu Manusia rapakabete pade rabila.
24 Aku mpuꞌu-mpuꞌu notesa ka komi, ane rapana ongu pae daꞌa ratuja ri tana pade raiwu nasimbayu ewa tomate, pae etu bate-batena aga saongu lau. Tapi ane ongu pae etu ratuja ri tana pade raiwu nasimbayu ewa tomate, kaopuna pae etu mowua madea.
25 Isema-sema aga nompotowe katuwuna riara dunia eꞌi kana malipo katuwuna banepia. Tapi isema-sema daꞌa nompotowe katuwuna riara dunia eꞌi, ira kana mombarata katuwua mabelo sampe ri kasae-saena.
26 Isema-sema madota mantulungi Aku kana mantuki Aku ala ira mosanggani-nggani ante Aku. Pade isema-sema mantulungi Aku kana rabila Umaku.
27 Weꞌi-weꞌi nasusamo raraku eꞌi. Nuapa masipato kuuli weꞌi-weꞌi? Daꞌa masipato Aku manguli, ‘Uma, kabasakamo Aku nggari kasusana to marata ri jaꞌiku.’ Sabana patuju karataku eꞌi ala mombarasai kasusa etu!
28 Tapi iweꞌi to masipato kuuli: ‘Uma, powiamo to mompakabete sangamu!’”
Naopu Iꞌa nanguli iwetu nariamo suara nggari langi nanguli, “Nipakabetekumo sangaku, pade kana kupakabetepa ngina.”
29 Nangepe suara etu nariamo tau-tau to nanguli, “Etu aga guntu.” Tapi naria woꞌu sanu ira nanguli, “Naria malaeka notesa ka Iꞌa.”
30 Jadi nangulimo Yesus ka ira, “Suara to niepe komi paniꞌa daꞌa nitesa ala mantulungi Aku, tapi ala mantulungi komi.
31 Weꞌi-weꞌi naratamo tempona sala manusia ri dunia kana ratangara. Weꞌi-weꞌi tempona woꞌumo Magau nu Seta to nakuasana riara dunia rapopalai.
32 Pade ane Aku raonggotaka mpakalanga nggari dunia eꞌi f Aku kana manggeni pura-pura tau marata ri jaꞌiku.”
33 Yesus notesa iwetu ala mompakanoto iwenu jala nggamatena.
34 Pade nangulimo tau dea ka Iꞌa, “Naria nitulisi riara buku Atura-atura agama Magau to Mompakasalama to nijanji Alatala kana matuwu sampe ri kasae-saena. Jadi iwenu sampe Komi nanguli Ana nu Manusia kana raonggotaka mpakalanga? Isema Ana nu Manusia etu?” g
35 Nesonomo Yesus, “Damo sampalai reme maroo ri jaꞌi komi. Jadi agina komi molumako tempo danarawa ala neꞌe komi rarata rumau. Tau nolumako riara karumauna daꞌa nanoto mpaka ri umba rakalauna.
36 Parasayamo reme etu tempo danaria nosanggani-nggani ante komi ala komi woꞌu majadi ana-ana nu reme.”
Nadea tau to Yahudi daꞌa nomparasaya Yesus
Sangga notesa iwetu nalaimo Yesus nggari jaꞌi ntau dea. Iꞌa daꞌa mana nosanggani-nggani ante ira.
37 Naupa nadeamo kabaraka nikawiana ri ngayo ntau dea, ira daꞌa nomparasaya Iꞌa.
38 Etu pura-pura najadi ala madupamo tesa to nitulisi nabi Yesaya nggaolu iweꞌi:
“Pue, daꞌa ria to nomparasaya kareba to nikeni kami ka ira!
Daꞌa ria to nompariara ntaꞌi kabaraka-kabaraka to nipopokita i Pue ka ira!” (Yes. 53:1)
39 Jadi ira daꞌa namala nomparasaya, sabana naria woꞌu tesa Alatala to nipasimbayu nabi Yesaya nggaolu iweꞌi:
40 “Nitunggaiku nompakaburo mata ira
pade nompakakoꞌo rara ira,
ala mata ira daꞌa mamala mekita,
pade rara ira daꞌa mangginjani,
pade ira daꞌa manjili ri jaꞌiku ala Aku mompakabelo ira.” (Yes. 6:10)
41 Iwetumo tesa to niuli nabi Yesaya nggaolu sabana nikitana mamimo baraka Yesus pade nitesana nombaboto etu.
42 Naupa iwetu nadea woꞌu topanggeniaka nto Yahudi to nomparasaya Yesus. Aga ira daꞌa nabia nompangaku etu ri ngayo ntau dea sabana naeka ira ka to Parisi, neꞌe-neꞌe ira rasuwuraka nggariara sapo mpodade.
43 Sabana neliupa dota ira rabila manusia pade rabila Alatala.
Tesa Yesus kaopuna ka tau dea
44 Pade nongaremo Yesus ri tatongo ntau dea, “Isema-sema nomparasaya Aku, daꞌa aga nomparasaya Aku tapi ira woꞌu nomparasaya Alatala to nompakau Aku.
45 Pade isema-sema to nanggita Aku, ira woꞌu nanggita Alatala to nompakau Aku.
46 Aku eꞌi nomai ri dunia eꞌi ewa reme ala isema-sema momparasaya Aku mana metoꞌo riara karumauna.
47 Ane maria tau to mangepe tesaku tapi daꞌa mantuki tesa etu, daꞌa Aku to mompakasala ira. Sabana Aku narata riara dunia eꞌi daꞌa ala mompakasala manusia, tapi ala mompakasalama manusia.
48 Ane tau daꞌa madota mantarima Aku pade daꞌa madota mangepe tesaku nariamo to mompakasala ira. Tesa to nitesaku ka ira etumo to mompakasala ira ri kaopu nu dunia.
49 Sabana Aku daꞌa notesa nantuki dotaku mboto. Aku aga nombatesa bo nanguli nuapa to niparenta Umaku ka Aku, sabana Iꞌamo to nompakau Aku marata ri dunia.
50 Pade ninjaniku woꞌu parentana etu mombawai katuwua mabelo sampe ri kasae-saena. Jadi tesa to nitesaku ka komi aga nantuki nuapa to niparenta Umaku ka Aku.”