Yesus walaa anggur to nakonona
15
Nanguli woꞌumo Yesus ka ira, “Aku eꞌimo walaa anggur to nakonona, pade Umaku pue ntinalu anggur etu.
2 Rangga-ranggaku to daꞌa nowua nikoto nitajiakana. Tapi rangga-rangga to nowua nipegasana mpakabelo-belo ala mantambai kadea nu wuana.
3 Komi etu nagasamo sabana niepe komimo pepatuduki to nitesaku ka komi.
4 Komi kana maroo mosaongu rara ante Aku pade Aku woꞌu maroo mosaongu rara ante komi. Rangga-rangga to nogaꞌa nggari batana daꞌa mamala mowua. Aga rangga-rangga to nasintaka ri bata kayu etu to mowua. Iwetu woꞌu komi daꞌa mamala mowua ane komi daꞌa maroo mosaongu rara ante Aku.
5 Aku eꞌimo walaa anggur pade komi etumo rangga-ranggana. Ane komi maroo mosaongu rara ante Aku pade Aku maroo mosaongu rara ante komi, komi kana mowua madea. Tapi ane komi mogaꞌa nggari jaꞌiku komi daꞌa mamala mompowia nuapa-nuapa.
6 Tau daꞌa naroo nosaongu rara ante Aku kana ratajiaka nasimbayu ewa rangga kayu ratajiaka sampe majadi mangau. Rangga-rangga ewa etu aga rapasiromu ratajiaka riara apu pade rapalabu.
7 Ane komi maroo mosaongu rara ante Aku pade tesaku maroo riara ntaꞌi komi, perapimo nuapa-nuapa to nipodota komi pade etu kana rawai ka komi.
8 Ane komi mowua madea manotomo komi mpuꞌu-mpuꞌu anaguruku. Pade ante iwetu Umaku kana ratoiya bo rabila.
9 Nasimbayu ewa Umaku nompotowe Aku, iwetu woꞌu Aku nompotowe komi. Komi kana maroo mosaongu rara ante Aku ala komi mombarasai pepotoweku.
10 Ane komi mantuki parenta-parentaku, komi mpuꞌu-mpuꞌu maroo mosaongu rara ante Aku pade mombarasai pepotoweku nasimbayu ewa Aku woꞌu nantuki parenta Umaku pade naroo nosaongu rara ante Iꞌa pade nombarasai pepotowena.
11 Pura-pura eꞌi niuliku ka komi ala kadamba nu raraku mamala woꞌu rarasai komi pade ala komi mpuꞌu-mpuꞌu madamba rara.
12 Iweꞌimo parentaku kuuli ka komi: Posipotowemo sambaꞌa bo sambaꞌa nasimbayu ewa Aku nompotowe komi.
13 Iweꞌimo jonjo tau mpuꞌu-mpuꞌu nompotowe wegana: Iꞌa nombawai katuwuna manjaliku wegana.
14 Komimo wega-wegaku ane komi mantuki parenta-parenta to niwaiku ka komi.
15 Aku mana manguli komi batua, sabana sambaꞌa batua daꞌa nangginjani nuapa to nipowia madikana. Tapi weꞌi-weꞌi Aku manguli komi wegaku. Nanotomo etu sabana pura-pura nuapa to niepeku nggari jaꞌi Umaku etu woꞌu nitesaku ka komi.
16 Daꞌa komi to nompelisi Aku, tapi Aku to nompelisi komi pade nompakau komi malau mowua madea, etumo wua to daꞌa maopu-opu. Ane komi mowua iwetu nuapa-nuapa raperapi komi nggari jaꞌi Umaku ante manguli sangaku kana rawaina ka komi.
17 Jadi iweꞌimo parentaku ka komi: Posipotowemo sambaꞌa bo sambaꞌa.”
Topomparasaya Yesus kana raporau rara ntau to daꞌa nomparasaya
18 “Ane komi raporau rara ntau ri dunia to daꞌa nomparasaya, kana ratora komi ira nokolu nomporau Aku.
19 Ane rapana komi nosimporoa ante tau daꞌa nomparasaya Aku, natantumo ira kana mompotowe komi sabana komi roa ira mboto. Tapi komi daꞌa nosimporoa ante ira sabana Aku nompelisi komi ala malai nggari jaꞌi ira. Jadi etu sampe ira nomporau rara komi.
20 Toramo nuapa to niuliku ka komi paniꞌa, ‘Sambaꞌa batua daꞌa neliu nggabete katuwuna nggari madikana.’ Ane Aku nipandasa ira, natantumo komi woꞌu kana rapandasa ira. Ane pepatudukiku nituki ira, natantumo pepatuduki komi woꞌu kana ratuki ira.
21 Pura-pura etu kana rapowia ira ka komi sabana komi najadi topantuki Aku. Etu rapowia ira sabana ira daꞌa ntoto nosinjani ante Alatala to nompakau Aku.
22 Ane rapana Aku daꞌa narata nombatesa ka ira, ira daꞌa nasala. Tapi naratamo Aku pade nitesaku mamimo ka ira. Jadi mana ria tanje ira mowia silaka.
23 Isema-sema nomporau Aku ira woꞌu nomporau Umaku.
24 Ane Aku daꞌa nompowia kabaraka-kabaraka ri tatongo ira anu daꞌa sanggani nipowia tau ntanina ira daꞌa nasilaka. Tapi nikita iramo kabaraka-kabaraka etu pade ira batena nomporau Aku ante Umaku woꞌu.
25 Tapi etu najadi ala madupa tesa to nitulisi riara Atura-atura agama ira iweꞌi: ‘Ira nomporau Aku nau daꞌa naria sabana.’ a