Kita kana maroo tempo nipandasa
16
“Pura-pura etu niuliku ka komi ala komi neꞌe mokanggaura momparasaya.
2 Komi kana rapopalai nggariara sapo mpodade nto Yahudi. Pade kana marata tempona tau to mompatesi komi mompekiri powia ira etu mompakadamba rara Alatala.
3 Etu pura-pura rapowia ira ri jaꞌi komi sabana ira daꞌa nosinjani ante Umaku pade daꞌa woꞌu nosinjani ante Aku.
4 Pura-pura etu niuliku ka komi weꞌi-weꞌi ala ane etu majadi kana ratora komi kajadia-kajadia etu nitesaku mamimo ka komi.”
Panggawia Nosa Nagasa nu Alatala
“Tesa etu daꞌa niuliku ka komi nggari pamulana sabana Aku danosanggani-nggani ante komi.
5 Tapi weꞌi-weꞌi Aku malau mpaka ri jaꞌi Umaku to nompakau Aku pade daꞌa ria sambaꞌa nggari tatongo komi nompekutana ri umba kukalau.
6 Nasusa mpuꞌu rara komi sabana Aku notesa ka komi paniꞌa Aku kana malau.
7 Tapi naupa iwetu kakono-konona neliu nggabelo ka komi ane Aku malau. Sabana ane Aku daꞌa malau Topetulungi daꞌa marata ri jaꞌi komi. Tapi ane Aku malau Aku kana mompakau Iꞌa marata ri jaꞌi komi.
8 Ane Topetulungi etu marata Iꞌa kana mompakanoto ka manusia ri dunia ira nasilaka. Pade rapakanotona woꞌu ka ira kanoaku, pade rapakanotona natantumo potangara nu Alatala.
9 Rapakanotona manusia nasilaka sabana ira daꞌa nomparasaya Aku.
10 Rapakanotona woꞌu kanoaku, sabana Aku malau mpaka ri jaꞌi Umaku pade komi mana manggita Aku.
11 Pade kana rapakanotona woꞌu natantumo Alatala mombasuku tau nasilaka, sabana Magau nu Seta to nombakuasai dunia eꞌi naopumo nitangara.
12 Danadeapa madota kutesa ka komi tapi daꞌa rapakule komi mantarima etu pura-pura weꞌi-weꞌi.
13 Tapi ane maratamo Nosa Nagasa etu Iꞌamo to manggeni komi mangginjani pura-pura pepatuduki to nakonona. Iꞌa daꞌa motesa nantuki dotana mboto. Tapi nuapa to niepena, etumo to ratesana. Pade Iꞌa kana motesa ka komi nuapa to majadi ri eo nggapurina.
14 Iꞌa kana mombabila Aku bo mompakabete sangaku sabana nuapa to nitarimana nggari jaꞌiku etumo to ratesana mpakanoto ka komi.
15 Pura-pura nuapa to naria ri jaꞌi Umaku, etu pura-pura bagiaku woꞌu. Etu sampe niuliku ka komi nuapa to nitarima Nosa Nagasa nggari jaꞌiku etumo to ratesana mpakanoto ka komi.”
Maopu anaguru Yesus masusa rara kana madamba woꞌu rara ira
16 “Sampalaipa komi mana manggita Aku. Pade sampalaipa woꞌu komi kana manggita Aku.”
17 Nangepe tesana etu nosipekutana mbotomo anaguruna sambaꞌa bo sambaꞌa, “Nuapa ntoto patujuna nanguli ka kita, ‘Sampalaipa komi mana manggita Aku, pade sampalaipa woꞌu komi kana manggita Aku?’ Pade nuapa woꞌu patuju tesana nanguli, ‘Aku malau mpaka ri jaꞌi Umaku?’”
18 Nosipekutana njuꞌumo ira, “Nuapa patuju tesana, ‘Sampalaipa?’ Daꞌa ntoto ninjanita patuju tesana etu.”
19 Ninjani Yesus ira madota mompekutana Iꞌa. Jadi niulina ka ira iweꞌi: “Nikitaku komi tunggai nosipekutana mbotomo nuapa patuju pantesaku paniꞌa tempo Aku nanguli, ‘Sampalaipa komi mana manggita Aku pade sampalaipa woꞌu komi kana manggita Aku.’
20 Aku mpuꞌu-mpuꞌu notesa ka komi, komi kana motumangi bo mageo mpajea manggita nuapa to majadi ri jaꞌiku, tapi baliku ri dunia eꞌi kana madamba-damba. Komi kana masusa rara manggita etu tapi kasusa rara komi kana mabali majadi kadamba nu rara.
21 Ane sambaꞌa besi ntora moana natantumo nasusa mpuꞌu rarana sabana naratamo ntoana moana. Tapi ane nesuwumo anana etu nikalinganamo susa rarana etu. Nadamba mpuꞌu rarana sabana sambaꞌa ngana nesuwu ri dunia.
22 Iwetu woꞌu ante komi. Weꞌi-weꞌi nasusamo rara komi. Tapi Aku kana mosirata bali ante komi pade tempo etu komi kana madamba bali. Pade daꞌa ria sambaꞌa tau mamala mompakalipo kadamba nu rara komi etu.
23 Tempo etu komi daꞌa mana mekutana nuapa-nuapa ri jaꞌiku. Aku mpuꞌu-mpuꞌu notesa ka komi, nuapa-nuapa raperapi komi nggari jaꞌi Umaku ante manguli sangaku kana rawaina ka komi.
24 Sampe weꞌi-weꞌi komi daꞌapa nomperapi nuapa-nuapa ante manguli sangaku. Tapi perapimo weꞌi-weꞌi pade komi kana rawai ala komi mpuꞌu-mpuꞌu madamba!”
Yesus nombadagi kuasa najaꞌa riara dunia
25 “Tesa to niuliku ka komi eꞌi aga nijaliliku. Tapi kana marata tempona daꞌa mana kujalili ka komi, tapi kana kutesa mpakanoto ka komi Umaku.
26 Tempo etumo komi kana merapi ri jaꞌi Umaku ante manguli sangaku. Daꞌa paraluu Aku momperapi nuapa-nuapa ka komi ri jaꞌi Umaku,
27 sabana Umaku mboto nompotowe komi. Iꞌa nompotowe komi sabana komi nompotowe Aku pade niparasaya komimo Aku eꞌi narata nggari jaꞌina.
28 Aku eꞌi narata nggari jaꞌi Umaku pade nomai riara dunia eꞌi. Tapi weꞌi-weꞌi Aku mompalasi dunia eꞌi pade manjili mpaka ri jaꞌi Umaku.”
29 Pade nangulimo anaguruna ka Iꞌa, “Kitamo! Weꞌi-weꞌi Komi notesa ante nanoto ka kami, daꞌa mana ante jalili.
30 Weꞌi-weꞌi nanotomo ka kami Komi nangginjani mpengele-ngele. Daꞌa paraluu tau nompekutana Komi. Etu sampe niparasaya kami Komi mpuꞌu-mpuꞌu narata nggari jaꞌi Alatala.”
31 Nesonomo Yesus, “Mpuꞌu-mpuꞌu niparasaya komimo weꞌi-weꞌi?
32 Toramo! Kana marata tempona, pade kakonona naratamo tempo etu, komi kana raposimpotatare. Komi mbau manjili mpaka ri sapomu mboto, komi mompalasi Aku njambaꞌaku. Tapi Aku daꞌa mpuꞌu njambaꞌaku sabana Umaku kana mosanggani-nggani ante Aku.
33 Pura-pura etu nitesaku ka komi ala masana rara komi sabana mosaongu rara ante Aku. Riara dunia eꞌi komi kana rapandasa. Tapi pakaroso rara komi! Kuasa to najaꞌa riara dunia eꞌi nidagikumo!”