Yesus jala mpaka ri jaꞌi Alatala
14
Nangulimo Yesus ka anaguruna, “Neꞌe masusa rara komi. Parasayamo Alatala, pade parasaya woꞌu Aku.
2 Ri sapo Umaku nadea mpuꞌu petoꞌo. Aku malau mpaka ri setu mompakasadia petoꞌo ka komi. Ane daꞌa iwetu kana kuuli mpakanoto ka komi.
3 Pade maopu Aku malau mompakasadia petoꞌo ka komi Aku kana manjili bali mai mangala komi ala ri umba kupetoꞌo ri setu woꞌu rapetoꞌo komi.
4 Petoꞌo kukalau etu ninjani komimo jalana.”
5 Nangulimo i Tomas ka Iꞌa, “Pue, daꞌa ninjani kami ri umba rakalau Komi. Jadi iwenu kami mangginjani jala mpaka gusaꞌa?”
6 Nesonomo Yesus ka iꞌa, “Aku eꞌimo jala, Akumo to mompakanoto tesa to nakonona ewa Alatala, pade Akumo to mombawai katuwua. Daꞌa ria sambaꞌa mamala malau mpaka ri jaꞌi Umaku ane daꞌa ante Aku.
7 Ane komi mosinjani ante Aku, komi mosinjani woꞌu ante Umaku. Pade nompamula weꞌi-weꞌi nosinjanimo komi ante Iꞌa pade nikita komimo Iꞌa.”
8 Nanguli i Filipus ka Yesus, “Pue, popokita ka kamimo Umamu, pade masana rara kami.”
9 Nesonomo Yesus ka iꞌa, “Iwenumo, Filipus, nasaemo Aku nosanggani-nggani ante komi tapi komi daꞌapa nosinjani ante Aku? Isema-sema nanggita Aku, nikitana woꞌumo Umaku. Jadi iwenu sampe komi nanguli, ‘Popokita ka kamimo Umamu?’
10 Iwenumo? Daꞌapa ntoto niparasayamu Aku eꞌi nosaongu ante Umaku pade Umaku nosaongu ante Aku? Nuapa to niuliku ka komi daꞌa tesaku mboto. Tapi Umaku to naroo ri jaꞌiku to nompowia etu pura-pura.
11 Parasayamo tesaku eꞌi, Aku mpuꞌu-mpuꞌu nosaongu ante Umaku pade Umaku woꞌu nosaongu ante Aku. Ane etu nakaja raparasaya komi ante nangepe tesaku, parasayamo sabana nikita komi kabaraka-kabaraka to nipowiaku.
12 Aku mpuꞌu-mpuꞌu notesa ka komi, isema-sema to nomparasaya Aku ira mamala mompowia kabaraka ewa to nipowiaku. Pade daꞌa aga etu, ira mamala mowia kabaraka to meliu nggabete nggari to nipowiaku, sabana Aku malau mpaka ri jaꞌi Umaku.
13 Pade nuapa-nuapa to raperapi komi ante manguli sangaku etu kana kupowia ka komi, ala nggari powiaku etu Umaku rabila bo ratoiya.
14 Nuapa-nuapa raperapi komi ante manguli sangaku kana kupowia ka komi.”
Yesus nojanji mompopanaꞌu Nosa Nagasa nu Alatala ka topomparasaya
15 “Ane komi mompotowe Aku komi kana mantuki parenta-parentaku.
16 Pade Aku kana merapi ri jaꞌi Umaku ala rawaina ka komi Topetulungi ntanina, to maroo ri jaꞌi komi sampe ri kasae-saena.
17 Topetulungi etumo Nosa Nagasa nu Alatala to mompakanoto ka komi pepatuduki to nakonona. Tau-tau ri dunia eꞌi to daꞌa nomparasaya daꞌa mamala mantarima Iꞌa, sabana ira daꞌa nanggita Iꞌa bo ira daꞌa nosinjani ante Iꞌa. Tapi komi kana mosinjani ante Iꞌa sabana Iꞌa nosanggani-nggani ante komi weꞌi-weꞌi pade Iꞌa kana metoꞌo riara ntaꞌi komi ngina.
18 Aku daꞌa mompalasi komi ewa ngana pailu. Tapi Aku kana manjili bali ri jaꞌi komi.
19 Daꞌa mana masaeka Aku mana rakita tau-tau ri dunia eꞌi. Tapi komi kana manggita Aku. Pade komi kana matuwu sabana Aku kana matuwu bali.
20 Ane maratamo tempo etu kana ranjani komi Aku nosaongu ante Umaku pade komi woꞌu nosaongu ante Aku pade Aku nosaongu ante komi.
21 Isema-sema mompariara ntaꞌi pade mantuki parenta-parentaku ira etumo to nompotowe Aku. Pade ira to nompotowe Aku kana rapotowe Umaku woꞌu, pade Aku mboto mompotowe ira pade mompopokita koroku ka ira.”
22 Pade nekutana Yudas (daꞌa Yudas Iskariot) ka Yesus, “Pue, nuapa sabana Komi aga mompopokita koromu ka kami, daꞌa ka pura-pura manusia ri dunia?”
23 Nesonomo Yesus, “Isema-sema mompotowe Aku kana mantuki tesaku. Pade Umaku kana mompotowe iꞌa pade kami kana marata metoꞌo mpasanggani-nggani ante iꞌa.
24 Tapi tau daꞌa nompotowe Aku daꞌa woꞌu madota mantuki tesaku. Pade tesa to niepe komi eꞌi daꞌa nggari jaꞌiku mboto, tapi nggari jaꞌi Umaku to nompakau Aku.
25 Pura-pura tesa etu nitesaku ka komi tempo Aku danaria nosanggani-nggani ante komi.
26 Tapi ane Nosa Nagasa nu Alatala marata Iꞌa kana mompatuduki ka komi mpengele-ngele pade mompopatora ka komi pura-pura nuapa to nitesaku ka komi. Sabana Iꞌamo Topetulungi to rapakau Umaku manjambei Aku.
27 Aku kana mompakasana rara komi ante kasana nu rara nggari jaꞌiku mboto. Pade kasana nu rara etu daꞌa nasimbayu ewa kasana nu rara nggari jaꞌi manusia ri dunia to najaꞌa eꞌi. Jadi neꞌe komi masusa rara, neꞌe komi maeka rara.
28 Niepe komimo tesaku paniꞌa to nanguli Aku malau nggari jaꞌi komi tapi Aku kana manjili bali ri jaꞌi komi. Ane mpuꞌu-mpuꞌu komi mompotowe Aku komi kana madamba rara mangepe tesa nanguli Aku malau mpaka ri jaꞌi Umaku, sabana Iꞌa neliu nggakuasa nggari Aku eꞌi.
29 Tesa etu niuliku ka komi weꞌi-weꞌi tempo daꞌapa najadi ala ane majadimo ngina kana raparasaya komimo.
30 Daꞌa mana madea gaga pantesa kuuli ka komi, sabana Magau nu Seta to nombakuasai dunia eꞌi ntora naratamo mompandasa Aku. a Iꞌa daꞌa nakuasa ri jaꞌiku,
31 tapi etu kana majadi ala manusia ri dunia eꞌi mangginjani Aku nompotowe Umaku pade Aku nompowia pura-pura nuapa to niparentana ka Aku.
Kamaimo kita malai nggari seꞌi.”