PEPATUDUKI YESUS KA ANAGURU-ANAGURUNA (Pasal 13-17)
Yesus nombarama kada anaguru-anaguruna
13
Tempo etu namosumo Eo Bete Paska. Pade ninjani Yesusmo ntora naratamo tempona Iꞌa mompalasi dunia eꞌi manjili mpaka ri jaꞌi Umana. Iꞌa mpuꞌu-mpuꞌu nompotowe ira to najadi bagiana riara dunia. Jadi tempo etumo nipopokitana ka ira towena to daꞌa ria kaopu-opuna. a
2 Yesus bo anaguru-anaguruna nekatoko nanggoni mpasanggani-nggani. Tempo etu Magau nu Seta naopumo nosiwawayo riara pekiri Yudas ana i Simon Iskariot ala mompobalu Yesus ka balina.
3 Ninjani Yesus Umana Alatala nombawai pura-pura kuasa ka Iꞌa. Pade ninjanina woꞌu Iꞌa narata nggari jaꞌi Alatala bo Iꞌa kana manjili mpaka ri jaꞌi Alatala.
4 Jadi nekanggoremo Iꞌa nombawonju baju nggumbana, pade nialana saongu handu nipoꞌuna ri kopena.
5 Naopu etu nialana ue nitolina riara loya. Pade nompamulamo Iꞌa nombarama kada anaguruna sambaꞌa bo sambaꞌa. Pade nipeꞌena kada ira ante handu to nipoꞌu ri kopena etu. b
6 Tempo Yesus narata ri jaꞌi Simon Petrus, nangulimo i Petrus ka Iꞌa, “Pue, daꞌa masipato Komi mombarama kadaku!”
7 Nanguli Yesus ka iꞌa, “Weꞌi-weꞌi daꞌapa ninjanimu nuapa batuana to nikawiaku eꞌi. Tapi nggapurina kana munjani.”
8 Tapi nanguli woꞌumo i Petrus ka Yesus, “Neꞌe, Pue! Neꞌe ntoto Komi mombarama kadaku!”
Nesonomo Yesus, “Ane Aku daꞌa mombarama kadamu, daꞌa ntoto maria posinggamosumu ante Aku.”
9 Nangepe etu nanguli woꞌumo i Simon Petrus, “Ane iwetu, Pue, neꞌe aga kadaku rarama Komi tapi pale bo balenggaku woꞌu.”
10 Tapi nangulimo Yesus ka iꞌa, “Tau naopu nandiu nagasa puramo korona, daꞌa mana paraluu radiu. Aga kadana kana rarama mpakagasa. Komi etu nagasamo, aga daꞌa pura-pura komi.”
11 Niuli Yesus iwetu sabana ninjanina isema to mompobalu Iꞌa ka balina. Etu sampe niulina, “Daꞌa pura-pura komi nagasa.”
12 Naopu Yesus nombarama kada ira, nialanamo baju nggumbana nipasuana bali, pade nekatokomo Iꞌa ri meja. Naopu etu nekutanamo Iꞌa ka anaguru-anaguruna, “Ninjani komi batuana nuapa to lako nikawiaku ka komi paniꞌa?
13 Komi nanguli Aku Guru bo Pue komi, pade tesa komi etu nakono, sabana Aku eꞌi mpuꞌu-mpuꞌu Guru bo Pue komi.
14 Jadi ane Aku eꞌi, Guru bo Pue komi, nompakaede koroku nombarama kada komi, masipato komi woꞌu mompakaede koro komi mosirama kada sambaꞌa bo sambaꞌa.
15 Aku nompopokita ka komi saongu jonjo ala nuapa to nipowiaku etu woꞌu rapowia komi sambaꞌa bo sambaꞌa.
16 Aku mpuꞌu-mpuꞌu notesa ka komi, sambaꞌa batua daꞌa neliu nggabete katuwuna nggari jaꞌi madikana. Iwetu woꞌu sambaꞌa tau nipakau daꞌa neliu nggabete katuwuna nggari tau nompakau iꞌa.
17 Ane etu manoto ranjani komi, madamba mpuꞌumo komi ane komi mompowia to nitesaku etu.
18 Nuapa to niuliku paniꞌa daꞌa nipawela ka komi pura-pura. Ninjaniku mamimo isema to nipelisiku. Tapi kana rapakadupa nuapa to nitulisi riara Buku Nagasa to nanguli iweꞌi: ‘Tau nanggoni mpasanggani-nggani ante Aku, iꞌamo majadi baliku banepia.’ c
19 Etu nitesaku ka komi weꞌi-weꞌi tempo etu daꞌapa najadi ala ane majadimo ngina raparasaya komimo Aku eꞌi mpuꞌu-mpuꞌu Alatala.
20 Aku mpuꞌu-mpuꞌu notesa ka komi, isema-sema mantarima tau to nipakauku ira woꞌu mantarima Aku. Pade isema-sema mantarima Aku ira woꞌu mantarima Umaku to nompakau Aku.”
Yudas nalai nompalasi ira
21 Naopu Yesus nombatesa etu pura-pura nasusa mpuꞌumo rarana. Pade niulina, “Aku mpuꞌu-mpuꞌu notesa ka komi, naria sambaꞌa nggari tatongo komi to mompobalu Aku ka baliku.”
22 Nangepe etu anaguru-anaguruna aga nosikita mbotomo ante kaingu nu rara sabana daꞌa ninjani ira isema to nipatuju Yesus etu.
23 Tempo etu sambaꞌa anaguruna to nipotowe Yesus nekatoko ri sinjorina.
24 Jadi i Simon Petrus nombakode roana etu ante matana pade nanguli, “Pekutana ka Guru bara isema to nipatujuna etu.”
25 Jadi anaguru to nekatoko ri sinjori Yesus etu nompakamosu Iꞌa pade nekutana, “Pue, isema to nipatuju Komi etu?”
26 Nesonomo Yesus, “Isema to kuwai ka roti to kutome riara ue mpane, iꞌamo to nipatujuku.” Naopu etu Yesus nangala sanggoto roti nitomena riara ue mpane pade niwaina ka Yudas ana i Simon Iskariot.
27 Iwetu Yudas nangala roti etu kaliu-liu nesuamo Magau nu Seta riara ntaꞌina. Pade nangulimo Yesus ka Yudas, “Pakasalisa urusimo nuapa madota mukawia!”
28 Daꞌa ria kamba sambaꞌa ira sampekatoko nanggoni etu to nangginjani nuapa patuju Yesus notesa iwetu ka Yudas.
29 Naria to nompekiri Yesus nompakau Yudas malau mangoli bara nuapa-nuapa rapake ira riara mposusa etu bara mombawai doi ka tau nakasiasi, sabana Yudas topomboliaka doi ira.
30 Jadi naopu Yudas nangala roti nggari jaꞌi Yesus, nalaimo iꞌa nggari setu. Tempo etu nawengimo.
Parenta nabou
31 Sangga nalaipa Yudas nangulimo Yesus ka anaguruna, “Weꞌi-weꞌi Aku, Ana nu Manusia kana ratoiya bo rapakabete. Pade nggari nuapa to majadi ri jaꞌiku etu Alatala woꞌu ratoiya bo rapakabete.
32 Ane Alatala ratoiya bo rapakabete nggari nuapa to majadi ri jaꞌiku Aku woꞌu ratoiya bo rapakabete Alatala nggari kajadia etu. Pade etu masalisa majadi.
33 Ana-anaku, Aku daꞌa mana masaeka mosanggani-nggani ante komi. Komi kana mangelo Aku tapi ewa to niuliku ka topanggeniaka-topanggeniaka nto Yahudi bopia, iwetu woꞌu kuuli ka komi weꞌi-weꞌi, ‘Ri umba kukalau komi daꞌa mamala malau.’
34 Naria parenta nabou kuwai ka komi iweꞌi: Komi kana mosipotowe sambaꞌa bo sambaꞌa. Nasimbayu ewa Aku nompotowe komi iwetu woꞌu komi kana mosipotowe sambaꞌa bo sambaꞌa.
35 Ane komi mosipotowe sambaꞌa bo sambaꞌa kana ranjani ntau puramo komi etu anaguru-anaguruku.”
Yesus nombaboto Petrus mombasapu Iꞌa ngina
36 Pade nekutanamo i Petrus ka Yesus, “Pue, ri umba rakalau Komi?”
Nesonomo Yesus, “Ri umba kukalau daꞌapa mamala iko malau. Tapi banepianapa pade iko malau mantuki Aku.”
37 Nesono woꞌumo i Petrus ka Iꞌa, “Iwenu sampe aku daꞌa mamala mantuki Komi weꞌi-weꞌi, Pue? Nasadiamo aku mamate manjaliku Komi!”
38 Nesonomo Yesus, “Mpuꞌu-mpuꞌu iko madota mamate manjaliku Aku? Aku mpuꞌu-mpuꞌu notesa ka iko, daꞌapa manu moraꞌo ngina njau tolungganimo iko mombasapu Aku.”